༄༅། །བསླབ་བྱ་མུ་ཐི་ལིའི་འཁྲི་ཤིང་བཞུགས་སོ། །

ཀུན་མཁྱེན་འཇམ་དབྱངས་བཞད་པའི་རྡོ་རྗེས་མཛད།

  ན་མོ་མུ་གུ་རུ་མཉྫུ་གྷོ་ཥཱ་ཡ། སྟོན་པ་མཉམ་མེད་ཤཱཀྱའི་རྒྱལ་བོ་དང་། །བྱམས་དང་འཇམ་དབྱངས་ཇོ་བོ་ཡབ་སྲས་དང་། །རྒྱལ་བ་གཉིས་པ་རྒྱལ་བའི་དབང་བོ་སོགས། །བླ་མ་མཆོག་གསུམ་ལྷ་ཡིས་དུས་ཀུན་སྐྱོངས། །དགེ་ལེགས་རྩ་བ་མཆོག་གསུམ་ངོ་བོ་དང་། །ཡོན་ཏན་བསྟན་གཞི་བསྟན་འགྲོའི་སྲོག་ཡིན་ཕྱིར། ། ཡོངས་རྫོགས་བཤེས་གཉེན་ཚུལ་བཞིན་བསྟེན་པ་དང་། །བླ་མའི་རྣལ་འབྱོར་འབྲལ་མེད་སྙིང་ལྟར་སྐྱོངས། །དལ་འབྱོར་རྙེད་དཀའ་དོན་ཆེ་ཐོབ་དུས་འདིར། ། ཁེ་ཆུང་ཉེན་ཆེ་ཆོས་བརྒྱད་མཐོ་སྙེགས་སོགས། །ཚེ་འདིའི་འདུན་མ་སྤངས་ཏེ་རང་གཞན་གྱི། །དམ་ཆོས་སྙིང་བོ་ཆིག་དྲིལ་བྱེད་དུས་ཡིན། །མི་དགེའི་འབྲས་བུ་ངན་སོང་འཇིགས་བསམ་ལ། ། དཀོན་ཅོག་ཡོན་ཏན་དྲན་པའི་སྐྱབས་འགྲོ་དང་། །ལས་འབྲས་བསླུ་བ་མེད་ཚུལ་ཡང་ཡང་དུ། །ལེགས་བསམ་འདི་སྣང་ཆགས་ཞེན་གཅོད་པ་གཅེས། །ཚེ་འདིའི་སྣང་བ་ལོག་པར་མ་གྱུར་ཕྱིན། །བྱ་བ་གང་བྱས་དགེ་བར་མི་འགྲོ་བས། །མཐོ་སྙེགས་མི་བྱ་འདི་ལ་ནན་ཏན་སྒོམས། །རིགས་དྲུག་བཟང་ངན་མཐོ་དམན་གར་གནས་ཀྱང་། །བཙོན་ཁང་བཟང་ངན་མཐོ་དམན་ཇི་བཞིན་དུ། །ཡང་ཡང་བསམ་ལ་སྲིད་པ་རྒྱུ་དང་བཅས། །བཟློག་ཐབས་བདེན་བཞིའི་ལམ་ལ་ཡང་ཡང་དྲིལ། །འཁོར་བའི་སྣང་ཚུལ་སྡུག་བསྔལ་མ་ཤེས་པར། །རྣམ་དག་ངེས་འབྱུང་སྐྱེ་བ་མི་སྲིད་པས། །ཁམས་གསུམ་གར་སྐྱེས་བཤན་པའི་བཤའ་ལུག་བཞིན། །ལས་ཉོན་གཉིས་ཀྱིས་ཡང་ཡང་འཆི་ཚུལ་བསམ། ། ཚུལ་དེ་ཤེས་ཀྱང་འཆིང་བྱེད་ཀུན་འབྱུང་གི། ། རྩ་བ་བདག་འཛིན་ཕྲ་མོ་མ་བཅོམ་པར། །ཐོས་བསམ་རློམ་པ་དཀའ་སྤྱད་ཚུལ་སོགས་ཀྱིས། །མི་གྲོལ་དེ་ཕྱིར་ཟབ་ལམ་བདག་མེད་བཙལ། །ནམ་ཞིག་ཟབ་མོའི་ལྟ་དེ་རྙེད་པའི་ཚེ། །ཐག་ཁྲར་