ཟི་ལིང་བོད་མིའི་ཁྲོམ་གྱི་སྤྲོ་དགའི་ལྷན་འཛོམས་དང་འབྲེལ་བའི་ཕན་བདེའི་གཏམ་གླེང་སྐབས་གསུམ་པ་གནའ་མཁར་ཟི་ལིང་དུ་བསྡུས།
2019སྤྱི་ཟླ2པའི་ཚེས24ཉིན་ཟི་ལིང་བོད་མིའི་ཁྲོམ་གྱི་སྤྱིའི་འགན་འཛིན་པ་ཚེ་རིང་དོན་འགྲུབ་སོགས་ཀྱིས་གཙོ་སྒྲུབ་བྱས་པའི་བོད་མིའི་ཁྲོམ་གྱི་སྤྲོ་དགའི་ལྷན་འཛོམས་དང་ཕན་བདེའི་གཏམ་གླེང་སྐབས་གསུམ་པ་དེ་ཟི་ལིང་ནོར་བཟང་ཕོ་བྲང་དུ་བསྡུས་ཏེ་སྤྱི་ཚོགས་ཁྲོད་ཀྱི་མི་སྣ་ལྷག་བསམ་ཅན་དང་མཚོ་སྔོན་ཞིང་ཆེན་གྱི༢༠༡༨ལོའི་མཐོ་རྒྱུགས་ཁྲོད་སྦྱངས་འབྲས་རྩེར་སོན་གྱི་སློབ་མ།
གངས་ལྗོངས་ཤེས་རིག་ནོར་བུའི་སློབ་གླིང་གི་ཕུལ་བྱུང་སློབ་མ། ཟི་ལིང་བོད་མིའི་ཁྲོམ་གྱི་ཕུལ་བྱུང་མི་སྣ་བཅས་ལ་བྱ་དགའ་སྤྲད་དེ་སྐུལ་འདེད་བྱས།
འདུ་ཚོགས་འདི་ནི་ཟི་ལིང་བོད་མིའི་ཁྲོམ་གྱི་འགན་འཛིན་པ་ཚེ་རིང་དོན་འགྲུབ། དཔའ་ལུང་དཔའ་ཐར། བཀྲ་ཤིས། བླ་བྲང་བསྟན་པ། མང་རྫོང་དཔལ་ཆེན་རྒྱལ་སོགས་ཀྱིས་གཙོ་སྒྲུབ་བྱས་པའི་དང་བླངས་པ་ལྔ་ཡིས་སྤྱི་ཚོགས་ཀྱི་ལས་རིགས་སོ་སོའི་ཁྲོད་དུ་སྤྱི་ཚོགས་དང་མི་རིགས་ལ་ཞབས་འདེགས།
སྣེ་ཁྲིད་བཅས་བྱེད་བཞིན་པའི་མི་སྣ་རླབས་ཆེན་དག་ལ་རྗེས་སུ་ཡི་རང་དང་བཀའ་དྲིན་མཚོན་བྱེད་ཀྱི་གཟེངས་རྟགས་འབུལ་བར་ཆེད་དམིགས་ཀྱིས་བསྒྲུབས་པ་ཞིག་ཡིན་ལ། ཞོར་དུ་ཟི་ལིང་བོད་མིའི་ཁྲོམ་གྱི་ཚོང་གཉེར་བ་དག་གིས་འདི་ལྟའི་སྐྱེས་ཆེན་དག་ལ་མིག་ལྟོས་དང་སྒོས་སྤྱི་ཚོགས་དང་མི་རིགས་ལ་ཞབས་འདེགས་ཞུ་བར་རེ་སྐུལ་བྱེད་པར་དམིགས་པ་ཞིག་ཀྱང་རེད།
ཐེངས་འདིའི་ཚོགས་ཐོག་ཏུ་གངས་ལྗོངས་ཤེས་རིག་ནོར་བུའི་སློབ་གླིང་གི་སློབ་དཔོན་ཆེན་མོ་ལྡོང་ཡོན་ཏན་རྒྱ་མཚོ་དང་སྤྲུལ་སྐུ་རྒྱ་མཚོ།
སྤྲུལ་སྐུ་པདྨ་བཀྲ་ཤིས། བྱ་ཁྱུང་དགོན་གྱི་དགེ་བཤེས་སངས་རྒྱས། ཁེ་ལས་པ་བརྩོན་འགྲུས།
