གངས་ལྗོངས་ཤེས་རིག་ནོར་བུའི་སློབ་གླིང་གི་དགེ་སློབ་རྣམས་ལ་སྤྲིངས་པ་སྙིང་གཏམ་སྙིང་གི་རླབས་འཕྲེང་།
  ༄༅། །ངེད་དྲ་བར་ཕེབས་པར་དགའ་བསུ་ཞུ། དེ་རིང་ནི་སྤྱི་ལོ 2019 ལོའི་ཟླ 10 ཚེས 21 རེས་གཟའ་ཟླ་བ་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། འདི་ནས་ང་དང་གླེང་མོལ་བྱ།
གཙོ་ངོས།
སློབ་གསོ།
ཆོས་ལུགས།
ཀུན་འདུས།
རྩོམ་རིག
དམངས་སྲོལ།
རྒྱུན་ཤེས།
ལོ་རྒྱུས།
མི་སྣ།
ཐོན་མི།
སྐད་འཇོག་ས།
ཕྱོགས་སྟོན། གཙོ་ངོས།» རྩོམ་རིག» བཅད་རྩོམ། »གངས་ལྗོངས་ཤེས་རིག་ནོར་བུའི་སློབ་གླིང་གི་དགེ་སློབ་རྣམས་ལ་སྤྲི
གངས་ལྗོངས་ཤེས་རིག་ནོར་བུའི་སློབ་གླིང་གི་དགེ་སློབ་རྣམས་ལ་སྤྲིངས་པ་སྙིང་གཏམ་སྙིང་གི་རླབས་འཕྲེང་།
རྩོམ་སྒྲིག་པ།  འབའ་སྣང་གྲོལ། སྤེལ་དུས 2018-05-20ལྟ་ཀློག (3539)རྩོམ་ཁུངས: ངེད་དྲ་བ།པར་འདེབ།


གངས་ལྗོངས་ཤེས་རིག་ནོར་བུའི་སློབ་གླིང་གི་དགེ་སློབ་རྣམས་ལ་སྤྲིངས་པ་སྙིང་གཏམ་སྙིང་གི་རླབས་འཕྲེང་།

