གྱེས་ཁའི་ལེགས་སྐྱེས།
ལས་དང་སྨོན་པས་མཚམས་སྦྱར་བའི། །
དད་དམ་གཙང་མས་ཉེར་བཅིངས་པའི། །
བརྩོན་ལྡན་སློབ་བུ་བརྒྱ་དང་བཅུ། །
སློབ་མཐར་ཕྱིན་ལ་སྤྲོ་བ་འཕེལ། །
མ་བཅོས་གཙང་མའི་དད་གུས་དག །
བསམ་ན་མིག་ཆུའི་ཕྲེང་ཐག་འཐོར། །
ཡུལ་ཕྱོགས་གང་དུ་ཆས་གྱུར་ཀྱང་། །
ཚེ་རིང་ནད་མེད་བསམ་དོན་འགྲུབ། །
ན་དང་རྒ་བས་རབ་གཙེས་པའི། །
དགེ་སྦྱོང་དབུ་དཀར་ཤུལ་དུ་ལུས། །
དགེ་སློབ་མཛའ་བརྩེ་དྲན་བཞིན་དུ། །
གཅིག་བུར་ཏིང་འཛིན་བསྟེན་པར་བྱ། །
ཕྱི་ཡི་རླུང་དང་མེ་བཙན་པས། །
ད་སྐབས་ས་ཐན་ཆུ་མང་བས། །
ཤེས་རིག་ནོར་བུའི་དགའ་ཚལ་ཆེ། །
ཇི་འདྲར་འགྱུར་སྙམ་སེམས་པ་འཕྱོ། །
སྤྱི་མཐུན་ལས་ཀྱི་མཐའ་དཀར་ན། །
དཀར་ཕྱོགས་སྐྱོང་བར་མཐུ་བཙན་ན། །
འཕྲལ་ཡུན་གདོན་བགེགས་མྱུར་ཞི་སྟེ། །
ཆོས་རིག་སློབ་གསོ་དར་བར་རེ། །
སྔོན་བྱོན་མེས་པོའི་རེ་བཞག་དང་། །
དེང་གི་དྲན་དབང་བསམ་བློའི་གཟི། །
དགེ་སློབ་དད་དམ་གཙང་མའི་མཐུས། །
བོད་རིག་དགེ་མཚན་དགོང་ལས་མཐོ། །
ཡ་རབས་ཡོན་ཏན་ཟླ་བཞིན་འཕེལ། །
མི་གཤིས་བཟང་བོ་གསེར་དང་མཚུངས། །
ཕྱི་ཐག་རིང་བའི་བུ་སློབ་ཀུན། །
བདེ་དགའི་དཔལ་གྱིས་འཚོ་གྱུར་ཅིག །
གངས་ལྗོངས་ཤེས་རིག་ནོར་བུའི་སློབ་གླིང་གི་སྐབས་ཉེར་བདུན་པའི་མཐར་ཕྱིན་སློབ་བུ་བརྒྱ་དང་བཅུ་ཙམ་སློབ་མཐར་ཕྱིན་ཁའི་མཇུག་མཐའི་སློབ་ཁྲིད་སྐབས་དགེ་མིང་འཛིན་པ་ལྡོང་ཡོན་ཏན་རྒྱ་མཚོས་བྲིས།
༢༠༢༤.༧.༤ཉིན།
| 
青公网安备 63262102000011号