རྭ་རྒྱའི་མཐར་ཕྱིན་སློབ་མ་འོས་སྦྱོར།

   ས་སྒང་འཇམ་དབྱངས་མཁྱེན་རབ་ལགས་ནི་（གངས་ལྗོངས་ཤེས་རིག་ནོར་བུའི་སློབ་གླིང་གི་སྐབས་བཅུ་གཅིག་པའི་མཐར་ཕྱིན་སློབ་མ）ལོ་དགུའི་སྟེང་ནས་རྔ་ཡུལ་ས་སྒང་དགོན་ཐུབ་བསྟན་དགེ་འཕེལ་གླིང་གི་ཆོས་གྲལ་དུ་ཞུགས་ཏེ། དགེ་བའི་བཤེས་གཉེན་དམ་པ་བློ་ལྡན་གྱི་མདུན་ནས་དགོན་པའི་ཆོ་ག་རྒྱུད་སྡེ་དང་འདོན་དབྱངས་རྟ་བཅས་ལེགས་པར་སྦྱངས་ནས་ལོ་ལྔའི་རིང་ལ་དབུ་མཛད་ཆེན་མོའི་འགན་ཁུར། ས་སྒང་བླ་མ་འཇམ་དབྱངས་ཚུལ་ཁྲིམས་རྒྱ་མཚོའི་མདུན་ནས་དགེ་ཚུལ་སློང་གི་སྡོམ་པ་བླངས། བླ་མ་འཇམ་དབྱངས་ཐུབ་བསྟན་ཆོས་གྲགས་སང་དང་། རྗེ་དཀར་རིན་པོ་ཆེ་ངག་དབང་ཀུན་དགའ་རིན་ཆེན། ཁྱབ་བདག་བཀའ་འགྱུར་བ་ཆེན་མོ་མཁན་འཆི་མེད་ཚེ་རིང་སོགས་ཀྱི་མདུན་ནས་རྒྱལ་བའི་བཀའ་འགྱུར་རོ་ཅོག་གི་ལྗགས་ལུང་དང་། དཔལ་ས་སྐྱ་བའི་གདམས་ཟབ་ལམ་འབྲས་བུ་དང་བཅས་པའི་དབང་ལུང་མན་ངག་སོགས་ལེགས་པར་ཐོབ་སྟེ། དཔལ་ཀྱེ་རྡོ་རྗེའི་བསྙེན་ཆེན་ལ་སོགས་པའི་མཚམས་དང་ཉམས་ལེན་ལ་ཅི་ནུས་ཀྱིས་གཞོལ་བར་བྱས། དགེ་རྒན་འཇམ་དབྱངས་མགོན་པོ་ཚང་དང་། རྫོང་སར་མཁན་ཆེན་ཐུབ་བསྟན་རབ་གསལ། རྭ་རྒྱ་ཤེས་རིག་ནོར་བུའི་སློབ་གླིང་གི་དགེ་རྒན་ཆེན་མོ་འཇིགས་མེད་རྒྱལ་མཚན། བཛྲ་ཚུལ་ཁྲིམས་རྒྱ་མཚོ། ལྡོང་ཡོན་ཏན་རྒྱ་མཚོ་ལ་སོགས་པའི་མཚན་ལྡན་གྱི་བླ་མ་དང་བཤེས་གཉེན་མང་དུ་བསྟེན་ནས་མདོ་སྔགས་རིག་གནས་བཅས་ལ་སྦྱངས་པ་གནད་སྨིན་མཛད་པ་དང་།

