མཉམ་མེད་ཇོ་བོ་རྗེ་དཔལ་ལྡན་ཨ་ཏི་ཤའི་རྣམ་ཐར་ཕྱོགས་བསྒྲིགས་དད་པའི་འཇུག་ངོགས་ལས།

དགུ་པ།   ལྷ་ས་སྙེ་ཐང་ན་མོ་ཆེར་སྐུ་མྱ་ངན་ལས་འདས་པའི་སྐོར།སྙེ་ཐང་དུ་སྤྱན་འདྲེན་པའི་དུས་སུ་བང་སྟོན་ལ་བལ་འཁོར་བཞི་དང་ནས་སྲན་ཁལ་བརྒྱད་ལས་མེད་པ་ལ་སྲིང་མོ་བཙུན་མ་ཕྱུག་མོ་ཞིག་ན་རེ།   ལོ་པཎ་སྤྱན་འདྲེན་པ་ལ་ཡོ་བྱད་ཅི་ཡོད་ཟེར་བས།   སྣེ་ལེན་ལྡང་ཙམ་ཡོད།   དེ་ནས་ཨ་ཏི་ཤ་ཡིད་བཞིན་གྱི་ནོར་བུ་ཡིན་པས་ཁོ་རང་ལས་འོང་པ་ཡིན།   ཁྱེད་རང་ཡང་ཡོ་བྱད་ཅི་ཡོད་ཕུལ་ཅིག   རང་རེ་གཉིས་ཀ་ཇོ་བོའི་ཐབ་ཁ་ལས་ཟོས་པས་ཆོག་གི་བྱས་པས།   དེས་ཡོ་བྱད་བཏང་སྟེ་སྣེ་ལེན་དཔེ་མེད་པ་གྲུབ།   ཁོང་རང་གིས་བལ་འཁོར་བཞི་དང་ནས་སྲན་ཁལ་བརྒྱད་བཅས་ཕུལ།

སྙེ་ཐང་ན་མོ་ཆེ།

     བང་སྟོན་གྱི་གཙོས་འཇང་པ་རྣམས་ཀྱིས་ནས་བོང་རྒྱབ་འཇང་ནས་སྙེ་ཐང་དུ་འབྲེལ་ཡང་ད་དུང་མ་རྫོགས་པར་ཕུལ།   དེ་ནས་བཙུན་མ་དེས་ཇོ་བོའི་ཐབ་ཁ་ནས་བཟས་པས།   བང་སྟོན་ན་རེ།   ཇོ་བོའི་དད་རྫས་ཁྱེད་ཀྱིས་མི་འཇུ་བས་ཁྱེད་རང་ཚོད་ལ་ཟོ་ཟེར།   ཇོ་བོ་སྙེ་ཐང་དུ་བཞུགས་རིང་ཉིན་ལྟར་གསོལ་ཞོ་ལུང་པའི་ཕུའི་འབྲོག་པས་ཕུལ་བས་དེའི་བྱིན་རླབས་ཀྱིས་ཁོང་ཚོའི་ཕྱུག་ཟོག་ལ་གཅན་གཟན་གྱི་གོད་ཆག་དང་ཕྱུག་ནད་སོགས་མི་བྱུང་ཟེར།   ཇོ་བོ་སྙེ་ཐང་ན་བཞུགས་པའི་དུས་སུ།   དབུས་གཙང་གི་མི་ཆེན་ཐམས་ཅད་ཚོགས་ནས་ཆོས་མང་དུ་ཞུས།

ལྷ་བཙུན་པས་བོད་ཀྱི་རབ་བྱུང་ཐམས་ཅད་ལ་མཁན་རྒྱུད་དེད་ནས་ཤམ་ཐབས་ཀྱི་ཁྲལ་བསྡུས་ནས་སྙེ་ཐང་ན་མོ་ཆེར་འབུལ་བ་ཆེན་པོ་བྱས་ཏེ་འབྲོམ་སྟོང་བཙན་ནམ་མཁའ་བྱ་བ་བོད་ན་གཟུགས་མཛེས་པ་ཞིག་གིས་ཕྱག་ཏུ་འབུལ་དུ་བཅུག    ཡང་དེ་ལ་བཙུན་མོ་རིན་པོ་ཆེ་རྒྱན་གྱིས་བརྒྱན་པ་སོགས་རྒྱལ་སྲིད་སྣ་བདུན་ཡང་ཕུལ།   བརྒྱད་སྟོང་པ་ཇོ་བོ་ཉིད་ཀྱིས་གང་མཁྱེན་པ་ཞིག་ཞུས་པ་ལ་ཕྱག་དར་སྟོན་པས་ཟིན་བྲིས་བྱས་པས་ཕར་ཕྱིན་ཁམས་ལུགས་སུ་གྲགས་པ་ཤིན་ཏུ་རྩ་ཆེ་བ་དེ་བྱུང་།   ཞང་སྣ་ཆུང་སྟོན་པ།   ལྡང་ལྗང་སྟོན་པ།   སྐྱུར་སྟོན་པ་དང་ཕྱག་དར་སྟོན་པ་སོགས་བཞིས་ཇོ་བོ་ལ་གྲུབ་མཐའ་ཞིག་ཞུས་པས།   ཕྱི་རོལ་པའི་འཇུག་པ་ལྔ་དང་ནང་པའི་འཇུག་པ་གཅིག་ཅེས་པ་ལ་བརྟེན་ནས་གྲུབ་མཐའ་ཁ་ཅིག་གསུངས་ནས་སློབ་དཔོན་རྣམས་ཀྱི་བཞེད་གཞུང་མང་པོ་ཞིག་ཡོད་དོ༎   དེ་ཐམས་ཅད་རྣམ་པར་རྟོག་པ་ཡིན།   ཚེ་ཐུང་འདི་ལ་རྣམ་རྟོག་བགྲང་གིས་མི་ལང་བས་སྙིང་བོ་བསྡུས་མཛོད་གསུངས།    ཞང་སྣ་ཆུང་སྟོན་པས་སྙིང་པོ་ཇི་ལྟར་བསྡུ་ལགས་ཞུས་པས།   སེམས་ཅན་ཐམས་ཅད་ལ་སྙིང་རྗེས་ཁྱབ་པར་གྱིས།    དེས་མ་ཟད་བྱང་ཆུབ་མཆོག་ཏུ་སེམས་བསྐྱེད། དེ་འགྲུབ་པའི་ཆེད་དུ་ཚོགས་གཉིས་རྫོགས་པར་མཛོད། དེའི་དགེ་བ་སེམས་ཅན་ཐམས་ཅད་ལ་ཐུན་མོང་དུ་བསྔོ་བར་མཛོད།

ཕྱི་ནང་གི་ཆོས་ཐམས་ཅད་རྨི་ལམ་སྒྱུ་མ་ལྟ་བུར་སྒོམ་པར་གྱིས། དེ་ལྟར་གྱིས་ལ་སྙིང་པོ་བསྡུས་མཛོད་གསུངས།   རིན་ཆེན་བླ་མས་ཇོ་བོ་རྗེར་ཅི་ཡང་མ་བྱས་པར་འཚང་རྒྱ་བའི་ཐབས་ཞུས་པས་བྱུང་ན་ཁོ་བོ་ཡང་འདོད་དེ།   ཚོགས་གཉིས་མ་རྫོགས་པའི་སངས་རྒྱས་ཁོ་བོས་མི་ཤེས་གསུངས།   ཡང་བོད་སྟོན་ཁ་ཅིག་གིས་ཆོས་ཞུ་བར་བྱས་པ་ལ།   ཞང་སྣ་ཆུང་སྟོན་པ་ན་རེ།   ཇོ་བོ་ལ་ཆོས་ཞུས་ཚད་ལ་བྱང་ཆུབ་ཀྱི་སེམས་སྦྱོངས་བྱ་བ་ལས་མི་འོང་ཟེར།དེ་ཇོ་བོས་གསན་ནས།

