རིམས་ནད་ལས་མྱུར་དུ་གྲོལ་བའི་ཕྱིར་བླ་མ་ཡི་དམ་དབྱེར་མེད་ལ་གསོལ་བ་འདེབས་པ་སྙིང་གི་གདུངས་དབྱངས།

བཛྲ་ཚུལ་ཁྲིམས་རྒྱ་མཚོ།

མ་ལུས་རྒྱལ་བའི་གདུང་འཚོབ་བླ་མ་དང་།།

རྒྱལ་ཀུན་ཐུགས་རྗེའི་གཏེར་ཆེན་སྤྱན་རས་གཟིགས།།

དབྱེར་མེད་སྤྱི་གཙུག་རྒྱན་དུ་སྤྱངས་དྲངས་ཏེ།།

བདག་གཞན་འཇིགས་ལས་གྲོལ་ཕྱིར་གསོལ་བ་འདེབས།།

སྔོན་ཚེ་བྱོན་པའི་ཉན་རང་བྱང་སེམས་དང་།།

སངས་རྒྱས་ཀྱིས་ཀྱང་མ་ཐུལ་སྙིགས་མའི་འགྲོར།།

ལྷག་པར་བརྩེ་བ་སྤྱན་རས་གཟིགས་དབང་དང་།།

དབྱེར་མེད་བླ་མས་བདག་ཅག་བསྐྱབ་ཏུ་གསོལ།།

བསམ་བློ་མི་གཙང་ཉོན་མོངས་དུག་གིས་གང་།།

ཀུན་སྤྱོད་མི་གཙང་མི་དགེ་བཅུ་ལ་སྤྱོད།།

དུས་ངན་སྙིགས་མའི་འགྲོ་འདི་ནད་ངན་གྱིས།།

མནར་བའི་ཚུལ་ལ་ཁྱེད་ཀྱིས་ཐུགས་རྗེ་གཟིགས།།

ཕ་མ་བུ་ཕྲུག་གཉེན་བཤེས་གྲོགས་མཆེད་བར།།

བྱམས་དང་བརྩེ་བའི་དྲོད་འཁོལ་ཆེས་ཆེར་ཞན།།

ཁྲེལ་དང་ངོ་ཚའང་མེད་པ་མི་ཡི་གཤིས།།

རྨང་ནས་བོར་བ་སྙིགས་མའི་འགྲོ་འདི་སྐྱོབ།།

ཆོས་པར་རློམ་ཡང་ཆོས་ལ་དད་པ་ཞན།།

ལས་འབྲས་ཁ་ནས་བཤད་ཀྱང་ཁོག་ན་མེད།།

རང་ཉིད་ཉེས་པའི་སྡུག་ཡུས་ཆོས་ལ་འདོན།།

སྙིགས་དུས་ཆོས་པ་རྣམས་ལ་ཐུགས་རྗེ་གཟིགས།།

ཡོན་ཏན་འབྱུང་གནས་བླ་མར་འདྲ་མཉམ་གླེང་།།

དངོས་གྲུབ་རྩ་བ་ཡི་དམ་ལྷ་ལ་སྨོད།།

བསླུ་མེད་དཀོན་མཆོག་གསུམ་ལ་བསྐུར་བ་འདེབས།།

དུས་ངན་སྙིགས་མའི་འགྲོ་འདིར་ཐུགས་རྗེ་གཟིགས།།

བདེ་ལ་སྲེད་ཀྱང་བདེ་བའི་རྒྱུ་ལ་སྡང་།།

སྡུག་བསྔལ་མི་འདོད་དེ་རྒྱུ་འབད་པས་སྒྲུབ།།

བླང་དོར་ལོག་པར་སྤྱོད་པ་སྙིགས་མའི་འགྲོར།།

བརྩེ་བས་གཟིགས་ལ་མྱུར་དུ་བསྐྱབ་ཏུ་གསོལ།།

མཆིལ་མ་གནམ་འཕེན་རང་གི་གདོང་ཇི་བཞིན།།

རང་བྱུང་ཁོར་ཡུག་རང་གིས་ཉམས་བྱས་པས།།

འབྱུང་བཞིའི་འཇིགས་པས་རང་ཉིད་ཕུང་བྱེད་པའི།།

སྙིགས་མའི་འགྲོ་འདི་ཐུགས་རྗེས་མྱུར་དུ་སྐྱོབ།།

དུག་གིས་བསྐྱེད་པའི་སྡུག་བསྔལ་མི་བཟོད་ཀྱང་།།

