ཕྱུག་འགྱུར་ལམ་བཟང་དུ་བསྐྱོད་པའི་གྲྭ་རྐྱང་ཞིག
  ༄༅། །ངེད་དྲ་བར་ཕེབས་པར་དགའ་བསུ་ཞུ། དེ་རིང་ནི་སྤྱི་ལོ 2019 ལོའི་ཟླ 11 ཚེས 18 རེས་གཟའ་ཟླ་བ་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། འདི་ནས་ང་དང་གླེང་མོལ་བྱ།
གཙོ་ངོས།
སློབ་གསོ།
ཆོས་ལུགས།
ཀུན་འདུས།
རྩོམ་རིག
དམངས་སྲོལ།
རྒྱུན་ཤེས།
ལོ་རྒྱུས།
མི་སྣ།
ཐོན་མི།
སྐད་འཇོག་ས།
ཕྱོགས་སྟོན། གཙོ་ངོས།» ཀུན་འདུས།» བོད་ཁུལ་གྱི་དཔལ་འབྱོར། »ཕྱུག་འགྱུར་ལམ་བཟང་དུ་བསྐྱོད་པའི་གྲྭ་རྐྱང་ཞིག
ཕྱུག་འགྱུར་ལམ་བཟང་དུ་བསྐྱོད་པའི་གྲྭ་རྐྱང་ཞིག
རྩོམ་སྒྲིག་པ།  བན་ཤུལ་འཇམ་དབྱངས། སྤེལ་དུས 2018-04-05ལྟ་ཀློག (4322)རྩོམ་ཁུངས: ངེད་དྲ་བ།པར་འདེབ།

           ཀྲུང་དབྱང་བོད་སྐད་རླུང་འཕྲིན་གྱི་བཅར་འདྲི་ལེའུ་ཚན༼ གཞོན་ནུའི་ཕྱུག་འགྱུར་ལམ་བཟང་ ༽ དུ་བསྐྱོད་པའི་གྲྭ་རྐྱང་ཞིག

གསར་འགོད་པ། ལྷ་སྟག་འཚོ།

    རེད། གྲོགས་པོ་ལྷན་རྒྱས། དེ་རིང་གི་ལེའུ་ཚན་ནང་ཁྱེད་ཅག་ལ་མི་བུ་ལྷག་བསམ་ཅན་ཞིག་གིས་རང་གི་ཕ་ཡུལ་གྱི་དཔལ་འབྱོར་དང་སློབ་གསོ་སོགས་རྗེས་ལུས་ཀྱི་རྣམ་པ་དེ་རང་ནུས་གང་ཡོད་ཀྱིས་བརྒྱུད་ཆེད་ཚོང་ལས་ཀྱི་ལམ་ཁར་ཕྱོགས་པའི་བརྒྱུད་རིམ་ཁ་བརྡ་བྱ་རྒྱུ་ཡིན་པས་ཁྱེད་ཚོས་ཐུགས་ལྷོད་ལྷོད་ཀྱིས་གསན་རོགས།

གསར་འགོད་པ།

རེད། ཨ་ཁུ་བདེ་མོ།

དཔའ་ལུང་བ་ཤེས་རབ་རྒྱ་མཚོ།

བདེ་མོ།

གསར་འགོད་པ།

དེ་ན་ཨ་ཁུའི་ཐོག་མར་ང་ཚོའི་རླུང་འཕྲིན་དང་དྲ་བའི་སྒང་ན་ད་ལྟ་ལེའུ་ཚན་འདི་ལ་གསན་བཞིན་པའི་གྲོགས་པོ་ཡོངས་ལ་མཚམས་འདྲི་བཀྲ་ཤིས་ཤིག་དང་ཞོར་ནས་རང་ཉིད་ངོ་སྤྲོད་ཐུང་ཐུང་ཞིག་གནང་ན་ཆི་མོ་རེད།

