དབལ་མང་པཎྜི་ཏ་དཀོན་མཆོག་རྒྱལ་མཚན།

གྲུབ་མཐའ། དགེ་ལུགས་པ།

འཁྲུངས་འདས། ༡༧༦༤--༡༨༥༣

  དབལ་མང་པཎྜི་ཏ་དཀོན་མཆོག་རྒྱལ་མཚན་མཆོག་ནི། རབ་བྱུང་བཅུ་གསུམ་པའི་ཤིང་སྤྲེལ་(༡༧༦༤)ལོར་ཡབ་དབང་གྲགས་སྐྱབས་དང་ཡུམ་བདེ་ཟ་ལྷ་མོ་གཉིས་ཀྱི་སྲས་སུ་སྐུ་འཁྲུངས། དགུང་ལོ་དྲུག་ཏུ་བཀྲ་ཤིས་འཁྱིལ་དགོན་དུ་ཆོས་ཞུགས་མཛད། རྗེ་འཇིགས་མེད་དབང་པོའི་དྲུང་ནས་རབ་བྱུང་སྡོམ་པ་བཞེས་ཏེ་མཚན་དཀོན་མཆོག་རྒྱལ་མཚན་ཞེས་བསྩལ། དགུང་ལོ་བདུན་ལོན་སྐབས་རྒྱུད་པ་རྒན་བསམ་གཏན་སེངྒེ་ནས་ཀློག་བསླབས། དགུང་ལོ་བརྒྱད་ལ་འདོན་ཆོག་ཡོངས་རྫོགས་ཐུགས་འཛིན་གྲུབ། དགུང་ལོ་བཅུ་གཅིག་སྐབས་ཆོས་གྲྭར་ཞུགས་ནས་གཞུང་ཆེན་ལ་གསན་བཞེས་མཛད། རྡོ་རམས་པ་ཚུལ་ཁྲིམས་སེངྒེ་དགེ་རྒན་དུ་བསྟེན། བསྡུས་གྲྭ། བློ་རྟགས། རྟགས་རིགས་རང་ལུགས། གྲུབ་མཐའ་རིན་ཆེན་ཕྲེང་བ། དགེ་འདུན་ཉི་ཤུའི་མཐའ་དཔྱོད་ཆེན་མོ། གུང་རུའི་རྟེན་འབྲེལ། དྲང་ངེས་རྣམ་འབྱེད་ཆེན་མོ། ཕར་ཕྱིན་སྐབས་བཞི་པ་ཡན། གྲུབ་མཐའ་ཆེན་མོ་རྣམས་ཐུགས་འཛིན་གནང་། སྐབས་འདི་དག་ཏུ་སྐུ་ཆས་བཀྲེན་པས་བྲག་ཇ་དང་གཏོར་སྐམ་གྱི་བཞེས་ཐུག་བསྐོལ། བཞུགས་གདན་ཙམ་ཡང་མེད་པར་ཉིན་མཚན་ཀུན་ཏུ་ས་རྗེན་ལ་བཞུགས། གཟིམ་ཤག་ཏུ་ཡང་གྲང་དུས་ཟླ་གམ་བཞེས་ནས་བཞུགས་པ་ལས་ན་བཟའ་གཞན་མེད་པ་སོགས་སྐུ་ངལ་ཆེན་པོ་བྱུང་ཡང་ཞུམ་པ་མེད་པར་ཐོས་བསམ་ཁོ་ན་ལ་གཞོལ། ཆུ་སྟག་དགུན་ཆོས་ལ་ཕར་ཕྱིན་སྟོན་མོ་མཛད། 

