མཉམ་མེད་ཇོ་བོ་རྗེ་དཔལ་ལྡན་ཨ་ཏི་ཤའི་རྣམ་ཐར་ཕྱོགས་བསྒྲིགས་དད་པའི་འཇུག་ངོགས་ལས། བཅུ་བ།
  ༄༅། །ངེད་དྲ་བར་ཕེབས་པར་དགའ་བསུ་ཞུ། དེ་རིང་ནི་སྤྱི་ལོ 2019 ལོའི་ཟླ 10 ཚེས 19 རེས་གཟའ་སྤེན་པ་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། འདི་ནས་ང་དང་གླེང་མོལ་བྱ།
གཙོ་ངོས།
སློབ་གསོ།
ཆོས་ལུགས།
ཀུན་འདུས།
རྩོམ་རིག
དམངས་སྲོལ།
རྒྱུན་ཤེས།
ལོ་རྒྱུས།
མི་སྣ།
ཐོན་མི།
སྐད་འཇོག་ས།
ཕྱོགས་སྟོན། གཙོ་ངོས།» མི་སྣ།» འཛམ་གླིང་མི་སྣ། »མཉམ་མེད་ཇོ་བོ་རྗེ་དཔལ་ལྡན་ཨ་ཏི་ཤའི་རྣམ་ཐར་ཕྱོགས་བསྒྲིགས་དད་པ
མཉམ་མེད་ཇོ་བོ་རྗེ་དཔལ་ལྡན་ཨ་ཏི་ཤའི་རྣམ་ཐར་ཕྱོགས་བསྒྲིགས་དད་པའི་འཇུག་ངོགས་ལས། བཅུ་བ།
རྩོམ་སྒྲིག་པ།  བན་ཤུལ་འཇམ་དབྱངས། སྤེལ་དུས 2019-02-02ལྟ་ཀློག (1884)རྩོམ་ཁུངས: རྩོམ་ཁུངས་འདེམ་བྱང་།པར་འདེབ།

བཅུ་བ།  ཇོ་བོ་རྗེའི་ཐུགས་སྲས་འཕགས་བོད་དུ་ཇི་ལྟར་བྱུང་བའི་སྐོར།

   ཇོ་བོ་རྗེའི་ཐུགས་སྲས་སློབ་མ་སྤྱིར་ན་འཕགས་ཡུལ་དང་།  ཨོ་རྒྱན།  ཁ་ཆེའི་ཡུལ་དང་། བལ་ཡུལ། བོད་བཅས་པར་ནམ་མཁའི་སྐར་ཚོགས་ལྟར་མང་དུ་བྱུང་ཡོད་ཀྱང་། རྒྱ་གར་དུ་ཐུན་མོང་མ་ཡིན་པའི་སློབ་མ་ལྔ་སྟེ། སློབ་དཔོན་རཏྣ་ཨ་ཀ་ར་དང་། བོ་དྷི་པ། བཤེས་གཉེན་གསང་བ། དབུ་མ་སེང་གེ  སའི་སྙིང་བོ་རྣམས་ཇོ་བོ་རྗེ་ཉིད་དང་མཁྱེན་པ་མཉམ་པར་གྲགས་ལ། གཞན་ཡང་བྱིན་གྱིས་བརླབས་པའི་སློབ་མ་ཧེ་རུ་ཀའི་དཀྱིལ་འཁོར་མངོན་དུ་གྱུར་བ་དང་། གསང་སྔགས་ཀྱི་སྤྱོད་པ་ལ་བཞུགས་པ།  རྣལ་འབྱོར་ལྷུར་ལེན་སོགས་བསྟན་པ་འཛིན་སྐྱོང་སྤེལ་གསུམ་ནུས་པའི་སློབ་མ་བསམ་གྱིས་མི་ཁྱབ་པ་བྱོན་ཏེ་འཕགས་ཡུལ་དུ་སངས་རྒྱས་ཆོས་ལུགས་དར་སྤེལ་མཛད། བོད་ཡུལ་དུ་སྤྱིར་རབ་ཏུ་བྱུང་བ་དང་། སྔགས་པ་སོ་སྐྱེ་ཁྱིམ་པ་ཐམས་ཅད་ཀྱིས་ཆོས་འབྲེལ་ཞུས་ཤིང་བཀའ་དྲིན་གྱིས་ཁྱབ་པར་མཛད། ཁྱད་པར་དུ་ཐུགས་སྲས་སློབ་མ་ཆེན་པོ་པུར་རྒྱལ་བཙན་པོའི་གདུང་རྒྱུད་མངའ་རིས་ཀྱི་རྒྱལ་བོ་ལྷ་བཙུན་བྱང་ཆུབ་འོད་དང་། ལོ་ཆེན་རིན་ཆེན་བཟང་བོ།  འབྲོམ་སྟོན་རྒྱལ་བོའི་འབྱུང་གནས།ནག་ཚོ་ལོ་ཙཱ་བ་ཚུལ་ཁྲིམས་རྒྱལ་བ། གཙང་བ་འགར་འགོས་ལེགས་འབྲོག  སེ་བཟང་ཡོལ་མཆེད་གཉིས།  ལྷོ་བྲག་པ་ཕྱག་ཁྲི་མཆོག བཙུན་པ་དགེ་སྐྱོང་། ཁུ་སྟོན།  རྔོག་ལེགས་པའི་ཤེས་རབ། ཨ་མེས་བྱང་ཆུབ་རིན་ཆེན། དགོན་པ་བ་འཇང་དབང་ཕྱུག་རྒྱལ་མཚན། ཕྱག་དར་སྟོན་པ། ཀ་བ་ཤཱཀྱ་དབང་ཕྱུག རྒྱ་བརྩོན་འགྲུས་སེང་གེ དགེ་བའི་བློ་གྲོས། ལྷ་ཆེན་པོ་གཟུས་རྡོ་རྗེ་རྒྱལ་མཚན།  གཙང་སྟོད་ནས་བྲག་སྟོན་ཆེ་ཆུང་གཉིས། ལེང་འབྲོག་གཉིས།  གཙང་སྨད་ནས་རོང་བ་འགར་དགེ་བ། འགོས་ལོ་ཙཱ་བ་ཡོལ་ཆོས་དབང་མཆེད་གསུམ། གནམ་གྱི་རྫིང་ཁ་བ། བང་སྟོན། སུམ་པ། སྣ་ནམ། མྱང་མི་མལ་ཤེས་རབ་སེམས་དཔའ། དབོན་ཆོས་རྒྱལ། འགོས་སྟོང་བཙན།  ལྷབ་མི་ཆེན། སྒྲོ་འཕགས་པ་བྱང་ཆུབ། ཁུ་མདོ་སེང་གེ་རྒྱལ་མཚན། ལྷ་རྗེ་བསམ་གཏན། ཞང་བཙུན་ཡར་པ་བ།  སྒོམ་པ་དད་པ་བླ་མ། ཞང་བཙུན་དྲི་མ་མེད་པ།

