སྐབས་ཉེར་དྲུག་པའི་མཐར་ཕྱིན་འཛིན་གྲྭ་དང་བོའི་ལྷུག་རྩོམ་ལ་གླེང་བརྗོད་དུ་བྲིས། 

   ད་ནི་གཞི་ནས་ཁོ་ཚོའི་བརྩམས་ཆོས་ལ་འགོ་བརྗོད་འབྲི་རན་སོང་། བདག་གིས་དུས་ཚོད་འདི་ལ་བསྒུགས་ནས་མི་ལོ་དྲུག་ཕྱིན་སོང་། མི་ལོ་དྲུག་ནི་བདག་གི་མི་ཚེའི་ཁྲོད་ཀྱི་ས་བཅད་རིང་མོ་ཞིག་ཡིན། འདི་ལ་རིན་ཐང་ཡོད་མེད་བཤད་དཀའ་ཡང་སེར་སྣ་བཟོད་གླགས་མེད་པ་རེ་སྐྱེས་མྱོང་། འོན་ཀྱང་ད་ལྟ་ཁོ་ཚོའི་བརྩམས་ཆོས་རེ་རེ་མཐོང་བས་བདག་གི་སེམས་ལ་ཡང་ངལ་གསོ་ཁྱད་པར་བ་ཞིག་ཐོབ་སོང་། 

   ཁྱོད་ཚོར་བདག་གིས་དུས་ནམ་ཡང་དོ་དམ་ནན་མོ་བྱས་ནས་ཡོང་བ་ཡིན། སྐབས་ལན་རེར་ནོར་འཁྲུལ་ཆུང་ཆུང་ཞིག་ལའང་ཆད་པ་བཅད་དེ་ཁྱོད་ཚོའི་སེམས་ལ་མི་སྐྱིད་པའི་ཚོར་བ་སྣ་ཚོགས་རེ་བཟོས་མྱོང་། དེ་ལ་བདག་གིས་འགྱོད་བཤགས་ཞུ་འདོད་མེད་དེ། རྒྱུ་མཚན་ནི་རྗེས་ཕྱོགས་ཁྱོད་ཚོ་ས་གང་དུ་སོང་ཡང་རང་ཉིད་ཀྱི་ནོར་འཁྲུལ་རང་ཉིད་ཀྱིས་ངོས་ཟིན་པའི་ཆེད་དུ་ཡིན་ལ། ནོར་འཁྲུལ་རེ་བཟོས་ན་དེ་ལ་མཇུག་འབྲས་ཅི་ཞིག་ཡོད་པའང་དང་ལེན་བྱེེད་པའི་གོམས་གཤིས་ཤིག་ཆགས་པའི་ཆེད་དུ་ཡིན། ནོར་འཁྲུལ་མི་བཟོ་བའི་མི་ཞིག་དཀོན་ཡང་། ནོར་འཁྲུལ་གྱི་མཇུག་འབྲས་དང་ལེན་བྱ་ཕོད་པའི་སྙིང་སྟོབས་ཅན་ཧ་ཅང་ཉུང་། དེ་བས་ཁྱོད་ཚོས་དུས་ནམ་ཡང་ནོར་འཁྲུལ་ལ་སྐྱིན་ཚབ་སྤྲོད་དགོས་པ་ཤེས་པར་གྱིས། 

   མི་ལོ་དྲུག་ལ་བདག་གིས་གང་ཤེས་ཅི་ཤེས་མཐའ་དག་སྦ་གསང་མེད་པར་བཤད་པ་ཡིན་ལ། སྐབས་མང་བོར་བཤད་དྲགས་ཏེ་ཁྱོད་ཚོར་སུན་སྣང་སྐྱེ་བཞིན་པ་ཡང་བདག་གིས་ཚོར། འོན་ཀྱང་འགྲོ་རན་དུས་ད་དུང་སྐད་ཆ་མང་བོ་ཞིག་བཤད་འཕྲོར་ལུས་ཡོད་པའི་སྣང་བ་འབྱུང་ལ། འགྲོ་ལུགས་འདུག་སྟངས་དང་། སྐད་ཆ་བཤད་སྟངས་ཚུན་ལའང་ད་དུང་བཤད་དགོས་པ་མང་བོ་ཞིག་ཡོད་པའི་སྣང་བ་སྐྱེས། བསམ་བློ་ཞིབ་ཏུ་བཏང་ན་ངས་བཤད་དགོས་པ་མཐའ་དག་སྔ་མོ་ནས་ཡང་བཤད་བསྐྱར་བཤད་བྱས་ཟིན་པར་མ་ཟད། ངས་བཤད་མི་དགོས་པ་མང་བོ་ཞིག་ཀྱང་ཡང་དང་ཡང་དུ་བསྐྱར་མྱོང་བས། ད་ལྟ་ཁྱོད་ཚོས་བདག་གི་སྐད་ཐོས་ནའང་སུན་སྣང་ཡོང་བའི་ཚོད་ཡིན། མདོར་ན་ཁྱོད་ཚོ་ནི་གངས་ལྗོངས་ཤེས་རིག་ནོར་བུའི་སློབ་གླིང་གི་དགེ་རྒན་རྣམ་པས་གསོ་སྐྱོང་གནང་བའི་སྟག་ཤར་ཁྱུ་གཅིག་ཡིན་པས། ཕྲག་སྟེང་དུའང་སློབ་གླིང་འདིའི་མཚན་སྙན་དང་གཟི་བརྗིད་ཡོད་པ་མ་བརྗེད་པར་གྱིས། 