སྦྲུལ་བཞིན་ཕུང་བོ་བདག་མེད་པར། །རྟོགས་པས་ད་ལྟའི་འདི་བཞིན་ཆོས་བརྒྱད་ཀྱིས། །མི་འཁྱེར་རྟག་ཏུ་ངུ་བཞིན་ཚོལ་བར་རིགས། ། བདག་མེད་རྟོགས་ཀྱང་བྱང་ཆུབ་སེམས་བྲལ་ན། །ཚོགས་གཉིས་རྒྱ་ཆེན་ཡུན་རིང་སྤྱད་བྱས་ཀྱང་། ། ཞི་བའི་རྒུད་ལས་མི་གྲོལ་རང་དོན་གྱི། །གཅེས་འཛིན་བཅད་ནས་གཞན་དོན་ཕན་ཡོན་བསམ། །འགྲོ་རྣམས་ཕ་མར་གྱུར་དང་སྡུག་བསྔལ་ཚུལ། །རྨོངས་པས་བསྒྲིབས་དང་སྐྱོན་གྱིས་མནར་བའི་ཚུལ། །ཡང་ཡང་བསམས་ནས་སྙིང་རྗེའི་རྩ་བ་ཚུགས། །སེམས་བསྐྱེད་ཅེས་པའི་མིང་ལ་མ་འཁྲུལ་བར། །དགེ་བ་གང་བྱས་ངེས་པར་གཞན་དོན་དུ། །བྱེད་དམ་མི་བྱེད་རང་ལ་ལེགས་ལྟོས་ལ། །འགྲོ་མཐོང་ཙམ་གྱིས་སེམས་བསྐྱེད་དྲན་ནུས་མཛོད། །དེ་ལྟའི་བདག་མེད་ལྟ་དང་བྱང་ཆུབ་སེམས། །མེད་པར་ལྷ་བསྒོམས་སྔགས་བཟླས་ཚུལ་ཁྲིམས་སོགས། །བདག་འཛིན་བསྒོམས་པ་ལ་འགྲོ་མུ་སྟེགས་ཀྱིས། །བདག་འཛིན་ངང་ནས་ལྷ་བསྒོམས་སྔགས་སོགས་བཞིན། །མི་གྲོལ་ལམ་འདི་གཉིས་ལ་ནན་ཏན་སྐྱེད། །སེམས་དེ་བསྐྱེད་ཀྱང་ཕྱིན་དྲུག་སྤྱོད་པ་ལ། །བསྒྲུབ་པ་མེད་ན་སེམས་བཟང་ཙམ་ཡིན་པས། །ཕྱིན་དྲུག་སྤྱོད་དང་གཞན་དོན་བསྒྲུབ་པའི་ཆེད། །ཚོགས་བསགས་སྨོན་ལམ་སྒོ་བརྒྱ་འབྱེད་པར་བྱ། །སྣོད་རུང་ཐབས་མཆོག་འཇུག་སྒོ་དབང་ལ་ཞུགས། །དངོས་གྲུབ་རྩ་བ་དམ་ཚིག་སྡོམ་པ་འདི། །བསྲུང་ན་རྒྱལ་བ་སྲས་བཅས་བྱིན་རློབས་ཤིང་། །མཁའ་འགྲོས་བཀའ་བཞིན་སྒྲུབ་ཕྱིར་སྔགས་ལམ་མྱུར། །ངེས་པར་སྙིགས་དུས་ཚེ་གཅིག་རྫོགས་སངས་རྒྱས། །སྟེར་བྱེད་རིམ་གཉིས་གོ་རིམ་གྲངས་ངེས་ལ། །ཆོག་སྦྱིར་མ་འཇོག་ཡིད་ངོར་འཕྲོད་ངེས་ལ། །བསྒོམ་པའི་རྣལ་འབྱོར་ཨ་ཧོ་སྐལ་བ་བཟང་། །ལྷ་སྒོམ་ཙམ་མིན་སྦྱང་གཞི་སྦྱོང་བྱེད་ཀྱི། །ངོ་འཕྲོད་བསྒོམས་པས་རྫོགས་རིམ་མྱུར་སྐྱེ་ཞིང་། །ང་རྒྱལ་བསྒོམས་པས་བགེགས་ཟློག་ལྷས་བྱིན་