འབྲོམ་སྟོན་པ།

སུམ་པ་མཐུ་ཆེན། རྣལ་འབྱོར་བ་ཤེས་རབ་རྡོ་རྗེ། ཁྱམས་པའི་བློ་གྲོས། ཁམས་པ་སྐུ་མཆེད་བཞི་ལ་སོགས་པའི་ཇོ་བོའི་ཐུགས་སྲས་ཇི་སྙེད་ཅིག་བྱོན་ནས་བོད་ཡུལ་དུ་སངས་རྒྱས་ཀྱི་བསྟན་པ་རིན་པོ་ཆེ་ཉི་མ་ལྟར་གསལ་བར་མཛད།  དེ་ཡང་ནག་ཚོ་ལོ་ཙཱ་བའི་ཇོ་བོའི་བསྟོད་པ་ལས། བླ་མ་བོད་དུ་མ་བྱོན་ན། ཐམས་ཅད་ལོང་བ་བཞིན་དུ་འགྱུར། མཁྱེན་པ་རྒྱས་པ་ཁྱེད་བྱོན་པས། བོད་དུ་ཡེ་ཤེས་ཉི་མ་ཤར།  ཞེས་པ་ལྟར་དོན་ལ་གནས་སོ།།

           འབྲོམ་སྟོན་པ་རྒྱལ་བོའི་འབྱུང་གནས་ནི་ཇོ་བོའི་སློབ་མའི་གཙོ་བོར་འགྱུར་ཅིང་བཀའ་གདམས་བསྟན་པའི་སྲོལ་གཏོད་ཆེན་པོ་ཡང་ཡིན། ཁོང་ཉིད་བོད་ཤིང་འབྲུག་༼1004༽ལོར་སྟོད་ལུང་གནམ་གྱི་བྱེ་མ་ལུང་དུ་སྐུ་འཁྲུངས།  དགུང་ལོ་བཅུ་གསུམ་ཙམ་ལ་དགེ་བཤེས་གཡུང་ཆོས་མགོན་ལ་ཀློག་ཡིག་བསླབས།  དགུང་ལོ་བཅུ་བདུན་སྟེང་ཇོ་བོ་སེ་བཙུན་ཁམས་ནས་རྒྱ་གར་དུ་བྱོན་པ་དང་མཇལ་ནས་དད་པ་སྐྱེས་ཏེ་ཐུགས་རྗེ་ཆེན་པོ་ཡི་གེ་དྲུག་པའི་གདམས་པ་ཞུས། འཕན་པོ་རྒྱལ་ལྷ་ཁང་གི་ཞང་སྣ་ནམ་རྡོ་རྗེ་དབང་ཕྱུག་ལས་དགེ་བསྙེན་གྱི་སྡོམ་པ་མནོས་ཏེ་མཚན་རྒྱལ་བོའི་འབྱུང་གནས་སུ་གསོལ།  དགུང་ལོ་བཅུ་དགུའི་སྟེང་བླ་མ་སེ་བཙུན་མཇལ་བར་མདོ་ཁམས་འདན་མར་ཕེབས། བླ་མ་སེ་བཙུན་བསམ་སྦྱོར་གཉིས་ཀྱིས་ཚུལ་བཞིན་བསྟེན་ཏེ་མདོ་སྔགས་ཀྱི་ཆོས་གཞུང་ལ་སྦྱངས་བརྩོན་མཐར་ཕྱིན་མཛད།  པཎྜི་ཏ་སྒྲ་ཚེར་མ་དང་སྨྲི་ཏི་གཉིས་ལས་སྒྲ་རིག་པ་སྦྱངས་བརྩོན་གནང་བས་ལེགས་པར་མཁྱེན། མདོ་ཁམས་སུ་ཁྱོན་ལོ་ཉི་ཤུ་ཙམ་བཞུགས།  རབ་བྱུང་དང་བོའི་ཆུ་རྟ་༼1042༽ལོར་ཇོ་བོ་རྗེ་མངའ་རིས་སུ་ཕེབས་པ་གསན་ཏེ་མངའ་རིས་སུ་ཕེབས།  སྤུ་ཧྲེང་དུ་ཇོ་བོ་དང་མཇལ་ཞིང་ཇོ་བོ་དབུས་གཙང་དུ་གདན་དྲངས།  ཇོ་བོའི་སྐྱེས་བུ་གསུམ་གྱི་གདམས་པ་འཁོར་བ་ལ་སྐྱོ་བ་སྐྱེད་ཅིང་བློ་བཟློག་ནས།  སྐྱབས་འགྲོ་དང་སེམས་བསྐྱེད་ལ་སོགས་པ་ལ་རིམ་གྱིས་སྦྱངས། ཇོ་བོ་རྗེས་རྒྱ་ཆེན་སྤྱོད་རྒྱུད་དང་ཟབ་མོ་ལྟ་རྒྱུད་ཀྱི་གདམས་པ་ཡོངས་སུ་རྫོགས་པའི་གནས་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཤིང་རྟ་ཆེན་པོའི་ལམ་བྱང་ཆུབ་ལམ་གྱི་སྒྲོན་མེའི་གདམས་པ་ཟབ་མོ་མཐའ་དག་འབྲོམ་སྟོན་ཉིད་ལ་གནང་སྟེ་བསྟན་པའི་བདག་པོར་མངའ་གསོལ།  མངོན་པར་རྟོགས་པའི་ལམ་ལ་རྩལ་ཐོན།  ཡི་དམ་གྱི་ལྷ་དཔག་ཏུ་མེད་པའི་ཞལ་གཟིགས།  ཇོ་བོ་མྱ་ངན་ལས་འདས་རྗེས་ཇོ་བོའི་འདས་མཆོད་རྒྱ་ཆེར་མཛད་ནས་སྐུ་གདུང་དངུལ་གྱི་མཆོད་རྟེན་བཞེངས།  ཇོ་བོའི་བཀའ་བཞིན་རབ་བྱུང་དང་བོའི་མེ་སྤྲེལ༼1056༽ལོར་རྭ་སྒྲེང་དགོན་པ་ཕྱག་བཏབ།  རྭ་སྒྲེང་དཀར་ཆགལྟར་ན་མེ་སྤྲེལ་༼1056༽ལོ་དགོན་པ་གོང་དང་གཟིམ་ཁང་བཏབ། མེ་བྱ༼1057༽ལོར་དབུ་རྩེ་ཀ་གཉིས་དང་ལྷ་ཁང་ཁྱུང་མགོ་ཅན་བཞེངས་པར་བཤད།

