བཤེས་གཉེན་བསྟེན་ཚུལ་བླ་མ་ལྔ་བཅུ་བ་བཞུགས་སོ། །
  ༄༅། །ངེད་དྲ་བར་ཕེབས་པར་དགའ་བསུ་ཞུ། དེ་རིང་ནི་སྤྱི་ལོ 2019 ལོའི་ཟླ 10 ཚེས 22 རེས་གཟའ་མིག་དམར་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། འདི་ནས་ང་དང་གླེང་མོལ་བྱ།
གཙོ་ངོས།
སློབ་གསོ།
ཆོས་ལུགས།
ཀུན་འདུས།
རྩོམ་རིག
དམངས་སྲོལ།
རྒྱུན་ཤེས།
ལོ་རྒྱུས།
མི་སྣ།
ཐོན་མི།
སྐད་འཇོག་ས།
ཕྱོགས་སྟོན། གཙོ་ངོས།» ཆོས་ལུགས།» ནང་བསྟན་རིག་གཞུང་། »བཤེས་གཉེན་བསྟེན་ཚུལ་བླ་མ་ལྔ་བཅུ་བ་བཞུགས་སོ། །
བཤེས་གཉེན་བསྟེན་ཚུལ་བླ་མ་ལྔ་བཅུ་བ་བཞུགས་སོ། །
རྩོམ་སྒྲིག་པ།  བན་ཤུལ་འཇམ་དབྱངས། སྤེལ་དུས 2019-04-07ལྟ་ཀློག (226)རྩོམ་ཁུངས: ངེད་དྲ་བ།པར་འདེབ།

༄༅། ། བཤེས་གཉེན་བསྟེན་ཚུལ་བླ་མ་ལྔ་བཅུ་བ་བཞུགས་སོ། །

སློབ་དཔོན་བྷ་བི་ལྷས་མཛད།

རྒྱ་གར་སྐད་དུ། གུ་རུ་པཉྩ་ཤི་ཀ བོད་སྐད་དུ། བླ་མ་ལྔ་བཅུ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །

དཔལ་ལྡན་རྡོ་རྗེ་སེམས་དཔའི་གནས་ཐོབ་རྒྱུར་གྱུར་པའི། །

བླ་མའི་ཞབས་ཀྱི་པདྨོར་ཇི་བཞིན་བཏུད་བྱས་ཏེ། །

དེ་བསྟེན་པ་ནི་དྲི་མེད་རྒྱུ་མང་ལས་གསུངས་པ། །

མདོར་བསྡུས་བཤད་པ་འདི་ནི་གུས་པས་མཉན་པར་གྱིས། །

དབང་བསྐུར་མཆོག་ཐོབ་རྡོ་རྗེ་ཡི། །

སློབ་དཔོན་ལ་ནི་དེ་བཞིན་གཤེགས། །

ཕྱོགས་བཅུའི་འཇིག་རྟེན་ཁམས་བཞུགས་པས། །

དུས་གསུམ་དུ་ནི་མངོན་ཕྱག་འཚལ། །

མཆོག་ཏུ་དད་པས་དུས་གསུམ་དུ། །

དཀྱིལ་འཁོར་མེ་ཏོག་བཅས་ཐལ་མོས། །

སྟོན་པ་བླ་མ་བསྙེན་བཀུར་ཞིང་། །

ཞབས་ལ་སྤྱི་བོས་ཕྱག་བྱའོ། །

ཁྱིམ་པའམ་ནི་གསར་བུ་ལ། །

འཇིག་རྟེན་སྨོད་པ་སྤང་བའི་ཕྱིར། །

དམ་ཆོས་ལ་སོགས་མདུན་བདར་ཏེ། །

བརྟུལ་ཞུགས་འཛིན་པས་བློས་ཕྱག་བྱ། །

གདན་བསྟབ་པ་དང་ལྡང་བ་དང་། །

དོན་གྱི་བྱ་བ་སོགས་བསྙེན་བཀུར། །

བརྟུལ་ཞུགས་ཅན་གྱིས་ཀུན་བྱ་སྟེ། །

ཕྱག་དང་དམ་པ་མིན་ལས་སྤང་། །

བླ་མ་དང་ནི་སློབ་མ་དག །

མཚུངས་པར་དམ་ཚིག་ཉམས་འགྱུར་བས། །

དཔའ་བོས་དང་བོར་སློབ་དཔོན་དང་། །

སློབ་མའི་འབྲེལ་བ་བརྟག་པར་བྱ། །

བློ་ལྡན་སློབ་མས་བླ་མར་ནི། །

སྙིང་རྗེ་མེད་ཅིང་ཁྲོ་ལ་གདུག །

ཁེངས་ཤིང་ཆགས་ལ་མ་བསྡམས་དང་། །

སྤྱོམས་དང་བཅས་པར་མི་བྱའོ། །

བརྟན་ཞིང་དུལ་ལ་བློ་གྲོས་ལྡན། །

བཟོད་ལྡན་དྲང་ལ་གཡོ་སྒྱུ་མེད། །

སྔགས་དང་རྒྱུད་ཀྱི་སྦྱོར་བ་ཤེས། །

སྙིང་བརྩེར་ལྡན་ཞིང་བསྟན་བཅོས་མཁས། །

དེ་ཉིད་བཅུ་ནི་ཡོངས་སུ་ཤེས། །

དཀྱིལ་འཁོར་བྲི་བའི་ལས་ལ་མཁས། །

སྔགས་བཤད་པ་ཡི་སྦྱོར་བ་ཤེས། །

རབ་ཏུ་དང་ཞིང་དབང་པོ་དུལ། །

དེ་འདྲའི་མགོན་ལ་བསམས་བྱས་ནས། །

སློབ་མར་གྱུར་ནས་བརྙས་ན་ནི། །

སངས་རྒྱས་ཐམས་ཅད་བརྙས་པས་ན། །

དེས་ནི་རྟག་ཏུ་སྡུག་བསྔལ་འཐོབ། །

སློབ་དཔོན་ལ་ནི་སྨོད་པ་དེ། །

ཡམས་དང་འཚེ་བའི་ནད་རྣམས་དང་། །

གདོན་དང་རིམས་དང་དུག་རྣམས་ཀྱིས། །

རྨོངས་ཆེན་དེ་ནི་འཆི་བར་འགྱུར། །

རྒྱལ་པོ་མེ་དང་སྤྲུལ་གདུག་དང་། །

ཆུ་དང་མཁའ་འགྲོ་རྐུན་པོ་དང་། །

གདོན་དང་ལོག་འདྲེན་རྣམས་ཀྱིས་ཀྱང་། །

བསད་ནས་སེམས་ཅན་དམྱལ་བར་འགྲོ། །

ནམ་ཡང་སློབ་དཔོན་དག་གི་ནི། །

ཀུན་ཏུ་སེམས་དཀྲུགས་མི་བྱ་སྟེ། །

གལ་ཏེ་རྨོངས་པས་བྱས་གྱུར་ན། །

དམྱལ་བར་ངེས་པར་འཚེད་པར་འགྱུར། །

མནར་མེད་ལ་སོགས་འཇིགས་རུང་བའི། །

དམྱལ་བ་བསྟན་པ་གང་ཡིན་པ། །