   དགུང་ལོ་ཉི་ཤུར་ཕེབས་སྐབས་བླ་མ་ངག་དབང་རྒྱ་མཚོའི་དྲུང་ནས་བསྙེན་རྫོགས་ཀྱི་སྡོམ་པ་བཞེས། དགུང་ལོ་ཉེར་གཉིས་ཐོག་སྨོན་ལམ་རབ་འབྱམས་པའི་གྲྭ་སྐོར་མཛད། དགུང་ལོ་ཉེར་ལྔར་གསེར་ཁང་གསར་བཞེངས་ཀྱི་ཆེད་མཚོ་སྔོན་ཁུལ་ལ་འབུལ་སྡུད་ལ་ཕེབས། བླ་མ་བློ་བཟང་ཡར་འཕེལ་དང་གཙང་རབ་འབྱམས་པ་བསྟན་པ་དར་རྒྱས་གཉིས་ལས་རྩིས་སྐོར་དང་། མེར་རྒན་ཆོས་རྗེ་སོགས་ཀྱི་དྲུང་ནས་དབྱངས་ཅན་སྒྲ་མདོའི་རི་མོ་ལག་བྲིས་བསླབས། སྐབས་མཚམས་ནམ་འགྲིག་ལ་དཔེ་མཚམས་དང་བསྙེན་པ་ལས་རུང་འགའ་ཞིག་གནང་། དགུང་ལོ་ཉེར་དགུའི་ཐོག་རྡོ་རམས་པའི་མཚན་རྟགས་བཞེས། དགུང་ལོ་སུམ་ཅུར་རྒྱུད་པའི་ཁྲིར་ཕེབས། དགུང་ལོ་སོ་བཞིར་ཀུན་མཁྱེན་འཇིགས་མེད་དབང་བོའི་ཡང་སྲིད་ཆེད་ལྷ་སར་ཕེབས། རྒྱལ་དབང་པཎ་ཆེན་རྣམ་གཉིས་ཀྱི་གསེར་ཞལ་མཇལ་ཏེ་ཆོས་འབྲེལ་དང་། ཏྲེ་ཁྲི་ཆེན་བློ་བཟང་བཀྲ་ཤིས། བ་རི་དགེ་བཤེས་ཁྱབ་བདག བཀྲས་ལྷུན་ཡོངས་འཛིན་ཞལ་སྔ་རྣམ་གཉིས་སོགས་ལས་བཀའ་ཆོས་རྒྱུན་དཀོན་མང་དུ་གསན། ས་རྟ་ལོར་མདོ་སྨད་དུ་ཆིབས་བསྒྱུར། དེ་ནས་མཛོད་དགེ་དགོན་གསར་རབ་རྒྱས་གླིང་གསར་འདེབས་ཀྱི་རྡོ་རྗེ་སློབ་དཔོན་དུ་བསྐོས། སྐུ་གསུང་ཐུགས་རྟེན་དང་མཆོད་རྫས་གསར་བསྒྲིགས་རྣམ་གྲངས་དུ་མ་བཞེངས། གཞན་ཡང་དགོན་སྡེ་མང་པོར་སྒྲུབ་མཆོད་དུ་མ་གསར་འཛུགས་གཏོང་ཐེབས་དང་སྤྱི་འཇོག་མང་འགྱེད་འཚེམ་ལུས་མེད་པར་གནང་། དགུང་ལོ་ཞེ་གཅིག་ནས་ཞེ་དྲུག་བར་བཀྲ་ཤིས་འཁྱིལ་གྱི་ཁྲི་ཐོག་ཉི་ཤུ་རྩ་བཞི་པའི་ཐུགས་འགན་བཞེས། 