དུག་གི་གཏེར་ཁ་བསྔོག་ལ་མི་འཇིགས་ཤིང་།།

དུག་གསུམ་དུག་གིས་ཆེས་ཆེར་མྱོས་པ་ཡི།།

དུག་མཚོར་བྱིང་བའི་འགྲོ་འདི་བསྐྱབ་ཏུ་གསོལ།།

ནད་ལ་འཇིགས་ཀྱང་ནད་ཀྱི་རྒྱུ་ལ་འབད།།

སྨན་པ་འཚོལ་ཡང་སྨན་པའི་ངག་མི་ཉན།།

ནད་རིམས་ཀློང་ན་འཇིགས་པའི་འོ་དོད་འབོད།།

ལས་ངན་འགྲོ་འདི་ཐུགས་རྗེས་མྱུར་དུ་སྐྱོབ།།

བཀྲེས་པས་མནར་ཡང་ཟས་ལ་དགྲ་རུ་བལྟ།།

འཇིགས་པས་མནར་ཡང་འཇིགས་སྐྱོབ་ལྷ་ལ་སྡང་།།

སྐོམ་པས་གདུང་ཡང་ཆུ་གཙང་འདོར་བརྩོན་པའི།།

ལས་ངན་སྙིགས་མའི་འགྲོ་འདི་མྱུར་དུ་སྐྱོབ།།

རང་གི་ལུས་ལ་མཚེར་མའི་གནོད་པ་ཙམ།།

མི་བཟོད་བཞིན་དུ་ཉམ་ཆུང་སྲོག་ཆགས་ཀྱི།།

སྲོག་ལ་ངན་ལས་སྣ་དགུས་རྩེ་བ་ཡི།།

རྨོངས་པའི་འགྲོ་འདི་མྱུར་བསྐྱབ་ཏུ་གསོལ།།

བཀྲ་ཤིས་བདེ་ལེགས་ཁ་ལ་བྱང་ན་ཡང་།།

བཀྲ་མི་ཤིས་པའི་བྱ་བ་སྒྲུབ་ལ་བརྩོན།།

བཀྲ་ཤིས་བདེ་བས་བོར་བ་སྙིགས་མའི་འགྲོ།།

བཀྲ་ཤིས་ལྷ་ཡིས་སྐྱོབ་པའི་དུས་ལ་བབ།།

སྤྱིར་ན་བདེ་སྡུག་དགེ་སྡིག་ལས་ལས་བྱུང་།།

སུ་དང་གང་གིས་བཀོད་བསྒྲིག་མ་མཛད་ཀྱང་།།

བྱིས་པ་རང་གིས་ཉེས་ཀྱང་བརྩེ་བའི་མར།།

སྡུག་ཡུས་ཇི་བཞིན་ཁྱེད་ལས་གང་ལ་ཞུ།།

དེ་ཕྱིར་སྙིང་ནས་བླ་མ་ཡི་དམ་ལ།།

གསོལ་འདེབས་གདུངས་དབྱངས་མ་ཁོག་ངག་ནས་ཤོར།།

ཡིད་ཆེས་དད་པས་སྔགས་ཀྱང་མང་དུ་བགྲང་།།

དེ་སླད་འཇིགས་པའི་ཀློང་ལས་མྱུར་དུ་སྐྱོབ།།

གལ་ཏེ་ལས་སུ་དགོངས་པས་མི་སྐྱོབ་ན།།

གཞན་གྱིས་བསགས་པ་སྨིན་པའི་དོགས་མ་མཆིས།།

ནམ་ཞིག་རང་མགོ་ཐོན་དུས་ཐུགས་རྗེ་ཡིས།།

སྐྱོབ་དགོས་མ་མཆིས་དུས་འདིར་ཅིས་ཀྱང་དགོངས།།

མ་རིག་རྨོངས་པའི་གཉིད་ལས་སད་དུ་གསོལ།།

བླང་དོར་ལོག་སྒྲུབ་བྱེད་པ་བཟློག་ཏུ་གསོལ།།

བསམ་བློ་ཀུན་སྤྱོད་ཉེས་པ་བསྲིང་དུ་གསོལ།།

ནད་རིམས་འདི་ལས་མྱུར་དུ་བསྐྱབ་ཏུ་གསོལ།།

ཐུགས་རྗེ་ཆེན་པོའི་གཟུངས་མཆོག་ལན་གཅིག་ཙམ།།

བཟླས་ནའང་ཕམ་བཞི་མཚམས་མེད་འདག་གསུངས་ན།།

བདག་ནི་ལྷ་དང་བླ་མ་དབྱེར་མེད་དུ།།