ཐོས་བསམ་སློབ་གཉེར་བྱེད་པའི་ཞོར་ལ་རྩོམ་ལུས་སྣ་ཚོགས་ཀྱི་སྒོ་ནས་བརྩམས་པའི་རྩོམ་ཡིག་བརྒྱ་ཕྲག་ལྷག་གངས་རྒྱན་མེ་ཏོག་དང་། གུར་ཀུམ་ཆུན་པོ་སོགས་ཞིང་ཆེན་ཕྱི་ནང་གི་དུས་དེབ་དང་ཚགས་པར་མི་འདྲ་བ་བརྒྱ་ལ་ཉེ་བ་ཞིག་གི་སྟེང་དུ་བཀོད་པར་མ་ཟད། རྩོམ་ཡིག་འགའ་ལ་ཚད་ལྡན་གྱི་བྱ་དགའ་ཡང་ཐོབ། ཉིས་སྟོང་བརྒྱད་ལོར་ཤེས་རིག་ནོར་བུའི་སློབ་གླིང་ནས་སློབ་མཐར་ཕྱིན་རྗེས་དགེ་རྒན་རྣམ་པའི་ཐུགས་བཀོད་ལྟར་དུ་མགོ་ལོག་རྟ་བྲག་དྭ་ཕྲུག་སློབ་གྲྭའི་དགེ་རྒན་དུ་གདན་འདྲེན་ཞུས་པ་དང་། མི་ལོ་བཅུ་གསུམ་ལྷག་གི་རིང་ལ་སློབ་གྲྭ་དེ་ནས་དགེ་རྒན་དང་སློབ་གཙོ་གཞོན་པའི་འགན་ཁུར་ནས་སློབ་མ་ཡོངས་ལ་སུམ་རྟགས་དག་གསུམ་དང་ཡིག་གཟུགས་སོགས་ཁྲིད་པར་ནན་གྱིས་བརྩོན་པས་གྲུབ་འབྲས་འབུར་དུ་ཐོན་པར་ཕྱོགས་ཡོངས་ནས་དགའ་བསུ་དང་གདེང་འཇོག་བླ་མེད་ཐོབ། མགོ་ལོག་ཁུལ་སློབ་གསོ་སྡེ་ཁག་གིས་གདན་ཞུས་བཞིན་ལོ་ངོ་དུ་མར་དུས་ལྟར་ཕེབས་ནས་མགོ་ལོག་ཁུལ་གྱི་རྫོང་དྲུག་གི་གཞི་རིམ་གྱི་དགེ་རྒན་མང་བོར་སློབ་མ་སྐྱོང་ལུགས་དང་སློབ་ཁྲིད་བྱེད་ཐབས་སོགས་ཀྱི་ཟབ་ཁྲིད་གནང་བས་ཕན་པ་མངོན་གསལ་བྱུང་། གཞན་ཡང་མཚོ་སྔོན་རླུང་འཕྲིན་ཁང་དང་དགོན་སྡེ། སློབ་གྲྭ་དང་མང་ཚོགས་སོགས་ཕྱོགས་ཀུན་ལ་ཕེབས་ཏེ་སློབ་གསོ་དང་འཆད་ཁྲིད་གནང་དང་གནང་བཞིན་བཞུགས་པ་དང་།

ལྷག་པར་དུ་ས་སྒང་དགོན་པའི་བླ་མ་ལམ་འབྲས་པ་སྟེ་འཇམ་དབྱངས་ཐུབ་བསྟན་ཆོས་གྲགས་ཚང་དང་བཞད་པ་བསྟན་པ་རྒྱ་མཚོ། མདོ་ཁམས་པ་ཚེ་རིང་དབང་རྒྱལ། སྡེར་ནང་ས་བྲིས་པ་སེང་གེ་དར་རྒྱས་སོགས་ཀྱི་མདུན་ནས་བོད་ཀྱི་ཡིག་གཟུགས་སྣ་ཚོགས་ལ་སྦྱངས་བ་མཐར་སོན་མཛད་དེ། མདོ་ཁམས་རྫ་རྒྱུད་འབུམ་རྙིང་དགོན་ཤེས་རིག་སློབ་གླིང་དང་། མགོ་ལོག་གྱང་རིང་དགོན་རྨ་རྒྱལ་ཆོས་རིག་སློབ་གླིང་། ཁང་སར་ཇོ་ནང་དགོན་འཇིགས་མེད་ཤེས་རིག་དར་རྒྱས་སློབ་གླིང་། མདོ་སྨད་བཅུ་ཕྲག་རིག་པའི་སློབ་གླིང་། གནམ་མཚོ་གསེར་སྡེར་དགོན་ཐུབ་བསྟན་ཆོས་འཁོར་གླིང་གི་ངུར་སྨྲིག་གསར་བའི་སློབ་གྲྭ། རྔ་ཡུལ་བསེ་དགོན་ཨེ་ཝཾ་ཅོག་སྒར་བཙུན་མའི་དགོན་མི་འགྱུར་བསམ་གཏན་གླིང་གི་རིག་གནས་ཆེད་སྦྱོང་འཛིན་གྲྭའི་བཙུན་མ་ཚོ་བཅས་ཀྱི་གྲྭ་བཙུན་མང་བོར་དབུས་བྲིས་ཀྱི་ཡིག་གཟུགས་སྣ་ཚོགས་དང་བརྡ་སྤྲོད་སོགས་ལོ་ཟླ་དུ་མར་ཟབ་ཁྲིད་བྱས་པས་གྲུབ་འབྲས་ངོ་མཚར་བ་བཞག་དང་འཇོག་བཞིན་ཡོད།