དཔའ་ལུང་བ་ཤེས་རབ་རྒྱ་མཚོ།

རེད། ཐོག་མར་ངས་ཀྲུང་དབྱང་བོད་སྐད་རླུང་འཕྲིན་གྱི་མདོ་འཛིན་པ་དང་འགོ་ཁྲིད་ཡོངས་ལ་བཀྲ་ཤིས་བདེ་ལེགས་ཞུས་པ་ཡིན། ང་རང་ཉིད་ཡིན་ན་མཚོ་ཤར་ས་ཁུལ་དཔའ་ལུང་རྫོང་གི་ལྷོ་ཕྱོགས་སུ་ཡོད་པའི་ཁ་སྒང་ས་ཆ་ནས་སྐྱེས་ནི་ཡིན། རང་ཉིད་ཡིན་ན་ཆུང་དུས་སློབ་གྲྭ་འགྲོ་རྒྱུར་གོ་སྐབས་མ་བྱུང་བའི་མི་ཞིག་ཡིན། ཆུང་དུས་ནས་དགོན་པ་ཆུང་ཆུང་ཞིག་ནས་གྲྭ་བ་བྱས་ཏེ་འདོན་རྟ་དབྱངས་སོགས་བསླབས་ཏེ་ལག་ཆགས་པ་དེ་འདྲ་ཞིག་ཡིན། མིང་ལ་ཤེས་རབ་རྒྱ་མཚོ་ཟེར།

གསར་འགོད་པ།

རེད་རེད། ཨ་ཁུ་ཤེས་རབ་རྒྱ་མཚོ། ངས་བསམ་ན་བོད་ཁུལ་གྱི་མི་མང་བ་ཞིག་གིས་གངས་ལྗོངས་དགའ་ཡ་རྟགས་ཅན་གྱི་བོད་ལྭ་འདི་ཤེས་རྒྱུ་རེད་བསམ། རྒྱུ་མཚན་ཡིན་ན་དགའ་ཡ་རྟགས་ཅན་གྱི་བོད་ལྭ་འདི་ང་ཚོའི་བོད་ཁུལ་གྱི་བོད་ལྭ་རྟགས་ཅན་གྱི་ཐོག་མ་རེད། དེ་ན་ཨ་ཁུས་དེང་ཐོག་གངས་ལྗོངས་དགའ་ཡ་ཞེས་པའི་བཟོ་གྲྭ་འདི་བསམ་བློའི་རྨང་གཞི་དེ་གང་ནས་བྱུང་བ་ཡིན།

