ལོ་ཆེན་བཻ་རོ་ཙ་ནའི་རྣམ་ཐར་ལས་ལྔ་བ།

རྒྱ་གར་ནས་ཕྱིར་བོད་ཡུལ་དུ་ཕེབས་པའི་སྐོར།

བཻ་རོ་ཙ་ནས།ཨེ་མ་གཞུང་ལྡན་གྲོགས་པོ་ཁྱོད་ཉིད་ནི།།མི་རུ་སྐྱེས་པས་སྐྱེས་པ་གཞན་ལགས་འཕགས།།སྨོན་ལམ་དག་པས་རྒྱ་གར་ཡུལ་དུ་སྐྱེས།།དངོས་གྲུབ་ཐོབ་པས་རྫུ་འཕྲུལ་རྐང་མགྱོགས་གྲུབ།།བླ་མ་མཆོད་ལེགས་ཆོ་རིགས་བཙུན་པོར་སྐྱེས།།དམ་ཚིག་བསྲུངས་པས་འདི་རུ་བསམ་དགུ་འགྲུབ།།སྒྲིབ་པ་བྱང་བས་འཕགས་པའི་བཀའ་གྲོས་བཟླས།།གཞུང་ལུགས་བཟང་བས་ཀུན་གྱིས་བསྟེན་པར་གྱུར།།དགོས་དགུ་ལུས་ལ་ཚང་བས་བདག་གི་གྲོགས་སུ་འཚལ།།ལུས་པོ་ཕ་མས་བསྐྱེད་ཀྱང་སྲོག་སྲིང་གྲོགས་པོས་སྟོན།།ཁྱོད་དང་གྲོགས་པོ་བྱས་པས་ཡངདག་བྱང་ཆུབ་རྙེད།།བོད་ཀྱི་རྒྱལ་ཁམས་མ་རིག་མུན་པ་སེལ།།འགྲོ་བ་ཇི་ལྟར་སྨིན་ཅིང་གྲོལ་བའི་དོན།།ཀུ་མ་ར་ལ་དགེ་བའི་རྩ་བར་བསྔོ།།བསྐལ་བར་སྦྱང་བྱས་བྱང་ཆུབ་དོན་དང་མཉམ།།རྐང་མགྱོགས་གྲུབ་པས་ད་ནི་བདག་ཀྱངའགྲོ།།བལ་ཡུལ་ཙམ་དུ་སྙིང་གཏམ་བྱ་ཡིས་སྐྱོལ།།ཞེས་གསུངས་ཏེ།གསེར་ཕྱེ་ཚོམ་གཅིག་དང་གསེར་གྱི་པ་ཏྲ་གསུམ་བྱིན།ཏ་ཀེ་རེའི་རྒྱལ་པས་ཕུལ་བའི་གསེར་སྐུ་དེ་ཁྱེར་ཏེ་གྲོགས་པོ་གཉིས་དང་བསྡོངས་ནས་ཕྱིན་ནོ།།   
བཻ་རོ་ཙ་ནས་ཤྭ་བའི་ཡིབ་ཞུ་རིང་པོ་ཞིག་མགོ་ལ་གྱོན།རྐང་ལ་ཟོམ་ལྷམ་ཁ་ཕྱིན་ཅི་ལོག་གཅིག་གོན།གོས་ཀྱི་གོང་པ་རྒྱབ་ཏུ་བསྣོལ།གླང་འཁར་སྐྱ་མོ་གཅིག་ལག་ཏུ་ཐོགས་ནས་ཕྱིན།གཅན་འཕྲང་དང་པོར་རྐང་མགྱོགས་གྱི་དཔོན་པོ་ཀུ་ཧ་ར་དང་འཕྲད།རྐང་མགྱོགས་ཀྱི་དཔོན་པོ་ཀུ་མ་རའི་གྲོགས་པོ་ཡིན་པས།གྲོགས་པོ་གཉིས་ཀྱིས་ཀུ་ཧ་ར་ལ་གསེར་ཕྱེ་ཁྱོར་གང་དང་།པ་ཏྲ་གཉིས་རྔན་པར་བྱིན་ནས།དོ་ནུབ་རྐང་མགྱོགས་པ་རྣམས་འདིར་འོངས་ན།བོད་ཀྱི་བན་དྷེ་མཐོང་ངམ་འདྲི་ཡིས།ཁྱོད་ཀྱི་བོད་ཀྱི་བན་དྷེ་འདྲ་བ་མ་མཐོང་། མགོ་ལ་ཤྭ་བའི་ཡིབ་ཞུ་རིང་པོ་རེ་གོན་པ།རྐང་ལ་ཟོམ་ལྷམ་ཕྱིན་ཅི་ལོག་ཏུ་གོན་པ།སྤྲུལ་བ་ཡིན་ནམ་མི་ཡིན།གནོད་སྦྱིན་ཡིན་ནམ།ཅི་ཡིན་ཆ་མེད་པ་ཞིག་ད་ཙམ་བོད་ཡུལ་མཐིལ་དུ་སླེབས་པ་ཡོད་ཀྱིས་ཤིག་ཅེས་འཕྲང་སྲུང་ལ་མནའ་དགག་བཅུག་གོཀུ་མ་རས་གྲོང་ཁྱེརསེར་སྐྱའི་སྒོར་སྒུག་ནས།རྐང་མགྱོགས་ཟླ་བོ་ཀུན་སྦྲན་ཏེ།བོད་ཀྱི་བན་དྷེ་བཻ་རོ་ཙ་ན་འདི་ནས་ཕར་ལ་སོང་ངམ།བདས་ལ་བསད་ཀྱི་ཟེར། ཆོས་སྐྱོང་བའི་རྒྱལ་པོ་དང་མཁས་པ་བདུན་གྱི་ཞལ་ནས་ཀྱང་།དེ་དང་འཕྲད་ན་གསོད་ལ་ཤོག་ཅིག་གསུངས།རྐང་མགྱོགས་པ་རྣམས་ཀྱིས་གཅན་འཕྲང་དང་པོ་ནས་འཕྲང་སྲུང་པར་བོད་ཀྱི་བན་དྷེ་མ་བྱུང་བར་སྨྲསས་པས།འཕྲང་སྲུང་པ་ན་རེ།བོད་ཀྱི་བན་དྷེ་མ་བྱུང་།མགོ་ལ་ཤྭ་བའི་ཡིབ་ཞུ་རིང་བོ་རེ་གོན་པ།རྐང་ལ་ཟོམ་ལྷམ་ཕྱིན་ཅི་ལོག་པ་གོན་པ།གོང་བ་བརྒྱབ་ཏུ་བསྣོལ་བ།མི་ཡིན་ནམ།འདྲེ་ཡིན་ནམ།སྤྲུལ་བ་ཡིན་ཆ་མེད་པ་ཞིག་དེང་སང་བོད་ཡུལ་མཐིལ་དུ་སླེབས་ཡོད་ཅེས་སྨྲས་པས།རྐང་མགྱོགས་པ་རྣམས་ཕྱིར་ལོག་གོ།
བཻ་རོ་ཙ་ན་ཚུར་ལི་ཡུལ་ལྕང་ར་སྨུག་པོར་བྱོན།ལི་ས་ཚུལ་ཁྲིམས་སྒྲོལ་མ་བྱ་བ་དང་མཇལ་ནས་ཞག་ས་ཞུས།དེས་ཞག་ས་དང་ལོ་རྒྱུས་དྲིས་མཐར་བེ་རོ་ཙ་ན་ཡིན་པར་ངོ་ཤེས་ནས།སེམས་ཉིད་རྟོགས་ན་ཇི་ལྟར་རྟོགས་པར་འགྱུར་ཞེས་ཞུས་པར་ལན་གསུངས་པས།
ལི་ས་ཚུལ་ཁྲིམས་སྒྲོལ་མ་ཡིད་ཆེས་ཏེ་རྟ་ངང་གསེར་མདོག་བྱ་བ་ཕུལ་ནས་མན་ངག་ཞུས་པས།ལི་ས་ཚུལ་ཁྲིམས་སྒྲོལ་མ་ལ་རྟོགས་པ་ཇི་བཞིན་པ་ཤར་ཏེ་དགོངས་པའི་དོན་ལ་བཞུགས་སོ།།