           བཛྲ་ཚུལ་ཁྲིམས་རྒྱ་མཚོས།

བརྗིད་ཆགས་ཁྱུང་མགོན་ལྷུན་པོའི་མདུན་རོལ་དང་།།

ཡ་བུག་འབྲུ་དྲུག་ཐང་གི་ཐིག་ལེ་རུ།།

ཁྲ་ཆུང་མིག་གི་བདུད་རྩིར་བཞེངས་པ་ཡི།།

ཤེས་རིག་ནོར་བུའི་སློབ་གླིང་ཨེ་མ་མཚར།།

ལོ་རྒྱུས་མི་རིང་ལོ་ངོ་ཉི་ཤུ་ལྷག།

འོན་ཀྱང་གྲགས་སྙན་ཟླུམ་གཟུགས་གོ་ལར་ཁྱབ།།

ཕྱི་ནང་ནད་གདོན་བར་ཆད་མང་ན་ཡང་།།

དོན་ལྡན་ལང་ཚོའི་གཟི་བརྗིད་དགུང་ལ་བསྙེགས།།

ལ་ལས་ངན་རྒུ་བསྒྲིགས་ནས་སྨོད་ཀྱང་རུང་།།

འགའ་ཞིག་བཟང་དགུ་བཏུས་ནས་བསྟོད་ཀྱང་ཆོག།

གང་ཤེས་རང་གི་གཤིས་རྒྱུད་སྦྱོང་བྱེད་དུ།།

ལྟ་བའི་དགེ་སློབ་མང་བ་བདེན་པ་ཉིད།།

སེམས་ཅན་མོས་པ་མི་འདྲ་སྣ་ཚོགས་ཕྱིར།།

རྒྱལ་བ་ཡིས་ཀྱང་མགུ་བར་མི་ནུས་ན།།

རང་རང་ལྟ་བས་གཞན་ལ་སྨོད་པ་ནི།།

ཞིབ་ཏུ་བསམས་ན་ཡ་མཚན་ཆུང་ངུའང་མེད།།

གལ་ཏེ་ཚུལ་མ་ཤེས་པར་སྨོད་ན་ནི།།

དྲང་བོའི་ལམ་ནས་ལེགས་པར་ངོ་སྤྲད་ཆོག།

འོན་ཀྱང་ཕྲག་དོག་ངན་སེམས་ཅན་རྣམས་ལ།།

གནས་ལུགས་བཤད་ཀྱང་གནས་སུ་མཐོང་བ་དཀའ།།

འཇིགས་མེད་སྙིང་སྟོབས་རྫོགས་པའི་ཆོས་གྲོགས་དེས།།

རང་རིགས་ལ་རྒྱའི་རྒྱལ་མཚན་མཐོར་བསྒྲེངས་པས།།

བོད་ལ་དགའ་བའི་བོད་པ་མང་བོའི་ལྕེ།།

བསྟོད་ལ་བྲེལ་བའང་དོན་དང་མཐུན་པ་ཉིད།།

སྙིང་སྟོབས་ཆེ་ཡང་སྐུ་ཡི་བདེ་ཐང་དགོས།།

ལ་རྒྱ་ཡོད་ཀྱང་གཞན་གྱི་གཡོ་ལ་འཛེམས།།

གླིང་འདིའི་སྲོལ་བཟང་ཡུན་དུ་གནས་དགོས་ན།།

ཁྱེད་ཀྱི་བདེ་ཐང་གཙོ་ཞེས་སྙིང་ནས་ཞུ།།

བཤད་ན་སྨྲ་ལྕེ་བདེ་བས་ཀུན་གྱིས་བསྟོད།།

བྲིས་ན་སྙན་རྩོམ་ལེགས་པས་ཀུན་ཡིད་འགུག།

ཅི་ཞིག་བྱུང་ཡང་དད་པ་མི་འགྱུར་བའི།།

ལྡོང་རིགས་་ཡོན་ཏན་རྒྱ་མཚོ་བདེ་ལགས་སམ།།

དེང་སྐབས་ཁྱོད་ཀྱི་གྲགས་སྙན་ལྷ་ཡི་རྔ།།

འཛམ་གླིང་དབྱིག་འཛིན་སྒེག་མོས་དབྱངས་སུ་གྱེར།།

འོན་ཀྱང་ཡུན་རིང་བསྐྱངས་པའི་ཤེས་རིག་གླིང་།།

ནམ་ཡང་མ་བརྗེད་ནམ་རྒྱུན་བཞུགས་པ་བསྔགས།།

ཁྱོད་ནི་བདག་ཡིད་མགུ་བའི་སློབ་མ་དང་།།

དེ་ལས་ཀྱང་ནི་ཡུན་རིང་འདྲིས་པའི་གྲོགས།།

ཉིད་ཕྱིར་ཁྱོད་ལུས་བདེ་བས་ཕོངས་པ་ཡང་།།

བདག་གི་སེམས་ལ་ངེས་པར་ནད་དུ་ཆེ།།

