ལྟ་བའི་གསུང་མགུར་ཟབ་མོ་བཞུགས་སོ༎

ཟབ་མོ་རྟེན་འབྱུང་གི་དེ་ཉིད་ངོ་མཚར༎ 

ཇི་བཞིན་རྗེན་པ་རུ་སྟོན་པའི་བླ་མ།། 

བཀའ་དྲིན་འཁོར་མེད་དེ་སྙིང་དབུས་བཞུགས་ཤིག།  

གང་དྲན་ཐོལ་བྱུང་གི་ཚིག་གསུམ་སྨྲ་འོ༎ 

ཨ་མ་རྒན་མོ་དེ་ཡུན་རིང་སྟོར་བའི༎ 

བུ་ཆུང་སྨྱོན་པ་ང་ཅི་ཞིག་ལྟར་ཏེ༎ 

ཨ་མ་དྲིན་ཅན་དེ་ལྷན་ཅིག་འདུག་པ༎ 

ངོ་མ་ཤེས་པ་དེ་ཤེས་ལ་ཁད་སྣང་ངོ་ ༎ 

ཇོ་ཇོ་རྟེན་འབྱུང་དེས་ལྐོག་ཏུ་བསྙད་པས༎ 

ཡིན་ཡིན་མིན་མིན་དེ་ཨེ་ཡིན་སྙམ་མོ༎ 

གཟུང་འཛིན་སྣ་ཚོགས་འདི་ཨ་མའི་འཛུམ་བག།  

སྐྱེ་འཆི་འཕོ་འགྱུར་འདི་ཨ་མའི་རྫུན་ཚིག།  

བསླུ་མེད་ཨ་མ་ཡིས་ཁོ་བོ་བསླུས་སོང་༎ 

ཇོ་ཇོ་རྟེན་འབྱུང་དེས་སྐྱོབ་པར་རེ་འོ༎ 

རྣམ་པ་གཅིག་ཏུ་ན་ཨ་མ་རྒན་མོ༎ 

ཁོ་ནའི་དྲིན་གྱིས་ནི་གྲོལ་བར་རེ་སྟེ༎ 

གཟུང་འཛིན་འདི་ཉིད་ཀོ་འདི་ལྟར་ཡིན་ན༎ 

དུས་གསུམ་རྒྱལ་བས་ཀྱང་སྐྱོབ་ཐབས་མི་འདུག།  

འགྱུར་བ་སྣ་ཚོགས་འདི་འགྱུར་མེད་ཨ་མའི༎ 

རྣམ་འགྱུར་ཡིན་པས་ན་གྲོལ་རྒྱུ་འདུག་གོ།  

ཅིར་ཡང་མ་གྲུབ་པའི་བརྗོད་མེད་ཨ་མའི༎ 

ཅིར་ཡང་བརྫུ་བ་ཡི་ཕར་བརྟེན་ཚུར་བརྟེན༎ 

འདི་ཀ་ཙམ་ཞིག་ལ་གོ་རྒྱུ་འདུག་གོ།  

ཕ་རྒན་བཙལ་བས་ནི་མ་རྙེད་པ་དེ༎ 

མ་རྒན་རྙེད་པ་ཁོ་ཡིན་པར་འདུག་པས༎ 

ཨ་མའི་པང་ནས་ནི་ཕ་རྒན་རྙེད་པས༎ 

ཕ་མ་དྲིན་ཅན་གྱིས་བུ་ང་སྐྱོབ་སྐད༎ 

གཅིག་མིན་གཞན་མིན་གྱི་ཨ་མའི་བཞིན་རས༎ 

ཇོ་ཇོ་རྟེན་འབྱུང་གི་མེ་ལོང་ནང་ན༎ 

ཟིན་པ་མེད་ཚུལ་གྱིས་ཡོད་ཡོད་འདྲ་སྟེ༎ 

སྨྱོན་པ་ང་འདྲས་ནི་རྟོག་དཔྱོད་མ་ཞུགས༎ 

ཀླུ་སྒྲུབ་ཟླ་གྲགས་ཀྱིས་ཞལ་ཆེམས་རླུང་བསྐུར༎

འཇམ་དཔལ་སྙིང་བོ་ཡིས་བྱ་ཞིག་བཏང་བས༎ 

ཐག་རིང་འཚོལ་བ་ཡི་དཀའ་ལས་བཤོལ་ནས༎ 

ལྷན་ཅིག་གནས་པ་ཡི་མ་རྒན་མཐོང་རེ༎ 

ད་ལྟ་རང་རེ་ཡི་བློ་གསལ་འགའ་ཞིག།  