ཞང་སྣ་ཆུང་སྟོན་པ་ཁྱེད་རེ་བདེན།   ང་ལ་རྒྱ་གར་ན་ཡང་ཁྱེད་འདྲ་བའི་མན་ངག་ལ་དགའ་ཞིང་སྒྲུབ་པ་ལ་མི་དགའ་བའི་སློབ་མ་ཞིག་ཡོད།   ཁོ་ཡང་བྱང་ཆུབ་ཀྱི་སེམས་ལ་ཡིད་མ་ཆེས་ཞེས་གསུངས།   འབྲོམ་སྟོན་པས་ཇོ་བོ་རྗེ་ལ་ཟླ་གྲགས་ལུགས་ཀྱི་རྟོགས་པ་ཕུལ་བས།   ཇོ་བོས་ཕྱག་ཐལ་མོ་ཤར་ཕྱོགས་སུ་སྦྱར་ཏེ་ད་ལྟ་རྒྱ་གར་ཤར་ཕྱོགས་ན་ལྟ་བ་འདི་ཁོ་ན་འཛིན།   ཁྱོད་ལྟ་བུའི་སེམས་དཔའ་ཆེན་པོ་བོད་ན་ཡོད་པ་བོད་བསོད་ནམས་རེ་མི་ཆུང་།   ཁོ་བོ་འོང་མི་དགོས་པར་འདུག་པ་ལ་གསུངས་ནས་གདམས་པ་ཤས་ཤིག་གནང་།   ཇོ་བོ་རྗེས།   བོད་སྔགས་མཚན་ཉིད་གཉིས་ལ་ཇི་ལྟར་འདོད་གསུངས།   གཞན་གྱིས་ཞུ་མ་སྤོབས།   ཞང་སྣ་ཆུང་སྟོན་པ་ན་རེ།   ཁོ་བོའི་བླ་མ་ཞིག་གིས་ལམ་གྱི་དུས་ན་ཉེ་རིང་ཡོད།   འབྲས་བུའི་དུས་ན་བཟང་ངན་མེད་གསུངས་ཞེས་ཞུས་པ་ལ།   ཇོ་བོ་རྗེས་ལམ་ཉེ་རིང་བྱུང་ན་འབྲས་བུ་ལ་བཟང་ངན་ཅི་ནས་ཀྱང་འོང་དགོས།   ནང་པ་སངས་རྒྱས་པའི་ཆོས་ཐམས་ཅད་རྒྱུ་འབྲས་གོ་མ་ལོག་པ་ཞིག་དགོས་གསུངས།   ཡང་ཇོ་བོ་རྗེས།   བོད་ན་མུ་སྟེགས་དངོས་ནས་མི་འདུག་སྟེ་ཆ་མཐུན་འདུག   གང་ལགས་ཞུས་པས་གནས་བརྟན་གནས་གཞི་འཇིག་པ་འདི་རྣམས་ཡིན་གསུངས།    ཉིན་ཞིག་ཇོ་བོས་ཨུ་པ་སུ་ཀ་ཁྱེད་ཀྱིས་དགུན་ཡང་མེ་ཏོག་འཆར་བ་ཞིག་ཡོད་ཟེར་བ་དེ་ག་རེ་གསུངས་པས།   འབྲོམ་སྟོན་པས་སྙེ་ཐང་གི་ན་མོ་ཆེའི་ཁར་ཇོ་བོ་སྤྱན་དྲངས་ནས་གསིང་མའི་མེ་ཏོག་སྤྱན་འབུལ་ཞུས་པས་ཇོ་བོའི་ཞལ་ནས་རྫུན་མ་བཏང་ཙམ་འདུག   ཁྱེད་མེ་ཏོག་ལ་དེ་ཙམ་དུ་དགའ་ན་ངས་ས་ཕྱོགས་འདིར་མེ་ཏོག་འཚར་བར་བྱིན་གྱིས་བརླབས་ཀྱི་གསུངས།   དེའི་བྱིན་རླབས་ཀྱིས་སྙེ་ཐང་གི་སྐོར་ན་མེ་ཏོག་གི་རིགས་གཞན་ན་མེད་པ་མང་དུ་ཡོད་གསུངས།  

ན་མོ་ཆེར་ཇོ་བོ་རྗེའི་སྐྱོ་བསང་མཛད་ཅིང་དུད་འགྲོ་ཀུན་ལ་རྟའི་བུ་ཆུང་ཁམས་བདེའམ་རའི་བུ་ཆུང་ཁམས་བདེའམ་གསུངས།   ཁྱད་པར་ཁྱི་ཕྲུག་རྣམས་ཕྱག་ཏུ་བསྣམས་ཤིང་ཁྱིའི་བུ་ཆུང་ཁམས་བདེའམ་ལུས་ངན་འདི་ལྟ་བུ་ལེན་པ་ཁྱེད་རང་གིས་ནོངས།   ཁྱེད་རང་གིས་ནོངས་གསུངས།   རེས་འཛེ་སྦྲང་ཀུན་ལ་བག་ཆགས་ངན་གསུངས་ནས་ཤངས་སྐྱོར།   རེས་འཛེ་སྦྲང་གི་གསེབ་ཏུ་བཞུགས་ཏེ་བྱམས་སྐྱོང་གནང་ཞིང་སྙིང་རྗེ་སྒོམ།   ཁུ་སྟོན་གྱིས་ཇོ་བོས་ཀྱང་མི་ཆེན་པོ་མི་མཁྱེན་པར་གདའ་དེ་ལྟར་མ་མཛད་པར་ཞུས་པས།    ཇོ་བོ་རྗེའི་བོད་ཀྱི་མི་ཆེན་གྱིས་དགོས་པ་མེད་ངའི་བྱམས་སྙིང་རྗེ་ལ་གནོད་གསུངས།   ཉིན་ཞིག་ཇོ་བོས་དེ་རིང་ང་སུ་དང་མི་འཕྲད་པས་དྲུང་དུ་མི་མ་བཏང་ཞིག་གསུངས།   དེའི་ཉིན་བར་མི་ཁྲེས་ཆུང་ཅན་ཞིག་བྱུང་སྟེ།   རྒྱ་གར་ནག་ཆུང་གིས་བཏང་བ་ཡིན།   ཇོ་བོ་རྗེ་ལ་འབུལ་བ་བྱེད་ཟེར་ནས་འབུལ་བ་བཞེད་དེ་བཏང་བས།   ཁྲེས་པོ་དེའི་ནང་ནས་ལྕགས་ཀྱི་སྤར་མོ་ཞིག་འུར་གྱིས་ཇོ་བོའི་ཕྱོགས་སུ་སོང་བས་ཇོ་བོའི་སྐུ་རྒྱབ་ཀྱི་རྩིག་ངོས་ལ་ཐབས་ཀྱིས་སོང་ནས་ཕྲི་ལི་ལི་འདུག་སྐད།   དེ་རྒྱ་གར་ནས་མུ་སྟེགས་པ་རྣམས་ཀྱིས་བོད་དུ་ནང་པའི་བསྟན་པ་འཕེལ་གྱིས་དོགས་ནས་གྲོས་བྱས་ཏེ་བར་ཆད་ལ་བཏང་བས་མ་ཚུགས་པ་ཡིན་གསུངས།   ཡང་ཉིན་ཅིག་རྒྱ་གར་གྱི་དགེ་སློང་ཤིན་ཏུ་བཙུན་པ་སྦྱངས་པའི་ཡོན་ཏན་དང་ལྡན་པ་གཉིས་བྱུང་ནས་ཇོ་བོ་རྗེ་ལ་ཆོས་ཞུས་པས།   ཇོ་བོས་གང་ཟག་གི་བདག་མེད་གསུངས་པའི་དུས་ཁོང་གཉིས་ཀྱི་ཐལ་མོ་སྦྱར་ནས་ཉན།   ཆོས་ཀྱི་བདག་མེད་གསུངས་པ་ན་ཨ་ཏི་ཤ་འཇིགས་འཇིགས་མི་གསུང་པར་ཞུ་ཟེར་ནས་རྣ་བ་འགེབས།   ཤེས་རབ་སྙིང་པོ་འདོན་པ་ཐོས་ན་ཡང་རྣ་བ་འགེབས་པས་ཇོ་བོ་ཐུགས་ཆད་དེ་བྱམས་སྙིང་རྗེ་བྱང་ཆུབ་ཀྱི་སེམས་ཀྱིས་འཕངས་ནས་ཚོགས་ཁྱད་པར་ཅན་ལ་འབད་པ་མ་བྱས་ན་སྲུང་སྡོམ་དག་པ་གཅིག་པུས་གར་ཡང་མི་ཕྱིན་པར་འདུག་གསུངས།

