༄༅།  །ཆོས་རྗེ་བྱང་ཆུབ་འོད་ཀྱི་ཞལ་གདམས་བཞུགས་སོ།  །

       ན་མོ་གུ་རུ།      ལར་ཁམས་འདུས་ཀྱི་དྲོད་རྟོགས་ཕྲ་མོ་ཡིས།  །སྒོམ་ཆེན་ང་རྒྱལ་ལ་སྐྱེ་ལས་ཆེ།  །ཉམས་མྱོང་གི་རོ་ལ་ཞེན་པ་ཡིས།  །སྒོམ་ཆེན་འཁོར་བའི་འཆིང་ལས་ཆེ།  །སྒོམ་བཟངས་ཀྱི་གྲངས་སྙན་འདོད་པ་ཡིས།  །སྒོམ་འདོད་བདུད་ཀྱིས་འཁྱེར་ལས་ཆེ།  །ཉོན་མོངས་ཀྱི་སྤྲིན་དང་མ་བྲལ་ན།  །འོད་གསལ་གྱི་ནམ་མཁའ་དག་པ་བརྫུན།  །བདག་གཅེས་ཀྱི་མུན་པ་མ་སངས་ན།  །བདག་མེད་ཀྱི་ཉི་ཤར་བརྫུན་དུ་འགྲོ།  །རབ་བདེ་འདོད་པའི་སྒོམ་ཆེན་དེ།  །རང་སེམས་བདུད་དུ་ཤོར་ལས་ཆེ།  །སྲོག་ཆུ་བུར་ལྟ་བུར་མ་ཤེས་ཤིང་།  །གྲགས་སྙན་གྱི་འདོད་པ་མ་སྤོངས་ན།  །ཐོས་བསམ་སྒོམ་གསུམ་གྱི་བརྩོན་འགྲུས་ཀྱང་།  །ལམ་གྱི་གཟུགས་བརྙན་དུ་འགྲོ་ལས་ཆེ།  །རང་སེམས་སྐྱེ་མེད་ཀྱི་དོན་རྟོགས་ཤིང་།  །ཏིང་འཛིན་རི་ལྟར་བརྟན་ཀྱུར་ཀྱང་།  །ཐབས་བྱང་ཆུབ་སེམས་ཀྱིས་མ་ཟིན་ན།  །ཐེག་ཆེན་རྒྱབ་ཏུ་སྐྱུར་ལས་ཆེ།  །རྨི་ལམ་སྒྱུ་མར་མ་ཤེས་ཤིང་།  །བདག་གཅེས་ཀྱི་འཁྲི་བ་མ་ཆོད་ན།  །ལུས་ངག་དགེ་སྦྱོར་ལ་འབད་གྱུར་ཀྱང་།  །འཁོར་བའི་གཉིད་སིངས་སུ་འགྲོ་ལས་ཆེ།  །ཐག་ཆེན་གྱི་བདུད་ལ་རྣམ་གཉིས་ཏེ།  །ཐབས་དང་བྲལ་བའི་ཤེས་རབ་དང་།  །ཤེས་རབ་བྲལ་བའི་ཐབས་ཡིན་ཞེས།  །ཉི་མའི་གཉེན་གྱིས་དེ་སྐད་གསུངས།  །ལར་སྣང་མེད་ཀྱི་སྟོང་རྐྱང་ཆད་པའི་མཐར།  །དེ་གནས་ལུགས་སུ་ལྟ་བ་འཁྲུལ་བའི་ཡིད།  །བདེན་པར་འཛིན་པ་དེ་སྐུར་འདེབས་ཀྱི་བློ།  །དེ་གོམས་པར་བྱེད་པ་ངན་འགྲོའི་ལམ།  །སྟོང་མེད་ཀྱི་སྣང་རྐྱང་རྟག་པའི་མཐའ།།  དེ་གནས་ལུགས་སུ་ལྟ་བ་གཏི་མུག་གི་ཡུད།  །བདེན་པར་འཛིན་པ་དེ་སྒྲོ་འདོགས་ཀྱི་བློ།  །དེ་གོམས་པར་བྱེད་པ་འཁོར་བའི་གཞི།  །སྣང་སྟོང་དབྱེར་མེད་དེ་ཤེས་བྱའི་གཤིས།  །དེ་གནས་ལུགས་སུ་ཤེས་ན་མཐའ་བྲལ་གྱི་བློ།  །དེ་གོམས་པར་བྱེད་པ་ཟུང་འཇུག་གི་ལམ།  །དེ་དུས་གསུམ་རྒྱལ་བའི་གཤེགས་ཤུལ་ཡིན།  །ལར་རྩེ་གཅིག་སྡོད་བའི་ཞི་གནས་དེ།  །གཏི་མུག་གི་ཁ་སྣོད་མི་བགྱིད་འཚལ།  །འཛིན་མེད་རང་གསལ་གྱི་སྒོམ་པ་དེ།  །བློ་ཁ་འཚོམས་ཀྱི་དགྲ་ལ་མི་བསྐུར་འཚལ།  །མ་བཅོས་གཉུག་མའི་ཡེ་ཤེས་དེ།  ། ཁམས་འདུས་ཀྱི་ཉམས་ལ་མི་བགྱིད་འཚལ།  །ཆོས་རྗེ་བྱང་ཆུབ་འོད་ཀྱི་ཞལ་གདམས་འགྲོ་བའི་སྙིང་ལ་གནས་བར་ཤོག།    བདག་གཅེས་འཛིན་དགྲ་ཡིན།  །གཞན་གཅེས་འཛིན་གཉེན་ཡིན།  །སྣང་བ་བརྫུན་ཡིན།   སེམས་ཉིད་ནམ་མཁའ་ཡིན།   ཞེས་དང་། བདག་འཛིན་སྡུག་བསྔལ་གྱི་རྩ་བ་ཡིན་པས་རྩད་ནས་བཅད་ན་ལེགས།     དམ་ཆོས་བྱང་ཆུབ་ཀྱི་ལམ་ཡིན་པས་ཉམས་སུ་བླངས་ན་ལེགས།  སྣང་བ་བརྫུན་གྱི་རང་བཞིན་ལ་བདེན་པར་མ་བཟུང་ན་ལེགས།  རང་སེམས་སངས་རྒྱས་ཀྱི་དགོངས་པ་ཡིན་པས་དང་དུ་གཉེར་ན་ལེགས།   ཞེས་བ་བླ་མ་ཆེན་པོ་བྱང་ཆུབ་འོད་ཀྱི་གསུང་དྲི་མ་མེད་པའོ།  །

ཕབ་བཤུ་བ།  ནག་ཙན་དན།