སེམས་ཀྱི་མཆོད་པ།
___བཀའ་དྲིན་གཞལ་ཐབས་མེད་པའི་དགེ་རྒན་རིན་པོ་ཆེ་ངེས་དོན་རིག་སྨྲའི་དབུས་ཀྱི་ཁྱུ་མཆོག་ཏུ་གྱུར་བ་བཛྲ་ཚུལ་ཁྲིམས་རྒྱ་མཚོ་མཆོག་ལ་ཕུལ།
---བོན་བརྒྱ་སྟག་ལ་འབུམ།
ཚེ་འདིར་ཁྱེད་དང་མཇལ་བ་སྔོན་གྱི་ལས།།
མཇལ་ནས་བླ་མར་བསྟེན་པ་ད་ལྟའི་ཚོགས།།
བུ་ཆུང་དཀར་ནག་ལམ་ཁ་ཤེས་ནས་ཡོད།།
ང་རང་ལས་ངན་ནང་གི་ལས་ཅན་ཡིན།།
བོན་པོའི་ཁྱིམ་རྒྱུད་ཅིག་ཏུ་སྐྱེས་ན་འང་།།
ནར་སོན་མེ་ཏོག་ཁྱེད་ཀྱི་པང་དུ་འཐོར།།
གྲུབ་མཐའ་ཀུན་ལ་སྡང་མིག་མི་ལྟ་བར།།
བྱིས་བློའི་འདབ་གཤོག་གྲོལ་བ་ཁྱེད་ཀྱི་དྲིན།།
ཕན་ཚུན་རྟེན་ཅིང་འབྲེལ་བར་འབྱུང་བ་དང་།།
ལས་ཀུན་རྒྱུ་དང་འབྲས་བུས་བསྐྱེད་པ་སྟེ།།
ཆོས་ཀུན་ཆོས་ཉིད་འབྱེད་པའི་ཤེས་རབ་ཀྱི།།
རྣོ་དབལ་ཅུང་ཙམ་རྒྱས་འདི་ཁྱེད་ཀྱི་དྲིན།།
རྙིང་བ་ཐམས་ཅད་ཧོལ་གྱིས་མི་འདོར་ཞིང་།།
གསར་བའི་ཕྱོགས་སུ་ཐོལ་གྱིས་མི་རྒྱུགས་པར།།
གསར་རྙིང་ལྟ་སྤྱོད་བསྲེས་པའི་བཞི་མདོ་ནས།།
རང་ལམ་རང་གིས་རྙེད་པ་ཁྱེད་ཀྱི་དྲིན།།
མཚང་འབྱིན་མི་ཁ་ཙམ་ལ་མི་ཁྲོ་ཞིང་།།
ངོ་སྲུང་བསྟོད་ཚིག་དག་ལ་མི་ཞེན་པར།།
རང་གི་བསམ་བློས་རང་ཉིད་ངོས་ཟིན་ཏེ།།
རང་ཉིད་རང་གིས་སྲུང་བ་ཁྱེད་ཀྱི་དྲིན།།
ཡོད་ཚད་སྒོར་མོར་བརྗེས་ནས་མི་འགྲོ་ལ།།
སྤྲང་དབྱུག་ཁོ་ན་འཆང་ནས་མི་འདུག་པར།།
རང་གི་འཚོ་བ་རང་གིས་ཐག་བཅད་དེ།།
རང་མགོ་རང་གིས་འདོན་པ་ཁྱེད་ཀྱི་དྲིན།།
བཙན་པོ་དཔོན་པོར་ཐུག་ཀྱང་དཔའ་མི་ཞུམ།།
སྟོབས་ཆེན་ཕྱུག་པོས་བོས་ཀྱང་སྙིང་མི་འདར།།
འདྲིས་དང་མ་འདྲིས་ཆོལ་གསུམ་བོད་མི་ལ།།
ཚེ་གང་འོས་མེད་མི་བྱེད་ཁྱེད་ཀྱི་དྲིན།།
གྲགས་སྐམ་ཁོ་ན་གཉེར་ནས་མི་འདུག་ཅིང་།།
བླུན་པོ་གར་ཁྲིད་བཞིན་དུ་མི་འགྲོ་བར།།
འཇིག་རྟེན་སྤྱི་ཚོགས་ཟེར་བ་ཕྱེད་ཙམ་མཐོང་།།
རང་གཏམ་རང་གིས་ཤོད་པ་ཁྱེད་ཀྱི་དྲིན།།
དྲིན་ཆེན་ཕ་མའི་སེམས་ཁ་མི་དཀྲུགས་ཤིང་།།
ཤ་ཉེ་གྲོགས་པོ་དག་ལ་མི་འགལ་བར།།
འཁོར་བ་ཙམ་ཡང་བཟུང་སྟེ་མི་སྡོད་པར།།
ཅི་ཞིག་ཨེ་འཁྱོངས་ལྟ་བ་ཁྱེད་ཀྱི་དྲིན།།
རྣམ་གཡེང་ལེ་ལོ་ཁོ་ནས་མི་འདའ་ལ།།
བུད་མེད་དག་དག་འཚོལ་བར་མི་དགའ་སྟེ།།
ཡ་མ་བརླ་ཞིག་བྱས་ནས་མི་འཚོ་བར།།
གང་ཞིག་ཨེ་ཤེས་ལྟ་བ་ཁྱེད་ཀྱི་དྲིན།།
མདོར་ན་ང་ནི་ཁྱེད་ཀྱི་ཆ་ཤས་ཤིག།
མདོར་ན་ང་ནི་ཁྱེད་ཀྱི་བ་སྤུ་ཞིག།
མདོར་ན་ང་ནི་ཁྱེད་ཀྱི་སྐྲ་སེན་ཞིག།
ཚེ་རབས་ཀུན་ཏུ་ཁྱེད་དང་འབྲལ་མེད་ཤོག།
སྐྱབས་འགྲོའི་ཚོགས་ཞིང་ནང་དུ་ཁྱེད་རང་ཡོད།།
ཁྱེད་ལ་བཏབ་པའི་གསོལ་བ་ཕུར་ཚུགས་ཡིན།།
འཁྱམ་པོའི་རྨི་ལམ་ཚལ་ན་ཁྱེད་རང་ཡོད།།
ཁྱེད་རང་དྲན་པའི་རི་མོ་ནོག་མེད་ཡིན།།
2011.10.མང་གཞུང་དུ།
རྩོམ་སྒྲིག་འགན་འཁུར་བ།
ཁཱ་ཤེས་རབ་རྒྱ་མཚོ། མགར་རྩེ་ཉི་ཟེར། ཨ་བུ་འབྲོང་། བན་ཤུལ་འཇམ་དབྱངས།
| 
青公网安备 63262102000011号