      ཇོ་བོའི་རྗེའི་བཞེད་སྲོལ་ལྷ་ཆོས་བདུན་ལྡན་གྱི་བཀའ་གདམས་བསྟན་པ་དར་སྤེལ་མཛད་པ་དང་ཇོ་བོའི་སློབ་མ་རྣམས་ཀྱང་ཆོས་འཚོ་བ་གཉིས་ཀྱིས་བསྐྱངས་པས་བཀའ་གདམས་བསྟན་པའི་བདག་པོར་གྱུར། འབྲོམ་སྟོན་པ་ཉིད་རྟེན་དགེ་བསྙེན་ཡིན་ཡང་བསླབ་ཁྲིམས་སྲུང་བ་ནི་དགེ་སློང་ལས་ལྷག་པར་མཛད། མཐར་དགུང་ལོ་དྲུག་ཅུ་བ་རབ་བྱུང་དང་བོས་ཆུ་ཡོས་༼1063༽ ལོར་རྭ་སྒྲེང་དགོན་དུ་མྱ་ངན་ལས་འདས།

འབྲོམ་སྟོན་པས་སློབ་མ་མང་དུ་བསྐྱངས་ཤིང་།  ཁྱད་པར་ཐུགས་སྲས་གཙོ་བོ་སྐུ་མཆེད་བཞི་ཞེས་གྲགས་པ་ནི་ཕུ་ཆུང་བ་གཞོན་ནུ་རྒྱལ་མཚན།  པོ་ཏོ་བ་རིན་ཆེན་གསལ།  སྤྱན་སྔ་བ་ཚུལ་ཁྲིམས་འབར།  ཁམ་ལུང་བ་དང་བཞིར་གྲགས་སོ།།

ནག་ཚོ་ལོ་ཙཱ་བ།

ནག་ཚོ་ལོ་ཙཱ་བ་ཚུལ་ཁྲིམས་རྒྱལ་བ་ནི་བོད་ལྕགས་ཕག༼1011༽ལོར་མངའ་རིས་རྫོང་དགའི་ལྷ་གདོང་དུ་སྐུ་འཁྲུངས།  རབ་ཏུ་བྱུང་བའི་མཚན་ལ་ཚུལ་ཁྲིམས་རྒྱལ་བ་ཞེས་གསོལ།  རྒྱ་གར་དུ་སློབ་གཉེར་ལ་ཕེབས་ནས་རྒྱ་བརྩོན་སེང་ལས་མངོན་པ་གསན།  ལྷ་བླ་མ་བྱང་ཆུབ་འོད་ཀྱི་བཀའ་བཞིན་དགུང་ལོ་བཅུ་བདུན་པ་ལ་ཇོ་བོ་རྗེ་བོད་དུ་སྤྱན་དྲངས་ནས་ལོ་བཅུ་དགུ་ཙམ་ཇོ་བོའི་རྗེ་འགྲམ་ནས་མདོ་སྔགས་ཀྱི་ཆོས་གཞུང་མ་ལུས་པ་གསན། ཇོ་བོ་བོད་དུ་སྤྱན་དྲངས་པས་བོད་ཁམས་སྤྱི་ལ་བཀའ་དྲིན་ཆེ་བས་བོད་སྟོན་རྣམས་ཀྱིས་སློབ་དཔོན་ཞེས་བརྗོད།  ནག་ཚོ་བལ་ཡུལ་དུ་བྱོན་མཁར་ཇོ་བོ་རྗེས་བསླབ་བྱ་མང་དུ་མཛད་དེ་ཇོ་བོ་ཉིད་ཀྱི་སྐུ་མཐེ་བོང་ཙམ་སེང་ལྡིང་ལ་བྲེས་ཏེ་གའུར་བཅུག་ནས་དཔུང་བ་ལ་བཏགས།  དེ་རྗེས་རས་ཁྲུ་བཅུ་དྲུག་པ་གཅིག་ལ་རྒྱ་གར་གྱི་རི་མོ་མཁན་ནག་པོ་བྱ་བའི་ཇོ་བོ་རྗེ་སྐུ་ཁྲུས་གཞལ་ཏེ་བྲིས།  མངའ་རིས་སྐོར་གསུམ་དུ་རྟེན་ལ་བྱིན་རླབས་ཆེ་ཤོས་སུ་གྲགས། ཇོ་བོའི་ཆོས་རྣམས་ལ་ཁོང་གིས་མི་མཁྱེན་པ་གཅིག་ཀྱང་མེད་བྱས་ཀྱང་ཆོག་སྟེ། ཁོང་རང་ཉིད་ཀྱིས་ཀྱང་ནག་ཚོ་བདག་ཉིད་གཅིག་པུ་མ་གཏོགས་པ།  ཇོ་བོའི་སློབ་མ་གཞན་ལ་ཡོད་རེ་སྐན།  ཞེས་གསུངས།  ཇོ་བོ་རྗེས་བོད་དུ་གསུངས་པའི་བཀའ་བསྟན་མང་ཆེ་བ་ནག་ཚོ་ལོ་ཙཱ་བས་ཕབ་བསྒྱུར་མཛད།  མཐར་རབ་བྱུང་དང་བོའི་ཤིང་འབྲུག༼1064༽ལོར་སྐུ་གཤེགས།

