ཨ་མའི་ལོ་ལོ་བྱིས་སྐྱོང་རིག་གནས་ཁྱབ་སྤེལ་ཞབས་ཞུ་ལྟེ་བས་ད་ལོའི་དགུན་གནང་སྐབས། མ་ཡུམ་གངས་ལྗོངས་ཤེས་རིག་ནོར་བུའི་སློབ་གླིང་གི་སློབ་གྲོགས་རྒན་པ་གཡུ་ཨ་གར་གྱི་རོགས་སྒྲུབ་ལ་བརྟེན་ནས་ཤེས་པ་གོང་འཕེལ་དང་། མ་ཤེས་པ་ལ་ཁ་གསབ་ཀྱི་ཚུལ་དུ། མཐོ་འབྲིང་དང་། དམའ་འབྲིང་། སློབ་ཆུང་རིམ་པའི་བྱིས་པ་ཁྱོན་ཉེ་ལྔར་སྔ་ཕྱི་ཟླ་ངོ་གཅིག་རིང་བོད་རྒྱ་དབྱིན་གསུམ་གྱི་གསབ་སྦྱོང་སློབ་ཁྲིད་གང་ནུས་ཀྱིས་སྤྲད་པ་ཡིན།

       ཐེངས་འདིའི་ཨ་མའི་ལོ་ལོ་གཙོ་སྐྱོང་བ་བདག་གིས་ཆེད་ཞུས་ཀྱི་དབྱིན་ཡིག་དགེ་རྒན་ཧ་རི་བྷ་དྲའམ་བྲག་དཀར་སྤྲེལ་རྫོང་དགོན་གྱི་ཨ་ཁུ་སེང་གེ་བཟང་བོ་དང་། བོད་ཡིག་དགེ་རྒན་སྐབས་བཅུ་གཉིས་པའི་སློབ་གྲོགས་རྒན་པ་གཡུ་ཨ་གར། རྒྱ་ཡིག་དང་རྩིས་དངོས་རྫས་གསུམ་གྱི་སློབ་མའི་དབྱར་དགུན་གནང་གི་ལས་བྱའི་དཀའ་གནད་མཛུབ་ཁྲིད་དགེ་རྒན། སྐབས་ཉེར་གཅིག་པའི་སློབ་གྲོགས་ཀླུ་བྱམས་རྒྱལ་བཅས་ཡིན།

      ཨ་མའི་ལོ་ལོ་དུས་ཐུང་ཟབ་སྦྱོང་སློབ་ཁྲིད་ཁྲོད་སློབ་ཆུང་སློབ་མའི་བསླབ་གཞི་དང་བསྟུན་ནས་བོད་ཡིག་གི་སྔོན་འགྲོའི་རྨང་གཞིའི་དེབ་གཅིག་དང་། དམའ་འབྲིང་སློབ་མར་སུམ་ཅུ་བའི་རྩ་འགྲེལ་སྐོར་ཀྱི་དྲིས་ལན་གདན་བསྡུས་ཀྱི་དེབ་གཅིག ད་དུང་མཐོ་འབྲིང་སློབ་མར་རྟགས་འཇུག་རྩ་འགྲེལ་དང་དྲིས་ལན་སྐོར་ནས་དེབ་གཅིག་བཅས་སྒྲིག་གཞི་མཐུས་ཚང་བའི་སྒོ་ནས་མ་ཡུམ་གངས་ལྗངས་ཤེས་རིག་ནོར་བུའི་སློབ་གླིང་གི་སློབ་གྲོགས་རྒན་པ་གཡུ་ཨ་གར་གྱིས་གཙོ་བསྒྲིགས་བྱས་ཏེ་ཨ་མའི་ལོ་ལོ་དུས་ཐུང་ཟབ་སྦྱོང་ཆེད་སྤྱོད་ཚོད་ལྟའི་དེབ་ཚོགས་ཤིག་བསྒྲགས་ནས་རིན་མེད་དུ་སློབ་མ་རྣམས་ལ་ཕུལ་ནས་གསབ་སྦྱོང་བདེ་བླག་ཏུ་འཇུག་བསྡུས།

