མགུར་མ།

ཀུན་མཁྱེན་འཇིགས་མེད་དབང་བོ།

ཀྭ་ཡེ་གསན་༼གསོན༽དང་སྐལ་མཉམ་གྲོགས་པོ་དག།

ཁ་ཞེ་མེད་པར་ལྷ་ཆོས་སྒྲུབ་འདོད་ན།།

ག་ན་འདུག་ཀྱང་ཐེག་མཆོག་དགེ་བའི་བཤེས།།

ང་རྒྱལ་སྤངས་ཏེ་གུས་པས་བསྟེན་པར་མཛོད།།

ཅ་ཅོའི་བསྟོད་བསྔགས་སྙན་ཡང་བྲག་ཆ་བཞིན།།

ཆ་ལུགས་ལང་ཚོ་མཛེས་ཀྱང་མྱུར་ཏུ་འཇིག།།

ཇ་སོགས་ལོངས་སྤྱོད་འཛོམ་ཡང་འཆི་ཁར་འདོར།།

ཉ་ལྟོ་བ་ལྟར་ཕྱི་མའི་དོན་སྒྲུབ་མཛོད།།

ཏ་མིང་རྒྱལ་བོའི་དཔལ་ཡང་རྒུད་གྱུར་ན།།

ཐ་མལ་ཕུན་ཚོགས་དག་ལ་ཡིད་བརྟན་ཅི།།

ད་ལྟ་ཉིད་ནས་འཁོར་བའི་སྐྱོན་བསམས་ཏེ།།

ན་རྒ་འཆི་བའི་སྡུག་བསྔལ་དྲུངས་འབྱིན་འཚལ།།

པ་ལ་ཤ་ཡི་ནགས་ལྟར་གྲངས་མེད་པའི།།

ཕ་མ་འདི་ཀུན་ཡལ་བར་འདོར་མི་རིགས།།

བ་མོ་ལྟར་དཀར་བྱང་ཆུབ་སེམས་མཆོག་གིས།།

མ་ལུས་འགྲོ་རྣམས་སྒྲོལ་ཕྱིར་སྙིང་སྟོབས་བསྐྱེད།།

ཙ་ཀོ་ར་བཞིན་མཐུན་འཇུག་རྒྱངས་བསྲིངས་ཏེ།།

ཚ་གྲང་ཁྱད་བསད་ཆོས་ལ་མ་འབད་ན།།

ཛ་ལང་དྲེགས་པའི་ཟོལ་གྱིས་བྲིད་གྱུར་ཀྱང་།།

ཝ་སྐྱེས་དཔོན་དུ་བསྐོས་ལྟར་ནམ་ཞིག་འཕུང་།།

ཞ་ལོང་སྐྱོན་དང་བྲལ་བའི་རྟེན་བཟང་འདི།།

ཟ་མ་ནོར་ཕྱིར་ཆུད་གཟོན་དོན་རེ་ཆུང་།།

འ་ཅག་སྙིང་བོ་མེད་པའི་ལུས་འདི་ལས།།

ཡ་མཚན་ཆོས་ཀྱི་སྙིང་བོ་ལེན་པར་རིགས།།

ར་གན་གསེར་ལྟར་བཅོས་པའི་ཚུལ་འཆོས་ནི།།

ལ་ལས་བསྟོད་ཀྱང་དམ་པས་ཁྲེལ་བའི་གནས།།

ཤ་རུས་གཏིང་ནས་གཡོས་པའི་དད་པ་ཡིས།།

ས་ལམ་རྟོགས་པའི་ཡོན་ཏན་སྒྲུབ་པར་འཚལ།།

ཧ་ལས་དུག་ལྟར་གནག་པའི་སེམས་རྒྱུད་འདི།།

ཨ་ཏི་ཤ་ཡི་མན་ངག་བདུད་རྩི་ཡིས།།

བྱང་ཆུབ་ལམ་དུ་བསྒྱུར་བའི་ཐབས་མཁས་ཀྱིས།།

ཉོན་མོངས་དུག་ལྔའི་དགྲ་བོ་གཞོམ་པར་འཚལ།།

ཅེས་རང་གཞན་ཆོས་ལ་བསྐུལ་བའི་གཏམ་ཨཏྤུལ་དཀར་བོའི་འཕྲེང་བ་ཞེས་བྱ་བ་འདི་ནི། ཆོས་སྨྲ་བ་༧བཙུན་པ་དཀོན་མཆོག་འཇིགས་མེད་དབང་བོའི་སྡེས་ཆོས་གྲྭ་ཆེན་པོ་བཀྲ་ཤིས་འཁྱིལ་གྱི་གཟིམས་ཁང་དུ་སྨྲས་སོ།།  །།

གསར་འགོད་པ། ནག་བཟའ་བློ་བཟང་ཆོས་གྲགས།