རྭ་རྒྱ་འཇིགས་མེད་རྒྱལ་མཚན་མཆོག་མཚོ་སྔོན་པོའི་ལྷ་མོ་དྲེལ་དགོན་པར་ཆིབས་བསྒྱུར་མཛད་འཕྲིན་བསྐྱངས་པ།

དགོན་གྲོང་གཉིས་ཀྱིས་ཕེབས་བསུ་བྱེད་བཞིན་པ།

དགེ་རྒན་མཆོག་ལ་ཕེབས་བསུ་བྱེད་བཞིན་པ།

ཁོང་གིས་ལྷ་མོ་དྲེལ་དགོན་པའི་དགོན་བདག༧རྗེ་སྨྲ་ཁམས་བློ་བཟང་བསྟན་འཛིན་རྒྱ་མཚོ་ལ་གྱ་སྟོན་ལེགས་སྐྱེས་འབུལ་བཞིན་པ།

ཁོང་གིས་བཀའ་སློབ་གནང་བཞིན་པ།

      མཚོ་སྔོན་ལྷ་མོ་དྲེལ་དགོན་པའི་དགོན་བདག་བླ་མ།  རྗེ་སྨྲ་ཁམས་བློ་བཟང་བསྟན་འཛིན་རྒྱ་མཚོ་མཆོག་གིས་དགུང་གྲངས་བརྒྱད་ཅུ་བཞེས་པའི་སྐུའི་གྱ་སྟོན་གྱི་ཉིན་གསུམ་པ་སྟེ་ཕྱི་ལོ་༢༠༡༩-༩-༡ཉིན།  བོད་ཀྱི་སློབ་གསོ་བ་ཆེན་མོ་རྭ་རྒྱ་འཇིགས་མེད་རྒྱལ་མཚན་མཆོག་ཡུལ་དེ་གའི་དགོན་གྲོང་གཉིས་ཀྱིས་གདན་ཞུས་ཐོག་ཉིན་དེའི་གུང་ཡོལ་ཙམ་ལ་དགོན་པར་ཕེབས་འབྱོར་གྱིས་སེར་སྐྱ་ཕོ་མོ་ཡོངས་ལ་དུས་སུ་བབས་པའི་གསུང་མོལ་ཞིབ་སྩོལ་གྱི་བཀའ་དྲིན་བསྐྱངས།

      དོན་དེ་དང་འབྲེལ་གསེར་ཆེན་ཐོན་མིའི་སློབ་ཚོགས་ཀྱི་དབུ་འཛིན་ལྷན་ཚོགས་ནས་ཀྱང་དགེ་རྒན་མཆོག་ལ་ཕེབས་བསུ་གྲ་སྒྲིག་གིས་སློབ་གྲོགས་སེར་སྐྱ་ཉི་ཤུ་ལྷག་མཚོ་སྔོན་པོའི་རིག་སྨོན་གྲོང་རྡལ་དུ་བསུ་བར་ཕྱིན་ཞིང་།  དགོན་དུ་ཕེབས་རྗེས་སློབ་གྲོགས་ཆོས་གྲགས་རྒྱ་མཚོའི་གྲྭ་ཤག་ཏུ་གསོལ་ཇ་བཞེས་ཤིང་དགེ་རྒན་རིན་པོ་ཆེ་མཆོག་དང་སློབ་དཔོན་ཆེན་མོ་རྒྱ་ཡེ་བཀྲ་བྷོ་གཉིས་ནས་སློབ་ཚོགས་ཀྱི་སློབ་གྲོགས་ཡོངས་ལ་གནད་ཆེའི་བཀའ་སློབ་ལམ་སྟོན་གནང་བ་དང་བཀྲ་ཤིས་བདེ་ལེགས་ཀྱི་ཁ་གཡང་བོས།

      ཕྱི་དྲོའི་ཆུ་ཚོད་བཞི་ཙམ་ལ་རྒན་རྣམ་པ་གཉིས་ནས་འཆད་ཁྲིད་ཀྱི་མཇུག་གྲུབ་པ་དང་དགོན་གཞུང་ནས་སྣེ་ལེན་གཟབ་རྒྱས་དང་བཅས་གོ་སྒྲིག་མི་སྣས་དགེ་རྒན་མཆོག་དང་རྒན་རྒྱ་ཡེ་བཀྲ་བྷོ་རྣམ་གཉིས་ཕྱིར་ཟི་ལིང་གྲོང་ཁྱེར་དུ་བསྐྱལ་བ་བཅས་སོ། །

འཕྲིན་གཏོང་བ་རྟ་ནག་བཟོད་པ།

༢༠༡༩-༩-༡ཉིན།