གསར་འགྱུར་མཁོ་སྤྲོད་པ། བྱ་སྟོད་བོད་ཕྲུག

གསར་འགྱུར་མཁོ་སྤྲོད་པ།  གསར་འགོད་པ་འབའ་སྣང་གྲོལ།

       2021.01.18..02.02ཉིན་བར་གངས་ལྗོངས་ཤེས་རིག་ནོར་བུའི་སློབ་གླིང་གི་སྐབས་ཉེར་གསུམ་པའི་མཐར་ཕྱིན་སློབ་མ་ཚེ་དབང་རིག་འཛིན་དང་དབང་ཕྱུག་རབ་བརྟན་གཉིས་ཀྱིས་གསེར་ཆེན་རྫོང་རྟ་ནག་མ་བྲག་འཁྱོག་སྡེ་བའི་ཞིབ་འཇུག་སློབ་མ་དང་། སློབ་ཆེན་སློབ་མ་སྐོར་ཞིག་དང་མཉམ་འབྲེལ་སྒོས་ས་གནས་དེ་གའི་སློབ་མ་ལྔ་བཅུ་ལྷག་ལ་བོད་རྒྱ་དབྱིན་གསུམ་གྱི་རྨང་གཞིའི་སློབ་ཁྲིད་བྱས་པ་མ་ཟད་སློབ་མའི་དགུན་གནང་སྐབས་ཀྱི་སྦྱང་བྱ་རྩིས་དངོས་རྫས་གསུམ་སོགས་ཀྱི་གསབ་སྦྱོང་སྤྲད།

གསར་འགྱུར་མཁོ་སྤྲོད་པ།  རྒྱུ་ཐ་མཐོང་དགའ།

      2021.01.10 ཉིན་ནས་བཟུང་གངས་ལྗོངས་ཤེས་རིག་ནོར་བུའི་སློབ་གླིང་གི་སྐབས་ཉི་ཤུའིམཐར་ཕྱིན་འཛིན་གྲྭ་གཉིས་པ་འམ་བླ་སྐར་དོན་བཞི་ཚང་གི་སློབ་མ་གདུགས་དཀར་རྒྱལ་གྱིས་ཆོས་ཚ་སྡེ་བར་ཉིན་ཤུ་ཉི་ལྷག་གི་དུས་ཡུན་རིང་།  ས་གནས་དེ་གའི་བྱིས་སྐྱོང་ནས་དམའ་འབྲིང་བར་གྱི་སློབ་མ་བདུན་ཅུ་ལྷག་ལ་སློབ་ཆུང་ནས་དམའ་འབྲིང་བར་གྱི་རྨང་གཞིའི་སློབ་ཁྲིད་བྱས་པ་དང་།   དམའ་འབྲིང་དང་མཐོ་འབྲིང་གི་རྒྱུགས་ཞུགས་སྐབས་ཀྱི་ཁ་ཕྱོགས་གཙོ་བོར་བཟུང་སྟེ་གསབ་ཁྲིད་བྱས།

གསར་འགྱུར་མཁོ་སྤྲོད་པ།  གསར་འགོད་པ། སངས་རྒྱས་རྒྱལ།

      2020 ལོའི་དགུན་ཁར་མཚོ་སྔོན་པོ་རྟ་ནག་མ་རུ་གངས་ལྗོངས་ཤེས་རིག་ནོར་བུའི་སློབ་གླིང་སྐབས་ཉེར་གསུམ་པའི་མཐར་ཕྱིན་སློབ་མ་ལྷ་མོ་དོན་འགྲུབ་གྱིས་ཕ་ཡུལ་བྲག་དཀར་སྡེ་བ་རུ་སློབ་མ་སུམ་བཅུ་ལྷག་ལ་བོད་ཀྱི་བརྡ་སྤྲོད་སུམ་རྟགས་སོགས་ཀྱི་གསབ་སྦྱོང་སྤྲད།

གསར་འགྱུར་མཁོ་སྤྲོད་པ། རྒྱུ་ཐ་མཐོང་དགའ།

      གངས་ལྗོངས་ཤེས་རིག་ནོར་བུའི་སློབ་གླིང་གི་སྐབས་ཉེར་གསུམ་པའི་འཛིན་གྲྭ་དང་བོའི་མཐར་ཕྱིན་སློབ་མ་རྒྱུ་ཐ་མཐོང་དགའ་དང་རང་སྡེའི་གྲོགས་པོ་དཔའ་ཐོ་གཉིས་ཀས་གཙོ་སྒྲུབ་བྱས་པའི་སྐབས་དང་བོའི་དགུན་གནང་ལས་བྱའི་གསབ་ཁྲིད་ཕ་ཡུལ་སི་ཁྲོན་བྲག་མགོ་གཙང་སྨད་དུ་ཉིན་བཅོ་ལྔའི་རིང་འཚོགས་ཤིང་། ཐེངས་འདིར་སློབ་མ་ཚོའི་དགུན་གནང་ལས་བྱར་སྣེ་ཁྲིད་དང་ལམ་སྟོན་གྱི་ཞབས་ཞུའི་རྣམ་པ་གང་ལེགས་བྱས་པས། ཕ་ཡུལ་གྱི་ཡུལ་མི་ཚོས་རྒྱབ་སྐྱོར་དང་གཟེངས་བསྟོད་ཀྱང་མི་དམན་པ་ཐོབ་ཡོད།

