2021 ལོའི་གངས་ལྗོངས་ཤེས་རིག་ནོར་བུའི་སློབ་གླིང་གི་སློབ་མ་གསར་བསྡུའི་བརྡ་ཐོ།

༡ གངས་ལྗོངས་ཤེས་རིག་ནོར་བུའི་སློབ་གླིང་དུ་མིང་ཐོ་འགོད་སྐབས་ངེས་པར་དུ་ཤེས་དགོས་པ་ཞིག་ནི། སྔར་སྲོལ་ལྟར་མིང་ཐོ་བཀོད་པའི་གོ་རིམ་ཁོ་ན་ལས་བླ་ཆེན་དཔོན་ཆེན་དང་།  སྒེར་འབྲེལ་ཟབ་པའི་གྲོགས་པོ་སུ་གང་ལ་ཡང་དམིགས་བསལ་ཅི་ཡང་མེད་པ་དེ་ཐུགས་ལ་འཛིན་པར་ཞུ།

༢  སློབ་གླིང་འདིར་ཞུགས་འདོད་པ་དག་གིས་ཐོག་མར་མིང་ཐོ་འགོད་དགོས་ལ། སློབ་མ་རང་གི་ཉེ་པར་གཅིག་དང་ཐོབ་དཔང་ངམ་ཁྱིམ་ཐོ་གང་རུང་རེ་དགོས།  མིང་ཐོ་འགོད་སར་རང་ཉིད་དངོས་སུ་མ་འབྱོར་ཡང་སློབ་གླིང་ན་ཡོད་པའི་སློབ་མ་སོགས་ཀྱིས་ཁྱེད་ཀྱི་ཚབ་ཏུ་མིང་ཐོ་འགོད་ཆོག

༣ རྒྱུགས་ཞུགས་མིང་ཐོ་འགོད་སྐབས་མཚོ་སྔོན་ཞིང་ཆེན་མ་ཡིན་པའི་ས་གནས་གཞན་གྱི་སློབ་མས་ཉིང་སྐྱུར་རྟག་དཔྱད་མཇུག་འབྲས་ངེས་པར་ཁྱེར་ཡོང་དགོས། དེ་མེད་ན་རྒྱུགས་རར་ཞུགས་མི་ཆོག

༤ དངོས་སུ་རྒྱུགས་ལ་ཞུགས་སྐབས་སྔར་མིང་ཐོ་བཀོད་ཟིན་པ་དག་གི་མིང་ཐོའི་ཨང་རིམ་དང་ཐོབ་ཐང་དཔང་ཡིག ཁྱིམ་ཐོ་བཅས་ལ་ཞིབ་བཤེར་བྱས་པ་བརྒྱུད་རྒྱུགས་ཞུགས་མིང་ཐོ་འགོད་དགོས། རྒྱུགས་ཚད་ལོངས་པའི་སློབ་མ་དག་ལ་མཉམ་འབྲེལ་སྨན་བཅོས་བྱང་བུ་<<一卡通 >>འང་བཟོ་དགོས་པས་སྔ་མོ་ནས་རང་གིས་གྲ་སྒྲིག་བྱས་ཏེ་ཁྱེར་ཡོང་དགོས།

༥  གལ་ཏེ་ཁྱོད་ཀྱིས་མིང་ཐོ་བཀོད་ཟིན་ཡང་རྗེས་སུ་རྒྱུགས་ལ་མ་ཞུགས་ན་ཁྱོད་ཀྱི་མིང་ཐོའི་དུས་ཡུན་ཡོལ་སོང་བས་འཕྲོ་བརླག་ཏུ་སོང་བ་ཡིན།  
མིང་ཐོ་བཀོད་རྗེས་ད་ལོར་རེ་བ་མེད་ཀྱང་དངོས་སུ་རྒྱུགས་ལ་ཞུགས་ན་ལོ་རྗེས་མའི་མིང་ཐོ་ལས་ཁྱོད་ལ་གོ་སྐབས་ཐོབ་སྲིད།

༦  ལོ་རེའི་སྤྱི་ཟླ་༩བའི་ཚེས་༩ནས་འགོ་བརྩམས་ཏེ་ལོ་རྗེས་མའི་སྤྱི་ཟླ་དགུ་བའི་ཚེས་འགོའི་བར་དུ་མིང་ཐོ་འགོད་བཞིན་ཡོད་ལ།  སྤྱི་ཟླ་༩བའི་ཚེས༤ནས༧བར་རྒྱུགས་ཞུགས་མིང་ཐོ་དང་ཚེས་༨ཉིན་ནི་དངོས་སུ་རྒྱུགས་ལེན་པའི་དུས་ཚོད་ཡིན་པས་དུས་ལྟར་ཕེབས་པར་དགའ་བསུ་ཞུ།།

༧ གསར་ཞུགས་སློབ་མར་མལ་ཆས་ཆ་ཚང་དང་། མལ་ཁང་ནང་གི་མཁོ་ཆས། ཁྲུས་རྫས་ཆ་ཚང་། སློབ་གྲྭས་གཅིག་གྱུར་ལྟར་བཀོད་བསྒྲིགས་བྱས་ཡོད་པས་ཕྱི་ནས་ཉོ་མི་དགོས།

༨ འདིར་གསལ་བཤད་ཞུ་འོས་པ་ཞིག་ལ།
    ནམ་རྒྱུན་ལོ་རེ་བཞིན་བོད་མདོ་དབུས་ཁམས་གསུམ་གྱི་ས་ཆ་སོ་སོ་ནས་ཆེད་ཕེབས་ཀྱི་སློབ་མ་དང་ཁྱིམ་བདག་བརྒྱ་ཕྲག་མང་བོ་སྔ་མོ་ནས་སློབ་གྲྭའི་ཉེ་འཁྲིས་ཀྱི་གྲོང་རྡལ་དུ་འབྱོར་ཏེ་མགྲོན་ཁང་དང་ཟ་ཁང་སོགས་ལ་རིན་གོང་ཆེན་པོ་བྱིན་ནས་གཟའ་འཁོར་གཅིག་ཡས་མས་སུ་སློབ་གྲྭར་ཞུགས་འདུན་གྱི་རེ་སྒུག་བྱས་ཡོད།  དེ་བས་མང་ཚོགས་ལ་སྟབས་བདེ་བཟོ་ཆེད་ངེད་སློབ་གླིང་གི་གླིང་སྟོད་ཀྱི་ཨ་མྱེས་ཁྲ་རྒན་རིག་གནས་ཁམས་གསེང་གླིང་གི་གཡས་གཡོན་དུ་རིན་མེད་སྒོས་གུར་ཕུབས་ནས་བསྡད་ཆོག་པའི་ས་གནས་ཤིག་གཏན་འཁེལ་བྱས་ཡོད་ལ། ཁྲ་རྒན་གླིང་གི་བོད་ཟས་དང་རྒྱ་ཟས་སོགས་ཀྱང་རིན་གོང་གཅིག་གྱུར་སྒོས་བཀོད་བསྒྲིགས་བྱས་ཡོད་པས་དེ་དོན་ཐུགས་ལ་འཛིན་པར་ཞུ་ཞུ།

༩  འབྲེལ་གཏུག་བྱ་ཡུལ། 

བློ་བཟང་བདེ་ལེགས། 18097158222

སྐལ་བཟང་བསྟན་འཛིན། 15597591153