|
|
ལོ་ལོར་བྲིས་པའི་སྙན་ངག | རྩོམ་སྒྲིག་པ། འབའ་སྣང་གྲོལ། | སྤེལ་དུས 2015-11-17 | ལྟ་ཀློག (5296) | རྩོམ་ཁུངས: ངེད་དྲ་བ། | པར་འདེབ། |
|
ལོ་ལོར་བྲིས་པའི་སྙན་ངག
རྩོམ་པ་བོ། ཆོས་སྐྱོང་རྒྱལ།
སྲིད་ཞིའི་ཡོན་ཏན་ལྟ་བའི་མིག །
སངས་ཤིང་རྒྱས་པ་སྟེར་བའི་མཆོག །
བརྩེ་ཆེན་རྒྱ་མཚོའི་བཤེས་གཉེན་དེས། །
བུ་ཁྱོད་རྟག་ཏུ་སྐྱོང་གྱུར་ཅིག །
དུང་གཤོག་ལྡེམ་ཞིང་ལྡེམ་པ་ཡི། །
དགུན་གྱི་ལྷ་མོ་བསམ་དཀར་མ། །
འཛུམ་དཀར་གྲོལ་པའི་ཁྱེ་འུ་འདི། །
ཁྱིམ་འདིའི་དཔལ་དང་གཡང་ལ་གནང་། །
ཨ་ཕ་ན་ཚོད་གཞོན་ལ་གནས། །
ཡོན་ཏན་ཕྲ་ཞིང་ཕྲ་ལ་ཐུག །
ལོ་ལོས་འཛུམ་པ་བྱས་ཙ་ན། །
ཨ་ཕའི་སེམས་ལ་སྐྱེངས་པ་སྟེར། །
ཡིན་ཡང་ཕ་ནི་མི་ཞུམ་སྟེ། །
ཡོན་ཏན་འབད་པའི་ཤུགས་ལ་གནས། །
ཤེས་རབ་བྱམས་བརྩེ་འཁྱིལ་བའི་ཁྱིམ། །
སྤྲོ་བས་བསྐྲུན་ལ་སེམས་པ་དཔའ། །
རྨ་ཀླུང་གཡུ་འབྲུག་འཁྱུག་པའི་བྱང་། །
ཁྲི་གཤོག་གཡུ་ཞུན་འཁྱིལ་བའི་ལྷོ། །
ཧོལ་ཁ་གསེར་མོ་ལྗོངས་ཞེས་པ། །
སྙན་པའི་སྙན་པ་འཕུར་བ་དེར། །
སྟག་འཚོ་སྒང་ལ་གཟི་རྔམ་ཆེ། །
གཡུ་བྲག་དུང་སེང་མཁའ་ལ་འཕྱོ། །
མ་འགྲེང་ཁྱུང་རིས་གཤོག་རྩལ་ངོམ། །
བཀྲ་ཤིས་འོད་དཀར་རི་ཡི་མཆོག །
རིམ་བཞིན་ཤར་ནས་བྱང་ན་བརྗིད། །
དབུས་བཅུད་འཛིན་པ་སྐྱེས་ལྷའི་གནས། །
དཔལ་འཛོམས་སྐྱེས་རིའི་འདབས་མ་སྟེ། །
ཁྱིམ་ནི་ན་སེར་ངོགས་སུ་ཆགས། །
ཞེ་ལ་བྱམས་བརྩེ་འཁྱིལ་པ་ཡི། །
འཛུམ་པའི་ཞལ་རས་དྭངས་པ་ཡི། །
དབུ་སྐྱེས་ཁ་བ་ཐར་ཐོར་ཅན། །
འཚོ་བའི་སྙིང་རུས་སྲ་མོ་ཅན། །
རང་ཁྱིམ་སྡོམ་པའི་ལྷ་དར་དང་། །
ཕྱི་ནང་སྐྱོང་བའི་ཉི་ཟླ་ལ། །
ཨ་མྱེས་ཨ་ཕྱི་བྱམས་དུངས་ཅན། །
གཡང་ཁྱིམ་ཆགས་པའི་རུ་མར་བཞུགས། །