ལོ་ཙཱ་བ་རིན་ཆེན་བཟང་བོ།

   ལོ་ཙཱ་བ་རིན་ཆེན་བཟང་བོ་བོད་ས་རྟ་༼958༽ལོར་མངའ་རིས་གུ་གེའི་ཆ་ལྦཾ་རཏྣ་རུ་སྐུ་འཁྲུངས།  དགུང་ལོ་བཅུ་གསུམ་སྟེང་མཁན་པོ་ཡེ་ཤེས་བཟང་བོ་ལས་རབ་ཏུ་བྱུང་།  དགུང་ལོ་བཅུ་བདུན་ལ་ཕེབས་སྐབས་རྒྱ་གར་དུ་སློབ་གཉེར་ལ་བྱོན།  ལོ་བཅུ་ཙམ་བཞུགས། ཇོ་བོ་ན་རོ་ཏ་ལ་སོགས་པའི་སྤྱན་སྔ་ནས་མདོ་སྔགས་དང་།  སྒྲ་རིག་པ།  ཚད་མ། གསོ་བ་རིག་པ་ལ་སོགས་རིག་གནས་མཐའ་དག་ལ་སྦྱངས་བརྩོན་མཐར་ཕྱིན་མཛད། དགུང་ལོ་སུམ་ཅུ་སོ་ལྔ་བཞེས་པར་སླར་བོད་དུ་བྱོན།  དགུང་ལོ་ཞེ་དགུའི་སྟེང་པཎྜིཏ་ཟླ་འོད་བཟང་བོ་དང་དྷི་ན་སོ།། ཀ་མ་ལ་རཀྵི་ཏ་ལས་བླ་ཆེན་སྡོམ་རྒྱུན་གྱི་བསྙེན་པར་རྫོགས།  མངའ་བདག་ལྷ་ལྡེས་སྤུ་ཧྲེང་གཞིར་གྱི་གནས་གཞི་ཕུལ་བས་ཁྲ་ཙའི་གཙུག་ལག་ཁང་དང་།  རོང་གི་གཙུག་ལག་ཁང་སོགས་གཙུག་ལག་ཁང་མཆོད་རྟེན་མང་དུ་བཞེངས།  མདོ་སྔགས་རིག་གནས་སྨན་དཔྱད་དང་བཅས་པའི་རྒྱ་གཞུང་བོད་དུ་བསྒྱུར་བ་དང་འགྱུར་བཅོས་མཛད་པ་ཤིན་ཏུ་མང་།  བོད་དུ་གསང་སྔགས་གསར་མའི་ཐ་སྙད་དེ་ཡང་ལོ་ཆེན་རིན་ཆེན་བཟང་བོ་ནས་འགོ་ཚུགས།  ཡི་དམ་གྱི་བསྐྱེད་རིམ་གྱིས་ཏིང་ངེ་འཛིན་ལས་ཀླུ་དཀར་རྒྱལ་བཏུལ།  དགུང་ལོ་གྱ་ལྔར་ཇོ་བོ་རྗེ་དང་མཇལ་ཞིང་ཇོ་བོའི་གདམས་པ་མང་དུ་ཞུས་ནས་ཇོ་བོའི་སྒྲུབ་བ་ལ་བསྐུལ་བས་སྒྲུབ་ཁང་སྒོར་ཚེ་འདིའི་རྣམ་རྟོག་སྐད་ཅིག་ཙམ་སྐྱེད་ན་བསྟན་སྲུང་རྣམས་ཀྱིས་མགོ་བོ་ཁོལ་ཅིག་ཅེས་སྒོ་ཡིག་སྦྱར་ནས་རྩེ་གཅིག་ཏུ་སྒོམ་སྒྲུབ་མཛད་པས་སྒྲུབ་བ་མཐར་ཕྱིན་ཏེ་དགུང་ལོ་གོ་བརྒྱད་པ་རབ་བྱུང་དང་བོའི་ཤིང་ལུག༼1055༽ལོར་ཁྲ་ཙེ་ཝིང་གིན་དུ་སྐུ་གཤེགས།