ཡང་ཙོང་ཁའི་རྒྱལ་བོ་ལ་ལོངས་སྤྱོད་ཡོད་ཚུལ་སོགས་ཞུས་པས་བོད་ན་དགེ་སློང་བཞི་སྡེ་ལ་འཚོ་བ་དྲངས་པའི་བསོད་ནམས་ལ་སྤྱོད་པ་སུའང་མི་འདུག་གསུངས།   ཇོ་བོ་ལ་རྒྱ་གར་གྱི་སློབ་མ་རྣམས་ཀྱིས་འབུལ་སྐྱེལ་གྱི་ཕོ་ཉ་བྱུང་བ་ལ།    ཇོ་བོས་རྒྱ་གར་ན་ངོ་མཚར་ཅན་གྱི་གཏམ་ཅི་ལྟ་བུ་འདུག་དྲིས་པས་དེ་ན་རེ་གཞན་མི་གདའ།   རྣལ་འབྱོར་པ་ཞིག་གིས་གྲོང་ཁྱེར་ཆེན་པོ་ཞིག་གི་དབུས་སུ་འཆག་སའི་ཁུང་བུ་བྱས་ནས་སྒྲུབ་པ་བྱས་པས།   ལོ་བཅུ་གཉིས་ན་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་སྟེ།   ད་ལྟ་སྐུ་ལུས་ཀྱི་བཀོད་པ་མང་པོར་སྤྲུལ་ནས་བྱམས་སྙིང་རྗེ་ལ་བརྩོན་པའི་ཆོས་གསུང་ཞིང་འདུག་ཞུས།   ཡང་རྣལ་འབྱོར་མ་ཞིག་གིས་མཎྜལ་ལྔ་ཕུལ་བས་དེ་ལས་པད་མའི་སྡོང་པོ་སྐྱེས།    དེ་ལ་མེ་ཏོག་ཤར་ནས་ཞག་བདུན་དུ་སོང་ཚེ་སྡོད་པ་ཞིག་ད་ལྟ་ཡོད་ཟེར་པས།   དགེ་བཤེས་དགོན་པ་བས་དབུ་མཛད་ཇོ་བོ་དང་སློབ་མ་རྣམས་ཐུགས་མཉེས་པོ་བྱུང་།   དགེ་བཤེས་དགོན་པ་བས་བསམ་གཏན་ལ་བཞུགས་པའི་དུས་སུ།   ནུབ་ཅིག་འུར་སྒྲ་ཆེན་པོ་ཞིག་བྱུང་བའི་རྗེས་ལ་ས་འོག་ནས་སྡིག་པ་ཆེན་པོ་ཞིག་བྱུང་བས་དགོན་པ་བས་ཇོ་བོ་རྗེ་ལ་གསོལ་བ་བཏབ་པས་སྡིག་པ་དེ་མེད་པར་གྱུར།   སང་ཉིན་ཇོ་བོ་རྗེ་སྔ་པར་བྱོན་ནས་ཁྱེད་ཀྱིས་ང་བོས་པ་གང་ཡིན་གསུངས།    བྱུང་ཚུལ་ཞུས་པས་མི་གཡོ་བའི་རྣལ་འབྱོར་བསྲུང་བའི་སྐོར་ཞེས་མི་གཡོ་བའི་གདམས་པ་མ་ལུས་པ་དགོན་པ་བ་ལ་གནང་།    ཇོ་བོ་རྗེས་དགོན་པ་སྟོང་པ་ཐམས་ཅད་ལ་བསམ་གཏན་པའི་གནས་ཡིན་གསུངས་ཕྱག་མང་དུ་མཛད་པས།   འདི་ན་མི་མེད་ཞུས་པས་ཕྱིས་སྒོམ་མཁན་འོང་སྟེ་མཆིས།   ཁོ་བོ་སྒོམ་པ་ལ་དགའ།   ཁོ་བོ་ལ་སྒོམ་ཕྲུག་མ་བྱུང་།   བོད་དུ་འོང་པ་དོན་མེད་གསུངས།   ཁྱེད་རང་ཡང་རི་ལ་སྒོམས་ཤིག་གསུངས།   དེར་འདྲེ་འོང་ལགས་ཞུས་པས།   ཁྱེད་རང་ཚུལ་ཁྲིམས་ཅ་ལེ་ཅོ་ལེར་སོང་བ་མིན་ནམ།   ངེད་རྒྱ་གར་ན་འདྲེའི་གསེབ་ཏུ་སྒོམ་པ་ཡིན།   ངའི་སློབ་མ་ཞིག་འདྲེའི་བར་ཆད་བྱུང་བས་ཁོས་སྟོང་པ་ཉིད་བསྒོམས་པས་ཞི་འདུག་གསུངས།    རེས་འགའ་གཅིག་པུར་བསྡད་པ་ལ་འདྲེས་ཁྱེར་བ་མང་གསུངས་ནས་མི་མཉེས་པ་ཡང་མཛད།   དེའི་དུས་སུ་རྔོག་ལེགས་པའི་ཤེས་རབ་ཀྱིས་དབང་བསྐུར་མ་བྱས་པར་བསྒྲུབ་ཐབས་ཆུང་ངུ་ཉན་དུ་རུང་ངམ་ཞུས་པས་བྱང་ཆུབ་ཀྱི་སེམས་བརྟན་པོ་ཡོད་ན་དེ་ཙམ་རུང་།   བོད་ཀྱི་དབང་བསྐུར་གྱིས་དབང་བསྐུར་གྱི་གོ་མི་ཆོད་པར་སྣང་།   བོད་དད་པ་ཆེ་བས་སྣོད་རུང་གི་སློབ་མ་ཡང་ཡོད་སྲིད་དབང་བསྐུར་ནུས་ཀྱི་སློབ་མཁན་མི་འདུག་གསུངས།

