ལོ་སར་ལ་བཀྲ་ཤིས་བདེ་ལེགས།

འཇིགས་མེད་རྡོ་རྗེ།

དམ་ཆོས་ཉི་མ་འོད་པོ་ཆེ།།

ལུང་རྟོགས་གདམས་པའི་མཛོད་འཆིང་པ།།

འཕགས་མཆོག་སྤྲུལ་བའི་གར་བསྒྱུར་མཁན།།

སྨྲ་བའི་དབང་བོ་གཙུག་གིས་བསྟེན།།

ལྟ་བ་རྟེན་ཅིང་འབྲེལ་འབྱུང་བ།།

སྤྱོད་པ་འཚེ་མེད་ཞི་བདེའི་ལམ།།

ལས་འབྲས་བསླུ་མེད་སྐྱབས་ཀྱི་མཆོག།

བདག་གི་བཤེས་ཁྱེད་ཕྱག་གི་ཡུལ།།

འཆད་ལ་ཐོག་མེད་སྨྲ་བའི་སེང་།།

རྩོད་ལ་འགྲན་མེད་རིག་པའི་བུ།།

རྩོམ་ལ་དབྱངས་ཅན་ངག་གི་དཔལ།།

ང་ཡི་བླ་མ་སྐྱོབ་པའི་མགོན།།

      གནམ་ལོ་གསར་བའི་དུས་བཟང་ལ་སྐུ་ཚེ་རྒྱལ་མཚན་བརྟན་ཞིང་ཐུགས་བཞེད་ཡིད་བཞིན་འགྲུབ་པའི་བཀྲ་ཤིས་སྨོན་ཚིག་དང་བཅས་སློབ་འབངས་ཡོངས་ཀྱི་གྲལ་མཐའ་བ་སྨན་དམིགས་བུའམ་འཇིགས་མེད་རྡོ་རྗེ་རུ་འབོད་པས་གུས་ཕུལ།