སློབ་དཔོན་ལ་ནི་སྨོད་པ་རྣམས། །

དེར་ནི་གནས་པར་ཡང་དག་བཤད། །

དེ་བས་འབད་པ་ཐམས་ཅད་ཀྱིས། །

རྡོ་རྗེ་སློབ་དཔོན་བློ་གྲོས་ཆེ། །

དགེ་བ་རབ་ཏུ་མི་སྤྱོམས་པ། །

ནམ་ཡང་སྨད་པར་མི་བྱའོ། །

བླ་མ་ལ་ནི་གུས་བཅས་ཡོན། །

རྗེས་མཐུན་ཁྱོད་ཀྱིས་སྦྱིན་པར་བྱ། །

དེས་ནི་རིམས་སོགས་གནོད་པ་རྣམས། །

ཕྱིར་ཞིང་འབྱུང་བར་མི་འགྱུར་རོ། །

རང་གི་དམ་ཚིག་སློབ་དཔོན་ནི། །

སྦྱིན་མིན་བུ་དང་ཆུང་མ་དང་། །

རང་སྲོག་གིས་རྟག་བསྟེན་བྱ་ན། །

ལོངས་སྤྱོད་གཡོ་བས་སྨོས་ཅི་དགོས། །

གང་ཕྱིར་བསྐལ་པ་བྱེ་བ་ནི། །

གྲངས་མེད་པར་ཡང་རྙེད་དཀའ་བའི། །

སངས་རྒྱས་ཉིད་ཀྱང་བརྩོན་ལྡན་ལ། །

ཚེ་འདི་ཉིད་ལ་སྟེར་བར་བྱེད། །

རྟག་ཏུ་རང་གི་དམ་ཚིག་བསྲུང་། །

རྟག་ཏུ་དེ་བཞིན་གཤེགས་པ་མཆོད། །

རྟག་ཏུ་བླ་མ་ལ་དབུལ་བྱ། །

འདི་ནི་སངས་རྒྱས་ཀུན་དང་འདྲ། །

མི་ཟད་དེ་ཉིད་འདོད་པ་ཡིས། །

ཅུང་ཟད་ཡིད་འོང་གང་དང་གང་། །

ཤིན་ཏུ་ཁྱད་པར་གྱུར་པ་ཉིད། །

དེ་དང་དེ་ནི་བླ་མར་དབུལ། །

དེ་བྱིན་སངས་རྒྱས་ཐམས་ཅད་ལ། །

རྟག་ཏུ་བྱིན་པ་ཉིད་དུ་འགྱུར། །

དེ་བྱིན་བསོད་ནམས་ཚོགས་ཡིན་ཏེ། །

ཚོགས་ལས་དངོས་གྲུབ་མཆོག་ཏུ་འགྱུར། །

དེ་བས་སློབ་མ་སྙིང་རྗེ་གཏོང་། །

ཚུལ་ཁྲིམས་བཟོད་པའི་ཡོན་ཏན་ལྡན། །

སློབ་དཔོན་དང་ནི་རྡོ་རྗེ་འཛིན། །

ཐ་དད་པར་ནི་མི་བརྟག་གོ །

མཆོད་རྟེན་བཤིག་འདྲའི་སྡིག་འཇིགས་པས། །

གྲིབ་མའང་འགོམ་པར་མི་བྱ་ན། །

ལྷམ་དང་སྟན་དང་བཞོན་པ་སོགས། །

འགོམ་མི་བྱ་བ་སྨོས་ཅི་དགོས། །

བློ་གྲོས་ཆེན་པོས་དགའ་སེམས་ཀྱིས། །

བླ་མའི་བཀའ་ནི་འབད་དེ་མཉན། །

རིགས་པ་ཡིས་ནི་མི་ནུས་ན། །

མི་ནུས་དེ་ལ་ཚིག་གིས་སྦྱང་། །

བླ་མ་ལས་ནི་དངོས་གྲུབ་དང་། །

མཐོ་རིས་དང་ནི་བདེ་བ་འཐོབ། །

དེ་བས་འབད་པ་ཐམས་ཅད་ཀྱིས། །

བླ་མའི་བཀའ་ལས་འདའ་མི་བྱ། །

བླ་མའི་རྫས་ནི་སྲོག་ཇི་བཞིན། །

དེ་ཡི་སྡུག་པའང་བླ་མ་བཞིན། །

བླ་མའི་འཁོར་ནི་གཉེན་བཞིན་དུ། །

མཉམ་པར་བཞག་པས་རྟག་ཏུ་བསམ། །

མལ་སྟན་འདུག་དང་སྔོན་འགྲོ་དང་། །

གཙུག་ཏོར་དག་དང་བཅས་པ་དང་། །

སྟན་ལ་རྐང་འཇོག་རྐེད་པར་ནི། །

ལག་བཞག་མཉེ་བར་མི་བྱའོ། །

བླ་མ་དག་ནི་ལངས་པ་ན། །

ཉལ་དང་འདུག་པར་མི་བྱའོ། །  

རྟག་ཏུ་དེ་ཡི་བྱ་བ་ལ། །

ལྡང་མཁས་ཕུན་སུམ་ཚོགས་པར་བྱ། །

མཆིལ་མ་ལ་སོགས་འདོར་བ་དང་། །

