ལྷ་རིས་པ་ཚེ་རིང་ཀུན་ཁྱབ་ཀྱི་སྒྱུ་རྩལ་བརྩམས་ཆོས་ངོ་སྤྲོད།
  ༄༅། །ངེད་དྲ་བར་ཕེབས་པར་དགའ་བསུ་ཞུ། དེ་རིང་ནི་སྤྱི་ལོ 2019 ལོའི་ཟླ 11 ཚེས 22 རེས་གཟའ་པ་སངས་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། འདི་ནས་ང་དང་གླེང་མོལ་བྱ།
གཙོ་ངོས།
སློབ་གསོ།
ཆོས་ལུགས།
ཀུན་འདུས།
རྩོམ་རིག
དམངས་སྲོལ།
རྒྱུན་ཤེས།
ལོ་རྒྱུས།
མི་སྣ།
ཐོན་མི།
སྐད་འཇོག་ས།
ཕྱོགས་སྟོན། གཙོ་ངོས།» ཀུན་འདུས།» སྲོལ་རྒྱུན་རི་མོ། »ལྷ་རིས་པ་ཚེ་རིང་ཀུན་ཁྱབ་ཀྱི་སྒྱུ་རྩལ་བརྩམས་ཆོས་ངོ་སྤྲོད།
ལྷ་རིས་པ་ཚེ་རིང་ཀུན་ཁྱབ་ཀྱི་སྒྱུ་རྩལ་བརྩམས་ཆོས་ངོ་སྤྲོད།
རྩོམ་སྒྲིག་པ།  བན་ཤུལ་འཇམ་དབྱངས། སྤེལ་དུས 2018-06-03ལྟ་ཀློག (3841)རྩོམ་ཁུངས: རྩོམ་ཁུངས་འདེམ་བྱང་།པར་འདེབ།

ང་ནི་རང་ཉིད་ཀྱི་སྒྱུ་རྩལ་ལ་དགའ།

ལྷ་རིས་པ་ཚེ་རིང་ཀུན་ཁྱབ་ཀྱི་ངོ་སྤྲོད།
   ཚེ་རིང་ཀུན་ཁྱབ་ནི། སྤྱི་ལོ་1983ལོར་ཁམས་ཡུལ་ཤུལ་གྱི་འབྲོག་ཁྱིམ་དཀྱུས་མ་ཞིག་ཏུ་སྐྱེས།  ཕ་རུས་འདན་ཤུལ་དང་མ་རུས་རུ་སར་ཡིན།  ལོ་ངོ་བདུན་ལ་སོན་སྐབས་ཕ་ཀརྨ་ཀླུ་དབང་དྲུང་ནས་ཡི་གེའི་སྦྱོར་ཀློག་ལ་སྦྱང་མགོ་བཙུགས། ཀློག་ལེགས་པར་བྱང་རྗེས་ཀྱི་རང་ལོ་བཅུ་གཅིག་སྐབས་དགོན་པའི་འཚོགས་གྲྭལ་དུ་ཞུགས།
    སྤྱི་ལོ་1995ལོར་རང་ལོ་བཅུ་གཉིས་ཐོག་ཀརྨའི་སྒར་བྲིས་པ་ཆེན་མོ་ཁུ་བོ་ནོར་བཀྲའི་དྲུང་ནས་ལྷ་རིས་སྤྱི་དང་ཁྱད་པར་ཀརྨའི་སྒར་བྲིས་ལ་སྦྱང་འགོ་བཙུགས། ལོ་གསུམ་ནང་ཐིག་རྩ་དང་། སྐྱ་རིས།  སྣག་རིས།  སྐྱ་ཐང་། ཚོན་སྡེབ།  པིར་བཟོ།  རས་གཞི་དབུར་བ།   ཚོན་འདེབས་པ་སོགས་ལྷ་རིས་ཀྱི་རྨང་གཞི་ལེགས་པོ་སྦྱངས། 


  སྤྱི་ལོ་1998ལོར་མདོ་ཁམས་སྨད་ཀྱི་གདན་ས་ཆེན་མོ་གསེར་ཐང་བླ་རུང་ལྔ་རིག་ནང་བསྟན་སློབ་གླིང་དུ་བསྐྱོད་ནས་སྙིགས་དུས་བསྟན་པའི་གསལ་བྱེད་ཆོས་རྗེ་ཡིད་བཞིན་ནོར་བུའི་ཞལ་སྔ་ནས་མདོ་དང་སྔགས་ཀྱི་དབང་ཁྲིད་མན་ངག་ལ་ལོངས་སུ་སྤྱོད་པའི་སྐལ་བཟང་རྙེད། དུས་མཚུངས་སུ་གཙང་རིག་སྐལ་བཟང་རྣམ་འདྲེན་མདུན་ནས་ཐ་སྙད་རིག་གནས་ལ་ཡང་སྦྱངས་པ་བྱས།
དེ་རྗེས་སླར་ཡང་སློབ་དཔོན་ནོར་བཀྲའི་དྲུང་ནས་སྒར་བྲིས་ཀྱི་ཞལ་ཐང་དངོས་འབྲི་བའི་མན་ངག་དང་ལག་ལེན་གྱི་དངོས་སྦྱོང་ནན་ཏན་བྱས་ནས་མཐར་ཕྱིན།

