ཚངས་ཐིག་ལ་རྨིད་གཅིག་ཙམ་ཡོད་པའི་ཤིང་ཟོམ་འདིའི་ནང་གི་ཉ་མོ་ཆུང་ཆུང་འདི་དག་ནི་དེ་འདྲའི་བག་ཕེབས་པ་ལ་ཨང་། ཟངས་ཐོམ་གྱིས་དཀྲུགས་ཀྱང་ཆུ་རིས་གང་ཡང་མེད་པར་སྣང་།

ཉ་མོ་འདི་དག་ངོ་མ་རེད་དམ། ཡང་བསྐྱར་ཞིབ་ཏུ་གཟིགས་དང་།

དེ་ནས་ཡང་བསྐྱར་ཤིང་ཚིལ་རིམ་པ་ཞིག་སྣོན་པ།

དལ་བུར་གཡོ་འགུལ་བཏང་ནས་ཤིང་ཚིལ་གྱིས་ཉ་གཤོག་ཆ་སྙོམས་པོར་བསྣུབས་པར་བྱེད་དགོས།

ད་གཟོད་གཞི་ནས་གསེར་ཉའི་གཟུགས་པོ་ཡོངས་བྲིས་ཆོག

ངོ་མཚར་བའི་སྐད་ཅིག་མ་འདིར། ཤིང་ཚིལ་རིམ་པ་རེ་རེའི་རྗེས་སུ་ཤིང་སྒྲོམ་དུ་ག་ལེར་གསོན་ཉམས་ལྡན་པའི་གསེར་ཉ་ཞིག་མངོན་སུམ་དུ་མིག་ལམ་ལ་སྣང་འོང་།

ཡང་དང་བསྐྱར་དུ་གཅིག་མཚུངས་ཀྱི་རིམ་པ་འདི་བརྒྱུད་དེ་ཉིན་འགའི་རྗེས་སུ།

མིག་གི་དབང་བོ་ཀུན་ནས་འཁྲུལ་བར་བྱེད་པའི་མཛེས་ཤིང་ཡིད་དུ་འོང་བའི་གསེར་ཉ་ཞིག་མངོན་འོངས་པ་དང་དེའི་མིང་ལ”རྨི་ལམ་དམར་བོ”ཟེར།

དབྱར་གཞུང་དེར་འདི་ལྟར་བྲིས་པའི་ཉ་མོ་རེ་རེ་ནི་ཁོ་རང་གི་སེམས་སུ་གསལ་ལ་མི་གསལ་བའི་མཛེས་སྡུག་ཅིག་ཡིན་པ་དང་དེ་ནི་སྐད་ཆས་ནམ་ཡང་བརྗོད་ཐབས་བྲལ། ཡིན་ནའང་དེ་ཉིད་དུས་ཚོད་དང་རྒྱུན་འཁྱོངས་ཀྱི་སྒོ་ནས་རི་མོར་བྲིས་ཡོད།

     ཉ་མོ་ཞིག་འབྲི་བར་མ་མཐའ་ཡང་ཤིང་ཚིལ་རིམ་པ་བཞི་ལྔ་ཙམ་དགོས་པ་དང་ཤིང་ཚིལ་རིམ་པ་ཞིག་སྐམ་པ་ལ་དུས་ཚོད་རིང་བོ་ཞིག་དགོས་ཏེ། ཤིང་ཚིལ་རིམ་པ་ཞིག་སྐམ་ཐག་ཆོད་པར་མ་མཐའང་ཉི་མ་གཉིས་དགོས། ཡིན་ནའང་ཁོ་རང་གིས་ནམ་ཡང་དུས་ཚོད་འདི་དག་ལ་ངང་སྒུག་བྱས་པ་རེད།