སྟན་ལ་རྐང་བ་རྐྱོང་བ་དང་། །

འཆག་དང་རྩོད་པར་སྨྲ་བ་དག །

བླ་མའི་མདུན་དུ་མི་བྱའོ། །

ཡན་ལག་མཉེ་དང་གར་དག་དང་། །

གླུ་དང་རོལ་མོ་མི་བྱ་ཞིང་། །

གཏམ་གྱི་སྦྱོར་བ་མང་པོ་རྣམས། །

ཐོས་པའི་ཉེ་འཁོར་དུ་མི་བྱ། །

བཏུད་དེ་སྟན་ལས་ལྡང་བ་དང་། །

གུས་པ་ཡིས་ནི་འདུག་པར་བྱ། །

མཚན་ཆུ་འཇིགས་བཅས་ལམ་དུ་ནི། །

བསྒོ་བ་ཐོབ་ནས་མདུན་འགྲོ་བྱ། །

སློབ་དཔོན་གྱིས་མཐོང་མདུན་དུ་ནི། །

བློ་དང་ལྡན་པས་ལུས་གཅུ་དང་། །

ཀ་བ་ལ་སོགས་རྟེན་མི་བྱ། །

སོར་མོའི་ཚིགས་ནི་བགྲང་མི་བྱ། །

རྐང་བཀྲུ་བ་དང་ལུས་བཀྲུ་དང་། །

དྲིལ་དང་མཉེ་བ་ལ་སོགས་ལ། །  

ཕྱག་ནི་སྔོན་དུ་འགྲོ་བས་བྱ། །

དེ་བཞིན་མཐར་ཡང་ཅི་བདེར་བྱ། །

དེ་ཡི་མཚན་སྨོས་བརྗོད་ན་ནི། །

མིང་མཐར་ཞལ་སྔ་ལྡན་པར་བྱ། །

གཞན་དག་གུས་པར་བྱ་བའི་ཕྱིར། །

ཁྱད་པར་གྱི་ནི་ཚིག་དག་བརྗོད། །

བླ་མ་ལ་ནི་བཀའ་སྩོལ་ཞུ། །

བཀའ་བཞིན་བགྱིད་ཅེས་བརྗོད་པར་བྱ། །

ཐལ་མོ་སྦྱར་ཞིང་མ་ཡེངས་པར། །

བླ་མས་བསྒོ་བ་མཉན་པར་བྱ། །

དགོད་དང་ལུད་པ་ལ་སོགས་ལ། །

ལག་པས་ཁ་ནི་དགབ་པར་བྱ། །

བྱ་བ་ཟིན་ནས་འཇམ་པ་ཡི། །

ཚིག་དག་གིས་ནི་གདས་པར་བྱ། །

མདུན་དུ་དུལ་བར་འདུག་པ་དང་། །

གོས་སོགས་ཚུལ་ནི་བསྡམས་པ་དང་། །

པུས་བཙུགས་ཐལ་མོ་སྦྱར་བ་ཡིས། །

ཉན་སོགས་འདོད་པས་གསོལ་གསུམ་གདབ། །

བསྙེན་བཀུར་སྤྱོད་པ་ཐམས་ཅད་ལ། །

ཡིད་ནི་ང་རྒྱལ་མེད་པར་བྱ། །

ངོ་ཚ་འཇིགས་ཤིང་བསྡམས་པ་ཡིས། །

བག་མ་གསར་པའི་ཚུལ་གནས་བྱ། །

སྒེག་པ་ལ་སོགས་བྱ་བ་ཀུན། །

སྟོན་པའི་མདུན་དུ་སྤང་བར་བྱ། །

གཞན་ཡང་དེ་འདྲའི་བྱ་བ་ཀུན། །

རང་གིས་བརྟགས་ལ་དོར་བར་བྱ། །

རབ་གནས་དཀྱིལ་འཁོར་སྦྱིན་སྲེག་དང་། །

སློབ་མ་སྡུད་དང་འཆད་པ་རྣམས། །

ཡུལ་དེར་བླ་མ་གནས་པ་ན། །

རྗེས་མ་གནང་བར་མི་བྱའོ། །

སྤྱན་འབྱེད་སོགས་ལ་ཅི་ཐོབ་པ། །

དེ་ཀུན་བླ་མ་དག་ལ་དབུལ། །

དེ་ཡིས་བསྟབས་པ་བླངས་ནས་ནི། །

གཞན་དག་ལ་ནི་ཅི་བདེར་བྱ། །

བླ་མའི་སློབ་མ་སློབ་མར་མིན། །

སློབ་མའང་བླ་མའི་མདུན་དུ་མིན། །

བསྙེན་བཀུར་དག་དང་ལྡང་བ་དང་། །

ཕྱག་སོགས་བྱེད་པ་བཟློག་པར་བྱ། །

སློབ་དཔོན་ལ་ནི་གང་འབུལ་དང་། །

བླ་མས་ཀྱང་ནི་གང་སྩལ་པ། །

དེ་ལ་བཏུད་དེ་ལག་གཉིས་ཀྱིས། །

བློ་དང་ལྡན་པས་བླང་བར་བྱ། །

དྲན་པ་བརྗེད་མེད་གྱུར་པ་དང་། །