ཁུ་སྟོན་བརྩོན་འགྲུས་གཡུང་དྲུང་།

ཁུ་སྟོན་བརྩོན་འགྲུས་གཡང་དྲུང་ནི་བོད་ལྕགས་ཕག༼1011༽ལོར་ཁུའི་རིགས་སུ་སྐུ་འཁྲུངས།  གྲུ་མེར་ཚུལ་ཁྲིམས་འབྱུང་གནས་ལས་རབ་ཏུ་བྱུང་།  ཇོ་བོ་རྗེ་དབུས་གཙང་དུ་ཕེབས་སྐབས་ཐང་པོ་ཆེར་གདན་དྲངས།  ཕར་ཕྱིན་གྱི་བཤད་པ་མཛད་པ་སོགས་ཇོ་བོའི་ཆོས་མང་དུ་མངའ་ཡང་ཕ་རོལ་ཏུ་ཕྱིན་པའི་གདམས་པ་དང་།  གཤིན་རྗེ་གཤེད་ཀྱི་མན་ངག་ལ་རྩལ་ཐོན།  མཐར་རབ་བྱུང་དང་བོའི་ཤིང་ཡོས༼1075༽ལོར་སྐུ་གཤེགས།

       

རྔོགས་ལེགས་པའི་ཤེས་རབ།                         རྔོགས་བློ་ལྡན་ཤེས་རབ།

རྔོག་ལེགས་པའི་ཤེས་རབ་ནི་འབྲིང་ཡེ་ཤེས་ཡོན་ཏན་ལས་རབ་ཏུ་བྱུང་།  ཁམས་སུ་བྱོན་ནས་ཇོ་བོ་སེ་བཙུན་གྱི་སློབ་མ་མཛད་དེ་ཆོས་མང་དུ་གསན། ཁུ་སྟོན་དང་འགྲོགས་ཏེ་དབུས་སུ་བྱོན།  མངའ་རིས་གུ་གེ་རྒྱལ་བོས་ཁ་ཆེའི་ཡུལ་དུ་མངགས་ཏེ་ནང་ཆོས་སློབ་གཉེར་མཛད་ནས་མཁས་པར་གྱུར། ཕྱིས་ལོ་ཆེན་རིན་ཆེན་བཟང་བོ་དང་མཉམ་དུ་བཀའ་བསྟན་མང་དུ་བསྒྱུར།  ཇོ་བོ་རྗེ་དབུས་སུ་ཕེབས་སྐབས་ལྷ་སར་གདན་དྲངས།  ཇོ་བོའི་ཐུགས་སྲས་སུ་གྱུར།  རྔོག་གི་ལོ་པཎ་ལ་ཞུས་ནས་རྟོག་གེ་འབར་བ་བསྒྱུར། བྲག་ནང་གི་རྩར་དགོན་པ་ཞིག་མཛད་པ་ལས་ཕྱིས་ཇོ་བོ་རྗེའི་ལུང་བསྟན་ལྟར་རབ་བྱུང་དང་བོའི་ཆུ་གླང་༼1073༽ལོར་གསང་ཕུ་ནེའུ་ཐོག་དགོན་པ་ཕྱག་བཏབ།  རྔོག་ལེགས་པའི་ཤེས་རབ་དང་རྔོག་བློ་ལྡན་ཤེས་རབ་ཀྱིས་ཚད་མ་རྣམ་ངེས་དང་བྱམས་ཆོས་སྡེ་ལྔ་གཞིར་བཞག་གིས་གསང་ཕུར་རིགས་ལམ་ནས་དྲངས་པའི་འཆད་ཉན་ཤིན་ཏུ་དར་བར་མཛད། རྔོག་ལེགས་པའི་ཤེས་རབ་ཀྱིས་ཇོ་བོའི་ཆོས་མང་དུ་མཁྱེན་པས།  དབུ་མའི་ལྟ་བ་ལ་རྩལ་ཐོན་ཞིང་།  སྒྲོལ་མས་ཞལ་གཟིགས།  བཀའ་གདམས་ཀྱི་བསྟན་པ་དར་ཞིང་རྒྱས་པར་མཛད་དོ།།

ཨ་མེས་བྱང་ཆུབ་རིན་ཆེན།

ཨ་མེས་བྱང་ཆུབ་རིན་ཆེན་ནི་བོད་ཤིང་ཡོས༼1015༽ལོར་མདོ་སྨད་ཙོང་ཁའི་ཡུལ་དུ་སྐུ་འཁྲུངས།  ཁོང་གིས་ཇོ་བོར་སྒོ་གསུམ་གུས་པས་བསྙེན་བཀུར་ཚད་མེད་ཞུས།  ཇོ་བོའི་ཆོས་བཀའ་མ་ལུས་པ་མཁྱེན་ཅིང་།  ལྷག་པར་ཏུ་བདེན་གཉིས་ལ་ཤིན་ཏུ་མཁས་པ་དང་ལས་ཁ་ཚར་གྱི་ཆོས་སྐོར་ལ་རྩལ་ཐོན།  དམ་ཚིག་གསུམ་བཀོད་པ་དང་འཇམ་དཔལ་རྡོ་རྗེས་ཞལ་གཟིགས།  འབྲོམ་སྟོན་པས་རྭ་སྒྲེང་དུ་གདན་དྲངས།  རབ་བྱུང་དང་བོའི་ཤིང་སྦྲུལ༼1065༽ ལོར་བཀའ་གདམས་བསྟན་པའི་གདན་ས་བསྐྱངས།  རབ་བྱུང་དང་བོའི་ས་རྟ་༼1078༽ ལོར་མྱ་ངན་ལས་འདས།

འགོས་ལོ་ཙཱ་བ།

  འགར་འགོས་ལ་གསང་སྔགས་ཀྱི་གདམས་པ་མ་ལུས་པ་གནང་སྟེ་སྔགས་པ་སེང་གེ་འདྲ་བ་ཞིག་བྱུང་ཞེས་གྲགས།  ཁྱད་པར་དུ་འགར་གྱི་འཕགས་སྐོར་དང་བདེ་མཆོག་གི་ཆོས་སྐོར་ལ་རྩལ་ཐོན།