དཔའ་ལུང་བ་ཤེས་རབ་རྒྱ་མཚོ།

སློབ་གྲྭ་ཆེན་མོ་སྟེ་གངས་ལྗོངས་ཤེས་རིག་ནོར་བུའི་སློབ་གླིང་ཞེས་པ་འདི་རླུང་བརྙན་འཕྲིན་ནས་བསྒྲགས་པ་དེ་ཐོས་པས་གོ་དྲུག་ལོར་རང་ཉིད་རྭ་རྒྱ་ཤེས་རིག་ནོར་བུའི་སློབ་གྲྭ་དེར་ཞུགས། ཞུགས་རྗེས་དགེ་རྒན་རྣམ་པའི་བཀའ་དྲིན་དང་ཐུགས་རྗེའི་འོག་ནས་རང་ཉིད་ཀྱིས་བོད་ཡིན་ཡིན་ན་འདྲ། རྒྱ་ཡིག་ཡིན་ན་འདྲ་དེ་འདྲ་བསླབས་རྒྱུའི་གོ་སྐབས་བྱུང་། དེ་ནས་ཕྱིར་འཁོར་ཏེ་ཕ་ཡུལ་ལ་བལྟས་ན། སྔར་བཞིན་ཕ་ཡུལ་གྱི་རྣམ་པར་འགྱུར་ལྡོག་ཅི་ཡང་བྱུང་མེད་པ་དེ་འདྲ་རེད། དེ་ཡིན་ན་ཕྱིར་ཕ་ཡུལ་ལ་ལོག་ཏེ་སློབ་གྲྭ་བསྒྲུབས་རྒྱུའི་འདུན་པ་སྐྱེས། དེའི་རྗེས་དགེ་རྒན་དག་ལ་ཡར་ཞུ་དང་སློབ་གྲོགས་དག་ལ་གྲོས་སྡུར། དགོན་པ་དང་སྡེ་མི་དག་ལ་གྲོས་མོལ་བརྒྱུད་ས་ཁུལ་དེ་ནས་སློབ་གྲྭ་ཆུང་ཆུང་ཞིག མིང་ལ་གངས་ལྗོངས་མུན་སེལ་སྣང་བྱིན་སློབ་གྲྭ་ཞེས་བསྒྲུབས་ཏེ་ཡོང་བ་ཡིན། འདི་ལ་དཀའ་ཁག་རབ་དང་རིམ་པ་མང་བོ་ཞིག་ཡོད་ཀྱང་དཔལ་འབྱོར་གྱི་དཀའ་ཁག་དེ་ལས་ཀྱང་དཀའ་ཁག་ཆེན་པོ་ཞིག་ཡིན་པས་གངས་ལྗོངས་དགའ་ཡ་བཟོ་གྲྭ་འདི་བཙུགས་པ་ཡིན། འདི་འཛུག་པའི་སྐབས་དེར་འདང་མང་བོ་བརྒྱབ་པ་ཡིན། གཅིག་ནི། རང་གི་སློབ་གྲྭ་འདི་ཁ་གསོ་རྒྱུའི་ཆེད་དུ་དཔལ་འབྱོར་སྒྲུབ་པ་དེ་ཡིན། གཉིས་སུ། མི་རིགས་ཤིག་ཡིན་ན་ཡུལ་སྲོལ་གོམས་གཤིས། སྐད་དང་ཡི་གེ་འདིའི་སྟེང་ནས་འགྲོ་ཡི་འདུག དེ་ཡིན་ན་ང་ཚོའི་བོད་ལྭ་འདི་ཡང་གོན་མཁན་ཇེ་ཉུང་ནས་ཇེ་ཉུང་དུ་འགྲོ་བཞིན་འདུག ཇེ་ཉུང་འགྲོ་བའི་རྩ་བ་གང་ལ་ཐུག་ཡོད་དམ་ཞེ་ན། བོད་ལྭའི་རིན་ཐང་འདི་ཉིད་ཅུང་ཙམ་ཉམས་དམས་སུ་འགྲོ་བ་དེ་རེད། བོད་ལྭ་ཞིག་ཚོང་ར་ཞིག་ཏུ་ཉོ་རྒྱུ་ཡོད་པའི་དབང་དུ་བཏང་ཡང་། རིན་གོང་སྒོར་བརྒྱའི་ཡན་ཆོད་བཙལ་ན་དཀོན་པོ་རེད། སྤྱིའི་ལྭ་བ་དང་རྒྱའི་ལྭ་བརིན་ཐང་ཅན། རས་གཅིག་མཚུངས་ཡིན་པ། ཡིན་ཡང་རིན་གོང་ལྡབ་འགྱུར་དང་། སྤྱིའི་ལྭ་བ་མཚོན་ན་སྒོར་ཁྲི་ཅན་གྱི་ལྭ་བ་ཡང་ཡོད་ཀི ཆེད་དུ་ང་རང་ཚོང་རར་སོང་ནས་རྒྱུས་ལོན་བྱེད་པ་ཡིན། བོད་ལྭ་མཚོན་ན་དེ་འདྲའི་རིན་ཐང་ཅན་གྱི་ལྭ་བ་དཀོན་པོ་རེད། ཚད་ལྡན་གྱོན་ཆས་ཐོག་མ། །གངས་ལྗོངས་དགའ་ཡ་རྟགས་ཅན། ། ཞེས་སྡོམ་ཚིག་ཅིག་བཀོད། ཚད་ལྡན་གང་གི་སྟེང་ནས་ཡིན་ཟེར་ན། རས་ཀྱི་སྟེང་ནས་ཚད་ལྡན། འཚེམ་བཟོའི་སྟེང་ནས་ཚད་ལྡན། རིན་གོང་སྟེང་ནས་ཚད་ལྡན། རྟགས་ཀྱི་སྟེང་ནས་ཚད་ལྡན། འདི་ཚང་མ་བོད་གངས་ཅན་གྱི་ཚོང་ར་ཅན་ཞིག་ཏུ་བསྒྱུར་ཐུབ་ན་ཅི་མ་རུང་སྙམ་པར་རང་གིས་སྨོན་ལམ་དང་རང་གི་མོས་པ་ལ་བརྟེན་ནས་ཉིས་སྟོང་དགུ་ནས་ཉིས་སྟོང་བཅུ་གཅིག་གི་བར་དེར་སྤྱི་ཚོགས་སྟེང་ནས་དགའ་ཡ་རྟགས་ཅན་གྱི་བོད་ལྭ་འདི་ཁས་བླངས་པ་དེ་ལྟ་བུ་རེད།