སྤྱི་ལོ་2003ལོར་རང་ཉིད་ཀྱི་ངོས་ནས་སྒར་ལུགས་ཆོས་ལོངས་སྤྲུལ་གསུམ་གྱི་ཞལ་ཐང་ཐོག་མ་བྱས་ཏེ་ལྷ་རིས་འབྲི་འགོ་བཙུགས།  ཞོར་དུ་ལྷ་བྲིས་པ་གཞན་དག་གི་ཟུར་ནས་ཀྱང་སྨན་ལུགས་དང་བྱེའུ་སྒང་པའི་ལུགས་སོགས་ཀྱི་འབྲི་རྩལ་ལ་ཡང་སྦྱོང་བ་ཐོན་པར་བྱས་པས།   ད་ལྟའི་ཆར་སྒར་སྨན་བྱེའུ་གསུམ་གྱི་ཚོན་ཐང་།   མཚལ་ཐང་།  ནག་ཐང་།  གསེར་ཐང་སོགས་འབྲི་ཚུལ་སྣ་ཚོགས་ཀྱི་ནུས་རྩལ་ཡོངས་སུ་རྫོགས་ཡོད།

  སྔ་རྗེས་སུ་དགོན་པ་ཁག་དུ་མའི་ཚོགས་ཆེན་འདུ་ཁང་གི་ཚོན་རིས་དང་ལྡེབ་རིས་བྲིས་པ་དང་། ཟངས་སྐུ་དང་འཇིམ་སྐུ་ཆེ་ཆུང་སྣ་ཚོགས་པའི་སྤྱན་འབྱེད་དང་།  གྲང་གསེར་གསོལ་བ།  གསེར་ཤོག་གླན་པ་སོགས་ལ་ཡང་ལག་ལེན་རྒྱུན་དུ་བྱས།
ཁྱད་པར་སྦྱིན་བདག་སྒེར་གྱི་བདེ་ཆེན་ཞིང་ཐང་བཅུ་ཕྲག་དུ་མ་དང་།  གུ་རུ་མཚན་བརྒྱད།  ཐུབ་དབང་།  གནས་བརྟན་བཅུ་དྲུག། སྒྲོལ་མ་ཉེར་གཅིག། རྒྱལ་བ་རིགས་ལྔ།  ལྟུང་བཤགས།  ཕྱག་སྟོང་སྤྱན་སྟོང་།   གཡུ་ལོ་བཀོད་པའི་ཞིང་ཁམས།   མཁན་སློབ་ཆོས་གསུམ།   རྡོར་སེམས།   གུ་རུ་དྲག་པོ།   ཉེ་སྲས་བརྒྱད།  ཛམ་བྷ་ལ།   གྲུབ་ཆེན་བརྒྱད་ཅུ།  གནས་བརྟན་བཅུ་དྲུག་ཞལ་ཐང་ཉེར་གསུམ་པ། བཀའ་བརྒྱུད་གསེར་འཕྲེང་ཞལ་ཐང་བཞི་བཅུ་མ།   ཕྱག་བཞི་པ།  ཨ་ཕྱི་བཅས་སྒར་ལུགས་སུ་བཞེང་བ་དང་། 
ཚེ་དཔག་མེད།  ཁྲོ་བོ་མི་གཡོ་བ།  སྒྲོལ་མ་འཇིགས་པ་བརྒྱད་སྐྱོབ་སོགས་བྱེའུ་སྒང་པའི་ལུགས་སུ་བཞེང་བ། 
སྤྱན་རས་གཟིགས་སེམས་ཉིད་ངལ་གསོ་དང་།  པཎ་ཆེན་དཔལ་ལྡན་ཡེ་ཤེས།  དར་ཧན་ཇིང་གིར་རྒྱལ་པོ་སོགས་སྨན་ལུགས་སུ་བཞེང་བ་བཅས་ཞི་བ་དང་ཁྲོ་བོ་ཕོ་རྒྱུད་དང་མོ་རྒྱུད་ཀྱི་རྩ་བ་གསུམ་དང་ཆོས་སྐྱོང་སོགས་ཀྱི་ཞང་ཐང་བརྒྱ་ཕྲག་ལྷག་འབྲི་བཞེང་བྱས་ཟིན། 
ཁོང་གིས་བྲིས་པའི་ཞལ་ཐང་རྣམས་ནི་ཁོར་ཡུག་མཛེས་ཤིང་བརྗིད་པ། ལྟ་ན་སྡུག་པ། ཡིད་དུ་འོང་བ། ལྷ་ཚོགས་དང་མི་སྣ་རྣམས་གཟི་བྱིན་འབར་བ། དང་བ་འདྲེན་པ། ལྷུན་ཆགས་པ། གསོན་ཉམས་ལྡན་པ་སོགས་སྒྱུ་རྩལ་གྱི་དཔལ་ཤིན་ཏུ་ཕུན་སུམ་ཚོགས་པས་དགོན་སྡེ་དང་སྦྱིན་བདག་སོགས་གཟིགས་མོ་བ་རྣམས་ཀྱིས་དགའ་བསུ་དང་ཡིད་རང་ཆེན་པོ་གནང་།