དགོན་པ་བྱང་ཆུབ་རྒྱལ་མཚན།

དགོན་པ་བྱང་ཆུབ་རྒྱལ་མཚན་རབ་བྱུང་གོང་མེ་ཕོ་འབྲུག༼1016༽ལོར་སྐུ་འཁྲུངས།  སྤྱིར་ཇོ་བོའི་ཆོས་མང་དུ་མཁྱེན་ཅིང་ཁྱད་པར་དུ་བསྒོམ་གྱི་གདམས་པ་ལ་རྩལ་ཐོན། དམ་ཚིག་གསུམ་བཀོད་ཀྱི་ཡི་དམ་གྱི་ཞལ་གཟིགས།  ས་ཕོ་རྟ་ལོ་ནས་རྭ་སྒྲེང་གི་གདན་ས་ལོ་ལྔ་མཛད།  རབ་བྱུང་དང་བོའི་ཆུ་ཁྱི་༼1082༽ལོར་སྐུ་གཤེགས།

དགེ་བཤེས་ཕུ་ཆུང་བ།

རྣལ་འབྱོར་བ་ཤེས་རབ་རྡོ་རྗེ་ནི་སྤྱིར་ཇོ་བོའི་ཆོས་མང་མཁྱེན་ཅིང་།  ཁྱད་པར་གྲུབ་མཐའ་ལ་རྩལ་ཐོན།  ཡི་གེ་དྲུག་མའི་ཞལ་གཟིགས་རྫུ་འཕྲུལ་ཡང་ཐོབ་སྐད།  བང་སྟོན་གྱིས་བྱང་ཆུབ་ཀྱི་སེམས་བསྐྱེད་པ་ལ་སོགས་པ་དང་།  དངོས་གྲུབ་བརྙེས་པ་སོགས་ཡོན་ཏན་བསམ་གྱིས་མི་ཁྱབ་པ་ཡོད་པར་གྲགས།  བཀའ་གདམས་སྐུ་མཆེད་གསུམ་གྱི་ཡ་གྱལ་དགེ་བཤེས་ཕུ་ཆུང་བ་གཞོན་ནུ་རྒྱལ་མཚན་ནི་བོད་རབ་བྱུང་དང་བོའི་ལྕགས་ལུགས༼1031༽ ལོར་འཕན་ཡུལ་རྒྱལ་གྱི་སྐྱི་ར་རྫིང་ཁར་དུ་སྐུ་འཁྲུངས།  ཆུང་ངུའི་དུས་གསེར་ཞོ་དོ་བསྣམས་ཏེ་རྒྱལ་ལྷ་ཁང་དུ་ཕེབས།ཞང་ཆེན་པོ་གླན་ཚུལ་བྱང་ལས་རབ་ཏུ་བྱུང་། མཚན་གཞོན་ནུ་རྒྱན་མཚན་དུ་གསོལ།  ཁུ་སྟོན་ལས་ཕར་ཕྱིན་གྱི་འགྲེལ་ཆུང་ཚར་བཅོ་ལྔ་ཙམ་གསན།  སྙེ་ཐང་དུ་ཇོ་བོ་རྗེ་མཇལ་ནས་ཆོས་ཀྱང་ཞུས།  འབྲོམ་སྟོན་གྱིས་འཕགས་པའི་བདེན་པ་བཞི་ལ་སོགས་པའི་ཆོས་མང་དུ་གསུངས།  འབྲོམ་སྟོན་པའི་ཕྱག་ཕྱི་མཛད་ནས་རྭ་སྒྲེང་དུ་ཕེབས།  འབྲོམ་སྟོན་གྱི་ཐུགས་སྲས་སུ་གྱུར།  དཀོན་མཆོག་མཆོད་པའི་ལས་ལ་ཤིན་ཏུ་བརྩོན་ཞིང་།  ནང་དུ་ཐུགས་དམ་ལ་རྩེ་གཅིག་ཏུ་བརྩོན།  ཚོགས་པ་མ་བསྐྱང་ཡང་ཆོས་འབྲེལ་ཞུ་བ་རྣམས་ལ་བདེན་པ་བཞིའི་ཆོས་སྐོར་རྒྱས་པར་གསུངས།  བཀའ་གདམས་མན་ངག་པའི་སྲོལ་བཏོད་ནས་བཀའ་གདམས་ཀྱི་བསྟན་པ་རྒྱས་པར་མཛད་དེ་མཐར་དགུང་ལོ་བདུན་ཅུ་དོན་དྲུག་པ་རབ་བྱུང་གཉིས་པའི་མེ་ཁྱི༼1106༽ ལོར་མྱ་ངན་ལས་འདས།