གསར་འགྱུར་མཁོ་སྤྲོད་པ། གསར་འགོད་པ། རྒྱུ་ཐ་མཐོང་དགའ།

      ༢༠༢༠ ལོར་སྔ་ཕྱིར་དུ་གངས་ལྗོངས་ཤེས་རིག་ནོར་བུའི་སློབ་གླིང་གི་སྐབས་ལྔ་བའི་མཐར་ཕྱིན་སློབ་མ་དཀོན་མཆོག་བཟང་བོ་སོགས་ཀྱིས་སྣེ་ཁྲིད་འོག་ཀུན་མཐུན་ཚོགས་པས་ཁོར་ཡུག་སྲུང་སྐྱོང་དང་གད་སྙིགས་གཙང་བཟོ་སོགས་སྤྱི་ཕན་བྱ་འགུལ་སྤེལ་བ། བྱ་འགུལ་འདི་ནི་ཉིས་སྟོང་བཅུ་གཉིས་ལོར་འགོ་བརྩམས་ཏེ་ད་ལྟའི་བར་རྒྱུན་མ་ཆད་མི་སྣ་ལྷག་བསམ་ཅན་སྐོར་ཞིག་གི་མཉམ་འབྲེལ་སྒོས་བསྒྲུབ་གྱིན་པའི་བྱ་འགལ་གལ་ཆེན་ཞིན་ཡིན།

གསར་འགྱུར་མཁོ་སྤྲོད་པ། རྭ་རྒྱ་དཀོན་མཆོག་བཟང་བོ།

    ཞིན་ཧེ་རྫོང་རྩི་གོར་ཐང་གྲོང་རྡལ་དམངས་ཁྲོད་ཁོར་ཡུག་བདག་གཉེར་དོ་དམ་མཐུན་ཚོགས་ནི་གངས་ལྗོངས་ཤེས་རིག་ནོར་བུའི་སློབ་གླིང་གི་མཐར་ཕྱིན་སྐབས་བཅུ་བཞི་བའི་འཛིན་གྲྭ་གཉིས་པ་ཚང་གི་སློབ་མ་དཀོན་མཆོག་ཆོས་རྒྱན་གྱིས་སྣེ་ཁྲིད་བྱས་ཏེ་བཙུགས་པ་ཞིག་ཡིན་ལ། ཉིས་སྟོང་བཅུ་དྲུག་ལོའི་ཟླ་བདུན་པར་ཚད་ལྡན་གྱི་ཆོག་མཆན་ཐོབ་པ་ཡིན།  ལོ་རེ་བཞིན་བྱ་འགུལ་སྣ་ཚོགས་སྤེལ་གྱིན་ཡོད་ལ་ཉིས་སྟོང་བཅུ་དགུ་ལོར་མཚོ་སྔོན་བོད་ཡིག་ཁྲིམས་ལུགས་ཚགས་པར་ཁང་དང་མཉམ་འབྲེལ་གྱིས་ལྗོངས་ཞིང་ལྔའི་རྩོམ་པ་བོ་ཡོངས་ལ་ཁ་གཏད་དེ་༼སྣོད་བཅུད་རྟགས་མའི་རྩོམ་ཡིག་འགྲན་བསྡུར་༽ཞེས་པ་སྤེལ་བས་རྒྱལ་ཕྱི་ནང་ཀུན་ལ་བག་ཆགས་ཟབ་མོ་ཞིག་དང་སྐུལ་སློང་མི་དམན་པ་ཞིག་ཐོབ་ཡོད། 2020 ལོར་སྔ་ཕྱིར་བྱ་འགུལ་མི་འདྲ་བ་ཐེངས་དྲུག་ཅུ་རེ་དྲུག་སྤེལ་ཡོད། གཙོ་བོ་ཁོར་ཡུག་སྲུང་སྐྱོང་གི་འདུ་ཤེས་ཟབ་མོ་ཞིག་ཆགས་པའི་ཕྱིར་དུ་དྲིལ་སྒྲོག་སྣ་ཚོགས་ཀྱི་ལས་ཀར་འབད་བཞིན་ཡོད།  བོའུ་ཧན་ས་ཆར་དམངས་སྒོར་དྲུག་སྟོང་དང་ཁ་ཐུམ་སུམ་བརྒྱ་བཞི་བཅུ་ཡིས་ཞལ་འདེབས་ཕུལ།

གསར་འགྱུར་མཁོ་སྤྲོད་པ།   དཀོན་མཆོག་ཆོས་རྒྱན།