ཟས་རིགས་གཡོས་སྦྱོར་ལ་བྱང་ཆ་ལྡན་པའི་བོད་རིགས་བུ་མོ་སེམས་ཉིད་སྒྲོལ་མ་མཚམས་སྦྱོར་མདོར་བསྡུས།

   ངའི་མིང་ལ་སེམས་ཉིད་སྒྲོལ་མ་ཟེར། ཕ་ཡུལ་འཛམ་ཐང་ནས་ཡིན། སློབ་གྲྭ་མཐར་ཕྱིན་རྗེས་ཟས་རིགས་གཡོས་སྦྱོར་སྐོར་ལ་སྤྲོ་བ་ཆེན་པོ་ཡོད་པས། ཁྲིན་འདུ་མའེ་ཝེ་གཡོས་སྦྱོར་སློབ་གླིང་དུ་སོང་ནས་ལོ་གཉིས་རིང་ནུབ་ཟས་དང་རྒྱ་ཟས་གཡོས་ཐབས་སློབ་སྦྱོང་བྱས་པ་ཡིན། སྐབས་དེར་གཞུང་ལུགས་དང་ལག་ལེན་ཕྱོགས་གཉིས་ནས་སློབ་སྦྱོང་བྱས་པས། གཡོས་སྦྱོར་ལག་རྩལ་ལ་ཡར་སྐྱེད་ཆེན་པོ་ཐོབ་བྱུང་། ཉིས་སྟོང་བཅོ་བརྒྱད་ལོར་སློབ་གླིང་དེ་ནས་སློབ་མཐར་ཕྱིན་རྗེས། གྲོགས་པོ་ཞིག་དང་མཉམ་དུ་ཁྲིན་འདུ་གྲོང་ཁྱེར་ནས་ནུབ་ཟས་གཡོས་སྦྱོར་ཁང་ཞིག་གཉེར་བ་ཡིན། ལས་ཀ་དེ་གཉེར་ཞོར་དུ་བོད་ཟས་གཡོས་ཐབས་རང་སྦྱོང་བྱས་ཤིང་། ནུབ་ཟས་གཡོས་ཐབས་དང་བོད་རང་གི་ལྷད་མ་འདྲེས་པའི་བཟའ་བཅའི་རྒྱུ་ཆ་ཟུང་དུ་འབྲེལ་ནས་ཟས་རིགས་སྣ་ཚོགས་ཚོད་ལྟ་བྱས་མཐར། རོ་བཅུད་འཛོམས་ཤིང་ཐུན་མིན་གྱི་ཁྱད་ཆོས་ལྡན་པའི་ཟས་མཆོག་མང་པོ་ཞིག་གཡོས་ཐབས་ཤེས་པ་དང་། འཛད་སྤྱོད་པ་ཚོས་ཀྱང་དགའ་བསུ་ཆེན་པོ་ཐོབ་བྱུང་། དེར་བརྟེན་རང་ཉིད་ལ་འབྱོར་བའི་ལག་རྩལ་དེ་དག་མི་དེ་བས་མང་པོ་ལ་མཉམ་སྤྱོད་བྱེད་འདོད་སྐྱེས་པས། ཟས་རིགས་དེ་དག་གཡོས་ཐབས་བརྙན་ལ་ཕབ་ནས་དྲ་ལམ་དུ་སྤེལ་བ་ཡིན། དྲ་ལམ་དུ་སྤེལ་རྗེས་དྲ་གྲོགས་མང་པོར་སྦྱང་མོས་ཡོད་ཅིང་དགའ་བསུའང་ཆེན་པོ་ཐོབ་བྱུང་བས། རང་ཉིད་ཀྱིས་བདམས་པའི་ལམ་ཁ་དེ་ལ་ཡིད་ཆེས་སྔར་བས་ཇེ་བརྟན་དུ་གྱུར་སོང་། རྗེས་མར་རང་ཉིད་ཀྱི་གཡོས་སྦྱོར་ལག་རྩལ་འདི་གྲོགས་པོ་དེ་བས་མང་པོ་ལ་ཁྲིད་ནས་ཁོ་ཚོར་ཕན་པ་ཅུང་ཙམ་རེ་ཐོབ་པ་དང་། བོད་ཟས་ཀྱི་ཐུན་མོང་མ་ཡིན་པའི་ཐོན་རྫས་འགའ་རེ་གསར་བཟོ་བྱེད་ཐུབ་པའི་རེ་བ་ཡོད།

གཤམ་དུ་ཁོ་མོས་དངོས་སུ་གཡོས་སྦྱོར་བྱས་པའི་ཟས་རིགས་སྐོར་ཞིག་ཁྱེད་ཅག་གི་སྤྱན་ལམ་དུ་བསྟར་ཡོད་པས་ཀུན་གྱིས་དོ་ཁུར་དང་བསམ་ཚུལ་གནང་བའི་རེ་བ་ཡོད། 

རྩམ་གོར།

ཕྱུར་གོར།

རྩམ་ཞུན།

ཞོའི་སྤྲི་གོར།

ནས་ཀྱི་ཞོ་ཕོར།

བག་ཚ་མར་ཁུ།

ཞི་ལའི་རྣ་བ།

གྲོ་མའི་ཟས་རིལ་ཁུ་བ།

ཤ་མོ་སྐུད་ཐུག

ཞོ་སྲེག་མ།

འབྲེལ་གཏུག་བྱ་འདོད་པ་དག་གིས་གོང་གི་བཤེར་རིས་བརྒྱུད་འབྲེལ་བ་གནང་ཆོག

གསར་འགོད་པ། སྨར་ཁམས་མཁའ་འགྲོ་རྒྱལ།