གསར་འགོད་པ།

ཨོ་རེད་རེད། ཨ་ཁུ། དེང་ཐོག་བཟོ་གྲྭ་འདི་འཛུགས་དུས་འདི་ལ་མ་དངུལ་ག་འདྲ་བཏང་ཡོད།

དཔའ་ལུང་བ་ཤེས་རབ་རྒྱ་མཚོ།

མ་དངུལ་ཆེན་པོ་བཏང་ཡོད་ནི་མ་རེད། སློབ་གྲྭ་དེ་ཉིས་སྟོང་ལྔ་ནས་བཟུང་བསྐྱངས་ཡོང་ནི་རེད། བསྐྱངས་ནས་ཡོང་དུས་དགེ་རྒན་གྱི་ཟླ་ཕོག སློབ་མའི་འཚོ་བ། ཡར་མར་གྱི་འགྲོ་སོང་སོགས་དཀའ་ངལ་ཡོད་པའི་རྒྱུ་མཚན་གྱིས་དཀའ་ངལ་དེ་ཐག་གཅོད་དགོས་འདུག ཐག་གཅོད་དགོས་ན་རང་ཉིད་ཀྱིས་ཁེ་ལས་ཤིག་དང་རང་ཉིད་ཀྱིས་ཚོང་ཞིག་བརྒྱབ་ནས་ཡོང་སྒོ་འཚོལ་ས་ཞིག་མེད་སོང་ན་སློབ་གྲྭ་འདི་ཡུན་རིང་དུ་སྐྱོང་དགོས་ན་དཀའ་རྒྱུ་རེད། རྒྱུན་དུ་བླ་མ་ཞིག་དང་ཕྱུག་པོ་ཞིག་འཚོལ་བ། སྦྱིན་བདག་ཅིག་གང་ན་ཡོད་ན་དེར་རྒྱུགས་ཏེ་ངོ་དགའ་བྱེད་ནི་རེད། དེ་ཧ་ཅང་དཀའ་མོ་རེད། ཐབས་སྡུག་གི་བྱ་བ་རེད། དེ་ཡིན་ན་དགའ་ཡ་འདི་ལས་པའམ་ཚད་ལྡན་གྱི་གྱོན་ཆས་ཤིག་ལས་ན་ཡང་དཔལ་འབྱོར་གྱི་དཀའ་ངལ་ཡོད་ཀི ཕ་ཡུལ་ན་གྲོགས་པོ་ཞིག་ཡོད། དེའི་ལག་ནས་སྒོར་ཁྲི་གཅིག་བསྐྱིས། ང་རང་སྤུན་ཆུང་བ་ཞིག་ཡོད་ནི་རེད། དེའི་མིང་ལ་དོན་གྲུབ་ཟེར། སྐབས་དེར་ང་རང་རླངས་འཁོར་མེད། ངེད་གཉིས་བར་ན་འཕྲུལ་རྟ་གཅིག་ཡོད། འཕྲུལ་རྟ་དེ་ཞོན་ནས་ཞོལ་གྱི་ཀ་མདོར་སོང་བ་ཡིན། དེ་ནས་ལོ་ལྔ་ལ་སྒོར་ཁྲི་གཅིག་བྱིན་ཏེ་ཁང་སྟོང་ཞིག་གླས་ནི་ཡིན། ཁང་བར་མཛེས་བཟོ་ཡང་ངེད་གཉིས་ཀྱིས་བྱས་ཏེ་གཙང་སྦྲ་བྱས་པ་ཡིན། དེ་ནས་བཟོ་འཁོར་གཉིས་ཉོས། གཞུང་ལས་ཁང་ཞིག་ལས་ཏེ་དེར་གློག་ཀླད་གཅིག་ཉོས་ཏེ་ལས་ཀ་མགོ་བརྩམས་པ་ཡིན། སྐབས་དེར་བཟོ་བ་ཡང་ཡ་རྫི་རྫོང་ཐོག་ན་ཡོད་པའི་ལྕགས་ཐར་རྒྱལ་ཟེར་བའི་བཟའ་ཟླ་གཉིས་ཀ་ཡོང་སྟེ་ང་རང་རོགས་བྱེད་པ་དེ་འདྲ་ཡིན་པས་དགའ་ཡ་བཟོ་གྲྭ་དེ་འདྲའི་འོག་ནས་ལག་ཆགས་པ་ཞིག་ཡིན།

