བཟང་ཐོག་གི་བཟང་།

ལྡོང་ཡོན་ཏན་རྒྱ་མཚོས།

རིས་མེད་སྨོན་ལམ་བཏབ་ན་ལོས་བཟང་མོད།།

རིས་མེད་ལག་ལེན་བྱས་ན་དེ་བས་བཟང་།།

ལྟ་གྲུབ་རིགས་པས་བཟུང་ན་ལོས་བཟང་མོད།།

ལྟ་ཚུལ་ཨ་འཐས་མིན་ན་དེ་བས་བཟང་།།

བླ་མ་མང་བོ་ཡོད་ན་ལོས་བཟང་མོད།།

བླ་མ་བསྟེན་ཚུལ་འགྲིག་ན་དེ་བས་བཟང་།།

ཐོས་པས་བློ་མིག་ཕྱེས་ན་ལོས་བཟང་མོད།།

ཐོས་དོན་རྒྱུད་ལ་སྦྱར་ན་དེ་བས་བཟང་།།

དབང་བསྐུར་མང་བོ་ཐོབ་ན་ལོས་བཟང་མོད།།

དབང་བརྡ་གསལ་བོར་འཕྲོད་ན་དེ་བས་བཟང་།།

གཞན་ལ་འཚེ་བ་སྤངས་ན་ལོས་བཟང་མོད།།

གཞན་ཕན་ཅི་ནུས་བསྒྲུབས་ན་དེ་བས་བཟང་།།

སྲོག་བསླུ་ཚེ་ཐར་བཏང་ན་ལོས་བཟང་མོད།།

སྲོག་ལྡན་འཆམ་མཐུན་བྱས་ན་དེ་བས་བཟང་།།

རྟེན་གསུམ་ལྷ་ཁང་བཞེངས་ན་ལོས་བཟང་མོད།།

རྟེན་འབྱུང་ཆོས་ཉིད་རྟོགས་ན་དེ་བས་བཟང་།།

མ་ཎི་རྡོ་ལ་བརྐོས་ན་ལོས་བཟང་མོད།།

མ་ཎིའི་གོ་དོན་བསླབས་ན་དེ་བས་བཟང་།།

གཟུངས་སྔགས་རས་ལ་དཔར་ན་ལོས་བཟང་མོད།།

གཟུངས་ཀྱི་བརྡ་དོན་ཁྲོལ་ན་དེ་བས་བཟང་།།

མཐུན་སྒྲིལ་ལག་རྡང་སྦྲེལ་ན་ལོས་བཟང་མོད།།

མཐུན་སྒྲིལ་གནད་དུ་སོང་ན་དེ་བས་བཟང་།།

སློབ་གསོའི་དར་ཆེན་ཕྱར་ན་ལོས་བཟང་མོད།།

སློབ་གསོ་སེམས་ལ་བཏང་ན་དེ་བས་བཟང་།།

ཕ་སྐད་གཙང་མ་བཤད་ན་ལོས་བཟང་མོད།།

ཕ་མའི་སེམས་ཁམས་མ་བོར་དེ་བས་བཟང་།།

ཀ་ཁའི་ཡིག་གཟུགས་འགྲན་ན་ལོས་བཟང་མོད།།

ཀ་ཁའི་བླ་སྲོག་བསྲུངས་ན་དེ་བས་བཟང་།།

རྩོམ་ཡིག་ཆད་མེད་སྤེལ་ན་ལོས་བཟང་མོད།།

རྩོམ་གྱི་ནང་དོན་གཙང་ན་དེ་བས་བཟང་།།

ལོ་རྒྱུས་དཔྱད་གླེང་གནང་ན་ལོས་བཟང་མོད།།

ལོ་རྒྱུས་དྲང་མོར་བཤད་ན་དེ་བས་བཟང་།།

ཁོར་ཡུག་སྲུང་སྐྱོབ་བྱས་ན་ལོས་བཟང་མོད།།

ཁོར་ཡུག་མ་སྦགས་བཞག་ན་དེ་བས་བཟང་།།

རྒན་གསོའི་ཁང་བཟང་བསྐྲུན་ན་ལོས་བཟང་མོད།།

རྒན་པར་བྱམས་སྐྱོང་ཆེ་ན་དེ་བས་བཟང་།།

རྣམ་གྲངས་ཆེ་ཆུང་ལོན་ན་ལོས་བཟང་མོད།།

རྣམ་དག་མི་གཤིས་མ་བོར་དེ་བས་བཟང་།།

སྐད་འཕྲིན་བཀོལ་སྤྱོད་ཤེས་ན་ལོས་བཟང་མོད།།

སྐད་ཆར་འགན་འཁུར་ཡོད་ན་དེ་བས་བཟང་།།

ཚོགས་སྡེ་སྣ་ཚོགས་བཙུགས་ན་ལོས་བཟང་མོད།།

ཚོགས་གཙོའི་བསམ་སྤྱོད་ཡག་ན་དེ་བས་བཟང་།།

སྐྱེས་སྐར་སྐྱིད་ཀྱིས་རོལ་ན་ལོས་བཟང་མོད།།

སྐྱེས་པའི་དོན་གོ་ཆོད་ན་དེ་བས་བཟང་།།

སྙིང་རྩ་ལྕགས་ལས་སྲ་ན་ལོས་བཟང་མོད།།

སྙིང་ལ་འཕར་ལྡང་ཡོད་ན་དེ་བས་བཟང་།།

མདུན་བསྐྱོད་སྤོབས་པ་ཡོད་ན་ལོས་བཟང་མོད།།

མདུན་ལྗོངས་གསལ་བོར་མཐོང་ན་དེ་བས་བཟང་།།

ཆོལ་གསུམ་བོད་ཡིན་ཟེར་ན་ལོས་བཟང་མོད།།

ཆོལ་ཁའི་འཐེན་འཁྱེར་མེད་ན་དེ་བས་བཟང་།།

                                  ༢༠༡༨-༡༠-༧