རོལ་དབྱངས་སེམས་དང་འཚོ་བར་བསྲེས། །
ཨ་ཁུ་བཟོད་བརྩོན་ཆེ་ཞིག་ཡོད། །
འཇམ་ལྷོད་གཤིས་ལ་འཁྱིལ་པ་ཡི། །
ཨ་ནེ་འཛུམ་ཆུང་གྲོལ་པ་ཡོད། །
ཀ་ཁ་སེམས་ལ་བསྐྱིལ་པ་ཡི། །
ཨ་ཅེ་ཚེ་རིང་ལྷ་མོ་བྱ། །
སྤང་ལྗོངས་ཡངས་པོར་རྩེན་པ་ཡི། །
ཕུ་བོར་བསྟན་འཛིན་ཆོས་རྒྱལ་འབོད། །
དཀའ་བའི་ཉིན་མཚན་རེ་བས་བསྐྱལ། །
བཟོད་མེད་ཟུག་གཟེར་སྤྲོ་བས་བསུས། །
ལུས་སྲོག་གནང་ཞིང་སྐྱོང་མཁས་པ། །
དྲིན་མོ་ཆེ་འདི་སྙིང་ལ་སྒོམས། །
བདུན་བརྒྱུད་རིགས་ཀྱི་དམ་ཚིག་ལ། །
བསླུ་མེད་མཛའ་བརྩེ་དྭངས་མ་ཅན། །
ཁ་ཞེ་དཀར་བའི་གཉེན་བཤེས་ཚོགས། །
འཛུམ་ལ་སྙིང་གི་དྲོད་ཁོལ་ཡོད། །
གྲོགས་ཀྱི་དྭངས་མ་མི་བསླུ་བ། །
འོ་མ་བསྲུབས་པའི་མར་ལོ་དང་། །
སྲེག་བཅད་བརྡར་པའི་གསེར་ཞུན་སྟེ། །
ཨ་ཕ་ང་ལ་རེ་འགའ་ཡོད། །
གངས་རིའི་ཁྲོད་ཀྱི་མི་རིགས་འདིར། །
གནའ་ནས་བོད་དང་བོད་པར་གྲགས། །
ལོ་ལོའི་སྙིང་གི་རུས་རྐང་དུ། །
སིམ་ཞིང་ཐིམ་དེར་བོད་ཅེས་བྱ། །
རིགས་ཀྱི་སྲོག་རྩ་བོད་ཡིག་ལ། །
ལྔ་རིག་འོ་མཚོ་འཕྱུར་བ་འཁྱིལ། །
སློབ་དཔོན་ཆེན་མོ་ཐོན་མི་དང་། །
རྒྱལ་ཆེན་ལོ་པཎ་རྣམས་ཀྱིས་བསྐྲུན། །
ཆེན་པོ་བོད་ཀྱི་རྒྱལ་ཁབ་ཀྱི། །
དར་རྒུད་གླེང་ན་དགའ་ཞིང་སྐྱོ། །
གནའ་ཞིག་བོད་ཀྱི་རྩ་བའི་མི། །
ཐོག་མར་ཡུལ་འདིར་བྱུང་ཞེས་གྲགས། །
རྒྱལ་ཕྲན་སིལ་མ་བཅུ་གཉིས་ནི། །
ཆེན་པོས་ཆུང་རྣམས་བཅོམས་ཤིང་འོངས། །
བོད་ཁམས་ཆེན་པོའི་སྣོད་བཅུད་ཀུན། །
བཙན་རྒྱལ་ཆེན་མོའི་བཀའ་གཅིག་གིས། །
རྒྱལ་རབས་ཞེ་གཉིས་བདེ་བར་བསྐྱངས། །
ཐོར་པའི་རྩ་བ་ནང་འཁྲུགས་དང་། །
རྒུད་རྒྱུ་ངན་སེམས་ཕྲག་དོག་སྟེ། །
སྨད་ཀྱི་སིལ་མ་མུན་པར་བྱས། །
ས་པཎ་ཆེན་མོའི་ཤེས་རབ་ལས། །