ཚུགས་ཐུབ་བདེན་གྲུབ་སོགས་བརྡ་ལ་ཞེན་པས༎ 

སྣང་བ་ལིངས་ལིངས་འདི་རང་སོར་བཞག་ནས༎ 

དགག་རྒྱུ་རྭ་ཅན་ཞིག་འཚོལ་བར་སྣང་སྟེ༎ 

སྒྲིབ་བྲལ་ཨ་མ་ཡི་བཞིན་རས་དེ་ན༎ 

ལང་ལང་ལིང་ལིང་འདི་ཡོད་སྐད་མི་འདུག།  

གནད་འགགས་མ་ཕིགས་པའི་བཤད་བཤད་མང་ཡང་༎ 

ཨ་མ་རྒན་མོ་དེ་བྲོས་དོགས་འདུག་གོ།  

ཡོད་ཞིག་ཡོད་མོད་ཀྱང་ད་ལྟའི་འདི་འདྲའི༎ 

རོང་རོང་འགལ་འདུ་ཅན་ཡིན་ཚོད་མི་སྣང་༎ 

ཕ་མ་མཛའ་གཅུགས་ཀྱི་འབྲལ་མེད་བག་ཕེབས༎ 

འཇམ་འཇམ་སྐྱིད་སྐྱིད་ཅིག་ཡིན་པར་སྣང་ངོ་༎ 

བྱེ་མདོ་རྣམ་རིག་དང་ཤར་གསུམ་མཁན་པོས༎ 

ཨ་མ་གླང་ཆེན་གྱི་ཐལ་དཀར་གཟུགས་ལ༎ 

བེམ་པོ་འཛུམ་རིས་ཀྱི་རྒྱ་སྟག་ཁྲ་བོ༎

འཛིན་པ་ཀླད་མེད་ཀྱི་སྤྲེ་འུ་སྨྱོན་པ༎ 

གཉིས་མེད་ཚུགས་ཐུབ་ཀྱི་དོམ་བུ་ངར་མའི༎ 

ཐ་སྙད་སྣ་ཚོགས་ཤིག་འདོགས་པར་བྱེད་ཀྱང་༎ 

ཨ་མ་རྒན་མོ་དེ་སྟོར་ནས་འདུག་གོ།  

ས་རྙིང་ཀར་འབྲུག་གི་མཁས་གྲུབ་མང་པོས༎ 

གསལ་སྟོང་འཛིན་མེད་ཀྱི་རང་གི་རིག་པ།།  

ཀ་དག་ལྷུན་གྲུབ་ཀྱི་ཀུན་བཟང་རང་ཞལ༎ 

མ་བཅོས་ལྷན་སྐྱེས་ཀྱི་ཕྱག་རྒྱ་ཆེན་པོ༎ 

ཡོད་མིན་མེད་མིན་གྱི་ཁས་བླངས་བྲལ་སོགས༎ 

སྣ་ཚོགས་ཐ་སྙད་ཀྱི་ཞལ་ཕོ་སྒྲོགས་ཀྱང་༎ 

གཤིས་ལུགས་ཐིགས་པོ་ཞིག་ཡིན་ན་ལེགས་ཏེ༎ 

མཛུབ་མོ་འཛུགས་ས་དེ་ཅི་ཞིག་ཡིན་ཨང་༎ 

ཕྱི་དོན་མ་བཤིག་པས་བློ་ཚུབས་མི་དགོས༎  

དོན་སྨྲ་སྡེ་གཉིས་རྣམས་དགྱེས་དགྱེས་མཛོད་ཅིག། 

རང་རིག་མ་ཡིན་ཀྱང་ཚད་གཞལ་འཐད་པས༎ 

རྣམ་རིག་སྨྲ་བ་ཀུན་དགྱེས་དགྱེས་མཛོད་ཅིག།  

རང་མཚན་མ་གྲུབ་ཀྱང་རྟེན་འབྲེལ་བཀྲ་བས༎ 

ཤར་གསུམ་མཁན་པོ་ཀུན་དགྱེས་དགྱེས་མཛོད་ཅིག།  

གསལ་སྟོང་མི་འགལ་བས་བཟུང་ཀྱང་ཆོག་གི།  

སློབ་བཤད་རྒྱུད་འཛིན་རྣམས་དོགས་ཆུང་མི་དགོས༎ 

ཀ་ནས་དག་ན་ཡང་བཟང་ངན་འཐད་པས༎ 

རིག་འཛིན་ཞིག་པོ་རྣམས་བཟང་ཞེན་མི་དགོས༎ 