རླབས། །གནད་གཉིས་ཚང་བའི་སྐུ་གསུམ་ལམ་ཁྱེར་སྒོམས། །གནད་བཞི་ལྡན་པའི་རྩ་རླུང་ཐིག་ལེ་ལ། །གནད་བསྣུན་ལས་རླུང་བཅད་དེ་སྟོང་བཞིའི་མཐར། །ལྷ་སྐུར་འགྲུབ་པའི་སྣང་ཕྱོགས་སྟོང་ཕྱོགས་ཀྱི། །མ་བཅོས་རྫོགས་རིམ་མཆོག་འདི་རྒྱལ་བས་བསྔགས། །ད་ལྟར་རྫོགས་རིམ་ཟབ་མོ་མ་ཐོབ་ཀྱང་། །ཡིད་ངར་སྐོར་དགུའི་བསྲེ་བ་ལེགས་སྦྱངས་པས། །འོད་གསལ་མ་བུ་འཕྲོད་པས་སྐྱེ་འཆིའི་འགང་། །སྤྲུལ་བའི་གར་གྱིས་བདུད་བཞི་ངེས་བཅོམ་སྟེ། །སྐྱེ་བ་གསུམ་བཞི་སོགས་ལ་མངོན་འཚང་རྒྱ། །དེ་བས་རིམ་གཉིས་ལུས་དང་སེམས་བཞིན་ཆོངས། །དེ་ལྟའི་ལམ་ལ་སྦྱོང་བའི་རྣལ་འབྱོར་བས། །ཉིན་མཚན་སོ་སོའི་ཀུན་སྤྱོད་ཐུན་མཚམས་སོགས། །མདོ་དང་རྒྱུད་སྡེ་རང་རང་གཞུང་བཞིན་དུ། །ཚ་གྲང་ལྟར་མིན་ཟུང་འབྲེལ་སྤྱོད་པ་གཅེས། །དེ་ལྟར་སྡོམ་པ་གསུམ་དང་རིམ་པ་གཉིས། །གདན་གཅིག་སྟེང་ནས་ཉམས་སུ་ལེན་པའི་ཚུལ། །རྡོ་རྗེ་འཆང་ནས་ཇོ་བོ་ཡབ་སྲས་དང་། །རྒྱལ་བ་གཉིས་པའི་ལུགས་ལ་དད་པ་དང་། །ཐུབ་བསྟན་ཡོངས་སུ་རྫོགས་པར་འཛིན་འདོད་ཅིང་། །བློ་གྲོས་ཆེན་པོ་ཅན་རྣམས་དཔྱོད་པར་འཚལ། །དེ་ལྟར་བགྱིས་པའི་རྣམ་དཀར་བྱ་བ་དེས། །སྲིད་ཞིའི་རྒྱུད་པའི་མུན་ཚོགས་ཀུན་བསལ་ཏེ། །ཚོགས་གཉིས་ཡོངས་སུ་རྫོགས་པའི་རྣམ་སད་འོད། །ལུས་ཅན་ཀུན་གྱིས་ཐོབ་པར་གྱུར་ཅིག་གུ། །ཞེས་ཐེག་ཆེན་རིམ་གཉིས་དང་བཅས་པའི་བསླབ་བྱ་མུ་ཐི་ལིའི་འཁྲི་ཤིང་ཞེས་བྱ་བ་འདི་ནི་རང་གི་སློབ་མ་གཞུང་ལུགས་རབ་འབྱམས་སྨྲ་བ་ཚེ་བློས་བཏང་གི་སྒྲུབ་པའི་རྒྱལ་མཚན་འཛིན་པའི་རྣལ་འབྱོར་བ་ལྷུན་གྲུབ་རྒྱ་མཚོས་ཞིང་ཁམས་ཀུན་ཁྱབ་ཀྱི་དྷུ་བེ་དང་བཅས་བསྐུལ་བའི་ངོར། ཤཱཀྱའི་དགེ་སློང་འཇམ་དབྱངས་བཞད་པའི་རྡོ་རྗེས་སྦྱར་བ་འདིས་ཀྱང་སྐྱེ་དགུ་ཀུན་ལ་ཕན་ཐོགས་པར་གྱུར་ཅིག །

གསར་འགོད་པ་འཇིགས་མེད་གྲགས་པ།