གཞན་ཡང་རྔ་ཡུལ་བསེ་དགོན་ཆེན་གྱི་བསྟན་བདག་རྣམ་གཉིས་སྟེ་བསེ་སྤྲུལ་ཀུན་དགའ་ཕུན་ཚོགས་དང་མཁར་སྤྲུལ་བཀྲ་ཤིས་དོན་གོ། ཨ་དཔལ་སྤྲུལ་སྐུ་ཐུབ་བསྟན་སྙན་གྲགས། གྱང་རིང་དགོན་པའི་མཆོག་སྤྲུལ་བྱང་ཆུབ།སྙན་དགོན་མཆོག་སྤྲུལ་བློ་བཟང་ཉི་མ། རྩིས་མདའ་དགོན་བསྟན་གཉིས་དར་རྒྱས་གླིང་དང་ལྷ་རི་དགོན་གཉིས་ཀྱི་སྤྲུལ་སྐུ་ཆོས་དབྱིངས་སྤྲོས་བྲལ་སོགས་དགོན་སྡེ་མང་བོའི་བསྟན་བདག་དང་བླ་སྤྲུལ་མང་བོ་ལའང་ཡིག་གཟུགས་སྣ་ཚོགས་ཁྲིད་ནས་སྐྱེད་སྲིང་བཟང་བོ་བྱས།

རྔ་ཡུལ་ས་སྒང་དགོན་དང་ཀིརྟི་དགོན། གདོང་རི་དགོན་དང་དྷཱིཿཕུ་དགོན་སོགས་དགོན་པ་འགའི་གྲྭ་བཙུན་རེ་ཟུང་དང་། མཚོ་སྔོན་དགེ་ཐོན་སློབ་གྲྭ་ཆེན་མོ་དང་། མཚོ་སྔོན་མི་རིགས་སློབ་གྲྭ་ཆེན་མོ། ལྷོ་ནུབ་མི་རིགས་སློབ་གྲྭ་ཆེན་མོ། མགོ་ལོག་དགེ་ཐོན་སློབ་གྲྭ། རྔ་བའི་བོད་ཡིག་སློབ་འབྲིང་སོགས་ཀྱི་སློབ་མ་བརྒྱ་ཕྲག་མང་བོར་ཡིག་གཟུགས་སྣ་ཚོགས་ཞིབ་ཁྲིད་གནང་ནས་གྲུབ་འབྲས་ལེགས་པོ་ཐོབ་པས་ཞིང་ཆེན་དང་ཁུལ།རྫོང་རིམ་པ་ནས་བྱ་དགའ་ཡང་གང་མང་ཐོབ། མཚོ་སྔོན་ཞིང་ཆེན་ཡིག་གཟུགས་མཐུན་ཚོགས་དང་སི་ཁྲོན་ཞིང་ཆེན་ཐང་ཀ་དང་ཡིག་གཟུགས་སྒྱུ་རྩལ་ཡར་སྐུལ་ལྷན་ཚོགས་ཀྱི་ཚོགས་མི་ཡིན། 

བརྩམས་ཆོས་ལ་ཀུན་རྟོག་པིར་གྱི་རྩེད་འཇོ་དང་། བྱིས་པའི་དག་ཡིག་གི་འགྲེལ་བ་གཞོན་ནུའི་མགུལ་རྒྱན། ས་པཎ་དག་སྡེབ་ཀྱི་འགྲེལ་བ་བློ་གསལ་བློ་སྒོ་འབྱེད་པའི་ལྡེ་མིག བསླབ་བྱ་སྙིང་གི་འོད་སྣང་གི་འགྲེལ་བ་བློ་གསལ་ཀུན་ད་དགྱེས་པའི་ཟླ་ཟེར། སྣང་གསུམ་རྒྱུད་གསུམ་གྱི་བསྡུས་དོན་ཐར་འདོད་ལམ་སྟོན། སྡོམ་གསུམ་གྱི་དྲི་བ་དང་དྲིས་ལན་སུམ་བརྒྱ། སྤྱི་ཚོགས་གླེང་བརྗོད་སོགས་དེབ་འགའ་མཆིས་སོ།།

གསལ་བཤད།  
    གངས་ལྗོངས་ཤེས་རིག་ནོར་བུའི་སློབ་གླིང་གི་དྲ་བར་ཆེད་དུ་སློབ་གླིང་འདིའི་ཕུལ་བྱུང་མཐར་ཕྱིན་སློབ་མ་རྣམས་འོས་སྦྱོར་བྱེད་ཀྱིན་ཡོད་པས། མཐར་ཕྱིན་འཛིན་གྲྭ་སོ་སོའི་སྤྱི་ཚོགས་སྟེང་གཟེངས་ཐོན་གྱི་མཐར་ཕྱིན་སློབ་མ་དག་དྲྭ་ཚིགས་རྩོམ་སྒྲིག་ཁང་དུ་འོས་སྦྱོར་གནང་རོགས་ཞུ།