རང་གི་ཀུན་སྤྱོད་ལ་བརྩོན་པས། །

སྤུན་གྱིས་རང་སྤྱོད་ལས་འདས་པ། །

དགའ་བས་ཕན་ཚུན་བཟློག་པར་བྱ། །

ན་བས་བླ་མའི་བྱ་བ་ལ། །

བཏུད་དེ་རྗེས་མ་གནང་བར་ཡང་། །

བཀག་པ་རྣམས་ནི་སྤྱད་བྱས་ཀྱང་། །

དགེ་སེམས་ཅན་ལ་སྡིག་མི་འགྱུར། །

འདིར་མང་སྨོས་པ་ཅི་ཞིག་དགོས། །

བླ་མ་དགྱེས་བྱེད་གང་ཡིན་བྱ། །

མི་མཉེས་བྱེད་ཀུན་སྤོང་བ་ནི། །

དེ་དང་དེ་ལ་འབད་དེ་བྱ། །

དངོས་གྲུབ་སློབ་དཔོན་རྗེས་འབྲང་ཞེས། །

རྡོ་རྗེ་འཛིན་པ་ཉིད་གསུང་བ། །

ཤེས་ནས་དངོས་པོ་ཐམས་ཅད་ཀྱིས། །

བླ་མ་ཡོངས་སུ་མཉེས་པར་བྱ། །

བསམ་པ་དག་པའི་སློབ་མ་ནི། །

དཀོན་མཆོག་གསུམ་ལ་སྐྱབས་སོང་ལ། །

བླ་མའི་རྗེས་སུ་འཇུག་པ་འདི། །

ཁ་ཏོན་བྱ་བར་སྦྱིན་པར་བྱ། །

དེ་ནས་སྔགས་སོགས་སྦྱིན་པ་ཡིས། །

དམ་ཆོས་སྣོད་དུ་བྱས་ནས་སུ། །

རྩ་བའི་ལྟུང་བ་བཅུ་བཞི་ནི། །

བཀླག་དང་འཛིན་པ་ཉིད་དུ་བྱ། །

དེ་ལྟར་བླ་མའི་རྗེས་འཇུག་སློབ་མ་ནི། །

མ་ལུས་ཕན་བསྐྱེད་སྐྱོན་མེད་འདི་བྱས་པའི། །

དགེ་བ་མཐའ་ཡས་བདག་གིས་གང་བསགས་པ། །

དེས་ནི་འགྲོ་རྣམས་མྱུར་དུ་རྒྱལ་གྱུར་ཅིག ། 

བླ་མ་ལྔ་བཅུ་བ་སློབ་དཔོན་བྷ་བི་ལྷས་མཛད་པ་རྫོགས་སོ། །  ། །

གསར་འགོད་པ། འཇིགས་མེད་གྲགས་པ།


དྲ་རྒྱ་གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ། རྩོམ་སྒྲིག་པ། འོད་ཟེར་བཟང་བོ། སྦྲ་ནག་འཇིགས་མེད་རྡོ་རྗེ། འབའ་སྣང་གྲོལ། བན་ཤུལ་འཇམ་དབྱངས།
འདྲེན་བཀོལ:
61.4K

  དཔྱད་གཏམ ( 1 )ཡོད།
དཔྱད་གཏམ་སྤེལ་ས།
སྤེལ་མཁན། བཤེར་གྲངས། he7k བཤེར་གྲངས་ཁ་སྐོང་བྱོས།ཡིག་འབྲི་བཞི་ལས་མང་མི་རུང་།ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་།ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།      
 
  བཤེས་གཉེན་བསྟེན་ཚུལ་བླ་མ་ལྔ་བཅུ་བ་བཞུགས་སོ། །   སྤེལ་མཁན།:  སྤེལ་དུས:2019/4/8
འདི་འདྲའི་བཤེས་གཉེན་བསྟེན་ཚུལ་གྱི་རིག་གནས་དེ་ད་ལྟ་བལྟས་ན་ཡོངས་ཁྱབ་ཀྱིས་ཁས་ལེན་པའི་བརྩི་བཀུར་གྱི་རིག་གནས་ཧ་ལས་པའི་ཡག་པོ་རེད།
  པར་ངོས1/1 པར་ཡོད།
ལྟ་ཀློག་གྲངས་ཀ
5870362
 
འབྲེལ་གཏུག་བྱ་ཡུལ།    ཁ་པར།  15283703999    E-mail:www.jmjzjy@126.com
པར་དབང་རྭ་རྒྱ་ཤེས་རིག་ནོར་བུའི་སློབ་གླིང་ལ་དབང་།
网站备案号:青ICP备15000002号 青公网安备 63262102000011号