    ང་རང་འཁེལ་ཕྱོགས་ཤིག་གིས་ཁྱོད་ཚོའི་འཛིན་བདག་དགེ་རྒན་དུ་བསྐོས་མོད། དེ་ལ་བདག་གིས་དོ་སྣང་ཅི་ཡང་བྱས་མ་མྱོང་། ང་རང་ཁྱོད་ཚོའི་བོད་ཡིག་དགེ་རྒན་དུ་གྱུར་ཏེ་མི་ལོ་འདི་དག་ལ་རང་གིས་གང་ཤེས་མཐའ་དག་ཁྱོད་ཚོར་བཤད་མྱོང་བས་དེ་ལ་ང་རང་དགའ་སྣང་ཆེན་པོ་ཡོད། ངས་རང་གི་དགེ་རྒན་རྣམ་པའི་གསུང་གསེར་ནག་གི་ཐིགས་པ་ལྟ་བུ་དག་ལས་བརྗེད་ངས་ཀྱིས་མ་འཁྱེར་བ་ཚང་མ་ཁྱོད་ཚོར་སྐད་སྐུར་གྱི་ཚུལ་དུ་འཕྲོད་ཡོད། དེ་ནི་ངས་རང་གི་མ་ཡུམ་སློབ་གླིང་འདི་ལ་ཞབས་ཞུ་སྒྲུབ་སྟངས་ཤིག་ཡིན་ལ། ཁྱོད་ཚོ་སློབ་གླིང་འདིར་ཡོང་བའི་ཉིང་དགོས་ཀྱང་ཡིན་ངེས།

  ཁྱོད་ཚོས་ང་འཛིན་བདག་ཅིག་ཡིན་པའི་ངོས་ནས་བརྩི་བཀུར་བྱ་མི་དགོས། དགེ་རྒན་ཞིག་ཡིན་པའི་ངོས་ནས་ང་དང་དགེ་རྒན་གཞན་པ་ལ་ལྟ་ཚུལ་གཅིག་མཚུངས་ཤིག་འཛིན་རྒྱུ་དང་། ང་ལས་ལྷག་པར་ཁོང་ཅག་གི་གསུང་བརྩིས་ཏེ་ཚེ་འདི་ཕྱི་ཀུན་ལ་མཁོ་བའི་ལམ་སྟོན་དུ་འཁྱེར་རྒྱུ་རེ་བ་ཡིན།  ངས་འདི་ལྟར་བཤད་དོན་ནི་ཁྱོད་ཚོས་ང་རང་འཛིན་བདག་དགེ་རྒན་ཡིན་པའི་ངོས་ནས་ལྷག་ཏུ་གུས་གུས་ལྟ་བུ་ཞིག་བྱེད་ཀྱིན་པའི་སྣང་བ་བྱུང་བས་དེ་ལྟར་བཤད་པ་ཡིན། གོམས་གཤིས་དེ་ང་ཚོའི་ཁོར་ཡུག་འདིར་མི་མཛེས། 

   ངའི་སྐད་ཆ་ཉོག་ལ་རིང་བ་དེ་དག་སླར་ཡང་བཤད་རྩིས་འདུག ད་ནི་སྐད་ཆ་མང་བོ་མི་བཤད་པར་མཚམས་འདི་ནས་ཁྱོད་ཚོར་བདེ་མོ་འཇོག ཁྱོད་ཚོས་མི་ལོ་འདི་དག་གི་རིང་ལ་ང་རང་ཡིད་ཆད་དུ་བཅུག་མ་མྱོང་། དེ་བཞིན་ཚེ་གང་རིང་རང་གིས་རང་ལ་ཡིད་ཆད་དུ་མི་འཇུག་པའི་རེ་བ་དང་བཅས་བདེ་མོ་བཞག་པ་ཡིན། རྗེས་སོར་ཡང་ཡང་མཇལ་བའི་སྨོན་འདུན་ཞུ།