གངས་ལྗོངས་ཤེས་རིག་ནོར་བུའི་སློབ་གླིང་གི་སློབ་སྲིད་ཁང་གི་འགོ་བ་གཞོན་པ་དགེ་རྒན་གཙུག་ཕུད་རྒྱ་མཚོ་ནི་སྤྱི་ལོ་༡༩༧༨ལོར་རྨ་ལྷོ་རྫོང་ཨ་རིག་གཙང་དཀར་མ་ཞེས་པའི་འབྲོག་ཁྱིམ་ཞིག་ཏུ་སྐྱེས།  ལོ་བཅུ་གཉིས་སྟེང་ངུར་སྨྲིག་གི་ཞིང་ཁམས་ལ་སྨོན་པ་ཤོར་ནས་གཙང་དགོན་དགའ་ལྡན་དོན་འགྲུབ་རབ་བརྟན་གླིང་དུ་ལྔ་རིག་སྨྲ་བའི་དབང་ཕྱུག་ཆེན་མོ་༧རྗེ་ཆོས་འཕེལ་རྒྱ་མཚོ་མཆོག་གི་མདུན་ནས་རབ་ཏུ་བྱུང་སྟེ་དུས་འཁོར་གྲྭ་ཚང་དུ་ཞུགས།ཕ་ཡུལ་ཁ་བ་རུ་བའི་བདེ་སྡུག་ལ་མིག་ཟུང་གཏད་ནས་རྔུལ་ཆུ་སྟོང་ཕྲག་གི་ཕྲེང་ཐག་དཔྱངས་ནས་ཡུལ་གྱར་བའི་མཚན་བྱང་ཁུར་ཏེ་ཕྱི་ནང་གི་རིག་གནས་ཀུན་ལ་སྦྱངས་པའི་སྐལ་བཟང་ཐོབ། 

        སྤྱི་ལོ་༢༠༠༢ལོར་གངས་ལྗོངས་ཤེས་རིག་ནོར་བུའི་སློབ་གླིང་དུ་ཞུགས་པར་མ་ཟད་སློབ་གླིང་དེའི་སྤྱི་གཉེར་ཚོགས་པའི་ཚོགས་གཙོ་དང་།   སྐབས་བརྒྱད་པའི་མཐར་ཕྱིན་འཛིན་གྲྭའི་འཛིན་དཔོན་བྱས་ནས་ཕ་སྐད་གཙང་མ་བཤད་མཁན་རྣམས་ལ་རྒྱལ་ཁའི་དར་ཆ་སྟེར་བའི་སྲོལ་བཟང་བཙུགས།  རྨ་རྒྱལ་མྱུག་གསར་སྤྱིའི་དེབ་གྲངས་གསུམ་པའི་ལག་བསྟར་རྩོམ་སྒྲིག་པའི་འགན་ཁུར།

       སྤྱི་ལོ་༢༠༠༥ལོར་སློབ་གླིང་དེ་ནས་མཐར་ཕྱིན།   བརྩམས་ཆོས་འགའ་རེ་ཕྱི་ནང་གི་དུས་དེབ་དང་ཚགས་པར་སོགས་ཀྱི་སྟེང་དུ་བཀོད་མྱོང་།   ད་སྐབས་སློབ་གླིང་དེ་ན་དགེ་རྒན་དང་སློབ་སྲིད་ཁང་གི་འགོ་བ་གཞོན་པའི་འགན་ཁུར་ཡོད་པར་མ་ཟད།  བསྟུད་མར་ལོ་བཞི་ལ་ཕུལ་བྱུང་དགེ་རྒན་གྱི་བྱ་དགའ་ཐོབ།

      སྤྱི་ལོ༢༠༡༥ལོ་ནས་ཤེས་རིག་སློབ་གླིང་གི་སློབ་སྲིད་ཁང་གི་འགོ་གཙོའི་འགན་བཞེས།

      སྤྱི་ལོ་༢༠༡༩ལོར་སློབ་གྲྭའི་སློབ་སྲིད་སློབ་གཙོ་གཞོན་པར་བསྐོས།