རྫོགས་ཆེན་དཔལ་སྤྲུལ་སྒྲུབ་ཕུག་ནས་མཇལ་བའི་མཚམས་པ་བ།
དོན་འགྲུབ་རྡོ་རྗེ།
གནས་འདི་བྱིས་དུས་ནས་རྣ་བས་གོ་གོ། །
རྩེད་ཡ་དགོད་རོགས་དང་མཉམ་དུ་ཡོང་ཡོང་། །
ལོ་ཟླའི་ཆུ་བོ་དེ་ཡ་མེད་ལན་མེད། །
དྲན་པའི་ཡིད་ངོ་ལ་འཁོར་ཙམ་འཁོར་ཙམ། །
འགྲུལ་བཞུད་ཐེངས་གཅིག་གི་ཀུ་རེའི་ངོས་ན། །
མ་རྙེད་རྨི་ལམ་གྱི་མཚན་ལྗོངས་རིང་མོ། །
འདི་ནས་མ་རྙེད་ཀྱི་བག་ཆགས་ཕྲ་མོ། །
གང་ནས་འཁོར་འདས་ཀྱི་ལས་འཕྲོ་ཆོད་འགྲོ། །
ལོ་ཡི་འཁོར་མོ་དེ་བཅུ་ཕྲག་རྗེས་སུ། །
དེ་རིང་དྲན་ཤེས་ཀྱི་འཛིན་པ་ཁྱེར་ཏེ། །
རང་ཡུལ་རུ་དམ་གྱི་དབེན་པའི་རི་ངོགས། །
ཏིང་འཛིན་སྒྲུབ་ཕུག་འདིར་སླར་ཡང་མཇལ་ཡོད། །
བྲེལ་བྲེལ་ཚོགས་དྲུག་གི་རྣམ་ཤེས་ལྡོམ་པོ། །
འདོད་ཡོན་སྒྱུ་བག་གི་གར་དུ་རྩེན་པས། །
རིག་པ་འོད་གསལ་གྱི་ཤེས་རབ་དྭངས་མ། །
བག་མེད་ཤོར་བ་འདི་ངོ་རེ་གནོང་ཨང་། །
མི་ཁོམ་མི་ཡུལ་གྱི་འཇིག་རྟེན་སྣང་བ། །
སྣང་བ་རྣམ་རྟོག་གི་རྗེས་ལ་སོང་སོང་། །
མ་མཐོང་རྨི་ལམ་གྱི་དྲན་པ་ཁྲ་ཁྲ། །
འདི་ནས་བག་ཡངས་ཀྱིས་མལ་རེ་གསོས་ན། །
ཁྱད་པར་ཁྱབ་བདག་གི་རྩ་བའི་བླ་མས། །
ཕ་ནོར་བུ་སྐལ་གྱི་ཐུགས་རྗེ་དོན་ཡོད། །
རྫོགས་ཆེན་སྙན་བརྒྱུད་ཀྱི་གདམས་ངག་བསྩལ་བས། །
གླིང་འདིར་ལུང་རྟོགས་ཀྱི་བྱིན་རླབས་འཕྲོས་ཡོད། །
བདག་ཀྱང་ཚེ་རབས་ཀྱི་ལས་སྨོན་སྦྲེལ་ནས། །
བརྒྱུད་ལྡན་རིག་འཛིན་གྱི་ཞལ་ལུང་མཇལ་ཡང་། །
སྒོ་གསུམ་ཆོས་མིན་གྱི་སྤྱོད་པར་གཡེང་བས། །
ཡུན་ཐུང་མི་ཚེ་ཡང་གློག་ལས་མྱུར་བྱུང་། །
དྲན་རིག་ཡེ་ཤེས་ཀྱི་རྟ་མཆོག་རྒོད་པོས། །
སྲིད་པའི་ཐང་ཆེན་ནས་ལམ་རེ་ཆོད་ན། །
ཀློང་ཆེན་རྣལ་འབྱོར་གྱི་རྩལ་ལ་སྦྱངས་ཏེ། །
འཁོར་འདས་མཉམ་ཉིད་ཀྱི་དབྱིངས་ལ་ཕྱིན་འགྲོ། །
དེ་རིང་མཇལ་བ་ང་མཇལ་བ་ཞིག་སྟེ། །