བུ་སློབ་མང་བོའི་དབུས་ན་བརྗིད་ཀྱང་རུང་།།

ཆེ་ཆེ་མང་བོའི་དབུ་ཡིས་བཀུར་ཀྱང་ཆོག།

བདག་གི་སེམས་ན་ད་དུང་སློབ་མ་དང་།།

ཆོས་ཀྱི་གྲོགས་ཕྱིར་སྙིང་གཏམ་འཛེམས་མེད་ཡིན།།

སྐབས་འགར་སྐྱོན་གྱིས་བཟུང་སྟེ་བསྡིགས་ཀྱང་སྲིད།།

ལ་ལར་ཡོན་ཏན་བརྗོད་ནས་བསྟོད་ཀྱང་སྲིད།།

གང་ལྟར་དུང་ཞེན་ཟབ་མོའི་ཀློང་རིམ་ནས།།

འོངས་པས་ཐུགས་ལ་འགལ་བ་མེད་པར་མཛོད།།

གཞུང་ལ་མཁས་ཀྱང་མཁས་ཉམས་མི་སྟོན་ཞིང་།།

དགེ་བཤེས་ཡིན་ཡང་ང་རྒྱལ་མི་བྱེད་ལ།།

གཞན་སྐྱོན་མི་གླེང་རང་རྒྱུད་གཏན་འབེབས་པའི།།

རྭ་རྒྱ་འོད་ཟེར་བཟང་བོའང་བདེ་ལགས་སམ།།

ཡ་རབས་ཚུལ་འཆང་གཅོད་པ་ཡབ་ཡུམ་དང་།།

ཕན་སེམས་ཆེ་བ་བློ་ཉི་བློ་བདེ་དང་།།

རྩེད་ལ་དགའ་ཡང་བསམ་པ་རྣམ་དག་པའི།།

བྲག་དམར་བཀྲ་ཤིས་རྣམས་ཀྱང་བདེ་ལགས་སམ།།

དཀའ་སྡུག་ཁྱད་དུ་བསད་ནས་སློབ་གྲྭའི་ལས།།

སྣ་ཚོགས་གུས་པས་ལེན་པ་དར་རྒྱས་དང་།།

འཕྲིན་ལས་ཕུན་ཚོགས་རྣམས་ཀྱང་བདེ་ལགས་སམ།།

ཡོན་ཏན་ཡོད་ཀྱང་ངོམ་ལ་མི་དགའ་ཞིང་།།

བྱ་བར་འབད་ཀྱང་བྱས་རྗེས་མི་རྩོད་པའི།།

བཟོད་པ་བཟང་བོ་ཀརྨ་ལམ་བཟང་གཉིས།།

ལས་འཁུར་ལྕི་བས་ངལ་བར་མ་གྱུར་ཏམ།།

རྣམ་དཔྱོད་ལྡན་ཞིང་དེ་ལས་སྨྲ་ལྕེ་ཅན།།

རྐང་ཚ་འཕྲིན་ལས་གཞན་ཡང་གཞུང་དྲང་བའི།།

གཙུག་ཕུད་ཤེས་རབ་སོགས་ཀྱང་བདེ་ལགས་སམ།།

ད་དུང་སློབ་གྲྭའི་དར་རྒུད་སྙིང་དབུས་སུ།།

དམ་དུ་བཅིངས་པ་པད་མ་མཁའ་འགྲོ་དང་།།

པད་མ་དོན་གྲུབ་རྔ་དར་འཕྲིན་རྣམ་དང་།།

ཨ་མཆོག་མགོན་པོ་སྐྱབས་སོགས་བདེ་ལགས་སམ།།

དབྱིན་སྐད་དབྱངས་སུ་འགུགས་ལ་ཐོགས་མེད་པའི།།

བསམ་འཕེལ་རྡོ་རྗེ་རྡོ་སྦིས་བློ་གྲོས་དང་།།

ཙོང་ཁ་རྒྱལ་སྲས་སོགས་ཀྱང་བདེ་ལགས་སམ།།

སེམས་རྩ་དཀར་ཡང་ཁ་ཚིག་རྩུབ་མོ་དང་།།

ནད་ཀྱིས་མནར་ཡང་ནམ་ཡང་མི་ཁོམ་ཞིང་།།

ན་ཚོད་གཞོན་ཡང་གྲགས་པ་ཆེས་འབར་བའི།།

གྱི་ལིང་འཇིགས་མེད་ཉེ་ཆར་ཇི་འདྲ་འདུག །

རིག་པ་རྒོད་ཀྱང་སྤྱོད་པ་ལྷོད་ལ་བབས།།

ལོ་ན་ཆུང་ཡང་རྒན་པོའི་བརྟུལ་ཞུགས་འཛིན།།

རྩོམ་ལ་དགའ་ཡང་དད་པ་མི་འགྱུར་བའི།།

བླ་ནག་སྐལ་ལྡན་བདེ་བར་ཡོད་ལས་ཆེ།།