བོད་ཡུལ་འཐོར་བ་སྡུད་ཙམ་མཛད། །
རིམ་བཞིན་ས་ཕག་རིན་གཙང་དང་། །
དགའ་ལྡན་རྒྱལ་རབས་རྣམས་ཀྱིས་བསྐྱངས། །
གངས་རི་བརྒལ་བའི་མཚོ་འགྲམ་དེར། །
བོད་ཀྱི་མེ་སོན་ཙམ་ཞིག་མཆིས། །
ཤེས་རབ་བྱམས་བརྩེས་བཞུད་པ་ཁོང་། །
བོད་ཀྱི་བརྡ་རྟགས་ཡིན་ཅེས་གྲགས། །
འཛམ་གླིང་ཡུལ་ཁམས་ཐམས་ཅད་དུ། །
བོད་རྣམས་ཐོར་བུའི་ཚུལ་དུ་གནས། །
དེ་ཀུན་སྙིང་གི་རུས་པ་ལ། །
ཕ་ཡུལ་གངས་ལྗོངས་འཁོར་ཅིང་འཁོར། །
གངས་ཁྲོད་གཡོ་ནག་སྒྱུ་ཡིས་བཟུང་། །
གངས་མིའི་རིགས་ཀྱང་གཞན་ལ་བསྒྱུར། །
གངས་རིའི་རིག་གཞུང་རྒུད་ལ་འཁོར། །
ཁྱོད་ནི་ད་ལྟའི་དུས་སུ་སྐྱེས། །
བུ་སྐྱེ་འཆར་ལྡན་ཐབས་ཀྱིས་བཀག །
བསམ་བློ་རྨང་ནས་བསྒྱུར་བར་རྩོམ། །
བོད་ནི་གནས་འཇིག་ལམ་ལ་ལྷུང་། །
ཁྱོད་ནི་གནད་ཆེན་དུས་འདིར་ཐོན། །
ཨ་ཕའི་ཞུམ་གཏམ་མ་ལགས་ཏེ། །
ལོ་ལོར་དྲང་གཏམ་བརྗོད་པ་ཡིན། །
བོད་དོན་ཁྲག་རིས་རྐང་རིས་མ། །
བོད་མིའི་སྲོག་དང་མིག་ཡིན་ནོ། །
དཔྱོད་པའི་ལམ་གྱི་མིག་འདྲ་བ། །
འདི་ནི་རགས་པ་སྤྱི་བཤད་ཡིན། །
ལོ་རྒྱུས་ཀུན་ལ་ཞིབ་གལ་ཆེ། །
ལོ་ལོས་ཡུན་དུ་སྦྱངས་པས་ཆོག །
བོད་ཡིག་འབྲི་འོ་དྭངས་མ་ལས། །
རིག་གཞུང་གསེར་གྱི་མར་ལོ་འཁྲུངས། །
སྲོལ་རྒྱུན་སྦྲང་དཀར་རྩམ་པ་དང་། །
དེང་གི་ཇ་མཆོག་བསྡེབས་པ་གནད། །
བོད་ཀྱི་རིག་པ་གཟི་བྱིན་ཅན། །
འཛིན་སྐྱོང་སྤེལ་ལ་དཔའ་སྙིང་དགོས། །
མུན་པ་འཐིབས་པའི་སྤྱི་ཚོགས་སུ། །
དཔའ་བོ་བསྐལ་བའི་བར་ཡང་གནས། །
ལོ་ལོ་ཁྱོད་ནི་བྱོན་པ་ལེགས། །
ལུས་སེམས་བདེ་ཐང་ཡིན་པས་དགའ། །
མི་ཚེའི་བཤུལ་ལམ་རིང་མོ་ལ། །
ཉི་ཟེར་དྭངས་མོས་བཀྲ་རེ་ཤིས། །
ལོ་ལོ་ཁྱོད་ནི་བྱོན་པ་ལེགས། །