དགེ་རྒན་ཆེན་མོ་ཤ་བོ་སྐྱིད་སོགས་ཆེད་ཞུས་སྐུ་མགྲོན་དག་ལས་གཞན་ཟི་ལིང་བོད་མིའི་ཁྲོམ་གྱི་ཚོང་གཉེར་བ་སོགས་མི་སྣ་བརྒྱ་ལྷག་མཉམ་ཞུགས་བྱས་པར་མ་ཟད་གཏམ་གླེང་བྱས།
མཐར་ཐེངས་འདིའི་བྱ་དགའ་ཐོབ་མཁན་མི་སྣ་དག་ལ་རྟེན་འབྲེལ་གྱི་ཤིས་ཚིག་དང་སྨོན་འདུན་ཕུལ་ཞིང་གསོལ་ཇ་དྲངས་རྗེས་མཇུག་ལེགས་པར་བསྡུས་སོ།།
ཆེད་ཞུས་སྐུ་མགྲོན་སློབ་དཔོན་ཆེན་མོ་ལྡོང་ཡོན་ཏན་རྒྱ་མཚོ་མཆོག་གིས་གསུང་བཤད་གནང་བཞིན་པ།
ཚོགས་རའི་ཡུལ་དངོས།
ཕུལ་བྱུང་མི་སྣར་བྱ་དགའ་གནང་བཞིན་པ།
བྱ་བའི་དབང་གིས་ཐེངས་འདིར་ཆེད་ཕེབས་གནང་མ་ཐུབ་པའི་བོད་ཀྱི་སློབ་གསོ་བ་ཆེན་མོ་རྭ་རྒྱ་འཇིགས་མེད་རྒྱལ་མཚན་མཆོག་ལ་དངུལ་གྱི་གཟེངས་རྟགས་གནང་བ།
བོད་ཆོལ་ཁ་གསུམ་གྱི་འདས་མ་ད་གསུམ་གྱི་གནའ་དེང་ཆོས་རིག་འབྱོར་གསུམ་གནས་པ་གོང་འཕེལ་དང་ཉམས་པ་སླར་གསོའི་ཆེད་དུ་མི་ཚེ་ཡི་ཕྲེང་ཐག་དཀར་པོ་ལྷད་མེད་ཁ་བ་བཞིན་ཕྱོགས་ཀུན་ཏུ་ཕུལ་དང་འབུལ་བཞིན་པའི་གནའ་དེང་བོད་ཀྱི་སློབ་གསོ་བ་དང་མཁས་དབང་ཆེན་མོ་༧རྒན་འཇིགས་མེད་རྒྱལ་མཚན་མཆོག་ལ་ངེད་ཟི་ལིང་བོད་མིའི་ཚོང་ཁྲོམ་གྱིས་ཁོང་གི་བཀའ་དྲིན་ཆ་ཤས་ཙམ་འཇལ་བྱེད་དུ་དངུལ་གྱི་གཟེངས་རྟགས་འདི་ཕུལ་བ་ལགས།
ཟི་ལིང་བོད་མིའི་ཚོང་ཁྲོམ་ནས།
སློབ་དཔོན་ཆེན་མོ་ལྡོང་ཡོན་ཏན་རྒྱ་མཚོ་ལ་དངུལ་གྱི་གཟེངས་རྟགས་ཕུལ་བ།
བོད་ཆོལ་ཁ་གསུམ་གྱི་འདས་མ་ད་གསུམ་གྱི་གནའ་དེང་ཆོས་རིག་འབྱོར་གསུམ་གནས་པ་གོང་འཕེལ་དང་ཉམས་པ་སླར་གསོའི་ཆེད་དུ་མི་ཚེ་ཡི་ཕྲེང་ཐག་དཀར་པོ་ལྷད་མེད་ཁ་བ་བཞིན་ཕྱོགས་ཀུན་ཏུ་ཕུལ་དང་འབུལ་བཞིན་པའི་གནའ་དེང་བོད་ཀྱི་སློབ་གསོ་བ་དང་མཁས་དབང་ཆེན་མོ་༧རྒན་ལྡོང་ཡོན་ཏན་རྒྱ་མཚོ་མཆོག་ལ་ངེད་ཟི་ལིང་བོད་མིའི་ཚོང་ཁྲོམ་གྱིས་ཁོང་གི་བཀའ་དྲིན་ཆ་ཤས་ཙམ་འཇལ་བྱེད་དུ་དངུལ་གྱི་གཟེངས་རྟགས་འདི་ཕུལ་བ་ལགས།
ཟི་ལིང་བོད་མིའི་ཚོང་ཁྲོམ་ནས།
གསར་འགོད་པ། སྨྲ་ཁམས་མཁའ་འགྲོ་རྒྱལ།
|