ཅི་ལ་ཐུག་ཀྱང་སློབ་གླིང་འདི་ཡི་ཆེད།།

རང་ནུས་འདོན་ལ་དཔའ་བའི་གུ་རུ་དང་།།

གྲངས་རིག་རྩིས་གཞུང་ཐང་མར་བརྡལ་བ་ཡི།།

འབྲུག་རྩེ་རྣམས་ཀྱང་སྔར་བཞིན་ཡོད་ལགས་སམ།།

སྐད་གཉིས་སྨྲ་བར་དབང་འབྱོར་དོན་གྲུབ་རྒྱལ།།

ལས་ལ་བརྩོན་ལྡན་བྱང་ཆུབ་ལམ་བཟང་དང་།།

ངང་རྒྱུད་དྲང་བ་ཀླུ་མཚོ་སྒྲོལ་མ་མཚོ།།

སོགས་ཀྱང་ཤེས་རིག་གླིང་ན་ཡོད་ལགས་སམ།།

དབུས་གཙང་ཆོས་ཀྱི་ཞིང་ནས་སྐྱེས་ན་ཡང་།།

སེམས་པ་དཀར་བོ་ཨ་མདོའི་ཡུལ་ལ་འཁོར།།

ལྷ་སའི་བུ་མོ་ཨ་མདོའི་མགྲོན་པོ་སྟེ།།

བསོད་ནམས་ཆོས་སྒྲོན་ད་དུང་ཡོད་ལགས་སམ།།

འདིས་མཚོན་མིང་ནས་བཟུང་དང་མ་བཟུང་བའི།།

གླིང་འདིའི་དགེ་རྒན་ལས་བཟོ་རྒན་གཞོན་ཀུན།།

སེམས་དང་བསམ་པ་གཙང་མས་སློབ་གླིང་ཆེད།།

རིང་ནས་འབད་པའི་བྱས་རྗེས་སུ་ཡིས་བསུབ།།

གཞན་གྱིས་སྨད་ཀྱང་བདག་གིས་ཁྱེད་རྣམས་བསྟོད།།

གཞན་གྱིས་བརྗེད་ཀྱང་བདག་གིས་བརྗེད་མི་སྲིད།།

རང་གི་མི་ཚེ་རང་རིགས་ལ་རྒྱའི་ཆེད།།

བསྟིམས་ལ་དཔའ་བ་ཁྱེད་རྣམས་སྙིང་ནས་བསྟོད།།

བདག་ལ་བྱས་རྗེས་འདི་ཞེས་མེད་ན་ཡང་།།

གླིང་འདིའི་དར་རྒུད་སེམས་ནས་ཡལ་མ་མྱོང་།།

རྔུལ་ཆུ་བསགས་པ་མིག་གིས་མི་མཐོང་ཡང་།།

བཞག་པའི་རྐང་རྗེས་རྨ་འགྲམ་ས་ལ་འཐིམས།།

ལོ་ངོ་ཉི་ཤུར་ལང་ཚོ་འདི་ནས་ཟད།།

ལུས་ཀྱི་བདེ་ཐང་འདི་ཡི་ཆེད་དུ་བོར།།

ཐོབ་འོས་ཐོབ་ཐང་གླིང་འདིའི་དོན་དུ་བཞག།

གལ་ཏེ་ཆོས་བརྒྱད་མིན་ན་འགྱོད་པ་ཆུང་།།

འབྱུང་བཞིའི་ལུས་འདི་ཅུང་ཟད་མི་བདེ་ཞིང་།།

བྱ་བ་གཞན་ཡང་ཅུང་ཞིག་བསྒྲུབ་དགོས་པས།།

རེ་ཞིག་གདོས་བཅས་ལུས་འདི་་སློབ་གླིང་དུ།།

མ་ཐོན་ན་ཡང་སེམས་པ་སྔར་ནས་འབྱོར།།

གངས་རིའི་གཟི་མདངས་མ་ཉམས་དེ་ན་ཡོད།།

གཞོན་སྐྱེས་མང་བོའི་རེ་བ་དེ་ན་ཡོད།།

དེ་ཕྱིར་དེ་ཡི་བསྟན་པའི་གདུགས་དཀར་ཆེ།།

འདེགས་པའི་དཔུང་བ་མ་ལྷོད་བུ་སློབ་རྣམས།།

ནང་ནས་མཐུན་ན་གཞན་གྱི་དབྱེན་དཀྲུགས་ཀུན།།

རྡོ་རྗེ་བྲག་ལ་ཤིང་གི་ཕུར་བ་བཞིན།།

གནོད་པར་མི་འགྱུར་དེ་ཕྱིར་ཁྱེད་ཅག་རྣམས།།

མཐུན་སྒྲིལ་ཨ་ལོང་མ་ཞིག་བུ་སློབ་རྣམས།།

དགེ་རྒན་རྣམས་ཀྱིས་སློབ་མར་བྱམས་སྐྱོང་བྱོས།།