རྔོག་གིས་ཕྱིས་གསང་སྔགས་གཟིགས་ཤིང་ཨ་ཏི་ཤས་གསུངས་པ་འདི་ལ་ཡིད་ཆེས་སོ་གསུངས།   ཡང་ཁ་ཅིག་གིས་ཇོ་བོ་ལ་ཆོས་ཞུས་པ་ན།   ཇོ་བོས་དད་པ་ཁོ་ན་གལ་ཆེ་གསུངས།    ཡང་ཇོ་བོ་ལ་བཅུད་ལེན་ཞུས་པས།   ཁོ་བོ་བྱང་ཆུབ་ཀྱི་སེམས་བཅུད་དུ་ལེན་གསུངས།   ཇོ་བོས་ཆོས་གོས་གྱོན་པ་དང་ནམ་གྱི་གོང་ལ་ཉལ་བ་ན་སངས་རྒྱས་ཀྱི་རྗེས་སུ་བསླབ་པར་བྱ་སྙམ་པའི་དུས་དྲན་ཏེ་མེད་ན་ཉེས་པ་རེ་འབྱུང་སྟེ་བོད་ཀྱི་རབ་བྱུང་ལ་ཅི་ཆ་གསུངས།   དེའི་དུས་དབུས་གཙང་དང་ཁམས་ནས་ཡོང་བ་མང་པོས་སྐྱབས་འགྲོ་སེམས་བསྐྱེད་ཞུས།   ལ་ལས་རིམ་པ་ཞུས།   ལ་ལས་རབ་གནས་ཞུས།   སེམས་བསྐྱེད་ཞུ་བ་ཚན་ཅིག་ལ་སྟོན་པ་འདི་ཀུན་ལ་ཆོས་ཞུ་བའི་རྒྱགས་འདུག་སྟེ་མཆོད་པའི་ཡོ་བྱད་མི་འདུག་གསུངས།   ཡང་ཁམས་པ་ཚན་ཅིག་གིས་རབ་གནས་ཞུས་པ་ལ།   འབྲོམ་སྟོན་པས་ཞལ་འཛུམ་འཛུམ་མཛད་ནས་ཇོ་བོ་རྗེ་ལ་གཟིགས།   དེ་ནས་ཡང་ཁམས་པ་དེ་རྣམས་ལ་གཟིགས་ནས།   འབྲོམ་སྟོན་པའི་ཞལ་ནས།   བླ་མས་འདི་ལྟར་གསུངས་ཀྱིན་འདུག་གསུངས་ནས་སྒྲ་སྒྱུར་ལ་ནན་ཏན་མཛད་པ་ལྟར།   རབ་གནས་ཡང་དག་པ་ཞིག་བྱས་ན།   དང་པོ་རྒྱུ་འདི་ལྟར་དགོས།   དེ་ནས་ལྷ་བཟོ་འདི་ལྟ་བུ་དགོས།   དེ་ནས་སྐྱ་རིས་འདི་ལྟ་བུ་དགོས།   དེ་ནས་སྤྱན་དབྱེ།  དེ་ནས་རབ་གནས་འདི་ལྟར་བྱེད་དགོས་ཞེས་པ་ལ་སོགས་པའི་རབ་གནས་ཀྱི་གདམས་པ་རྣམས་གསུངས།   དེའི་ཚེ་བྱམས་པ་ལྷ་ཡུལ་མའི་སྒྲུབ་ཐབས་དང་།   སྒྲོལ་མ་ཕྱག་འཚལ་ཉེར་གཅིག་མ་དང་།   ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལ་སོགས་པ་འབྲོམ་སྟོན་པས་བསྒྱུར་བ་མཛད།   དེའི་དུས་སུ་ཇོ་བོ་རྗེ་ལ་ལོ་ཙཱ་བས་བདག་དགེ་སྦྱོར་ཅིག་བགྱིད་པས་མཆིམས་ཕུལ་ཅིག་གཏོང་བར་ཞུ་ཞུས་པས།   ཇོ་བོས་ང་ལ་ལོ་ཙཱ་དགོས་གསུངས་ནས་མ་གནང་།   ཡང་ཡང་ཞུས་པས་གནང་ནས།   དེའི་བར་གྱི་ལོ་ཙཱ་བ་འབྲོམ་སྟོན་པས་མཛད་དེ་ཟླ་བ་གསུམ་བཞུགས།   དེ་དུས་རོང་པའི་སྟོན་པ་དགེ་བ་དང་།    ཉང་རེའི་སྟོན་པ་ཐག་འབེབས་དང་བསོད་ནམས་ཡེ་ཤེས་ལ་སོགས་པ་སྟོན་ཆེན་མང་དུ་ཕེབས།   དགེ་བཤེས་སྟོན་པས་ལོ་ཙཱ་བ་ལ་སློབ་དཔོན་མྱུར་དུ་བྱོན་ཞེས་པའི་སྤྱན་འདྲེན་བྱུང་ནས་ལོ་ཙཱ་བ་བྱོན་ཏེ།   སྟོན་པ་དགེ་བས་ཞུས་ནས་དཔལ་དགྱེས་པ་རྡོ་རྗེའི་ལྷན་ཅིག་སྐྱེས་པའི་རྣལ་འབྱོར་སློབ་དཔོན་ཤནྟི་པས་མཛད་པ་དང་།   ཌོམ་བྷི་ཧེ་རུ་ཀའི་བདུད་རྩི་འོད་ཀྱི་འགྲེལ་པ་ཇོ་བོ་ཉིད་ཀྱིས་མཛད་པ།   འཁོར་ལོ་སྡོམ་པའི་གཞུང་མང་པོ་དང་།   དཔལ་མ་ཧཱ་མ་ཡའི་སྒྲུབ་ཐབས་ལ་སོགས་པ་བླ་མ་ཉིད་དང་ལོ་ཙཱ་བས་བསྒྱུར་རོ༎  དབུ་གཡོར་གཅད་གསུམ་གྱིས་ཞུས་ནས།   བྱང་ཆུབ་སེམས་པའི་ས་དང་།   མདོ་སྡེ་རྒྱན་དང་།   རྒྱུད་བླ་མ་དང་།   ལམ་སྒྲོན་རྣམས་གསུངས།   དེའི་དབྱར་དུས་བསླབ་པ་ཀུན་ལས་བཏུས་པ་དང་།   མདོ་ཀུན་ལས་བཏུས་པ།   སྤྱོད་པ་ལ་འཇུག་པ་རྣམས་གསུངས།    བོད་ཀྱི་བསྟན་བཅོས་མང་པོ་གཟིགས་སུ་ཕུལ་བས་ཨ་རོའི་ཐེག་ཆེན་རྣལ་འབྱོར་མ་གཏོགས་གཞན་ལ་མ་མཉེས།   དེ་ཕན་ཆད་དབུས་སུ་ལོ་བདུན་དང་ཟླ་བ་ལྔ་བཞུགས་ནས།   ཆོས་ཀྱི་དབྱིངས་ཀྱི་གླུ་དང་།   འཁོར་བ་ལས་ངེས་པར་འབྱུང་བའི་གླུ།   བདེ་བ་དྲུག་གི་གླུ།   བྱང་ཆུབ་སེམས་ཀྱི་གླུ་སོགས་མགུར་དུ་བཞེས་པ་མ་གཏོགས་ཆོས་བཤད་རྒྱ་ཆེན་པོ་མ་གནང་།   མཚན་མོ་ཕལ་ཆེར་མཁའ་འགྲོ་མའི་ཚོགས་སུ་གསང་སྔགས་ཟབ་མོའི་དོན་ལྟ་བ་རྡོ་རྗེའི་གླུ་དང་སྤྱོད་པ་རྡོ་རྗེའི་གླུ་དང་སྒོམ་པ་རྡོ་རྗེའི་གླུ་དང་རྡོ་རྗེ་ཆོས་ཀྱི་གླུ་སོགས་མགུར་དུ་བཞེས་པ་རྣམས་ཇོ་བོ་རྗེ་ལ་གནང་བ་ཞུས་ནས་ནག་ཚོ་ལོ་ཙཱ་བས་བསྒྱུར།    དེ་ནས་ཇོ་བོ་རྗེ་སྐུ་ཁམས་མི་བདེ་བ་ཞིག་བྱུང་བས།   དེ་ལ་མཆོད་པ་དང་རིམ་གྲོ་ལ་སོགས་པ་བྱས་པ་ཙམ་གྱིས་ཡི་དམ་གྱི་ལྷ་རེ་ཞལ་གཟིགས་ནས་སྐུའི་བསྙུང་གཞི་དྭངས།   དེ་ལྟ་བུ་ཡང་ཡང་བྱུང་།   སྤྱིར་སྙེ་ཐང་དུ་བཞུགས་པའི་རིང་ལ་ཡི་དམ་གྱི་ལྷ་ཞལ་གཟིགས་པ་མང་།   ཁྱད་པར་ཟླ་བ་ཉའི་ནུབ་ཅིག་ལ་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔས་ཞལ་གཟིགས།   དེ་ནས་ནུབ་རེ་བཞིན་ཞལ་གཟིགས།   ཉིན་གཅིག་དགུན་ཁར་རླུང་ཆེན་པོ་གཅིག་བརྒྱབ་པའི་དུས་ཇོ་བོ་རྗེས་མཎྜལ་མཛད་ཅིང་ཕྱག་སེར་ག་ཤིག་གེ་ཡོད་པ་ལ་རྗེ་བཙུན་སྒྲོལ་མ་བྱོན་ནས་བུ་དེ་ཙམ་གྱི་དཀའ་བ་བགྱིས་ག་ན་དགོས་ཞེས་གསུངས།    ཡང་ནུབ་ཅིག་མནལ་ལམ་དུ་བུད་མེད་རྒྱན་གྱི་སིལ་ཁྲོལ་གསན་པས་ལྟ་མི་རུང་དགོངས་ནས་མ་གཟིགས་པས།   ཁྱོད་མ་ལ་ཡང་མི་གཟིགས་སམ་གསུངས་མནལ་སད་ཙ་ན་མདུན་གྱི་ནམ་མཁའ་ལ་རེ་བཙུན་མ་སྒྲོལ་མ་རིན་པོ་ཆེའི་རྒྱན་རྣམ་པ་སྣ་ཚོགས་ཀྱིས་བརྒྱན་པ་ཞིག་ཞལ་གཟིགས།   ང་རྨི་ལམ་དུ་སྒྲོལ་མ་ལ་ཡང་མའི་འདུ་ཤེས་སྒོམ་པ་ཡིནཏེ་ཇོ་མོ་རང་འདི་ན་འདུག་ཏེ་དཔང་པོ་ཡིན་ནོ་གསུངས་ཏེ་སྒྲོལ་མའི་སྐུ་ཐང་ལ་ཕྱག་མཛུབ་བཙུགས་པ་དེ་རྗེས་སུ་རྭ་སྒྲེང་ན་བཞུགས་སོ༎ 