འཇིག་རྟེན་ཁམས་འདི་ངོ་མཚར་ཆེ། །
གཙང་བོ་བཞུར་དང་མེ་ཏོག་འཛུམ། །
ཁ་བ་འཕུར་དང་སྐར་མ་དགོད། །
ལུ་གུའི་དུང་རྡང་འཐེན་པ་དང་། །
རྟེ་འུས་མཆོང་རྩལ་ཞེ་ལ་དྲོ། །
བེ་འུ་འོ་ཁ་སྙིང་ལ་རྗེ། །
ཀ་ཁའི་རིག་པ་ཚེ་ཡི་གྲོགས། །
བུ་ཆུང་ཚེ་རིང་ལོ་བརྒྱ་ཤོག །
དོན་ལ་བཀྲ་ཤིས་བརྩེགས་པ་ཤོག །
ང་ཚོའི་སྨོན་ལམ་ཐེབས་པའི་ཁྱིམ། །
མཐུན་པ་སྤུན་བཞིའི་གཡང་འཁོར་ཤོག །
ཅེས་པ་འདི་ནི་རང་ལོ་ཉེར་དྲུག་ཏུ་སོན་པ་བོད་རབ་གནས་ཤིང་མོ་ལུག་གི་ལོ་སྟེ་བོད་རྒྱལ་ལོ ༢༡༤༢ ལོའི་བོད་ཟླ ༡༠ ཚེས ༢ ཉིན་ད་ལྟའི་བུ་ཕྲུག་རྣམས་ཀྱི་ཆུང་བ་བུ་ཕོ་དམ་ཆོས་མགོན་པོ་སྐྱེས་ཤིང་དེ་ནས་ཉིན་བཞི་བར་སེམས་ཚོར་འདི་གནས་མཆོག་དཔལ་འཛོམས་སྐྱེས་རིའི་འདབས། ཧོལ་ཁ་གསེར་མོ་ལྗོངས་སུ་ཆོས་སྐྱོང་རྒྱལ་གྱིས་བྲིས་པའོ། །
|
| |
སྤྱིའི་ལྟ་སྐུལ་བ། སློབ་གྲྭའི་དབུ་བཞུགས་ལྷན་ཚོགས། གཙོ་སྐྱོང་སྡེ་ཁག ཐོན་མིའི་སློབ་ཚོགས། དོ་དམ་པ། ཁཱ་ཤེས་རབ་རྒྱ་མཚོ། ཞིབ་དཔྱད་པ། ཁཱ་ཤེས་རབ་རྒྱ་མཚོ། རྩོམ་སྒྲིག་པ། འབའ་སྣང་གྲོལ། རྩོམ་སྒྲིག་ཨུ་ཡོན། འོད་ཟེར་བཟང་བོ། བསོད་ནམས་རབ་སྣང་། འཕྲིན་ལས་ཉི་མ། བན་ཤུལ་འཇམ་དབྱངས་ཡེ་ཤེས། དམ་ཆོས་ཕུན་ཚོགས། སྦྲ་ནག་འཇིགས་མེད་རྡོ་རྗེ།
|
|
འདྲེན་བཀོལ: |
|
|
དཔྱད་གཏམ (
1
)ཡོད། |
|
|
|
ལོ་ལོར་བྲིས་པའི་སྙན་ངག སྤེལ་མཁན།: གཡུ་ལུང་བ།
སྤེལ་དུས:2015/11/1 |
ཁྱེད་ལ་རྟེན་འབྲེལ་ཞུ།🎂🎉why people cheat in marriage click why women cheat |
|
|
|
པར་ངོས1/1 པར་ཡོད། |
|
|
|
|
|
|
འབྲེལ་གཏུག་བྱ་ཡུལ། ཁ་པར། 15283703999 E-mail:QQ:3267109906 |
པར་དབང་རྭ་རྒྱ་ཤེས་རིག་ནོར་བུའི་སློབ་གླིང་ལ་དབང་། |
|
|
|
|