གསར་འགོད་པ། 

ཨོ་རེད་རེད། ལོ་དང་བོར་ཡོང་སྒོ་ཅི་འདྲ་ཡོད་ཀི

དཔའ་ལུང་བ་ཤེས་རབ་རྒྱ་མཚོ།

ཉིས་སྟོང་དགུ་ནས་མགོ་བཟུང་བ་དང་། ཉིས་སྟོང་བཅུ་ཐམ་པ། ཉིས་སྟོང་བཅུ་གཅིག་བར་ཡོང་སྒོ་ཟེར་རྒྱུ་མེད། ཟི་ལིང་འདི་ནས་རས་རེ་ཉོས། ང་རང་ཟི་ལིང་འདི་ནས་བསྡད་དེ་རས་རྨིད་འགའ་རེ་ཉོས་ཏེ་ཁོ་ཚོར་བསྐུར། བཟོ་གྲྭ་ནས་དེ་དག་བཟོས་ཏེ་ཡོང་བ་དེ་འདྲ་རེད། ཉིས་སྟོང་བཅུ་ཐམ་པའི་ལོ་མཇུག་དེར་སོག་རྫོང་དེ་ནས་རྡུང་ལེན་པའི་འགྲན་ཚོགས་ཤིག་འཚོགས་ནི་རེད། སྐབས་དེར་སོག་ཕྲུག་ཤེས་རབ་ཀྱིས་རྒྱབ་སྐྱོར་བྱེད་དེ་ཡོང་བ་ཡིན། དུས་དེར་ང་ཚོར་གོན་པ་སུམ་ཅུ་ཐམ་པ་འདྲ་ཞིག་ཡོད་ཀི དེ་འཁྱེར་ནས་དགོང་ཚོགས་དེ་ནས་ཁྱབ་བསྒྲགས་བྱས། ཉིས་སྟོང་བཅུ་གཅིག  བཅུ་གཉིས། བཅུ་གསུམ་ཡར་མར་འདི་ནས་དགའ་ཡ་བཟོ་གྲྭ་འདི་ཚོང་ར་ཅན་དུ་བསྒྱུར་ནས་མང་ཚོགས་ཡིན་ན་ཚང་མས་ཁས་བླངས་པས། ལོ་རེར་ཡོང་སྒོར་ཁྲི་ཉིས་བརྒྱ་དེ་འདྲ་ཡོད་རྒྱུ་རེད། དེ་ཡོད་ན་ན་རང་གི་འདང་རྒྱག་ཕྱོགས་བཟོ་གྲྭ་འདི་བསྒྲུབས་པའི་དམིགས་ཡུལ། ས་གནས་དེའི་སློབ་གསོ། ས་གནས་དེའི་བྱིས་པ་ཆུང་ཆུང་ཚོར་སློབ་གསོའི་གོ་སྐབས་བསྐྲུན་རྒྱུ་དེ་རེད། ང་ཚོའི་སློབ་གྲྭ་འདི་འདྲ་ཞིག་རེད། ངས་སློབ་གྲྭ་འདི་བཙུགས་པའི་སྐབས་དེར་བྱིས་པ་ཚོ་སློབ་གྲྭ་སྐྱེལ་རྒྱུའི་ལུགས་སྲོལ་དེ་མེད་ཀི བླ་མ་དང་སྦྱིན་བདག་དེ་འདྲ་འབྲེལ་བ་བྱས་ཏེ་གོན་པ་རྙིང་བ་རེ་བྱིན་ཏེ་ཁྱིམ་བདག་ཚོ་སློབ་གསོ་གཏོང་གི་རེ་བཅུག དེ་ནས་བཟུང་རིམ་གྱིས་སློབ་གྲྭ་འགྲོ་སྲོལ་ཆགས་སོང་། ཡང་གནད་འགག་ཅིག་ལ། ངའི་སློབ་གྲྭ་དེ་ནས་ལོ་དགུའི་འོས་འགན་སློབ་གསོ་ཐོབ་ཀྱང་། སྲིད་འབྱོར་རིག་གསུམ་་གང་གི་ཕྱོགས་ནས་རྗེས་ལུས་ཡིན་ནི་རེད། དེའི་ཕྱིར། སློབ་གྲྭ་ཆེན་མོར་འགྲོ་རྒྱུའི་མདུན་ལམ་བཀག་འཇོག་ནི་རེད། སློབ་གྲྭ་ཆེན་མོར་སུ་ཞིག་འགྲོ་ཐུབ་ན་འགྲོ་སོང་གང་ལ་གང་འཚམ་ཡོད་ཀི སློབ་ཆེན་གྱི་འགྲོ་སོང་དེ་ཐག་གཅོད་ཐབས་སུ་ཁྱིམ་བདག