   ཡང་གཟིམ་ཆུང་ལ་གསོལ་ཆས་འབུལ་དུ་བྱོན་པས་ཇོ་བོའི་སྤྱན་ནམ་མཁའ་ལ་གཟིགས་ནས་མེཏྲྀ་མེཏྲྀ་གསུང་ཞིང་ཡོད་པས་འབུལ་མ་ནུས་པར་ལོག   ཡང་ཕྱིན་པས་དེབཞིན་དུ་བཞུགས་འདུག་པས་མར་ལོག   འབྲོམ་སྟོན་པས་ཨ་མེས་བྱང་ཆུབ་ལ་ཇོ་བོའི་གསོལ་ཆས་དེ་གྲང་དུ་མ་འཇུག་པར་སྲོས་ཤིག་ཇོ་བོ་རྗེ་མགོན་པོ་བྱམས་པ་ཞལ་གཟིགས་ཚོད་དུ་འདུག་གོ།   འུ་ཅག་གཉིས་ཀྱིས་མཐོང་དུས་ནི་མེད་གསུངས།    དེ་ནས་གསོལ་ཆས་གྲང་མོར་སོང་།   གུང་ཡོལ་དུ་ཉེ་བ་ན་ངའི་ཆོས་སྟོན་ཁྱེར་ཤོག་གསུངས།   ཇི་ལྟར་ལགས་ཞུས་པས་མེཏྲྀ་བྷྲི་ཁོ་ལི་གསུངས།   ཇོ་བོས་ད་ནངས་རྗེ་བཙུན་བྱམས་པ་དང་རྗེ་བཙུན་འཇམ་དཔལ་དབྱངས་གཉིས་མདུན་གྱི་ནམ་མཁའ་འདི་ན་བྱོན་ནས་ཐེག་པ་ཆེན་པོའི་ཆོས་ལ་བགྲོ་གླེང་མཛད།   ཕྱག་རྡོར་གྱིས་བར་ཆད་བསྲུང་།   ལྷའི་བུ་རྣམས་ཀྱིས་ཟིན་བྲིས་བྱས།   ད་དེ་བྲི་དགོས་གསུངས་ནས་ཕྱག་བྲིས་མཛད།   བྱམས་པས་བགྲོ་གླེང་མཛད་པའི་སྐྱ་རིས་ཇོ་བོ་ཉིད་ཀྱིས་མཛད།   ངས་འདི་འདྲ་ཞིག་མཐོང་བྱུང་།   འདི་འདྲ་བའི་སྐུ་ཐང་དང་བསྟན་པའི་བདག་པོ་དང་།   ཡི་གེ་དྲུག་པ་བྲག་རིས་མ་གསུམ་བྲིས་ནས་བསྐུར་ཤོག་ཞེས་བི་ཀ་མ་ལ་ཤཱི་ལར་གསེར་བསྐུར་ནས་བཏང་།   དེ་ནས་རྒྱ་གར་ཤར་ཕྱོགས་ནས་མཁས་པ་བོས་ནས་བྲིས་ཏེ་ཚུར་བསྐུར་བྱུང་བ་དེ་ཕྱིས་སྙེ་ཐང་ན་བཞུགས་ཡོད་པར་གྲགས།  

ཡང་སངས་རྒྱས་ཐམས་ཅད་གདུལ་བྱ་ལ་གང་འདུལ་དུ་བསྟན་པ་ལས་རང་རང་གི་སྐུ་མདོག་གསེར་མདོག་ཏུ་འདུག་གསུངས་ནས་རིགས་ལྔ་གསེར་འཇམ་དུ་མཛད།    དེ་དུས་ཁམས་སྟོན་དགའ་ཆེན་དགའ་ཆུང་གཉིས་དང་།   བ་རི་བ་སོགས་རྒྱ་གར་དུ་ཆོས་སློབ་ཏུ་འགྲོ་བའི་ལམ་རྒྱུས་དང་།   འཕྲལ་སྐད་དང་བར་ཆད་སེལ་བའི་བྱིན་རླབས་ཞུར་བྱུང་བས།   ཇོ་བོས་བྱིན་རླབས་མཛད་ནས།   ཁྱེད་རང་ལ་བར་ཆད་མེད་གཞན་ལ་ཕན་ཐོགས་པར་འོང་བ་འདུག་གོ་གསུངས།   ཁྱེད་རྣམས་བླ་མ་རྡོ་རྗེ་གདན་པའི་སྤྱན་སྔར་སོང་ཞིག་གསུངས།   དེའི་དུས་ན་ཇོ་བོ་རྗེས་ཆོས་ཐམས་ཅད་ཞལ་ཆེམས་སུ་གསུངས་ཤིང་དྷརྨ་ཨ་ལོ་ཀ་ཡང་གསུང་།   དེ་ཇི་ལྟར་ལགས་ཞུས་པས།   ཆོས་བྱ་བའི་དུས་ཡིན་གསུངས།   ཐེག་པ་ཆེན་པོའི་གསང་སྔགས་ཀྱི་ལམ་འདི་སྦྲུལ་སྙུག་དོང་དུ་བཅུག་པའམ་གླང་པོ་ཆེའི་སྣ་ལ་རལ་གྲི་བཏགས་པ་དང་འདྲ་སྟེ་ཁེ་ཉེན་ཆེ་བ་ཡིན་གསུངས།  

   བོད་ཀྱིས་རྒྱུད་སྡེ་བཞི་ག་ལོངས་སྤྱད་མི་ནུས།   བོད་ལ་རྣལ་འབྱོར་རྒྱུད་འཚམས་གསུངས།   ཇོ་བོ་རྗེས་འབྲོམ་སྟོན་པ་ལ།   ཐེག་པ་ཆེན་པོའི་མདོ་སྡེ་མ་ལུས་པའི་དོན་སློབ་དཔོན་ཀླུ་སྒྲུབ་དང་འཕགས་པ་ཐོགས་མེད་ལ་སོགས་པའི་སྐྱེས་བུ་ཆེནཔོའི་ཆོས་ལུགས།   དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཤིང་རྟ་ཆེན་པོའི་ལམ་འདི་ཁྱོད་ལ་གཏད་དོ་གསུངས།   འབྲོམ་སྟོན་པས་ཁྱེད་ཀྱིས་གཞན་ལ་ཐེག་པ་ཆེན་པོའི་གསང་སྔགས་ཀྱི་གདམས་པ་གནང་ནས།   ང་ལ་འདི་གནང་བ་ཇི་ལྟར་ལགས་ཞུས་པས།   ཇོ་བོ་རྗེས་ངས་ཁྱོད་མིན་པ་གཞན་ལ་གཏད་ས་མ་རྙེད་པ་ཡིན་གསུངས།    ཁྱོད་ཀྱིས་སེམས་པ་བཟང་པོ་གྱིས།   བྱང་ཆུབ་ཀྱི་སེམས་མེད་ན་ཆོས་མང་པོ་ཉན་པ་དང་བལྟས་པ།    བསམ་པ་དང་བསྒོམས་པ།   བསྐྱེད་རིམ་དང་རྫོགས་རིམ།   དབུ་མའི་ལྟ་བསྒོམ་དང་བཟླས་བརྗོད་ལ་སོགས་གང་བྱས་ཀྱང་ཕན་པ་མེད།   བྱང་ཆུབ་སེམས་ཀྱིས་མ་ཟིན་པའི་དགེ་སྦྱོར་དང་བྱང་ཆུབ་ཀྱི་སེམས་ལ་གནོད་པའི་དགེ་སྦྱོར་ཐམས་ཅད་བདུད་ཀྱི་ལས་ཡིན་གསུངས།  

