ཁྱོད་ལ་བཞུར་བའི་འབབ་རྒྱུན།   ཚན་པ་གསུམ།

བན་ཤུལ་བྱམས་པ་རྒྱལ།

རི་གསུམ་གྱི་རྩེ་ནས།

གཡས་འཁྱིལ་དུང་ལ་ཁྱོད་ཀྱི་རྣམ་ཤེས་བུས།

ལུང་གསུམ་གྱི་མདོ་ནས།

གཙང་མོའི་ཆུ་ལ་ཁྱོད་ཀྱི་སྒྲ་དབྱངས་བྱུགས།

མི་ཚེ་གཅིག་གི་མགོ་མཇུག་བར་གསུམ་ལ་སྨྱུག་རྩེ་རུ་འཛུམ་པ་མོ།

＿ཁ་བྱང་ལ་བསྐྱོན་པའི་མཛེས་སྡུག་མ།

 ཁྱོད་ཀྱི་འདབ་མ།

ཁྱོད་ཀྱི་འདབ་མ།

དམིགས་ཡུལ་ཞིག་དང་འཚོལ་སྙེག་ཅིག  གདམ་གསེས་ཤིག་གིས།

ངས་རང་ཉིད་ཁྱོད་ཀྱི་ཁོལ་ཁར་བཞག་ནས་བཞུས་ཤིང་བརྡུངས་ལ།

ཁྱོས་ཁྱོད་རང་ང་ཡི་སྙིང་ཁར་གླན་ནས་བགད་ཅིང་ངུས།

ནམ་རྒྱུན་ངས་འདི་ལྟར་བསམ་མྱོང་སྟེ།

སྐབས་དེ་དག་ལ།

ཁྱོད་ངུ་མ་ཕོད་པར་བགད་པ་ཡིན་ཡང་སྲིད་ལ།

ཡང་ན་དགོད་མ་ཤེས་པར་ངུས་པ་ཡིན་ནའང་ཐང་།

གང་ལྟར།

མཆི་མའི་འོད་ལ་སིམ་པའི་ཁྱོད་ཀྱི་གཏམ་རྒྱུད་རེ་རེ།

ངའི་མིག་གོང་ན་ད་དུང་བསྐམས་མེད།

ཁྱོད་ཀྱི་འདབ་མ།

དབྱར་གསུམ་གྱི་ཆར་བས་རློན་དྲི་འཐུལ་ལ།

དཔྱིད་གསུམ་གྱི་བསེར་བུས་སྟངས་སྟབས་འཕྱུར།

ཁྱོད་ཀྱི་འདབ་མ།

འདར་བཞིན་ཡོད།

སྟོན་མཇུག་གི་རླུང་བུས་རྡེག་པའམ།

དགུན་གསུམ་གྱི་ཁ་བས་གཙེས་པ་ཡིན།

ཁྱོད་ཀྱི་འདབ་མ།

འདར་ལྕུག་ལྕུག་གི་ཚེ་སྲོག་གསོན་པོ་ཞིག

ནམ་རྒྱུན།

མོའི་མིག་ཟུང་གི་སྐར་ཕྲན་ཇི་བཞིན་འདར།

ངའི་སྙན་ངག་གི་མཉེན་ཆ་ཇི་བཞིན་འདར།

ད་དུང་། ཁོའི་ལྷག་བསམ་གྱི་འོད་ཟེར་ཇི་བཞིན་འདར།

ནམ་མཁའ་སྟོང་བས་ཡིན་ནམ།

ས་གཞི་བརྟན་པས་ཡིན།

མཁའ་དབུགས་ལྕི་མོ་འདི།

ཁྱོད་ཀྱིས་མི་ཐེག་ལ་བདག་གིས་ཀྱང་མི་བཟོད་ཨང་།

ང་ན་ནས་ཡུན་རིང་འགོར་ལ།

ཁྱོད་ཀྱང་་་

ཁྱོད་ཀྱི་གཡུ་སྦྲང་།

ཁྱོད་ཀྱི་གཡུ་སྦྲང་།

སྔོ་བསངས་ཀྱི་ཁམས་ནས་བཞུར་འོང་བའི་དུང་གི་ཐིགས་པ་ཇི་བཞིན།

ནེམ་ལྗང་གི་གཞི་རུ་འཛུམ་འོང་བའི་མེ་ཏོག་གི་དགོད་སྒྲ་ཇི་བཞིན །

ཆེས་སྙི་བའི་ཁྱོད་སྙིང་གི་འདབ་མར་ཞུ་རྗེས།

ཆེས་སྙན་པའི་སྨྲ་བརྗོད་དབྱངས་རྟ་ཞིག་ལས།

བཞུར་བར་བརྩམས་ཀྱང་།

ཁྱོད་དང་བཅས་པའི་འཇིག་རྟེན་འདིའང་།

རེ་ཞིག་ལྐུགས་པར་གྱུར་སོང་།

ཁྱོད་ཀྱི་གཡུ་སྦྲང་།

དབྱངས་ཀྱིས་མྱོས་ནས།

གཤོག་པ་ལེབ་མོ་ལམ་ལམ་ལྡེབ་ཀྱིན།

ཁྱོད་ཀྱི་གཡུ་སྦྲང་།

མཛེས་པས་ཚིམས་པའི།