སློབ་མ། བཟོ་གྲྭ་གསུམ་གྱི་བར་དུ་གན་རྒྱ་ཡི་གེ་ཞིག་བྲིས་ནི་ཡིན། སློབ་གྲྭ་ཆེན་མོ་སུ་ཞིག་གིས་རྒྱུགས་འཕྲོད་སོང་ན་དགའ་ཡ་བཟོ་གྲྭས་འགྲོ་སོང་གི་འགན་ཁུར། ཕ་མར་ཅི་ཞིག་གི་འགན་ཁུར་ཡོད་ཅེ་ན། བྱིས་པའི་དུས་ཚོད་འཕྲོ་བརླག་ཏུ་མ་བཏང་བར་སློབ་གྲྭར་སྐྱེལ་རྒྱུའི་འགན་ཁུར། སློབ་མ་ཅི་ཞིག་གི་འགན་ཁུར། སློབ་གྲྭ་ཆེན་མོར་སོང་ནས་དུ་བ་འཐེན་པ། ཆང་འཐུང་བ། རྐྱལ་སྟོང་མི་བྱེད་པར་སློབ་སྦྱོང་ཡག་པ་ཞིག་བྱེད་རྒྱུའི་འགན་ཁུར་ཡོད་ནི་རེད། ངའི་བཟོ་གྲྭ་ཡིན་ན་སློབ་མ་དེར་སྦྱིན་བདག་བྱེད་རྒྱུའི་འགན་ཁུར་ཡོད་ནི་རེད། ངེད་གསུམ་པོའི་བར་ན་དེ་འདྲའི་གན་རྒྱ་ཡོད། ཁ་སང་དེ་རིང་ཡིན་ན་ཕལ་ཆེར་སློབ་མ་བཅོ་བརྒྱད་ལ་སློབ་གྲྭ་ཆེན་མོར་མུ་མཐུད་དུ་རོགས་སྐྱོར་བྱེད་ཀྱིན་ཡོད། མ་དངུལ་གཏོང་ས་གཅིག་དེ་རེད། གཉིས་ཡིན་ན་ཉིས་སྟོང་བཅུ་བཞི་ལོའི་སྐབས་འདིར་སྒོར་མོ་ཁྲི་ལྔ་བརྒྱ་དྲུག་བརྒྱ་དེ་འདྲ་བསགས་ཡོད། ང་ཚོའི་ཁ་སྒང་ས་ཆ་ཡིན་ན་ལམ་ཡིན་ན་ཆུ་ཡིན་ན་དཀའ་ངལ་ཡོད་ནི་དེ་མོ་རེད། ཐ་ན་མགྲོན་པོ་དང་འགོ་ཁྲིད་ཡིན་ན་ཐོན་རྒྱུར་དཀའ། ངའི་འབྲེལ་ཡོད་ལས་ཁུངས་སློབ་གསོ་ཅུའུ་རེད། སློབ་གྲྭ་ལོ་དགུ་བཅུ་ཐམ་པའི་རིང་ལ་སློབ་གསོ་ཅུའུ་ཅུའུ་ཀྲང་ཐོན་ཡོད་ནི་མ་རེད། རྒྱུ་མཚན་ཅུའུ་ཀྲང་སོགས་ཡོང་མ་འདོད་པ་དེ་མ་རེད། གཙོ་བོ་ལམ་གྱི་དཀའ་ངལ་གྱི་འོག་ནས་ཡིན། དབྱར་ཁ་ལྟ་བུར་མཚོན་ན། ཆར་བབས་བཞག་པ་ཡིན་ན་གནས་དེ་ནས་བསྡད་པ་ལས་འགྲོ་ཁག་པོ་ཡིན། མགོ་ནག་སྐྱིད་སྡུག་གནམ་གྱི་ལག་ཟེར་བ་ལྟར་ང་ཚོའི་ས་གནས་ངོ་མ་དེ་འདྲ་རེད། ས་བདེ་ས་དྲོད་ས་ལམ་བདེ་ས་དེ་འདྲ་ཞིག་ཏུ་སྤོར་དགོས་སྙམ་ནས་ཀ་མདོ་ས་ཆ་དེ་ནས་ས་མུའུ་སོ་གསུམ་ཅན་ཞིག་ཞིག་ཉོས་ཏེ་འཛུགས་སྐྲུན། དེར་སྒོར་ཁྲི་སྟོང་ཞིག་བཏང་། ཉིས་སྟོང་བཅོ་ལྔ་ལོར་སློབ་གྲྭ་དེར་གནས་སྤར། ད་ངས་དགའ་ཡ་བཟོ་གྲྭ་བསྒྲུབས་པའི་དམིགས་ཡུལ་ཡིན་ན་འདྲ། དགའ་ཡ་བཟོ་གྲྭའི་ཡོང་སྒོ་ཡིན་ན་འདྲ། ཆེས་རང་ཉིད་དུང་ས་དང་ཤུགས་རྒྱག་ས་དེ་ས་གནས་དེའི་རིག་གནས་སློབ་གསོའི་ཕྱོགས་དེ་རེད།

