ང་ཁེར་རྐྱང་འདྲ་ཡང་དོན་གྱིས་གྲོགས་མཆོག་ཁྲི་མ་འབུམ།

   དེ་སྔོན་ཁ་པར་དང་སྐད་འཕྲིན་གྱི་ལམ་ནས་ཁྱོད་ལ་འགྲོ་རོགས་འདུག་རོགས་མེད་པར་གྲོགས་མེད་ཁེར་རྐྱང་མི་བྱེད་པར་རང་གི་བདེ་འཇགས་དང་ལུས་ཕུང་ལ་བདག་པོ་རྒྱགས་རོགས་ཞེས་བཤད་མཁན་མང་བོ་ཞིག་བྱུང་བས་རྐྱེན་བྱས་ཏེ།  ང་ཁེར་རྐྱང་འདྲ་ཡང་དོན་གྱིས་གྲོགས་མཆོག་ཁྲི་མ་འབུམ་ཟེར་བའི་ལན་ཞིག་འབྲི་བར་སེམས་སོང་།   སྤྱིར་གྲོགས་པོ་བཟང་བོ་སྨན་གྱི་ལྗོན་ཤིང་འདྲ་ཟེར་བ་ནི།  སྐྱིད་སྡུག་ལེགས་ཉེས་ཀྱི་བྱ་བ་གང་ལ་འཕྲད་ཀྱང་འགྱུར་བ་མེད་པར་ཕན་ཅི་ཐུབ་བྱེད་པ་ལ་ཟེར་བ་ལས།  དེ་རིང་ཁྱོད་ཀྱིས་མ་འཐུང་ན་ངས་ཡང་མི་ཟ་ཟེར་ནས་འདུག་ཀྱང་སང་ཉིན་ཕ་རོལ་བོ་ཅུང་ཙམ་རྒུད་པ་འམ་རང་ཉིད་ཀྱི་ཁེ་ཕན་ཕྲན་བུ་ཙམ་གྱི་ཆེད་དུ་བླ་བཙགས་རྐང་འདྲེན་བྱེད་མཁན་དག་ནི་གྲོགས་ངན་དུག་གི་སྡོང་བོ་ཟེར་བ་དེ་ཡིན། གྲོགས་པོ་བཟང་བོ་ཞིག་ཡིན་ན་ནི་ཁྱེད་རང་དཀའ་ངལ་ཆེ་ཤོས་ཀྱི་དུས་སུ་ལྷག་པར་ཁྱོད་ཀྱི་འགྲམ་དུ་ལངས་ནས་ཁྱེད་ལ་ཆར་རླུང་འགོག་འདོད་ཡོད་པ་དང་ཁྱེད་ལ་སྟོབས་ཤུགས་སྤྲོད་འདོད་ཡོད་པར་མ་ཟད།  ཁྱེད་རང་ལེགས་འགྲུབ་བྱུང་བའི་ཚེ་འང་ཕྲག་དོག་མི་བྱེད་པར་ཐག་ཉེ་རིང་གང་དུ་ཡོད་ཀྱང་ཁྱེད་ལ་སྨོན་འདུན་ཞུ་མཁན་དེ་ཡིན།

      真正的朋友，是在你最困难的时候，愿意站在你身边为你遮风挡雨，给予你力量，当你成功时，在远处默默为你祝福的人！

ང་ཁེར་རྐྱང་འདྲ་ཡང་དོན་གྱིས་གྲོགས་མཆོག་ཁྲི་མ་འབུམ།

རྭ་རྒྱ་འཇིགས་མེད་རྒྱལ་མཚན་གྱིས།

སྐྱབས་དཀོན་མཆོག་གསུམ་གྱི་བྱིན་རླབས་ཉི་མ་སྟོང་ལས་གཟི་བྱིན་འབར།།
ལྷ་ཡི་དམ་ཞི་ཁྲོའི་འཕྲིན་ལས་སྲིད་པ་གསུམ་ལས་རྣམ་པར་རྒྱལ།།
གྲོགས་ཆོས་སྐྱོང་སྲུང་མའི་དམ་ཚིག་འགྱུར་མེད་རྡོ་རྗེ་ཁམས་སུ་གྲུབ།།
ཡུལ་གཞི་བདག་དཀར་བོའི་སྡོང་གྲོགས་གློག་དམར་འཁྱུག་བཞིན་རྟག་ཏུ་འཁོར།།

       ཞེས་སྤྱི་ལོ་༢༠༢༠་ལོའི་སྤྱི་ཟླ་༩་བའི་ཚེས་༡༧་གྱི་མཚན་མོར་རྭ་རྒྱ་བ་འཇིགས་མེད་རྒྱལ་མཚན་གྱིས་གནའ་མཁར་ཟི་ལིང་གྲོང་ཁྱེར་གྱི་མཁར་སྤེའུ་ཚལ་དུ་ཡོད་པའི་གནས་མལ་བཀྲ་ཤིས་དོན་ཀུན་འགྲུབ་པའི་ལྡིང་ཁང་དུ་བྲིས། ཡིན་ན་ཡང་ཕྱི་ནང་གི་འགལ་རྐྱེན་སྣ་ཚོགས་ཀྱི་དབང་གིས་དེ་རིང་མ་གཏོགས་གྲོགས་པོའི་ཚོམས་སུ་འགོད་པའི་གོ་སྐབས་རེག་མ་བྱུང་།

བཛྲ་ཚུལ་ཁྲིམས་རྒྱ་མཚོས།

ལྡོང་ཡོན་ཏན་རྒྱ་མཚོས།

ཆོས་གྲོགས་ཁྱོད་ནི་རིགས་ཀྱི་བ་དན་ཡིན།།
ཆོས་གྲོགས་ཁྱོད་ནི་བདེན་པའི་བཙན་རྫོང་ཡིན།།
ཁྱོད་ཀྱི་ལྷག་བསམ་གངས་རིའི་མདངས་ལ་འདྲེས།།
ཁྱོད་ཀྱི་ཐུགས་སྟོབས་རྡོ་རྗེའི་བྲག་ལ་བཅོལ།།

ང་ཚོར་མཆོག་གསུམ་དམ་པའི་བྱིན་མཐུ་ཡོད།།
ང་ཚོར་ཆོས་སྐྱོང་སྲུང་མའི་འཕྲིན་ལས་ཡོད།།
ང་ཚོར་ཁྲི་འབུམ་བསམ་བློའི་རྒྱབ་དཔུང་ཡོད།།
ང་ཚོར་ཕྱོགས་ལས་རྣམ་རྒྱལ་དུས་བཟང་ཡོད།།

གསར་འགོད་པ།  རྒྱུ་ཐ་མཐོང་དགའ།