རྨེའུ་ཞེས་པའི་རུས་མིང་བྱུང་ཚུལ་ཅུང་ཙམ་གླེང་བ།

   ས་གནས་སོ་སོའི་ལོ་རྒྱུས་ནི་བོད་ཀྱི་ལོ་རྒྱུས་ཀྱི་ཡན་ལག་ལྟ་བུ་ཡིན་སྟབས། ས་གནས་ཤིག་གི་ལོ་རྒྱུས་ལ་རྨས་སྐྱོན་ཤོར་ཚེ། དོན་གྱིས་བོད་ཀྱི་ལོ་རྒྱུས་ཀྱི་སྟོང་ཆ་བསྐང་མ་ཐུབ་པར་ཅི་ལ་མིན། སྐྱེ་གཟུགས་མཛེས་པའི་བོད་ཀྱི་ལོ་རྒྱུས་ཀྱི་རྐང་ལག་གང་རུང་ཞིག་ལ་སྐྱོན་བྱུང་བ་དང་གཉིས་སུ་མ་མཆིས། དེ་བས་རང་རང་སོ་སོའི་ས་གནས་ལོ་རྒྱུས་འབྲི་རྒྱུ་ནི་ས་གནས་དེའི་སྨྱུག་འཛིན་པ་ཀུན་གྱི་ཕྲག་ཏུ་བབས་པའི་གཡོལ་མེད་ཀྱི་འོས་འགན་ཞིག་ཏུ་གྱུར་ཡོད་སྟབས། དེ་ལ་གཡོལ་ཐབས་བྱེད་པ་ནི་དོན་གྱིས་ཁྱོད་རང་འགན་ཁུར་གྱི་འདུ་ཤེས་བྲལ་བའི་མི་ཞིག་ལ་ངོས་བཟུང་ཡང་མི་ཆོག་པ་ཅི་ཡང་མེད་དོ།། ལོ་འདི་དག་ལ་རྨེའུ་སྐོར་སྲིད་གཞུང་དང་རྨེའུ་སྐོར་སློབ་ཆུང་གཉིས་ཀྱི་བསྒྲགས་བྱང་སོགས་སུ་རྨེའུ་དང་དམེ་གཉིས་ཀྱི་ཐ་སྙད་འདི་ཡིད་ལ་གང་དྲན་དང་ལག་ལ་གང་ཐོན་ཐོན་འབྲི་མཁན་མང་བར་མ་ཟད། སྤྱིར་བོད་ཀྱི་བརྡ་སྤྲོད་ལ་མི་མཐུན་པའི་ཡི་གེ་གསར་གཏོད་བྱེད་མཁན་ཡང་ཡོད་སྟབས། ཁོ་བོའི་སེམས་སུ་དོགས་མི་བདེ་བར་གྱུར། རྒྱུ་མཚན་ས་ཆ་འདི་ནས་སྔོན་གྱི་ལོ་རྒྱུས་ཡིག་ཚང་་དང་བསང་ཡིག་སོགས་སུ༼རྨེའུ༽ ཞེས་པ་འདི་བྲིས་པ་མ་གཏོགས་ད་དམེ་འབྲི་སྲོལ་ཕ་ཆེར་མེད་པར་སྣང་། ལྷག་ཏུ་ན་ནིང་དོ་ཚུགས་ཤིག་ལ་ལོ་རྒྱུས་ལ་བརྩི་བཀུར་བྱེད་མི་ཤེས་པ་དག་གིས་བསྒྲགས་བྱང་གསར་རྣམས་དང་འགྲོགས་ནས་མིང་ཚིག་གསར་བ་རེ་ཟུང་ས་འདིར་ཆ་མེད་རྒྱུས་མེད་རེ་བྱུང་བ་ནི་དོན་གྱིས་ས་གནས་དང་ལོ་རྒྱུས་ལ་བརྩི་བཀུར་མ་བྱས་པ་ལགས།