  སྤྱི་ལོ་2017ལོར་ཁམས་ཡུལ་ཤུལ་ཁུལ་ནས་“གཟུགས་མེད་རིག་གནས་ཤུལ་བཞག་ཀརྨའི་སྒར་བྲིས་ཞལ་ཐང་འགྲེམ་སྟོན་ཐེངས་དང་པོ་”བྱེད་སྐབས་བརྩམས་ཆོས་ཞལ་ཐང་དུ་མ་དེར་བདམས་ཐོན་བྱུང་ནས་ཁུལ་རྩོམ་རིག་སྒྱུ་རྩལ་ལྷན་ཚོགས་དང་།  ཁུལ་རིག་གནས་ཅུའུ་གཉིས་ཀྱིས་གཟི་བརྗིད་དཔང་ཡིག་སྤྲད།
ད་ལྟའི་ཆར་ཡང་རྒྱུན་མཐུད་ནས་ཞལ་ཐང་སྣ་ཚོགས་འབྲི་བཞེང་དང་། སློབ་མ་ལྷ་རིས་པ་གསོ་སྐྱོང་། བདེ་ཆེན་འོད་གསལ་གླིང་གི་ལྷ་རིས་ཀྱི་དགེ་རྒན་སོགས་བྱེད་ཀྱིན་སྒར་ལུགས་གཙོ་བོ་དང་སྨན་བྱེའུ་ལུགས་ཞོར་དུ་བྱས་ཏེ་བོད་ཀྱི་རི་མོའི་སྒྱུ་རྩལ་རྒྱུད་འཛིན་དང་དར་སྤེལ་གནང་བ་ལ་བརྩོན་བཞིན་ཡོད་དོ།  །

གུ་རུ་མཚན་བརྒྱད།

གུ་རུ་སྣང་སྲིད་ཟིལ་གནོན།


བདེན་ཆེན་ཞིང་བཀོད།

རྒྱལ་བ་རིགས་ལྔ།


རྫོགས་ཆེན་བླ་རྒྱུད།

གནས་བརྟན་ཆེན་པོ་ལམ་བསྟན།

མཉམ་མེད་དྭགས་པོ་ལྷ་རྗེ།


ཀརྨ་པ་བཞི་བ་རོལ་པའི་རྡོ་རྗེ། 

ཁོང་གིས་གསེར་ཤོག་གླན་ཅིང་སྤྱན་འབྱེད་བྱས་པའི་ཐང་སྟོང་རྒྱལ་པོའི་ཟངས་སྐུ་ཆེན་པོ་ཞིག


ལྷ་རིས་པ་ཚེ་རིང་ཀུན་ཁྱབ་ཀྱི་འཕྲིན་ཕྲན་བཤེར་རིས།
འོས་སྦྱོར་ཡི་གེ་འབྲི་མཁན། ཡུལ་ཤུལ་ཚེ་དབང་བཀྲ་ཤིས།

རྩོམ་ཡིག་མཁོ་སྤྲོད་པ། གསར་འགོད་པ། གླིང་རུ་བ།


དྲ་རྒྱ་གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ། རྩོམ་སྒྲིག་པ། འོད་ཟེར་བཟང་བོ། སྦྲ་ནག་འཇིགས་མེད་རྡོ་རྗེ། འབའ་སྣང་གྲོལ། བན་ཤུལ་འཇམ་དབྱངས།
འདྲེན་བཀོལ:
61.4K

  དཔྱད་གཏམ ( 0 )ཡོད།
དཔྱད་གཏམ་སྤེལ་ས།
སྤེལ་མཁན། བཤེར་གྲངས། fc5i བཤེར་གྲངས་ཁ་སྐོང་བྱོས།ཡིག་འབྲི་བཞི་ལས་མང་མི་རུང་།ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་།ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།      
 
མིག་སྔར་འདི་རུ་དཔྱད་གཏམ་སྤེལ་མཁན་མ་བྱུང་།
ལྟ་ཀློག་གྲངས་ཀ
5945775
 
འབྲེལ་གཏུག་བྱ་ཡུལ།    ཁ་པར།  15283703999    E-mail:www.jmjzjy@126.com
པར་དབང་རྭ་རྒྱ་ཤེས་རིག་ནོར་བུའི་སློབ་གླིང་ལ་དབང་།
网站备案号:青ICP备15000002号 青公网安备 63262102000011号