བཻ་རོ་ཙ་ན་བལ་ཡུལ་ཏག་ཤ་ཀ་བྱ་བའི་ཡུལ་དུཔཎྜི་ཏ་པྲཛྙ་སིདྡྷི་བྱ་བ་དང་འཇལ།པཎྜི་ཏས་བཻ་རོ་ཙ་ན་ལ་རྟོགས་ཚད་ཅི་འདུག་དྲིས་པར།བོད་ཀྱི་བན་དྷེས་རང་གི་སེམས་ཇི་ལྟར་རྟོགས་ན་རྟོགས་པ་ལགས།ཐེག་པ་གང་ལ་མཁས་ན་འབྲས་བུ་ཐོབ།མཆོད་པ་གང་གིས་མཆོད་ན་འཕགས་པ་མཉེས།ཞེས་དྲིས་པར་ལན་ཇི་བཞིན་གསུངས་པས།པཎྜི་ཏ་པྲཛྙ་སིདྡྷི་མཉེས་ནས་དགུན་ཟླ་གཅིག་ལ་མཆོད་གནས་བྱས་སོ།།                                 
དེ་ནས་བལ་ཡུལ་དུ་བྱོན་ཙ་ན།རྒྱ་གར་གྱི་ལྷ་མོ་རེ་ལྕམ་གྱིས་ཁ་བ་བཏང་སྟེ།བཻ་རོ་ཙ་ནས་བཀའ་བདེན་ནམ་མི་བདེན་བརྟགས་པ།དུས་གསུམ་སངས་རྒྱས་རང་གི་སེམས་ཡིན་ཏེ།།སྐྱེ་ཤི་མེད་པས་དུས་གསུམ་སངས་རྒྱས་སོ།།ཡང་རབ་བློ་དང་ལྡན་པའི་སྐལ་ལྡན་ལ།།སེམས་ཀྱི་ཉི་མ་ཤར་བར་བྱ་བའི་ཕྱིར།།བསམ་པ་བཟང་པོ་གསེར་དང་འདྲ་བ་ཡིས།།བོད་ཀྱི་ཡུལ་ནས་རྒྱ་གར་ཡུལ་བར་དུ།།དཀའ་བ་བཅུ་དྲུག་བསྡོས་པའི་མན་ངག་ལ།།དཀའ་བ་གཅིག་གིས་བར་དུ་མ་ཆོད་པའི།།ཁ་བ་འདི་ཡིས་བར་དུ་ཆོད་ལ་ཁད།།བཀའ་འདི་བདེན་ན་ཁ་བ་འདི་ཆོད་ཅིག།ཅེས་གསུངས་པས།ལྷ་མོ་དམར་མོས་སྐུ་སྤྲིན་གྱི་གསེབ་ནས་བསྟན།།ཕྱག་འཚལ།བྲན་དུ་ཁས་བླངས།དུས་དེ་ཁ་བ་ཆད་ནས་གདུགས་རབ་ཏུ་དྲོའོ།།
གསེར་སྐུ་དེ་འཕགས་པ་ཤིང་ཀུན་ལ་ཕུལ་ནས།སྒྲིབ་རྐྱེན་མི་མངའ་དུས་གསུམ་རྒྱལ་བའི་སྐུ།ཐུགས་རྗེའི་བཀའ་བཙན་འཛམ་གླིང་ནམ་མཁའ་འདྲ།སྟོན་པའི་ཐུགས་རྗེ་ཕྱོགས་རིས་མི་མངའ་ཡང་།འཁོར་བའི་ལས་འདི་མཐའ་མེད་ནམ་མཁའ་འདྲ།ཐུགས་རྗེས་འཁོར་བའི་རྒྱ་མཚོ་སྒྲོལ་བའི་ཕྱིར།དུས་གསུམ་རྒྱལ་བའི་སྐུ་ལ་བཟོད་པར་གསོལ།ཞེས་གསུངས་སོ།དེ་ནས་ཉང་རོ་ནེའུ་སིང་སུ་ཆོས་སྟོན་ལ་བྱོན། བསམ་ཡས་སུ་ཉི་མ་དགོང་ཕྱེད་ལ་སླེབས་སོ།།

རྩོམ་ཡིག་མཁོ་སྤྲོད་པ། གསར་འགོད་པ།  ནགས་བཟའ་བློ་བཟང་ཆོས་གྲགས།