   རྨེའུ་ཞེས་པའི་མིང་འདི་ནི་རུས་མཛོད་ཀྱི་ཁུངས་དང་བྲལ་ཚེ་གང་བྲིས་ཀྱང་མི་ཆོག་པ་མེད་མོད། ༼རྨེའུ༽ཞེས་པ་ནི་རུས་རྒྱུད་ཀྱི་ཁུངས་དང་འབྲེལ་བའི་ཐ་སྙད་ཅིག་ཡིན་སྟབས་འདི་ལ་གང་བྱུང་བྱུང་དུ་བསྒྱུར་བཅོས་གཏོང་བར་མི་རིགས་སོ།། བོད་ཀྱི་ས་གནས་སོ་སོ་ནི་གནའ་བོའི་ལོ་རྒྱུས་ཀྱི་གཏེར་མཛོད་རེ་རེ་ཡིན་པ་དང་། ས་གནས་དེ་དང་འབྲེལ་བའི་གནའ་བོའི་མིང་ཚིག་རེ་རེ་ནི་ལོ་རྒྱུས་ཀྱི་གླེགས་བམ་རེ་ཅི་ལ་མིན། དེ་བས་གྲོགས་རིགས་པ་སྨྲ་བ་རྣསམ་ལ་གྲོས་མོལ་གྱི་ཚུལ་དུ་རང་ས་གནས་ཀྱི༼རྨེའུ༽ ཞེས་པའི་སྐོར་ནས་གླེང་གཞི་ཞིག་གི་དོད་དུ་ཅུང་ཟད་ཙམ་བགྲོ་བར་འདོད་དོ།།

   མངའ་རིས་དང་རྔ་བའི་བར་གྱི་འབྲེལ་བ་ནི་འབྱུང་ཁུངས་དང་བྱུང་དངོས་ཀྱི་འབྲེལ་བ་ཡིན་ཚུལ་གནའ་མི་རྒན་པོའི་ངག་རྒྱུན་དུའང་། རྔ་བ་མ་རེད་མངའ་བ་རེད།། སྟོད་མངའ་རིས་ཆད་ཀི་དུམ་བུ་རེད། ཤ་སོག་པ་བགོས་པའི་ཚལ་བ་རེད། ཅེས་རྒན་གཞོན་ཀུན་གྱི་ཁ་ལ་རླུང་ལྟར་གྲགས་པ་དེས་ཀྱང་གསལ་བཤད་བྱས་ཡོད་ལ། དཔའ་བོ་གཙུག་ལག་ཕྲེང་བས། རྗེ་དམིགས་པ་དང་རུས་མིང་རྨེའུ་དང་འབྲོ་བྱ་བའི་བློན་པོ་སུམ་གྱིས་སྣུབས་ཡུལ་གླིང་དགུ་ན་སྣུབས་རྗེ་དམིགས་པ་བློན་པོ་རྨེའུ་དང་འབྲོ། སྣུབས་ཡུལ་གླིང་དགུ་དབང་དུ་བྱས་ཚུལ་གསུངས། སྟོད་མངའ་རིས་ནས་རྨེའུ་ངམ་ཆེན་སྐྱོལ་པོ། དེའི་སྲས་འདུལ་བ་བརྩོན་དང་གཡུ་གཤིན་གཉིས་བྱུང་བ་དང་། དེའི་སྲས་རྨེའུ་རྒྱལ་གྱི་ལྷུན་པོ་དབུས་སུ་ཡོང་སྟེ་གཡས་རུ་ཤངས་ཀྱི་སར་གཞིས་བཟུང་ཞིང་རིགས་རྒྱུད་བསྐྱེད། དེ་བཞིན་དུ་སྟོང་ཚབ་དང་རྨེའུ་ཡེ་ཤེས་གཡུང་དྲུང་སོགས་ཀྱིས་སྙེ་བཟང་རིར་གནས་བཅས། དེ་ལས་སྙེ་མོ་འཕགས་ཕུའི་རྨེའུ་ཚང་སོགས་ཀྱིས་ཆོས་བོན་རིས་མེད་ཀྱི་དྲང་སྲོང་རིག་འཛིན་མང་དུ་འཁྲུངས་པར་གྲགས། སྙེ་མོ་ཟངས་ཀྱི་ས་ནི་དེང་སང་སྙེ་མོ་རྫོང་བྱ་བའི་ཡུལ་ཡིན། བོད་ཀྱི་རྒྱལ་བོ་ཁྲི་སྲོང་ལྡེ་བཙན་གྱི་དུས་སུ་སྟོད་མངའ་རིས་སོགས་ནས་མདོ་སྨད་དུ་རུས་མིང་རྨེའུ་ཅན་གྱི་ཡུལ་སྡེ་ཁག་ཅིག་རི་སྤོར་བའི་འགོ་བརྩམ་ཏེ་རྨེའུ་པད་སྡོང་སྤྲུགས། རྨེའུ་མ་ར་སྙ་སོགས་ལ་རྫ་དམར་རྨེའུ་ཚང་ཞེས་པ་ནི་ནག་ཆུ་ཁར་རྫ་མ་ཟེར་བའི་ས་མིང་ཞིག་ཡོད་པར་གྲགས། ས་དེ་ལ་དེང་སང་ཡང་རྫ་མར་ཟེར་ཞིང་། རྫ་མར་ཡུལ་ཤོག་ཡོད་ས་དེ་ཡིན་པར་བཤད།

   དུས་དེ་ནས་ནས་རིམ་གྱིས་ས་གླང་ལོ༨༦༩ཡས་མས་སུ་མདོ་ཁམས་རྔ་བའི་ཡུལ་དུ་ཡོང་སྟེ་གཞིས་ཆགས་པར་གྲགས་སོ།།རྔ་ཡུལ་དུ་ཡོང་དུས་རྨེའུ་ཚང་དང་། བུ་ནང་འོན་པོ་ཚང་། དབོན་པའི་སྒར་བ་ཚང་། མཁར་གྱི་རྨེའུ་ཕྱུག་ཚང་། གྱོང་མང་མོ་བ་ཚང་། རྨེའུ་སྒང་ཚང་། རྨེའུ་མགར་ཚང་བཅས་བྱུང་། དེའི་ཡར་སྔོན་དུ་ནས་རྔ་བའི་ཡུལ་འདིར་གནའ་བོའི་རུས་མིང་གཉན་མཁར་བ་གསུམ་གྱིས་མཚོན་པའི་ཡུལ་གཞན་གྱི་རིགས་རྒྱུད་ཅིང་མང་བོ་ཡོད་ཚུལ་ཡང་ཞོར་དུ་ཤེས་དགོས་ལ་དག་གིས་ས་འདིར་གཞི་བཟུང་བར་གྲགས། ཨ་ཁུ་ཆོས་འཕེལ་གྱིས་ཁྱིམ་ཁག་བཅོ་བརྒྱད་ཙམ་བྱུང་བར་གཞིགས་ན། རྗེས་སུ་རྨེའུ་ཚང་གིས་རྔ་བའི་ས་ཆར་དབང་བསྒྱུར་བའི་སྟོབས་ཤུགས་ཆེ་རུ་བྱིན་ནས་ཁོ་རང་རང་གི་ཕ་ཡུལ་གྱི་མིང་བརྗེས་པའི་སླད་དུ་རྨེའུ་ཚང་གི་མིང་ཅན་ཡོད་སར་མངའ་བ་ཞེས་པའི་བཏགས་ཤིང་། དེའི་རྗེས་སུ་ཡུན་གྱིས་རྔ་བར་བསྒྱུར་བ་ཨེ་ཡིན་སྙམ་མོ།།