བཅོས་ནས་བསྒོམ་ན་ཡང་ལྷན་སྐྱེས་འཆར་བས༎

རྟོགས་ལྡན་རྒན་པོ་རྣམས་ཨུ་ཚུགས་མི་དགོས༎ 

ཡོད་མེད་སྤྲོས་བྲལ་དེ་ཁས་བླངས་ཆོག་པས༎ 

རྟོག་གེ་མགོ་མཁྲེགས་རྣམས་ཚབ་ཚུབ་མ་བྱེད༎ 

འོན་ཀྱང་གཞུང་ལུགས་ལ་སྦྱངས་བ་ཆུང་རྣམས༎ 

ཐ་སྙད་སྦྱོར་ཚུལ་ཞིག་མ་མཁྱེན་ཡིན་སྲིད༎  

ཁོ་བོ་ཁྱེད་ཅག་ལ་མི་གུས་མ་ལགས༎ 

ཕོག་ཐུག་བྱུང་ན་ནི་བཟོད་པར་མཛོད་ཅིག།  

ཁོ་བོ་ཀུན་ཤེས་ཀྱི་ཤར་པོ་མིན་ཡང་༎ 

ཕ་མེས་གཞུང་ལུགས་ཀྱི་རྟ་ཕོ་བཟང་པོ༎ 

རྟག་སྦྱོར་གུས་སྦྱོར་གྱིས་ཞོན་ཚུལ་མཁས་པས༎ 

གཅིག་རྡུགས་འཕྲང་ལས་ནི་ཐར་བར་རེ་འོ༎ 

འཚོལ་དགོས་མི་འདུག་སྟེ་འཚོལ་མཁན་རང་ཡིན༎ 

བདེན་པར་མི་ཞེན་ཏེ་རྫུན་པ་ཉིད་ཡིན༎   

རྫུན་པ་མི་བདོག་སྟེ་བདེན་པ་རང་ཡིན༎ 

ཆད་མིན་རྟག་མིན་ལ་ངལ་གསོས་ཆོག་གོ།  

ཨ་མ་མ་མཐོང་ཡང་མིང་ཙམ་ཞིག་གིས༎ 

ཕ་མ་དྲིན་ཅན་དེ་ཡུན་རིང་སྟོར་བ།།  

གམ་ན་འདུག་པ་བཞིན་འཕྲད་པར་སྣང་གི། 

ཀླུ་སྒྲུབ་ཡབ་སྲས་དེ་བཀའ་དྲིན་ཆེ་འོ༎ 

བློ་བཟང་གྲགས་པ་དེ་བཀའ་དྲིན་ཆེ་འོ༎ 

དྲིན་ཅན་བླ་མ་དེ་བཀའ་དྲིན་ཆེ་འོ༎ 

བཀའ་དྲིན་གཟོ་ཐབས་སུ་ཨ་མ་མཆོད་དོ༎ 

སྐྱེ་མེད་བརྗོད་བྲལ་གྱི་ཨ་མ་རྒན་མོས༎ 

རིག་པའི་བུ་ཆུང་དང་ལྷན་ཅིག་འཛོམས་ནས༎ 

ཀུན་བཟང་སྤྱོད་པ་ཡི་དགའ་སྟོན་ཆེན་པོས༎ 

མ་རྒན་འགྲོ་བ་ཀུན་གཏན་བདེར་འཁྲིད་དོ༎ 

ཨེ་མ་ལ་རོལ་བའི་རྡོ་རྗེ༎ 

ཨ་འོ་ལ་སྐྱིད་པའི་རྐང་བྲོ༎ 

འོ་ན་ལ་འདི་རུ་བརྡུང་ནས༎ 

ཨ་ཧོ་ཡ་དཀོན་མཆོག་མཆོད་དོ༎

    ཅེས་ཨ་མ་ངོ་ཤེས་ཀྱི་རྫུན་ཚིག་བྲག་ཆའི་སྒྲ་དབྱངས་འདི་ཡང་དབུ་མ་ཆེན་པོ་ལ་ལྷག་པར་མོས་པའི༧ལྕང་སྐྱ་རོལ་བའི་རྡོ་རྗེས་སྤྲུལ་བའི་གནས་མཆོག་རི་བོ་རྩེ་ལྔར་སྨྲས་པས་ཡི་གེ་བ་ནི་དགེ་སློང་དགེ་ལེགས་ནམ་མཁའོ༎

རྩོམ་ཡིག་ཕབ་བཤུ་བ་དང་མཁོ་སྤྲོད་པ། འཇིགས་རྣམ།