འབྲོམ་སྟོན་པས་ཇོ་བོ་བཞུགས་སའི་གཟིམས་ཁང་གི་སྒོ་བསྡམས་ཚེ་ཕྱིར་གདུགས་ལ་བཞུགས་འདའ་བས་འབྲོམ་གྱིས་ཨ་ཏི་ཤ་རྩིག་པ་ལ་ཐོགས་པ་མ་མཆིས་སྐད་ན་མེད་དམ་ཞེས་ཞུས་པས།   ཇོ་བོས་རྒྱ་གར་ན་དེ་སྐད་དུ་གྲགས་གསུངས།   ཇོ་བོ་སྐུ་གཤེགས་ཀར་སྐུ་གཟུགས་ཁྲུ་གང་ཙམ་གྱི་ནམ་མཁའ་ལ་བཞུད་པ་ཀུན་གྱིས་མཐོང་།   རྒྱ་གར་ནས་སློབ་མས་གསོལ་བ་བཏབ་པའི་དྲིལ་བུའི་སྒྲ་དང་ལྷས་མཆོད་པའི་རོལ་མོའི་སྒྲ་རྣམས་གསན་གསུངས།   ངའི་བླ་མ་དགའ་ལྡན་ན་བཞུགས།   ང་ཡང་དགའ་ལྡན་དུ་འགྲོ་གསུངས།   དེ་ལྟ་བུ་མང་དུ་གསུངས་པས་འབྲོམ་སྟོན་པ་ཐུགས་མ་བདེ་ནས་ནག་ཚོ་ལོ་ཙཱ་བ་མཆིམས་ཕུ་ནས་སྤྱན་དྲངས།  

དེའི་དུས་སུ་སྔོན་ནཱ་རོ་པའི་སློབ་མ་པཎྜི་ཏ་ཛྙཱ་ནཱ་ཀ་ར་ཞེས་པ་ལ་འཕགས་པའི་ལུགས་ཀྱི་མན་ངག་ཡོད་པ་དེ་ཞུ་མ་ཐུབ་གསུངས་པ་དེ་མ་བསྙེལ་ལམ་ཞུས་པས།   ཇོ་བོ་རྗེས།   དེ་དྲན་གསུངས།   འོ་ན་དེ་ད་ལྟ་བལ་ཡུལ་ན་བྱོན་འདུག་པས་ཕེབས་སམ་ཞེས་ཞུས་པས།   ཇོ་བོས།   དེ་ལྟར་ཡིན་མོད་ཀྱི།   ཁོ་བོ་ནི་རྒས་པས་ཉན་པའི་མཐུ་མེད།   ཁྱོད་འབོད་པ་ཞིག་འོང་གིས་དེ་དུས་ན་སོང་ལ་ཆོས་དེ་ཉོན།   དེའི་བར་འུ་ཅག་འགྲོག་ནས་ང་ཡང་ད་སྟེ་ཟླ་བ་བཅུ་ཙམ་ནས་དགའ་ལྡན་དུ་མགོན་པོ་བྱམས་པ་ལ་གདམས་པ་དང་རྗེས་སུ་བསྟན་པ་ཉན་དུ་འགྲོ།   སེམས་ཅན་ཀུན་རྟག་ཏུ་མི་འགྲོགས་སོང་གསུངས།   ལོ་ཙཱ་བས་བཤུམས་ནས་བདག་གིས་ཇོ་བོ་འབོར་མི་ནུས་པར་གདའ་བས་མི་གཤེགས་པར་ཞུ་ཞུས་པས།   ཇོ་བོས་ང་འདིར་ཁྱོད་ཀྱིས་བསྐྱལ།   ངའི་ནང་རིག་པའི་ཆོས་ཐམས་ཅད་ཀྱང་ཁྱོད་ཀྱིས་ཁོང་དུ་ཆུད་པར་བྱས་ནས།   ཁྱོད་འགྲོ་བར་མི་རིགས་མོད་ཀྱི་འོན་ཀྱང་ཐེག་པ་ཆེན་པོའི་ཆོས་ལ་བར་ཆད་མང་བས་ཁྱོད་འགྲོ་དགོས།   དེའི་བར་དུ་མཆོད་པ་རྒྱུན་མ་ཆད་པར་ཕུལ་ལ་ང་ལ་གསོལ་བ་ཐོབ་གསུངས།   དེ་ནས་ལོ་ཙཱ་བས་མཆོད་པ་བཤམས་ཤིང་གསོལ་བ་བཏབ་པས།   ཟླ་བ་གཅིག་ཙམ་ན་ལྗང་བཙུན་དར་མ་བྱང་ཆུབ་དང་ཏྲི་ཏྲི་ཤཱཀྱ་བློ་གྲོས་གཉིས་འོངས་ནས།   ངེད་གཉིས་སློབ་དཔོན་རྒྱལ་རིན་གྱིས་བཏང་བ་ཡིན།   སྔོན་གསུངས་པའི་བླ་མ་དེ་ད་ལྟ་བལ་ཡུལ་ན་བཞུགས་འདུག་པས་མྱུར་དུ་བྱོན་ཟེར།   ཇོ་བོ་རྗེས།   ང་ཡང་དགའ་ལྡན་དུ་སོང་ནས་ལྷའི་བུ་ནམ་མཁའ་དྲི་མེད་ཞེས་བྱ་བར་འགྱུར།   ཁྱོད་ཀྱིས་ངའི་ལུས་ཚད་དུ་གཟུགས་བརྙན་ལེགས་པར་བྲིས།   ང་དགའ་ལྡན་ནས་ཁུག་ལ་རབ་གནས་གྱིས།   གསོལ་བ་ཐོབ་དང་ང་དགའ་ལྡན་ནས་འོངས་བ་ཡིན་ནོ༎   ད་དུང་ཟླ་གཅིག་སྡོད་ལ་གསོལ་བ་ཐོབ་གསུངས་ཏེ་ཟླ་བ་ཕྱེད་དང་གཉིས་སུ་མཆོད་ཅིང་གསོལ་བ་བཏབ།   དེའི་དུས་སུ་ཇོ་བོའི་སློབ་མ་བོད་སྟོན་ཐམས་ཅད་འདུས་ནས་ཇོ་བོ་རྗེ་བཙུན་ཆེན་པོ་ནི་མི་བཞུགས་པར་མགྱོགས་པོ་གཤེགས་པར་འདུག    ཇོ་བོའི་སྲོལ་སུས་འཛིན་ཟེར་བས་ལོ་ཙཱ་བས།   ཆོས་ཐམས་ཅད་ནས་ཡོན་ཏན་བླ་མ་ལས་སྐྱེ་བར་བཤད་འདུག་པས་བླ་མའི་ཞབས་ཏོག་འབྲོམ་སྟོན་གྱིས་ཞུས་པ་འདྲ་བ་སུས་ཀྱང་མ་གྲུབ།    ཇོ་བོའི་སྲོལ་འབྲོམ་སྟོན་པས་འཛིན་པར་འཐད་གསུངས།   དེ་ནས་ཇོ་བོས་ལོ་ཙཱ་བ་ལ་ད་སོང་གསུངས།   ལོ་ཙཱ་བས་བླ་མ་དགའ་ལྡན་གྱི་གནས་ནས་བདག་ལ་གཟིགས་སུ་གསོལ་བྱིན་གྱིས་བརླབ་ཏུ་གསོལ་ཞེས་གསོལ་བ་བཏབ།   ཇོ་བོས་ཀྱང་དེ་ལྟར་བྱའོ་ཞེས་ཞལ་གྱིས་བཞེས།   འབྲོམ་སྟོན་པས་ཀྱང་མི་ཆོས་གནད་ཀྱི་ཕྲེང་བ་སོགས་ཞལ་གདམས་མཛད་དེ་ལོ་ཙཱ་བ་བྱོན།   ཨ་མེས་བྱང་ཆུབ་ཀྱིས་བདག་བསོད་ནམས་ཆུང་བས་བླ་མའི་ཞབས་ཏོག་ལས་སྒོམ་རྒྱུ་མ་བྱུང་སྙམ་པ་ན།   ཇོ་བོ་རྗེས།   སྒོ་གསུམ་བླ་མའི་ཞབས་ཏོག་ལ་བཀོལ་ན་སྒོམ་གྱི་དམིགས་པ་གཞན་ནས་བཙལ་མི་དགོས་གསུངས།   ཕྱིས་དགེ་བཤེས་དགོན་པ་བའི་གསུངས་ལས།   འབྲོམ་སྟོན་པས་ལོ་ཙཱ་གནང་ཨ་མེས་བྱང་ཆུབ་ཀྱིས་ཇོ་བོའི་ཞབས་ཏོག་སྒྲུབ།   ངས་བསྒོམ་པ་ཡིན་ཏེ་རྟོགས་པ་ཁོང་གཉིས་མཐོ་བར་འདུག་གསུངས།   དེ་ནས་ཇོ་བོས་རྒྱ་གར་དུ་སློབ་དཔོན་ཞིག་གི་དྲུང་དུ་གསེར་ཅུང་ཟད་ཡོད་པ་འདི་སྐྱེལ་བར་ཨ་མེས་བྱང་ཆུབ་གཏོང་དགོས་གསུངས་པས།   འབྲོམ་སྟོན་པས་ཁོང་མི་གཏོང་བར་ཞུས་ཀྱང་ཁོ་བསམ་པ་བཟང་པས་དོན་འགྲུབ་སྟེ་འོང་གསུངས་ནས་གསེར་སྲང་སུམ་ཅུའི་ཀོ་ཐུམ་དང་བཅས་གནང་།   ཨ་མེས་བྱང་ཆུབ་ཀྱིས་ཇོ་བོ་དང་མི་མཇལ་བར་འདུག་སྙམ་ནས་མཚན་གང་བཤུམས་པས་སྤྱན་གཉིས་ཀ་སྐྲངས་པ་ཙམ་དུ་སོང་།   བར་ཆད་ལན་གསུམ་བྱུང་ཡང་སྐྱོན་མེད་དུ་བི་ཀྲ་མ་ལར་འབྱོར།   ཇོ་བོ་རྗེ་སྐུ་གཤེགས་ཀར་མི་རེ་ལ་ཞལ་ཆེམས་རེ་གསུངས།   ཕྱག་ཁྲི་མཆོག་གིས་ཇོ་བོ་རྗེ་ལ་བདག་གིས་ཆོས་བཤད་ལགས་སམ་ཞུས་པས།    བྱ་བ་ངན་པའི་འཕྲོ་ཆོད་གསུངས།   འོ་ན་སྒོམ་ལགས་སམ་ཞུས་པས།   བྱ་བ་ངན་པའི་འཕྲོ་ཆོད་གསུངས།   འོ་ན་ཆོས་བཤད་ཀྱང་བཤད།   བསྒོམ་ཀྱང་བསྒོམ་ལགས་སམ་ཞུས་པས་ཀྱང་།   བྱ་བ་ངན་པའི་འཕྲོ་ཆོད་གསུངས།   འོ་ན་ཇི་ལྟར་བགྱི་ཞུས་པས།   ཚེ་འདི་བློས་གཏོང་།   དབེན་པ་བསྟེན་གསུངས།   དེ་ནས་ཤེས་རབ་རྡོ་རྗེ་དང་བློ་གྲོས་འབར་གཉིས་ལ་ཇོ་བོའི་ཞལ་ནས་སེམས་བཟང་པོ་གྱིས།   དེ་མེད་ན་ཐོས་བསམ་སྒོམ་གསུམ་ཅི་བྱས་ཀྱང་དགོས་པ་མེད་པས་སེམས་བཟང་པོ་གྱིས་གསུངས།   དགེ་བཤེས་དགོན་པ་བས་ཕྱིས་ཇི་ལྟར་བགྱི་ཞུས་པས།   འཇིག་རྟེན་བློས་ཐོངས།  ཚེ་མཇུག་འདི་འབྲོམ་སྟོན་པ་དང་མ་བྲལ་བ་གྱིས་གསུངས།   ཅི་ལགས་ཞུས་པས་ངས་བྱིན་གྱིས་བརླབས་པ་ཡིན་གསུངས།   འབྲོམ་སྟོན་པས་བདག་གིས་སུ་ལ་བསྟེན་ལགས་ཞུས་པས།   ཁྱོད་ཀྱིས་དགེ་བའི་བཤེས་གཉེན་མ་མཐོང་ངམ།   དགེ་བའི་བཤེས་གཉེན་མདོ་སྡེ་ལ་གྱིས།   ཁྱོད་མངོན་པར་ཤེས་པ་མ་ཐོབ་ཀྱི་རིང་ལ་དམུས་ལོང་ནང་མདའ་འཕེན་པ་དང་འདྲ་བས་གཞན་དོན་མ་བྱེད།   སངས་རྒྱས་ཀྱི་བསྟན་པ་སྤྱི་ལ་ཅི་ཕན་བྱ།   བསྟན་པ་དགེ་འདུན་གྱི་སྡེ་ལ་རག་ལས།   དགེ་འདུན་གྱི་སྡེ་འདུལ་བ་འཛིན་པ་ལ་རག་ལས་པས་འདུལ་བ་འཛིན་པ་ཅི་ཡོད་བྱ་གསུངས།   དེ་ནས་སྐྱེས་བུ་ཆེན་པོའི་ཆོས་ལུགས་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་ཀུན་གྱི་ཤིང་རྟ་ཆེན་པོའི་ལམ་འདི་ཁྱོད་ལ་གཏད་ཀྱིས་ཟུངས་ཤིག་གསུངས།   དེ་ནས་ཨ་མེས་བྱང་ཆུབ་ཀྱིས་གཙོ་བྱས་ཐ་མལ་གྱི་རྣམ་རྟོག་མི་རྒྱུ་བའི་དགེ་སློང་བཞི་སྡེ་རེ་ལ་འཚོ་བ་དྲོངས།   འདུལ་བ་འཛིན་པའི་དགེ་འདུན་གྱི་སྡེ་ཞིག་ཚུགས།   ངས་བཤད་པ་ལྟར་བགྱིས་ལ་ཁྱོད་རང་གྲ་སྒྲིག་བྱེད་ཁུལ་གྱིས་དང་།   འདི་ལ་བྱེད་མཁན་ཞིག་འོང་གིས་གསུངས།   སངས་རྒྱས་རྣམས་ཀྱིས་དབུགས་ཕྱུང་།   བླ་མ་དང་སངས་རྒྱས་ཐམས་ཅད་ཐིག་ལེར་གྱུར་པའི་ཐིག་ལེ་འབྲོམ་གྱི་ཐུགས་ཀར་ཐིམ།   གང་ཙམ་ནས་གཟུགས་སྐུར་བཞེངས་སོ༎   ཟླ་བ་ཉ་ལ་འབྲོམ་གྱི་རྨི་ལམ་དུ་ཡེར་པའི་བྲག་རི་འགྱེལ་བ་དང་།   ཇོ་བོ་རྗེ་ལ་ས་གཞི་བར་སྣང་འབྲོམ་སྟོན་པའི་ཐུགས་སྲས་ཀྱིས་གང་བར་རྨིས་ཏེ་དྲི་ལན་མཛད།    མཐར་ཡབ་སྲས་དབྱེར་མེད་དུ་ཐིག་ལེར་འགྱུར་བ་ལས་སླར་ཡང་སོ་སོར་བཞེངས་སོ༎  དེ་ལྟར་ལོ་གཅིག་དང་ཁྱད་པར་དུ་ཁྲུམས་སྟོད་ཟླ་བའི་ཚེས་བཅོ་ལྔ་ནས་དབྱུ་གུ་ཟླ་བའི་ཚེས་བཅོ་བརྒྱད་ཀྱི་བར་ཉིན་རེ་ཞིང་འབྲོམ་སྟོན་པས་སྤྲུལ་པ་དཔག་ཏུ་མེད་པ་མཛད་ནས་མྱ་ངན་ལས་མི་འདའ་བར་གསོལ་བ་འདེབས་པ་ལས་སྐུ་དངོས་ཀྱི་གདུལ་བྱ་རྫོགས་པས་བཞུགས་པར་ཞལ་གྱིས་མ་བཞེས་ཀྱང་ཇི་སྲིད་དུ་གཟུགས་སྐུའི་སྣང་བརྙན་བསྟན་ལ།  