པོ་ཏོ་བ་རིན་ཆེན་གསལ།

བཀའ་གདམས་སྐུ་མཆེད་གསུམ་གྱི་ཡ་གྱལ་པོ་ཏོ་བ་རིན་ཆེན་གསལ་ནི་བོད་རབ་བྱུང་དང་བོའི་མེ་ཡོས༼1027༽ ལོར་ཡབ་སྲིན་པོ་དང་ཡུམ་ལེ་མོ་གཉིས་ཀྱི་སྲས་སུ་འཕན་ཡུལ་དུ་སྐུ་འཁྲུངས།  སྐུ་ཆུང་ངུ་ནས་སྙིང་རྗེ་ཆེ་ཞིང་ཆོས་ལ་དད་པས་ཡེར་པ་བ་རྔོག་བྱང་ཆུབ་འབྱུང་གནས་དང་།  འཕན་པོ་རྒྱལ་ལྷ་ཁང་གི་གླན་ཚུལ་བྱང་གཉིས་ལས་རབ་ཏུ་བྱུང་མཚན་རིན་ཆེན་གསལ་ཞེས་གསོལ།  བཀའ་གདམས་པའི་ཆོས་སྤྱོད་རྣམས་སྦྱངས་ཤིང་བསླབ་ཁྲིམས་དག་རང་གི་མིག་འབྲས་བཞིན་བསྲུངས།  ཁུ་སྟོན་སོགས་མཁས་པ་མང་དུ་བསྟེན་ནས་སྡེ་སྣོད་གསུམ་ལ་སྦྱངས་བརྩོན་མཐར་ཕྱིན་མཛད།  ཡེར་པ་ཇོ་བོ་རྗེ་ལ་སྒོམ་རིམ་བར་བ་གཅིག་གསན།  འབྲོམ་སྟོན་པ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ནས་ལོ་ངོ་བདུན་ཙམ་བཞུགས་རིང་སྡེ་སྣོད་གསུམ་སོགས་སྦྱངས་བརྩོན་གནང་སྟེ་མཁས་པའི་མཐར་གསོན།  ཡུན་རིང་དུ་སྒྲུབ་པ་ཉམས་ལེན་འབའ་ཞིག་མཛད།  དགུང་ལོ་ལྔ་བཅུ་ང་གཅིག་ནས་བཀའ་གདམས་གཞུང་དྲུག་གིའཆད་ཉན་མཛད་དེ་བཀའ་གདམས་གཞུང་བ་བའི་སྲོལ་བཏོད།  མཁར་བྲག་དང་སྒྲོ་ལག་དགོན་མཐར་ཐོག་དང་སྟག་ལུང་ལ་སོགས་གནས་ངེས་མེད་དུ་བཞུགས།  ཚོགས་པ་སྟོང་ཕྲག་ལྷག་རེ་འདུས།  ཇོ་བོའི་ཆོས་བྱང་ཆུབ་ལམ་གྱི་སྒྲོན་མ་གཙོ་བོར་བཟུང་ནས་ཆོས་འཆད་ཉན་མཛད་པས་ཚིག་གཅིག་ཀྱང་མ་ལུས་པ་ཉམས་ལེན་ཁོ་ནར་སྦྱར་ནས་གསུངས།  གཞན་ཡང་མདོ་སྡེ་རྒྱན་དང་བྱང་ས།  བསླབ་པ་ཀུན་བཏུས།  སྤྱོད་འཇུག  སྐྱེས་རབས་དང་ཆེད་དུ་བརྗོད་པའི་ཚོམས་ལ་སོགས་པ་ནན་ཏན་དུ་གསུངས།  སྐུ་ཚེའི་སྨད་ལ་པོ་ཏོ་དགོན་པ་ཕྱག་བཏབ་པས་དགེ་བཤེས་པོ་ཏོ་ཞེས་གྲགས།  རབ་བྱུང་གཉིས་པའི་ཤིང་བྱ༼1105༽ ལོར་དགུང་ལོ་དོན་དགུའི་སྟེང་སྐུ་གཤེགས།

སྦྱན་སྔ་བ་ཚུལ་ཁྲིམས་འབར།

བཀའ་གདམས་སྐུ་མཆེད་གསུམ་གྱི་ཡ་གྱལ་སྤྱན་སྔ་བ་ཚུལ་ཁྲིམས་འབར་ནི་ཡབ་དབས་ཤཱཀྱ་རྡོ་རྗེ་དང་ཡུམ་ལི་མོ་ཡེ་ཤེས་སྒྲོན་གཉིསཀྱི་སྲས་སུ་རབ་བྱུང་དང་བོའི་ས་སྟག༼1038༽ ལོར་འཕན་པོ་ཉན་སྣ་ར་སྒང་དུ་སྐུ་འཁྲུངས།  ཆུང་ངུ་ལས་སྟོད་ལུང་མལ་ཤེས་རབ་སེམས་དཔའ་ལས་རབ་ཏུ་བྱུང་།  ཡུམ་གྱི་བཀའ་ལྟར་དགུང་ལོ་ཉི་ཤུར་རྭ་སྒྲེང་དུ་འབྲོམ་སྟོན་པས་འདི་ཉིད་ལ་སྟོང་ཉིད་ལྟ་བའི་གདམས་པ་བསྩལ་ནས་བསྒོམས་གསུངས་ཤིང་ཇོ་བོའི་སྔགས་ཀྱི་གདམས་པ་ཡང་མང་དུ་གནང་བས་སྤྱན་སྔ་བ་ཞེས་གྲགས།  དེ་བཞིན་རྣལ་འབྱོར་བ་ཆེན་པོ་ཨ་མེས་བྱང་ཆུབ་རིན་ཆེན་ལས་བདག་མེད་ཕྲ་མོ་སོགས་བཀའ་ཁྲིད་རྫོགས་པར་ཞུས།  དགུང་ལོ་ང་བརྒྱད་པ་རབ་བྱུང་གཉིས་པའི་ཤིང་ཕག༼1095༽ ལོར་ལོ་དགོན་པ་ཕྱག་བཏབ།  བཀའ་གདམས་མན་ངག་པའི་སྲོལ་བཏོད།  སྐུ་ཉིད་ལོ་ཙཱ་ལ་ཡང་མཁས་ཤིང་།  ཤམ་ཐབས་ལ་ཀོ་བའི་ལྷན་པ་མང་དུ་བཏབ་པས་ཀོ་ཤམ་པར་ཡང་གྲགས།  མཐར་དགུང་ལོ་དྲུག་ཅུ་རྩ་དྲུག་པ་རབ་བྱུང་གཉིས་པའི་ཆུ་ལུག༼1103༽ ལོར་སྐུ་གཤེགས།