ཕལ་བའི་མི་ལུས་ཀྱི་ལུས་རྟེན་འཁྱམ་པོ། །
འཁྱམ་པོའི་མི་ཚེ་ཡི་ཆུ་བུར་མིག་གིས། །
སྒོམ་ཆེན་རྒྱུས་མེད་ཅིག་མཇལ་ནས་བྱུང་ངོ་། །
སྒོམ་ཆེན་སྤྱན་རས་དེ་མཐོ་བར་གཟིགས་གཟིགས། །
ལྷུན་གྲུབ་ཐོད་རྒལ་ལ་གཟིགས་པའི་རྣལ་འབྱོར། །
མཇལ་བའི་མིག་རས་དེ་མར་ལ་བལྟས་བལྟས། །
ཁམས་གསུམ་འཁོར་བ་ལ་གཡེང་བའི་བུ་ཆུང་། །
དད་པའི་ཐལ་མོ་དེ་སྙིང་གར་སྦྱར་ནས། །
བསམ་བློའི་བུ་ག་རུ་ག་ལེར་སོང་བས། །
ཆགས་སྡང་སྒྱུ་མ་ཡི་གར་ལ་བསམས་ན། །
ཆུ་བུར་མིག་མཐའ་ལས་མཆི་མ་ཟགས་བྱུང་། །
སྲིད་པའི་བདེན་ཞེན་དེ་བཟློག་ཏུ་དཀའ་བས། །
བཟང་ངན་རྐྱེན་སྣང་ལ་རྣམ་རྟོག་འཁྲུལ་སོང་། །
སྤང་བླངས་རེ་དོགས་ཀྱི་ལས་ཉོན་བཙན་པས། །
འཁོར་བའི་རི་གྲོང་ན་རྟག་པར་ཉུལ་ཡོད། །
ཕྱི་རོལ་ཁ་དོག་གི་ཆོས་གཟུགས་ང་འདྲའི། །
བཅོས་མའི་ཚུལ་འཆོས་འདི་ངོ་རེ་གནོང་ངོ་། །
ནང་གི་རྣལ་འབྱོར་ལ་བརྩོན་པ་ཁྱེད་འདྲའི། །
ཆོས་པའི་རྣམ་ཐར་འདི་ཡི་རེ་རང་ངོ་། །
ཕྱི་ཚུལ་རྣལ་འབྱོར་བ་ཞིག་པོས་ཁེངས་འདྲ། །
ནང་རིག་འོད་གསལ་གྱི་སྙིང་པོའི་གཟུངས་ཆེན། །
སྣང་སྟོང་གཉིས་མེད་ཀྱི་མཉམ་པར་བཞུགས་སམ། །
གཡོ་མེད་ཏིང་འཛིན་གྱི་སྒོམ་སྟངས་ལེགས་པ། །
སྐལ་ལྡན་དང་བ་ཡི་མིག་གི་རྒྱན་ཆ། །
འགྲོ་བའི་ཚོགས་བཟང་གི་བསོད་ནམས་ཞིང་འདིར། །
ཟག་མེད་སྒྱུ་འཕྲུལ་གྱི་དབྱིངས་སུ་བཞུགས་སམ། །
མ་བཅོས་གཉུག་མ་ཡི་གཤིས་ཀ་བཟང་བ། །
སྲིད་པའི་སྣང་བ་དེ་མཚོ་མོའི་རླབས་རིས། །
རེས་དགའ་རེས་སྐྱིད་ཀྱི་འཁོར་བར་གྲོས་ནས། །
འཁོར་འདས་རྒྱབ་གྱེས་ཀྱི་མགུར་གླུ་ལེན་ནམ། །
ཡུལ་ཅན་རིག་པ་ཡི་རྩེད་འཇོ་ཡག་སོང་། །
རྒྱལ་བ་སེམས་དཔའ་ཡི་བྱིན་གྱིས་རླབས་པའི། །
འཕགས་པའི་རི་ངོགས་འདི་དམ་པའི་གདན་ས། །
རྣམ་དཀར་ཀུན་འབྱུང་གི་དགེ་སྦྱོར་འཕེལ་ལམ། །