སློབ་མ་རྣམས་ཀྱིས་དགེ་རྒན་གུས་བས་བཀུར།།

ཀུན་ཀྱང་གངས་རིའི་ལ་རྒྱ་མ་ལྷོད་པར།།

སྐྱེ་འགྲོ་སྤྱི་ཡི་ཕན་བདེ་སྒྲུབ་འཚལ་ལོ།།

དེ་ལྟར་བྱོས་དང་བདག་ཀྱང་མི་རིང་བར།།

འོང་ངོ་འཇོན་ནུས་མེད་ཀྱང་རེ་ལྡན་འགས།།

རེ་བ་མི་གཏོང་ཙམ་དང་སློབ་གསོ་ཡི།།

ལས་དོན་སེམས་ན་ཡོད་པ་མཚོན་བྱེད་ཙམ།།

དེ་ལྟར་སྙིང་གཏམ་སྙིང་གི་འོ་མཚོ་ལས།།

བྱུང་བའི་འཕྲིན་ཡིག་འཕྲལ་མར་བྲིས་པ་འདི།།

བླ་བྲང་བཀྲ་ཤིས་འཁྱིལ་ནས་དགེ་སྦྱོང་བ།།

ཚུལ་ཁྲིམས་རྒྱ་མཚོས་ཤེས་རིག་གླིང་ལ་སྤྲིངས།།

ཞེས་༢༠༡༨ལོའི་ཟླ་༤ཚེས་༦ཉིན།


དྲ་རྒྱ་གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ། རྩོམ་སྒྲིག་པ། འོད་ཟེར་བཟང་བོ། སྦྲ་ནག་འཇིགས་མེད་རྡོ་རྗེ། འབའ་སྣང་གྲོལ། བན་ཤུལ་འཇམ་དབྱངས།
འདྲེན་བཀོལ:
61.4K

  དཔྱད་གཏམ ( 2 )ཡོད།
དཔྱད་གཏམ་སྤེལ་ས།
སྤེལ་མཁན། བཤེར་གྲངས། he6k བཤེར་གྲངས་ཁ་སྐོང་བྱོས།ཡིག་འབྲི་བཞི་ལས་མང་མི་རུང་།ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་།ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།      
 
  གངས་ལྗོངས་ཤེས་རིག་ནོར་བུའི་སློབ་གླིང་གི་དགེ་སློབ་རྣམས་ལ་སྤྲིངས་པ་སྙིང་གཏམ་སྙིང་གི་རླབས་འཕྲེང་།   སྤེལ་མཁན།: ཁྲིཿསྐར་མདའ། སྤེལ་དུས:2018/5/21
སློབ་དཔོན་དམ་པ་༧བཛྲ་ཚུལ་ཁྲིམས་ཚང་གི་ལུས་ཕུང་བདེ་ཐང་ཡོང་བར་ཤོག ཁྱེད་ནི་ངེད་ཁ་བ་ཅན་གྱི་མུན་སེལ་སྒྲོན་མེ་དེ་ཡིན་ལགས།
  གངས་ལྗོངས་ཤེས་རིག་ནོར་བུའི་སློབ་གླིང་གི་དགེ་སློབ་རྣམས་ལ་སྤྲིངས་པ་སྙིང་གཏམ་སྙིང་གི་རླབས་འཕྲེང་།   སྤེལ་མཁན།:  སྤེལ་དུས:2018/5/21
གངས་ལྗོངས་ཤེས་རིག་ནོར་བུའི་སློབ་གླིང་གི་དགེ་སློབ་ཡོངས་ལ་མངོན་པར་བསྟོད་དོ།འགྲོ་དོན་མཁའ་དང་མཉམ་པར་ཤོག།མཚན་སྙན་སྲིད་རྩེར་བསྒྲེངས་གྱུར་ཅིག།
  པར་ངོས1/1 པར་ཡོད།
ལྟ་ཀློག་གྲངས་ཀ
5865699
 
འབྲེལ་གཏུག་བྱ་ཡུལ།    ཁ་པར།  15283703999    E-mail:www.jmjzjy@126.com
པར་དབང་རྭ་རྒྱ་ཤེས་རིག་ནོར་བུའི་སློབ་གླིང་ལ་དབང་།
网站备案号:青ICP备15000002号 青公网安备 63262102000011号