མོས་ནས་ལན་བརྒྱར་བཟླ་ཡི་བྱིན་རླབས་སྩོལ།།

སྔོན་གྱི་ལས་དང་འཕྲལ་གྱི་རྐྱེན་ངན་ལས།།

བྱུང་བའི་རིམས་ནད་འདི་ཡིས་བགྲང་ཡས་འགྲོ།།

མནར་བའི་ཚུལ་འདི་མ་བཟོད་བླ་མ་ལྷར།།

འབོད་དོ་ཐུགས་རྗེས་མྱུར་དུ་བསྐྱབ་ཏུ་གསོལ།།

ལུས་སེམས་སྡུག་ལ་སྦྱོར་བྱེད་ཇི་སྙེད་པ། །

མ་ལུས་ཞི་ཞིང་མཐུན་པའི་ཚོགས་ཆོས་ཀྱིས།།

མར་གྱུར་འགྲོ་རྣམས་བདེ་ཞིང་རྒྱལ་བའི་བསྟན།།

དར་ཞིང་རྒྱས་པའི་བྱིན་རླབས་ཅི་ཡང་སྩོལ།།

བླ་མ་ཡི་དམ་མཆོག་གསུམ་ཐུགས་རྗེ་དང་། །

བསྟན་སྲུང་རྒྱ་མཚོའི་ཚོགས་ཀྱི་ནུས་མཐུ་དང་། །

ལས་འབྲས་བསླུ་མེད་བདག་གི་དད་སྟོབས་ཀྱིས། །

ཇི་ལྟར་སྨོན་པའི་དོན་རྣམས་འགྲུབ་གྱུར་ཅིག །

   ཅེས་པ་འདི་ནི། ཤཱཀྱའི་དགེ་སློང་གི་གཟུགས་བརྙན་ཙམ་འཆང་བ་བཛྲ་ཚུལ་ཁྲིམས་རྒྱ་མཚོར་འབོད་པས། ཉེ་ཆར་མ་རིག་པས་བློ་མིག་ཀུན་ནས་ལྡོངས་པའི་ལས་ངན་འགའ་ཞིག་གིས་སེམས་ཅན་སྲོག་ཆགས་རྣམས་ཡ་ང་བའི་སྡུག་ལས་ཀྱིས་མནར་བར་བྱས་ནས་བསད་ཅིང་ཟོས་པའི་རྐྱེན་ལས་སྤྱི་མཐུན་གྱི་ལས་སྨིན་པ་དུས་སུ་བབས་ཏེ་ཤིན་ཏུ་འཇིགས་ཤིང་སྐྱི་གཡའ་བའི་པྲོག་ཞྭའི་ནད་དུག་ཅན་གྱི་ཡམས་ནད་ཀྱིས་ཤར་ནུབ་ཀྱི་གོ་ལ་ཟླུམ་པོའི་ཁྱོན་ཀུན་མུན་པར་བྱེད་བཞིན་པའི་ངང་ཚུལ་འདི་མ་བཟོད་ནས།  སྨན་པ་དང་ཚན་རིག་པས་སྔོན་འགོག་ཇི་ལྟར་བྱེད་ཚུལ་རྣམས་ཉན་ཅིང་ཤེས་པར་བྱས་ནས་ལག་ལེན་བྱེད་པ་གཞིར་བཞག་གི་སྟེང་། རིམས་ནད་ཀྱི་འཇིགས་པས་མ་རེག་པ་རྣམས་མི་རེག་ཅིང་། རེག་པ་རྣམས་མྱུར་དུ་གྲོལ་བའི་ཕྱིར་དུ། ཉིན་རེ་བཞིན་ཐུགས་རྗེ་ཆེན་པོའི་བསྟོད་པ་དྲི་མེད་དུང་མདོག་མ། སྟོབས་བཅུ་མངའ་བ་མ། མ་ལུས་རྒྱལ་བ་མ་རྣམས་བཏོན་ནས་མ་ཎི་དང་། ལོ་གྱོན་མ། སྒྲོལ་མ་ཉེར་གཅིག་གི་བསྟོད་པ་དང་འབྲེལ་བའི་ཏཱ་རེ་དང་། གྲུབ་ཆེན་ཐང་སྟོང་རྒྱལ་བོས་གསུངས་པའི་ས་སྐྱའི་ནད་གྲོལ་མར་གྲགས་པ་དང་བཅས་དད་པ་དག་སྣང་གིས་འདོན་བཞིན་ཡོད། དེ་དང་ཆབས་གཅིག་སྙིང་ནས་སྨོན་ལམ་བཏབ་པ་རྣམས་ཡི་གེར་བཀོད་པའོ།།