གསར་འགོད་པ།

རེད་རེད། ཨ་ཁུ་ཤེས་རབ། དེ་ཡིན་ན་དུས་ཚོད་མང་བ་མེད་ཀི། ལེའུ་ཚན་གྱི་མཇུག་མཐར། ཁྱོད་རང་ཉིད་ཡིན་ན་ལོ་ངོ་དུ་མའི་རིང་ཚོང་ལས་གཉེར་ཏེ་ཡོང་བས་ཉམས་མྱོང་མང་བ་ཡོད་ཀི ཉམས་མྱོང་ཡོད་པའི་སྟེང་ཁེ་ལས་དང་ཚོང་ལས་སོགས་གོམ་པ་སྤོ་བསམ་པའི་ན་གཞོན་ཚོར་ཚིག་འགའ་གསུང་ན།

དཔའ་ལུང་བ་ཤེས་རབ་རྒྱ་མཚོ།

ཨོ་རེད། དེ་ན་རང་ཉིད་ལ་ཉམས་མྱོང་ཆེན་པོ་ཡོད་ནི་མ་རེད་དེ་རང་གི་དྲན་ཚུལ་ཙམ་བཤད་ན། ཚོང་ལས་ཡིན་ན་འདྲ། རིག་གནས་ཀྱི་བྱ་བ་ཡིན་ན་འདྲ། གང་དང་གི་ཕྱོགས་ནས་གཙོ་བོ་མི་རིགས་ཀྱི་རིག་གནས་དང་འགལ་མི་ཉན་གི ང་ཚོར་ཡིན་ན་བོད་མི་རིགས་རེད། བོད་མི་རིགས་ཡིན་ན་ལས་རྒྱུ་འབྲས་ཁས་ལེན་ནི་དེ་འདྲ་རེད། ལས་རྒྱུ་འབྲས་དང་འགལ་བའི་ཚོང་ལས་ཡིན་ན་རྒྱུན་རིང་རྒྱུ་མ་རེད། ཚོང་ར་ཡང་ཡོད་པར་ཧ་ཅང་དཀའ་རྒྱུ་རེད། ཚོང་ལས་པ་ཡིན་ན་གཙོ་མཛད་སྤྱོད་པ་དང་ཚོང་རར་རྒྱུས་ལོན་ཡག་པ་བྱེད། ཚོང་ར་དེ་དང་བསྟུན་པའི་ཐོན་རྫས་གསར་བཏོད་རང་བཞིན་ཅན་ཞིག་ཐོན་སྐྱེད་བྱེད་དེ་ཁྲོམ་ར་ཅན་ཞིག་བསྒྱུར་རྒྱུ་དེ་ཧ་ཅང་གལ་ཆེན་པོ་རེད། ཚོང་རྫས་དེ་ཡིན་ཡང་གཅིག་མཚུངས་རེད། ཚད་ལྡན་དང་ཚད་ལྡན་མ་ཡིན་པ་ཟེར་བ་དེ། རང་ཉིད་མི་ཚད་ལྡན་ཡིན་ཡང་ཐོན་རྫས་ཚད་ལྡན་མ་ཡིན་པ་ཡིན་ན་ད་དུང་ཚོང་ར་ལག་ཏུ་རྙེད་རྒྱུ་དཀའ་མོ་རེད། དེའི་རྒྱུ་མཚན་གྱིས་མི་ཚད་ལྡན་ཡིན་པའི་སྟེང་ནས་ལག་ཏུ་ཐོན་པའི་ཐོན་རྫས་ཚད་ལྡན་ཅན་ཞིག ཚད་ལྡན་གཉིས་འཛོམས་ཡིན་པའི་སྟེང་ནས་ཚོང་ར་ཅན་དུ་བསྒྱུར། ཚད་ལྡན་ཅན་གྱི་ཁྱབ་བསྒྲགས་བྱས་པ་ན་ཚོང་ལས་ཀྱི་ལམཁ་ཡག་པ་ཞིག་ཏུ་འགྲོ་ཐུབ་བསམ་གི་ཡོད། དེར་ཤུགས་རྒྱག་པ་དང་སྤོབས་པ་ཡོད་རྒྱུ་དེ་བཤད་མ་དགོས་པ་དེ་རེད།