     གཞན་ཡང་བཀའ་བརྒྱུད་བསྟན་པའི་སྲོལ་གཏོད་ལྷོ་བྲག་མར་བ་ལོ་ཙཱ་བ་རྒྱ་གར་ཏུ་ཕེབས་སྐབས་དཔལ་ཁུད་ཐང་དུ་ཇོ་བོ་རྗེ་དང་མཇལ་ཞིང་ཆོས་ཀྱི་གདམས་པ་མང་དུ་གསན།  མཉམ་མེད་དྭགས་པོ་ལྷ་རྗེས་ཇོ་བོའི་དངོས་སློབ་རྣལ་འབྱོར་བ་ཆེན་པོའི་སློབ་མ་རྒྱ་ཡོན་ལས་བཀའ་གདམས་ཀྱི་ཆོས་མ་ལུས་པ་གསན།  དེ་ནས་རྗེ་བཙུན་མི་ལ་རས་པ་ལས་ཕྱག་ཆེན་གསན་ནས་བཀའ་ཕྱག་ཆུ་བོ་གཉིས་འདྲེས་ཀྱི་གདམས་པ་ལམ་རིམ་ཐར་རྒྱན་མཛད།  རྗེ་ཕག་མོ་གྲུ་བས་བཀའ་གདམས་དགེ་བཤེས་དོལ་བུ་པ་ལས་བཀའ་གདམས་ཀྱི་ཆོས་གསན་ཅིང་།  བསྟན་རིམ་གྱི་བསྟན་བཅོས་ཀྱང་མཛད།  འབྲི་གུང་སྐྱོབ་པ་འཇིག་རྟེན་མགོན་པོས་བཀའ་གདམས་དགེ་བཤེས་གླང་ལུང་བའི་ཞབས་ལ་གཏུགས་ནས་གདམས་པ་མང་དུ་གསན་པ་དང་།  ཀརྨ་པ་དུས་གསུམ་མཁྱེན་པས་བཀའ་གདམས་དགེ་བཤེས་ཤ་ར་བའི་སློབ་མ་རྣལ་འབྱོར་བ་ཤེས་རབ་རྡོ་རྗེ་ལས་བཀའ་གདམས་ཀྱི་ཆོས་གསན་ནས་སྤྱོད་ཕྱོགས་ཀྱི་ཉམས་ལེན་རྣམས་བཀའ་གདམས་ལུགས་བཞིན་མཛད།  ས་སྐྱ་པཎྜིཏས་བཀའ་གདམས་དགེ་བཤེས་སྣེའི་ཟུར་བའི་སློབ་མ་སྤྱི་བོ་ལྷས་པ་ལས་བཀའ་གདམས་ཀྱི་ཆོས་བཀའ་མང་དུ་གསན་ཅིང་།  ཐེག་ཆེན་ལམ་གྱི་ཉམས་ལེན་རྣམས་བཀའ་གདམས་པའི་ལུགས་ཁོ་ན་མཛད།

བློ་བཟང་གྲགས་པ།

   རྒྱལ་བ་ཙོང་ཁ་བ་བློ་བཟང་གྲགས་པས་ཀྱང་ལྷོ་བྲག་གྲུབ་ཆེན་ནམ་མཁའ་རྒྱལ་མཚན་དང་ཆོས་སྐྱབས་བཟང་བོ་གཉིས་ལས་བཀའ་གདམས་ཀྱི་ཆོས་གསན་ཅིང་།   བྱང་ཆུབ་ལམ་གྱི་སྒྲོན་མ་གཞིར་བཞག་སྔོན་མེད་ལེགས་བཤད་ཀྱི་བསྟན་བཅོས་ལམ་རིམ་ཆེ་ཆུང་སོགས་མདོ་སྔགས་ཀྱི་གསུང་རྩོམ་ཇི་སྙེད་ཅིག་གསར་རྩོམ་མཛད་དེ་དགེ་ལུགས་པའི་གྲུབ་མཐའི་སྲོལ་བཏོད་མཛད།  བཀའ་གདམས་གླེགས་བམ་ལས།  །ཐ་མར་བསྟན་པའི་མེ་རོ་དག  །གྲགས་པའི་མཚན་གྱིས་གསོ་བར་བྱེད།   །ཅེས་ལུང་བསྟན་པ་ལྟར།  བཀའ་གདམས་པ་ལ་མ་རྟོགས་ལོག་རྟོག་གི་དྲི་མ་མཐའ་དག་བསལ་ཏེ་ཇོ་བོའི་བཀའ་གདམས་པའི་རྣམ་ཐར་གཙང་མས་བོད་གངས་ལྗོངས་ཡུལ་གྲུ་ཀུན་ཏུ་རྒྱ་ཁྱབ་ཀྱི་དར་བཞིན་རྒྱས་པར་མཛད་པ་བཅས་སོ།།

གསར་འགོད་པ། བློ་བཟང་ཆོས་གྲགས།


དྲ་རྒྱ་གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ། རྩོམ་སྒྲིག་པ། འོད་ཟེར་བཟང་བོ། སྦྲ་ནག་འཇིགས་མེད་རྡོ་རྗེ། འབའ་སྣང་གྲོལ། བན་ཤུལ་འཇམ་དབྱངས།
འདྲེན་བཀོལ:
61.4K

  དཔྱད་གཏམ ( 0 )ཡོད།
དཔྱད་གཏམ་སྤེལ་ས།
སྤེལ་མཁན། བཤེར་གྲངས། qngt བཤེར་གྲངས་ཁ་སྐོང་བྱོས།ཡིག་འབྲི་བཞི་ལས་མང་མི་རུང་།ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་།ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།      
 
མིག་སྔར་འདི་རུ་དཔྱད་གཏམ་སྤེལ་མཁན་མ་བྱུང་།
ལྟ་ཀློག་གྲངས་ཀ
5861532
 
འབྲེལ་གཏུག་བྱ་ཡུལ།    ཁ་པར།  15283703999    E-mail:www.jmjzjy@126.com
པར་དབང་རྭ་རྒྱ་ཤེས་རིག་ནོར་བུའི་སློབ་གླིང་ལ་དབང་།
网站备案号:青ICP备15000002号 青公网安备 63262102000011号