ཉ་མོ་རེ་རི་མོར་བྲིས་ཚར་རྗེས་ལེགས་འགྲུབ་ཐེངས་ཤིག་བྱུང་བ་དང་འདྲ་བ་དང་། ཉམས་མྱོང་ཇི་ཙམ་བསགས་པ་མང་ན་དེ་ཙམ་གྱིས་བརྩོན་སེམས་ལྡན་ཞིང་། ཧྲིན་ཁོ་ལུང་ཅེ་ནི་བྱིས་པ་དག་སྒྱུ་འཕྲུལ་གྱི་རྩེད་འཇོ་ལ་གཡེང་བ་དང་འདྲ་བར་ཤིང་ཚིལ་གྱི་རི་མོ་འདིས་ཀུན་ནས་བཟི་བར་བྱས།

        Keng Lyeབཤད་དོན། ལོ་ངོ4གོང་རོལ། ཁོའི་གྲོགས་པོ་ཞིག་གིས་ཁོ་རང་ལ་ཧྲིན་ཁོ་ལུང་ཅེའི་བརྩམས་ཆོས་ངོ་སྤྲོད་བྱས་པ་དེས་ཁོ་རང་གི་ཤིང་ཚིལ་རི་མོ་གསར་འབྲི་ཐད་ཉམས་མྱོང་ཕུན་སུམ་ཚོགས་པའི་བློ་སྒོ་ཕྱེས་ཡོད་ཟེར། ཡང་ཁོས་བསྟན་དོན། དུས་རྒྱུན་དྲྭ་གྲོགས་མང་བོ་ཞིག་གིས་ཁོ་རང་གི་བརྩམས་ཆོས་ལ་བལྟས་རྗེས་ཁོས་སྲོག་ཆགས་ལ་མནར་གཅོད་གཏོང་བཞིན་འདུག་ཅེས་སྐྱོན་བརྗོད་ཚ་ནན་བྱེད་པ་ནི་ངོ་མ་དགོད་བྲོ་ལ་ངུ་སྐྱེན་པ་ཞིག་གོ།།

ལོ་ངོ་བཅུ་གཉིས་ཡུན་ལ་གསེར་ཉ་རི་མོར་བྲིས་པ་ནི་ཧྲིན་ཁོ་ལུང་ཅེ་ལ་མཚོན་ན་པར་རིས་ཙམ་ཞིག་མ་ཡིན་པར་དེ་ནི་སྙན་ངག་ཅིག་ཏུའང་ཀུན་ནས་མཚུངས། ཉི་མ་རེ་རེ་བཞིན་རང་གི་ལས་ཤག་ནས་ཁོ་རང་བྱ་བར་བརྩོན་བཞིན་ཡོད་ལ། རྒྱབ་ཀྱི་གསེར་ཉ་དེས་ནི་སྔར་བཞིན་འཁྱུག་རྩལ་ངོམ་པ་དང་མཚམས་རེར་བསྡད་ཡོད་ཚེ་ཁོ་རང་ཁ་ཕར་བའི་སྐད་ཅིག་མ་དེར་ཁོ་རང་གི་མིག་ཞགས་དང་ཉ་མོའི་མིག་མདངས་གཉིས་གཅིག་ཏུ་འཁྱུད་སོང་།

ཉ་ཡི་དྲན་ཤེས་ནི་སྐར་ཆ་བདུན་གྱི་ཡུན་ཙམ་ཡིན་ནའང་འཁྱུག་འགྲོས་འདིས་ཧྲིན་ཁོར་སེམས་ཤུགས་ཐེངས་ག་ཚོད་སྤྲད་ཡོད་དམ། དོན་འདི་ཉ་མོས་ཅི་ཡང་མི་ཤེས་མོད། འོན་ཀྱང་ཁོ་བོས་མི་ཚེའི་འདུན་མ་རྙེད་ཟིན་ཏོ།།

གསར་འགྱུར་མཁོ་སྤྲོད་པ་དང་ཡིག་སྒྱུར་བ།  གསར་འགོད་པ། གསེར་ལག་འཇམ་དབྱངས་ཚུལ་ཁྲིམས།