ཚོགས་འདུའི་སྤྱི་སྐྱོང་བ་རྟ་ནག་བཟོད་པས་ཉིན་གཅིག་རིང་གི་ཚོགས་འདུའི་ལས་རིམ་དང་ཚོགས་རའི་སྒྲིག་ལམ།  གདན་ཞུའི་ཆེད་མཁས་ངོ་སྤྲོད།  རོགས་སྒྲུབ་ཁེ་ལས་ངོ་སྤྲོད།  བློན་པོ་གསེར་ཆེན་སྤྱི་གཉེར་གྱི་སྐབས་དང་བོ་དང་གཉིས་པའི་ཟབ་སྦྱོང་ཚོགས་འདུའི་དགོས་དོན་དང་སྐབས་ཕྱི་མ་རེ་རེ་རྒྱུན་སྐྱོང་དམིགས་གཞི་བཅས་ཀྱི་བཤད་གླེང་ཁྲོད་ཚོགས་འདུའི་དངོས་གཞིར་ཞུགས།

     ཐེངས་འདིའི་གདན་ཞུའི་འཇོན་མི།  རྒྱལ་སྤྱིའི་གསོ་རིག་འབུམ་རམས་པ།  འཇིགས་མེད་བོད་སྨན་གྱི་སྤྱིའི་འགན་འཛིན་པ་རྒན་འཇིགས་མེད་ཕུན་ཚོགས་ལགས་ཀྱིས་<<བོད་དཔལ་འབྱོར་རིག་པའི་འཇུག་སྒོ>>ཞེས་པའི་བརྗོད་གཞིའི་སྟེང་དུས་ཚོད་གཉིས་ལྷག་ལ་གཏམ་བཤད་གལ་ཆེན་གནང་བ་ལས་གཞན་ལྷག་འཕྲོའི་སྐར་མ་བཞི་བཅུའི་ཡུན་ལ་ཚོགས་ཞུགས་མི་སྣའི་དྲི་བ་སྣ་ཚོགས་ལ་ལན་བཏབས་ཏེ་ཚོགས་རར་དོན་སྙིང་ཆེན་པོ་ལྡན་པ་བྱུང་།

     ཕྱི་དྲོའི་དུས་ཚོད་གཉིས་ཀྱི་སྟེང་ལས་རིམ་འཕྲོ་མ་མུ་མཐུད་དེ།  གདན་ཞུའི་འཇོན་མི།  མཚོ་སྔོན་ཞིང་ཆེན་ཚོང་ལས་ཡར་སྐུལ་ཚོགས་པའི་ཚོགས་གཞོན།  བོད་ཀྱི་རི་མོ་བ་སྐད་གྲགས་ཅན།  གསེར་བྲག་དོན་གྲུབ་ཚེ་བརྟན་ལགས་ཀྱིས་ཚོང་དཔོན་ནོར་བཟང་གི་སྐུ་ཚེ་ལོ་རྒྱུས་དང་འབྲེལ་གཏམ་བཤད་གནང་བ་ལས་གཞན།  མཚོ་སྔོན་ཞིང་ཆེན་ཚོང་ལས་ཡར་སྐུལ་ཚོགས་པས་ངེད་བློན་པོ་གསེར་ཆེན་སྤྱི་གཉེར་ལ་གནང་བའི་ལེགས་སྐྱེས་བསྩལ་ཅིང་བརྩི་མཐོང་ཤིས་ཚིག་སྒྲོག་འདོན་གནང་བ་དང་། བོད་མི་མང་ལ་སྐུ་དྲིན་རི་ལས་ལྕི་བའི་སློབ་གསོ་བ་ཆེན་མོ་རྒན་འཇིགས་མེད་རྒྱལ་མཚན་མཆོག་ནས་སྐར་མ་གཉིས་དང་སྐར་ཆ་སོ་བདུན་ཡུན་གྱི་བརྙན་ཐོག་ཤིས་ཚིག་གལ་ཆེན་འཆར་ངོས་ལས་བཏང་།

     དེའི་འཕྲོར།  གདན་ཞུའི་འཇོན་མི།  ཤམ་བྷ་ཚོང་དོན་མགྲོན་མཁར་གྱི་ཚོང་སྤྱི།  མཚོ་ལྷོ་ཚོང་ཚོགས་ཀྱི་ཚོགས་གཞོན།  ཚོང་རམས་པ་མཁྱེན་རབ་ལགས་ཀྱིས་<<ཚོང་བའི་ཆ་རྐྱེན་དང་འཚོ་བའི་འདུ་ཤེས>>ཞེས་པའི་བརྗོད་གཞིའི་ཐོག་མིག་སྔའི་བོད་སྤྱི་ཚོགས་ལ་དངོས་མཁོའི་གཏམ་བཤད་གལ་བོ་ཆེ་ཉིང་བསྡུས་སུ་གནང་།

     དེའི་འཕྲོར།  གདན་ཞུའི་འཇོན་མི།  མཚོ་ལྷོ་ཁུལ་ན་གཞོན་ལས་སྒོ་གསར་སྤེལ་གྱི་སྤྱི་ཁྱབ་ཧྲུའུ་ཅི།  གངས་ལྷ་མེ་ཏོག་སྤྱི་གཉེར་གྱི་སྤྱི་འགན་པ།  ན་གཞོན་ཁེ་ལས་པ་ཚེ་རིང་རྒྱལ་ལགས་ཀྱིས་རང་གི་ཚོང་གཉེར་བརྒྱུད་ལམ་དང་འབྲེལ་གཏམ་བཤད་གནང་།

    དེའི་འཕྲོར།  མཚོ་ལྷོ་ཁུལ་ཞིང་ཕྱུགས་ལས་ཁུངས་ཀྱི་ཚེ་རིང་རྡོ་རྗེ་ནས་གཏམ་བཤད་བྱས་རྗེས་ཉིན་ཧྲིལ་བོའི་ཚོགས་འདུ་རྒྱལ་ཁ་དང་བདེ་ལེགས་ཀྱིས་དཀྲིས་ནས་ཡོངས་སུ་གྲུབ་པ་བྱས།