ལོ་སར་ཤིས་ཚིག་དུང་གི་སྒྲ་དབྱངས།

                སྨར་ཁམས་པ་པད་དཀར་འབངས་ཀྱིས།

རྡུལ་དམར་བྱུགས་པའི་ཉི་གཞོན་འཛུམ་པ་དབང་ཕྱོགས་རི་ནས་ཚེས་པ་ཡིས། །

གླིང་བཞིའི་མཁའ་ཡི་པགས་པ་འཐུག་པོ་འོད་ཟེར་དྲ་བས་དྲས་པ་བཞིན། །

གྲུ་འཛིན་རི་ཡི་སྤོ་ལ་འགྱིང་བ་འཕྲོག་བྱེད་དཀར་བོའི་ངར་སྐད་ཀྱིས། །

སྲོག་གནས་མྱོས་པའི་མི་བསྲུན་ཡིད་ལ་འཇིགས་བརྒྱ་སྟེར་བའི་དགེ་ལེགས་བཀྱེས། །

ལེགས་བྱས་དེ་ཡིས་ཁ་བའི་མེ་ཏོག་རྐང་བར་བཀོད་པའི་རིགས་ཅན་གྱི། །

དཔྱོད་ལྡན་རྣམས་དང་དཔུང་བ་སྐྱེས་དག་དཔལ་དང་གྲགས་པས་རྒྱགས་པ་དང་། །

ལོ་མང་ཁུར་བའི་སྲོག་གི་ཀ་བ་བྲག་གི་ཁོང་གསེང་ལ་བཅོལ་ནས། །

ལང་ཚོའི་མཛེས་ལྡན་གཞོན་ནུའི་ཚོགས་ཀྱིས་རང་རིགས་སྲུང་བའི་ཚུགས་ཐུབ་ཤོག །

མུ་ཁྱུད་ལྟ་བུའི་ཀེ་ལ་ཤ་ཡང་རང་མདངས་དཀར་བོ་མ་ནོགས་ཤིང་། །

འགྱུར་སྐད་སྙན་པའི་ནགས་མའི་ཀླུང་ན་གཡུ་ཡི་ཡལ་ག་འབྲས་བུས་དུད། །

ཤོད་ཀྱི་སྤང་ལ་གནག་ཕྱུགས་ཁྱབ་པ་སྤྲོ་དགའི་ཡོ་ལང་དར་བ་ཡིས། །

ལྕགས་གླིང་ལོ་ཡི་ཟླ་བའི་ཕྲེང་བ་བཀྲ་ཤིས་སྟོང་གིས་འཕྱུར་བར་ཤོག །

གནམ་ལོ་གསར་བའི་སྨོན་ལམ་གཙང་མ།

ཀླུ་བློ་དར།

སྒྲིབ་གཉིས་ཀུན་སྤངས་ནམ་མཁའི་ཁྱོན་ཡངས་པོར།  །

ཤེས་བྱ་ཐམས་ཅད་མངོན་སུམ་ཡུལ་དུ་གནས།   །

ཇི་ལྟ་ཇི་རྙེད་མཁྱེན་པས་འགྲོ་བའི་མགོན།  །

རྐང་གཉིས་གཙོ་བོ་ཁྱོད་ལ་སྐྱབས་སུ་མཆི།  །

ཐུབ་པའི་བསྟན་པ་ཡུན་རིང་གནས་པ་འདི།  །

བསྟན་འཛིན་སྐྱེས་བུ་རྣམས་ཀྱི་བཀའ་དྲིན་ཡིན།  །

ཀླུ་སྒྲུབ་ཐོགས་མེད་ཟླ་བ་གྲགས་པ་སོགས།  །

རྒྱ་གར་པཎ་གྲུབ་རྣམས་ལ་གུས་པས་འདུད།  །

བོད་ཡུལ་མུན་པའི་གླིང་འདིར་སྒྲོན་མེས་སྒྲོན།  །

དམ་ཆོས་འོ་མཚོ་བོད་པའི་ཡུལ་ནས་འཁྱིལ།  །

ལམ་སྒྲོན་ལམ་རིམ་ལ་སོགས་རིམ་གྱིས་མཛད།  །

བཀའ་གདམས་བླ་མ་རྣམས་ལ་གསོལ་བ་འདེབས།  །

སྔོན་བྱུང་མཁས་པའི་མཛད་རྣམ་ཇི་བཞིན་དུ།  །

རྗེས་འཇུག་སློབ་མའི་ཉམས་ལེན་ལེགས་པར་མཛད།  །

དད་པའི་ཨ་ལོང་གཡོ་མེད་ལྷུན་པོ་བཞིན།  །

རྒྱུད་པའི་བླ་མ་རྣམས་ལ་ཕྱག་འཚལ་ལོ།  །

སྙིགས་དུས་དམ་ཆོས་ལས་སུ་མཛད་པ་འདི།   །

བྱང་ཆུབ་སེམས་དཔའ་ཡིན་པའི་རྟགས་སུ་ངེས།  །

ཉིན་མཚན་དབྱེར་མེད་ལས་ཀྱི་མཛད་པ་མཆོག  །

སྨྲ་མཁས་བཤེས་གཉེན་རྣམས་ཀྱི་ཞབས་ལ་འདུད།  །

སྲོག་ལྡན་སྐྱེ་འགྲོ་བཟང་ངན་ཐམས་ཅད་ཀྱང་།  །

སྔོན་བསགས་ལས་ཀྱི་བཀོད་པ་སྣ་ཚོགས་ཀྱིས།  །

ལུས་སྦྱིན་མཁན་དང་འབྲེལ་མེད་གཅིག་ཀྱང་མེད།  །

དྲིན་ཆེན་ཕ་མའི་བཀའ་དྲིན་མཚུངས་ཟླ་གྲལ།  །

ཡོངས་ཀྱིས་བཀུར་བའི་འགྲོ་བའི་བླ་མ་དང་།  །

པཎ་གྲུབ་བཅུ་བདུན་གྲུབ་ཆེན་བརྒྱད་ཅུ་སོགས།  །

བཀའ་གདམས་སྐྱེས་བུ་དམ་པ་རེ་རེ་འང་།  །

བྱམས་ལྡན་ཕ་མའི་དྲིན་ལས་མ་འདས་སོ།  །

སྤྱི་གཙུག་དད་པའི་ཞིང་ས་དཀོན་མཆོག་གསུམ།  །

ལས་དང་རྒྱུ་འབྲས་སེམས་ཀྱི་སྟེང་དུ་སྨིན།  །

གནམ་ལོ་གསར་བ་ཚེས་པའི་དུས་བཟང་འདིར།  །

སྐྱེ་རྒུ་ཡོངས་ལ་ནད་མེད་ཚེ་རིང་ཤོག  །

ལོ་སར་ལ་བཀྲ་ཤིས་བདེ་ལེགས་ཞུ།

སྟོབས་ལྡན་རྒྱལ།

བཀྲ་ཤིས་རྟགས་བརྒྱད་གཡང་ཁྱིམ་རྟེན་དུ་ཚེས།

བཀྲ་ཤིས་བདེ་ལེགས་བསྐལ་བའི་རྒྱན་དུ་ཤར། །

བཀྲ་ལ་བཀྲ་ཤིས་འཁྲུངས་བའི་གནམ་ལོ་ལ།།

བཀྲ་ཤིས་འཕེལ་བའི་ལེགས་ཚོགས་སྟོང་གིས་མཆོད། །

ཚེ་རིང་སྲུང་འཁོར་རིགས་དྲུག་ཀུན་ལ་སྨིན། །

ཚེ་རིང་ལོ་བརྒྱ་སྐྱེ་རྒུའི་ལུས་སུ་འཁོར། །

ཚེ་རིང་རྣམ་དྲུག་རྟག་བརྟན་འགྲོ་ལ་འཁྲུངས།

ཚེ་རིང་ཚེ་འཁོར་ཚེ་གཡང་དུས་ཀུན་ཤོག །

ལོ་གསར་བཟང་།

སྤྲེལ་རིན་བཟང་གིས།

འཇིགས་སྣང་ཁ་ཐུམ་རྒྱབ་པའི་ལྕགས་བྱི་ལོ།།

པྲོག་གསར་ནད་དུག་བཅས་ཏེ་བདེ་མོ་བྱོས།།

རེ་བ་སྟོང་གིས་བྱུག་པའི་ལྕགས་གླང་ལོ།།

ལྷ་དར་དཀར་བོ་ཞིག་གིས་བསུ་མ་བྱེད།།

གནམ་ལོ་གསར་དུ་ཚེས་པའི་རྟེན་འབྲེལ་གྱིས།།

བཤེས་གཉེན་དམ་པའི་མཛད་འཕྲིན་རྒྱས་པ་དང་།།

མ་ཡུམ་སློབ་གྲྭའི་མཚན་སྙན་རབ་འབར་དེ།།

ཆོལ་གསུམ་སྤུན་ཟླའི་འདོད་དོན་ལྷུན་འགྲུབ་ཤོག།

བཀྲ་ཤིས་གཡང་གི་ཚེས་པའི་ལོ་གསར་ནང་།།

དྲིན་ཅན་ཕ་མའི་སྐུ་གཟུགས་བདེ་ཐང་དང་།།

ཕུ་ནུ་མིང་སྲིང་རླུང་རྟ་ཡར་དར་བའི།།

བཀྲ་བདེ་ལེགས་གངས་ཅན་བོད་ལ་ཞུ།།