མཛེས་སྤྲས་བོད་སྨན་གསར་གཏོད་མཁན་སྨན་པ་ཤེས་རབ་རྒྱ་མཚོ།

     དེ་ཡང་མཛེས་སྦྲས་བོད་སྨན་གསར་གཏོད་མཁན་སྨན་པ་ཤེས་རབ་རྒྱ་མཚོ་ནི་གངས་ལྗོངས་ཤེས་རིག་ནོར་བུའི་སློབ་གླིང་སོགས་མཐར་ཕྱིན་རྗེས་གཞུང་སྒེར་གྱི་སྨན་རམས་པ་དུ་མའི་ཞབས་རྡུལ་སྤྱི་བོས་བླངས་ཏེ་བོད་ཀྱི་གསོ་བ་རིག་པའི་གཞུང་ལ་འབད་བརྩོན་ལྷོད་མེད་བྱེད་མཁན་ཞིག་དང་། བོད་ཁུལ་གྱི་བོད་སྨན་ཁང་དུ་མའི་ནང་ནས་དངོས་སྦྱོང་དང་ལག་ལེན་ཉམས་མྱོང་གི་ཐད་ནས་དམངས་ཁྲོད་དུ་ཆེས་དགའ་བསུ་ཐོབ་བཞིན་པའི་སྨན་པ་དཀྱུས་མ་ཞིག་ཡིན་པར་མ་ཟད། རང་ཡུལ་དང་ས་ཕྱོགས་ངེས་མེད་ལ་དབུལ་སྐྱོར་དང་ཉམ་ཐག་གང་ཡོད་ལ་རོགས་རམ་ཅི་ཐུབ་བྱེད་པའི་ཁ་ཡོད་ལག་ཡོད་ཀྱི་གྲྭ་རྐྱང་དགེ་ལས་པ་ཞིག་ཀྱང་ཡིན།  ད་སྐབས་ཁོང་གིས་དུས་རབས་གསར་བའི་དགོས་མཁོ་དང་མཐུན་ཞིང་བོད་སྨན་ཁྲོམ་ར་ཅན་དུ་གཏོང་བར་ནུས་ཚོད་ཀྱིས་མཛེས་སྦྲས་བོད་སྨན་ཞིག་གསར་གཏོད་བྱས་ཡོད།

       དེ་ནི་བོད་ཀྱི་སྲོལ་རྒྱུན་གྱི་གསོ་བ་རིག་པའི་གཞུང་ལུགས་དང་ལག་ལེན་ཟུང་དུ་སྦྲེལ་ཅི་ཐུབ་བྱས་ཤིང་།  ཡུན་རིང་ཉམས་ཞིབ་དང་བརྟགས་དཔྱད་བྱས་པ་བརྒྱུད་ཉིས་སྟོང་བཞི་ནས་བཟུང་མཛེས་སྤྲས་བོད་སྨན་སྡེབ་སྦྱོར་བྱེད་པའི་འགོ་བཙུགས་ལ།  ཆེས་ཐོག་མར་ཁ་ངོའི་རྨ་ལ་ཕན་ན་ཡང་སྐྱི་པགས་ཀྱི་འཇམ་ཤ་དང་རློན་ཤ་སོགས་ལ་མི་འགྲིག་ཅིང་ལྡོག་ཕྱོགས་ཀྱི་ནུས་པ་ཐོན་པ་སོགས་ཀྱང་བྱུང་མྱོང་ཡོད།

       ཡིན་ནའང་ཕམ་ཁའི་ཉམས་མྱོང་གཞི་རྩར་བཟུང་ནས་ཡང་བསྐྱར་སྨན་སྣ་གསར་དུ་བསྡེབས་པ་དང་གསོ་རིག་ཆེད་མཁས་ཀྱི་མཁས་དབང་གི་ཞབས་ལ་གཏུགས། ཉིས་སྟོང་བཅུའི་ལོ་ནས་རིམ་གྱིས་མཚོ་སྔོན་ཞིང་ཆེན་མཚོ་བྱང་ཁུལ་བོད་སྨན་ཁང་གི་བོད་སྨན་གྱི་གཞུང་ལུགས་དང་ལག་ལེན་ལ་བྱང་ཆུབ་པའི་སྨན་རམས་པ་རིན་ཆེན་གྱིས་མཛུབ་ཁྲིད་བྱས་འོག་སྦྱང་བརྩོན་ལྷོད་མེད་བྱས་ཤིང་། ཡང་བསྐྱར་མཛེས་སྤྲས་བོད་སྨན་གྱི་སྡེབ་སྦྱོར་ཚོད་ལྟ་བྱས།

     དེའི་རྗེས་ཀན་སུའུ་ཞིང་ཆེན་ཀན་ལྷོ་ཁུལ་རྨ་ཆུ་རྫོང་དུ་སྨན་ཁང་བཙུགས་ཏེ་ནད་པ་ཚོར་དངོས་སུ་ལག་ལེན་དུ་བཏབ་པས་ཕན་པ་རྒྱ་ཆེན་བྱུང་ཡོད།   ཐོག་དང་བོར་ཁ་ངོ་སྐྲངས་ཏེ་ཆུ་སེར་དང་ཟ་འཕྲུག་ཡོད་པ།    ཁྲག་གི་སྙིགས་མ་ལས་བྱུང་བའི་ཆ་ནས་ཁ་ངོའི་རྨ་མདོག་དམར་བོ་དང་།   ནག་པོ།   དཀར་བོ།   ཕོ་བའི་དྭངས་མ་མ་ཞི་བ་ལས་བྱུང་བའི་ཆ་ནས་གནག་སྣུམ་གཉིས་འདྲེས་པའི་ཤ་པགས་ཀྱི་བར་ལ་ཆུ་སེར་སོགས་ནད་དུ་གྱུར་ནས་པགས་ལ་བཀྲམ་པ། ཕར་བལྟས་པ་ཙམ་གྱིས་པགས་པའི་མདོག་འགྱུར་ཞིང༌། ཟ་འཕྲུག་ལངས་པ་དང༌། ཤུ་ཐོར་སོགས་འབྱུང་བ་ལ་ཐོག་མར་གདོང་ལ་བྱུགས་སྐབས་ཐོག་ན་གནས་བའི་ནག་ཐིག་གཙང་མར་དག་ངེས་པས་ངོ་གདོང་ཇེ་འཇམ་དུ་འགྲོ། དེ་ནས་ཡུན་གྱིས་ངོ་གདོང་གི་གཏིང་ན་གནས་པའི་པགས་ནད་དང་།   ནག་ཐིག་མི་གཙང་བའི་དྲེག་པ་སོགས་པགས་པའི་ཁ་རུ་ཡོང་ནས་ངོ་གདོང་གི་ནག་ཐིག་ཇེ་གསལ་དུ་འགྲོ་ངེས། དེ་ནས་མུ་མཐུད་དུ་དགོང་མོ་རེ་རེ་བཞིན་བསྐུས་ནས་ཟླ་བ་གཅིག་ལྷག་ཙམ་སོང་ན་གདོང་གི་ནག་ཐིག་སོགས་ཚང་མ་རྩ་བ་ནས་མེད་པར་ཆགས་ནས་ངོའི་བཞིན་མདངས་ཀྱང་ཇེ་གསལ་དང་དཀར་པོ་འགྱུར་ངེས་པས་འདི་ལྟ་བུའི་ཐུན་མིན་གྱི་ཁྱད་ཆོས་ཡོད།