   དགུང་ལོ་ཞེ་བདུན་ནས་ལྔ་བཅུ་བར་རབ་རྒྱས་གླིང་དགོན་པའི་ཁྲིར་བཞུགས། དགུང་ལོ་ང་གཅིག་ནས་དོན་ལྔའི་བར་ཨ་ཆོག་དགོན་དང་བསྟན་འཕེལ་གླིང་གི་ཁྲི་འཛིན་མཛད། དེ་སོ་སོར་མདོ་སྔགས་ཀྱི་འཆད་ཉན་སྒྲིག་ལམ་དག་ཐེར་དང་བཅོས་བསྒྱུར་ཡང་ཡང་མཛད་དེ་བཤད་སྒྲུབ་བསྟན་པའི་རྐང་ཚུགས། བྱང་གྲུ་གུ་ནས་ལྷོ་ཟི་ཁྲོན་བར་དགོན་སྡེ་དང་རི་ཁྲོད་སོགས་ལ་གཟབ་རྒྱས་ཀྱི་ཆོས་འཁོར་ཤིན་ཏུ་རྒྱ་ཆེར་བསྐོར། བཀྲ་ཤིས་འཁྱིལ་གྱི་གདན་རབས་དང་། རྗེ་བླ་མ་དཀོན་མཆོག་རྒྱལ་མཚན་དཔལ་བཟང་པོའི་རྣམ་ཐར་ཐར་འདོད་འཇུག་ངོགས། གྲུབ་མཐའི་དྲིས་ལན་ཕྱོགས་ལྷུང་མུན་སེལ། བྱང་ཆུབ་བདེ་ལམ་གྱི་ཟིན་བྲིས་གནད་དོན་གསལ་བ། མདོ་སྡེ་རྒྱན་གྱི་འགྲེལ་པ་ཐུབ་བསྟན་རྒྱས་པའི་མེ་ཏོག ལྟ་བའི་ཟིན་བྲིས་འོད་ཟེར་སྟོང་འབར། རྗེ་བཙུན་དཀོན་མཆོག་བསྟན་པའི་སྒྲོན་མེའི་རྣམ་ཐར་དད་པའི་པད་མོ་བཞད་པའི་ཉིན་བྱེད། རྟེན་འབྲེལ་བསྟོད་པའི་ཊཱིཀྐ་རིན་ཆེན་ལྗོན་ཤིང་། བདེ་ལམ་ཟིན་བྲིས་སྙིང་གི་མེ་ལོང་སོགས་བཀའ་རྩོམ་པོད་བཅུ་གཉིས་ཙམ་བཞུགས། སྐུ་གསུང་ཐུགས་རྟེན་བགྲང་གིས་མི་ལང་པ་གསར་བཞེངས་གནང་།  དགུང་ལོ་དགུ་བཅུ་ལ་ཕེབས་པ་རབ་བྱུང་བཅུ་བཞི་པའི་ཆུ་གླང་(༡༨༥༣)ལོའི་ཟླ་དྲུག་པའི་ཡར་ཚེས་ལ་སྐུ་གཤེགས།

གསལ་བཤད། བོད་ཀྱི་པཎྚི་ཏའི་དཀར་ཆག་རབ་གསལ་མེ་ལོང་ཞེས་བྱ་བ་འདི་ནི་གངས་ལྗོངས་ཤེས་རིག་ནོར་བུའི་སློབ་གླིང་གི་སྐབས་ཉེར་ལྔ་བའི་མཐར་ཕྱིན་བོད་ཡིག་ཆེས་མཐོའི་འཛིན་གྲྭས་འཚོལ་སྡུད་དང་ཕྱོགས་བསྒྲིགས་བྱས་པ་ཞིག་ཡིན་ཞིང་།   དེབ་འདིའི་རྩོམ་སྒྲིག་འགན་ཁུར་བ་གཤེན་མི་དང་། སྤྱང་ཡེ་ཤེས། བེ་རི་རྒྱལ་མཚན་བཅས་ཀྱིས་ཡིད་འཐད་བྱུང་ནས་ངེད་དྲྭ་བའི་རྩོམ་སྒྲིག་ཁང་ལ་མ་ཡིག་མཁོ་སྤྲོད་བྱས་པ་བཞིན་གངས་ལྗོངས་ཤེས་རིག་ནོར་བུའི་སློབ་གླིང་གི་དྲ་བར་མུ་འགོད་བྱེད་ཀྱིན་ཡོད།