    དེ་ཡང་མངའ་རིས་སུ་ལོ་གསུམ།   སྙེ་ཐང་དུ་ལོ་དགུ།   དབུས་གཙང་གཞན་དུ་ལོ་ལྔའི་བར་དུ་སྐལ་བ་དང་ལྡན་པ་རྣམས་ལ་མདོ་སྔགས་ཀྱི་གཞུང་གདམས་ངག་མ་ལུས་པ་བསྟན་ནས།   མཐར་དགུང་ལོ་དོན་གསུམ་པ་བོད་རབ་བྱུང་དང་པོའི་ཤིང་རྟ༡༠༥༤ལོ་དབྱུག་གུ་ཟླ་བའི་ཚེས་བཅོ་བརྒྱད་ལ་ཇོ་བོ་རྗེ་ཉིད་གཟུགས་སྐུའི་བཀོད་པ་ཆོས་དབྱིངས་སུ་འཐུམ་ཚུལ་བསྟན་ནས་ཆོ་འཕྲུལ་མཐའ་ཡས་པས་དགའ་ལྡན་ཡིད་དགའ་ཆོས་འཛིན་དུ་གཤེགས་ཤིང་།   གདུལ་བྱའི་སྣང་ངོར་སྐུ་གདུང་ཙམ་ཞིག་བཞུགས་པར་བསྟན་ནོ༎  

དེ་ནས་ཇོ་བོ་རྗེའི་བུ་སློབ་ཀུན་མྱ་ངན་གྱི་ཚུལ་མི་མཛད་པས་བོད་རྟོན་རྣམས་ཀྱི་མྱ་ངན་ཡང་སངས།   འབྲོམ་སྟོན་པས་འོ་མའི་ནང་དུ་དྲི་སྤོས་མང་དུ་བླུགས་ཏེ་གདུང་རྣམས་དེར་ཅུང་ཟད་རེ་བཅུག་ཅིང་གདན་དྲངས།   ཇོ་བོའི་གདུང་རྟེན་འཕགས་པ་མྱ་ངན་ལས་འདས་པ་ལྟར་སྦྱོངས་གསུངས་ནས་ས་སྙེ་ཐང་ན་མོ་ཆེར་པུར་ཞུགས་ཀྱིས་སྦྱངས།

   དེ་ནས་ཀ་བ་ཤཱཀྱ་དབང་ཕྱུག་བྱོན་པས་འབྲོམ་སྟོན་པ་ཐུགས་བློ་བདེ་བར་གྱུར།   ལྡེ་མིག་ཐམས་ཅད་ཁོང་ལ་ཕུལ།    ཀ་བ་ཤཱཀྱ་དབང་ཕྱུག་གིས་འབྲོམ་སྟོན་པས་ཇི་ལྟར་བཞེད་པ་བཞིན་དུ་མཛད།   ཕའི་རུས་པ་བུ་ལ་དགོས་པ་ཡིན་པས་ཇོ་བོའི་གདུང་རྣམས་དགེ་བཤེས་སྟོན་པས་ཚག་ཀྱིས་གསུངས།     རྒྱ་དཔེ་རྣམས་ལོ་ཙཱ་བ་ལ་དགོས་པ་ཡིན་པས་ཁྱོད་ཀྱིས་ཚག་གྱིས།   བླ་མ་གསེར་གླིང་པའི་དངུལ་གདུགས་ཅན་ཀྱང་ཁྱོད་ཀྱིས་ཟུངས།   ཁུ་སྟོན་ལ་བླ་མ་གསེར་གླིང་པས་གནང་བའི་ཐུབ་པའི་གསེར་སྐུ་དེ་ཕུལ་བས་འབུལ་མཁན་འབྲོམ་སྟོན་ཡིན་སྙམ་ནས་གསེར་སྐུའི་འབུལ་ས་ཨ་བོ་ཁུ་སྟོན་རང་ཡིན་གསུངས་ནས་མཉེས།   རྣལ་འབྱོར་བ་ཆེན་པོ་ལ་རྣམལ་འབྱོར་པ་གསུམ་གྱིས་རབ་གནས་མཛད་པའི་ཡི་གེ་དྲུག་པ་ཞིག་ཕུལ།   དགོན་པ་བ་ལ་ཇོ་བོའི་ཐུགས་དམ་མི་གཡོ་བ་ཞིག་ཕུལ་བ་ད་ལྟ་རྭ་སྒྲེང་ན་བཞུགས།   རྔོག་ལེགས་པའི་ཤེས་རབ་ལ་མཆོད་རྟེན་བརྒྱད་པ་དང་དངུལ་གདུགས་ཅན་ཅིག་དང་ཇོ་བོའི་ཐུགས་དམ་རྟེན་རྗེ་བཙུན་སྒྲོལ་མའི་གསེར་སྐུ་བཅས་གནང་།   དེ་ནས་འོར་དུ་ཡང་མཆོད་རྟེན་བརྒྱད་པ་དང་།     ཐུབ་པ་ཆེན་པོ་གཙོ་འཁོར་ལྔ།   སྨན་བླ།   མཆོད་སྡོང་།   བསིལ་བྱེད།   ལུགས་སྐུ་ཆུང་ཆུང་མང་དུ་བཞུགས།   དེ་ནས་ལུག་གི་ལོ༡༠༥༥ལ་ཇོ་བོའི་དགོངས་རྫོགས་མཆོད་འབུལ་རྒྱ་ཆེན་པོ་མཛད་དེ།   དགེ་བཤེས་འབྲོམ་སྟོན་པས་འཕགས་པ་བརྒྱད་སྟོང་པ་གསུངས།   རྣལ་འབྱོར་པ་ཕྱག་ཁྲི་མཆོག་གིས་སྤྱོད་འཇུག་གསུངས།   བུ་སློབ་གཞན་རྣམས་ཀྱིས་ཀྱང་རང་སོ་སོས་ཆོས་རེ་གསུངས།   དེ་དུས་བསྙེན་བཀུར་ཞུས་པ་རྣམས་ཀ་བ་ཤཱཀྱ་དབང་ཕྱུག་གིས་གསུངས་པ་ལྟར་འབུལ་བ་ཐམས་ཅད་ཕྱོགས་གཅིག་ཏུ་བཞག་ནས་སྙེ་ཐང་ན་མོ་ཆེར་ཇོ་བོའི་གདན་སར་ལྷ་ཁང་ཞིག་བཞེངས་པའི་མཐུན་རྐྱེན་དུ་ཕུལ་ཏོ༎

མཐོ་ལྡིང་གཙུག་ལག་ཁང་གི་མཆོད་རྟེན་ཆེན་མོ།

གསར་འགོད་པ། ཨ་སྐྱོང་འཇིགས་མེད་རྣམ་རྒྱལ།