འདོད་ཆུང་ཆོག་ཤེས་ཀྱིས་བཞུགས་སྟངས་ལེགས་པ། །
སྟོང་སང་འཛིན་བྲལ་གྱི་ཐུགས་ལ་བཞུགས་པའི། །
བློ་འདས་ཡེ་ཤེས་ཀྱི་སྒོམ་པ་རང་གྲོལ། །
འགྲོ་དྲུག་སེམས་ཅན་ལ་ཐུགས་རྗེས་གཟིགས་སམ། །
སྒྲུབ་པའི་རྒྱལ་མཚན་གྱི་དབུ་འཕང་མཐོ་བ། །
སངས་རྒྱས་ཀུན་འདུས་ཀྱི་ངོ་བོར་བཞུགས་པའི། །
རྩ་བའི་བླ་ཡི་བྱིན་རླབས་ཐུགས་རྗེས། །
འཁོར་བའི་སྙིང་པོ་ལ་སྤྱན་ཆབ་བསིལ་ལམ། །
བྱ་བཏང་རྣལ་འབྱོར་གྱི་བཞུགས་བག་ལྷོད་པ། །
ཀུན་རྟོག་ནམ་མཁའ་ཡི་བྱ་རྗེས་འདྲ་བར། །
ཆོས་ཉིད་རྨི་ལམ་གྱི་སྒྱུ་མར་གཟིགས་པའི། །
གཡོ་མེད་སྒོམ་ཆེན་གྱི་ཞལ་རས་མཇལ་བས། །
མོས་གུས་བྱིན་རླབས་ལ་ཐུགས་རྗེ་ཞུའོ། །
རྒྱུ་བའི་བརྟུལ་ཞུགས་ཀྱང་ནུབ་ལ་ཉེ་བྱུང་། །
མཚམས་སྤྲིན་དམར་པོ་ཡང་སྨག་ལ་འདྲེས་བྱུང་། །
མཇལ་བའི་ལག་ཟུང་གི་ཐལ་མོ་སྦྱར་ནས། །
སྒོམ་ཆེན་ཁྱེད་རང་ལ་གྱེས་ཕྱག་འབུལ་ལོ། །
སྟོང་ཆེན་བདེ་བ་ལ་མཉམ་པར་བཞུགས་པའི། །
སྒྲུབ་པ་ཉམས་བཞེས་ཀྱི་དམ་པ་ཁྱེད་རང་། །
ཏིང་འཛིན་ཡེ་ཤེས་ཀྱི་རྩལ་ཆེན་སྦྱངས་ནས། །
འོད་གསལ་སྒྲུབ་ཕུག་འདིར་ལྷོད་ལ་བཞུགས་རོགས། །
བཏང་སྙོམས་མེ་ལོང་གི་ཡེ་ཤེས་ཆེན་པོས། །
འགྲོ་བློའི་མ་རིག་གི་མུན་པ་སེལ་ནས། །
གང་ཤར་རྣལ་འབྱོར་གྱི་སྣང་གླུ་སྙན་མོས། །
འབྲེལ་ཚད་དོན་ལྡན་ལ་འདྲེན་པར་ཞུའོ། །
སྒྲུབ་རི་གསང་ཆེན་ངེས་དོན་གླིིང་དུ་གྲུབ་དབང་རྫོགས་ཆེན་པ་བསྟན་འཛིན་ལུང་རྟོགས་ཉི་མ་མཆོག་གིས་གྲྭ་མང་འདུས་པ་རྒྱ་མཚོར་རྫོགས་ཆེན་མཁའ་འགྲོ་སྙིང་ཐིག་གི་བཀའ་ཁྲིད་གནང་སྐབས། ཕྱི་དྲོའི་ཁྲིད་སྦྱོང་གི་དུས་ཚོད་ཅིག་ལ་ཡུན་རིང་མ་འབྱོར་བའི་སྒྲུབ་ཕུག་དང་མཚམས་པ་བ་ཞིག་མཇལ་བའི་རྐྱེན་དང་བཅས་དབེན་པའི་ནགས་སུ་སྦྱར་བའོ། །
2017 རྒྱལ་ལོ། ༢༡༤༤ ༧ ༢༧
| 
青公网安备 63262102000011号