ཉམས་འགྱུར་རྫོགས་པའི་གར་སྟབས་བསྒྱུར་བཞིན།

ནམ་ཞིག འཕུར་འོང་ངམ།

ཡང་ན། ནམ་ཞིག་ཕར་ལ་འཕུར་འགྲོ་ཨང་།

གཡུ་སྦྲང་ཕར་ལ་འཕུར་དུས།

གཤོག་པའི་ཆུ་རྡུལ་མཛེས་གི

གཡུ་སྦྲང་ཚུར་ལ་ཕྱོགས་ན།

སེམས་ཀྱི་སྒྲ་དབྱངས་ལོས་སྙན།

སུས་ཀྱང་ཁྱོད་ལ།

ཁྱོད་ནི་ཁྱོད་ཀྱི་གཡུ་སྦྲང་གི

གར་འཕུར་ཁོ་ན་སེམས་པའི་ཁྱོད་ཀྱི་འདབ་མ་རེད་ཟེར།

སུས་ཀྱང་ཁྱོད་ལ།

ཁྱོད་ནི་ཁྱོད་ཀྱི་གཡུ་སྦྲང་གི

ཚུར་འཕུར་གཅིག་པུ་བསྒོམས་པའི་ཁྱོད་ཀྱི་འདབ་མ་རེད་ཟེར།

ཡིན་ནའང་།

ཆུ་མོའི་ཤག་སྒྲ་ཁྱོད་ཀྱིས་ཐོས་ཨེ་མྱོང་།

སྙིང་གི་མེ་ཏོག་ཁྱོད་ཀྱིས་མཐོང་ཨེ་མྱོང་།

ཁྱོད་ཀྱི་གཡུ་སྦྲང་གིས།

ཁྱོད་ཀྱི་སྙིང་ལ་གཙེས་ཀྱང་།

དྲོད་འཇམ་གྱི་བཞུར་རྒྱུན་ཞིག་དང་།

ཁྱོད་ཀྱི་གཡུ་སྦྲང་གིས།

ཁྱོད་ཀྱི་འགྲམ་པར་གཞུས་ཀྱང་།

བྱམས་དུང་གི་རྨི་ལམ་ཞིག་རེད།

ཁྱོད་དང་ཁྱོད་ཀྱི་གཡུ་སྦྲང་ལགས།

ཁྱོད་རང་མཐོང་དུས།

ཁྱོད་རང་མཐོང་དུས།

བདག་གི་མིག་ལམ་དུ།

བཞད་གད་འཕྱོ་བའི་རྒྱུ་སྐར་གྱི་སོ་འཛུམ་གསལ་སོང་།

འོད་དཀར་འཇོ་བའི་ཟླ་གཞོན་གྱི་བཀྲག་མདངས་བཞད་སོང་།

རླུང་གིས་གཡོ་བའི་སྦ་དཀར་གྱི་ཉམས་འགྱུར་རྫོགས་སོང་།

གནག་ཅིང་སྣུམ་པའི་ཡིད་འོང་གི་རྦབ་ཆུ་ཤོམ་སོང་།

ཁྱོད་རང་མཐོང་དུས།

བདག་ལ་གཙང་ཆབ་སྔོན་མོའི་ལྷུང་ལྷུང་གི་བཞུར་རྒྱུན་ཡོད་སོང་།

བདག་ལ་དྲོད་ལམ་ལམ་གྱི་ཉི་ཟེར་གྱི་འདབ་མ་ཐོབ་སོང་།

བདག་ལ་འཇམ་བསིལ་བསིལ་གྱི་སྟོན་རླུང་གི་རེག་བྱ་ལྡན་སོང་།

ཁྱོད་རང་མཐོང་དུས།

འཇིག་རྟེན་ཞིག་གི་ཁ་བ་ཞུ་སོང་།

སེམས་པ་ཞིག་གི་གསང་བ་ཤོར་སོང་།

ཁྱོད་འོང་དུས།

བདག་ལ་གློ་བུར་བའི་འཚུབ་ཆ་ཞིག་དང་གནོང་སེམས་ཤིག

ཁྱོད་འགྲོ་དུས།

བདག་ལ་རྒྱུན་རིང་གི་ན་ཟུག་ཅིག་དང་འགྱོད་གདུང་ཞིག

ཁྱོད་དྲན་དུས།

སེམས་པ་དྲན་པའི་སེམས་པ་འདི།

ནམ་མཁའི་མཐོང་ལ་འདྲེས།

ཁྱོད་སེམས་དུས།

མིག་ཟུང་དྲན་པའི་མིག་ཟུང་འདི།

ས་ཡི་གཏིང་ལ་འཛུལ།

ཁྱོད་དང་མཉམ་དུ།

འཁོར་བའི་འཁྱག་རོམ་སེམས་ཀྱིས་བཞུ་འདོད་ལ།

ཁྱོད་དང་ལྷན་དུ།

བརྩེ་བའི་ལང་ཚོ་མིག་གིས་བཞེངས་བར་འདོད།

---

རྩོམ་སྒྲིག་འགན་འཁུར་བ། ཁྰ་ཤེས་རབ་རྒྱ་མཚོ།    མགར་རྩེ་ཉི་ཟེར། འབའ་སྣང་གྲོལ། ཨ་བུ་འབྲོང་།