གསར་འགོད་པ།

རེད་རེད། ཨ་ཁུ་བཀའ་དྲིན་ཆེ། དེ་ན་མཇུག་མཐར་གངས་ལྗོངས་དགའ་ཡའི་ཚོང་གསར་ཁོར་སྲུང་ལྷ་དར་ཁྲོམ་བསྒྲགས་ཚོགས་འདུ་བདེ་བླགས་ངང་ལེགས་འགྲུབ་བྱུང་བར་ངས་འདི་ནས་བཀྲ་ཤིས་རྟེན་འབྲེལ་ཞུ་བ་དང་ཆབས་ཅིག་ཚོང་ལས་ཀྱི་ལམ་ཁ་སྔར་ལས་ཡངས་ཤིང་ཁྱེད་ཀྱི་ཕ་ཡུལ་དཔའ་ལུང་ས་ཆའི་སློབ་གསོ་གོང་ནས་གོང་དུ་འཕེལ་བར་བཀྲ་ཤིས་སྨོན་འདུན་ཞུ།

དཔའ་ལུང་བ་ཤེས་རབ་རྒྱ་མཚོ།

ཡ་ཡ། བཀའ་དྲིན་ཆེ།                                                        

ཕབ་བཤུ་བ་དང་མཁོ་སྤྲོད་པ།  གསར་འགོད་པ།  རྒྱ་འདུ་སངས་རྒྱས།


དྲ་རྒྱ་གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ། རྩོམ་སྒྲིག་པ། འོད་ཟེར་བཟང་བོ། སྦྲ་ནག་འཇིགས་མེད་རྡོ་རྗེ། འབའ་སྣང་གྲོལ། བན་ཤུལ་འཇམ་དབྱངས།
འདྲེན་བཀོལ:
61.4K

  དཔྱད་གཏམ ( 0 )ཡོད།
དཔྱད་གཏམ་སྤེལ་ས།
སྤེལ་མཁན། བཤེར་གྲངས། y5xb བཤེར་གྲངས་ཁ་སྐོང་བྱོས།ཡིག་འབྲི་བཞི་ལས་མང་མི་རུང་།ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་།ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།      
 
མིག་སྔར་འདི་རུ་དཔྱད་གཏམ་སྤེལ་མཁན་མ་བྱུང་།
ལྟ་ཀློག་གྲངས་ཀ
5931166
 
འབྲེལ་གཏུག་བྱ་ཡུལ།    ཁ་པར།  15283703999    E-mail:www.jmjzjy@126.com
པར་དབང་རྭ་རྒྱ་ཤེས་རིག་ནོར་བུའི་སློབ་གླིང་ལ་དབང་།
网站备案号:青ICP备15000002号 青公网安备 63262102000011号