གོས་ལྷ་པཎྜི་ཏ་བློ་བཟང་ཤེས་རབ།

གྲུབ་མཐའ། ཇོ་ནང་བ།

འཁྲུངས་འདས། ༡༧༦༨-

 གོས་ལྷ་པཎྜི་ཏ་བློ་བཟང་ཤེས་རབ་མཆོག་ནི། སྤྱི་ལོ་(༡༧༦༨)ལོར་མདོ་སྨད་རྔ་བའི་ཡུལ་སྨད་ཀྱི་བཀྲ་ཤིས་ཐང་གི་གོས་ཚང་ཞེས་པའི་ཁྱིམ་རྒྱུད་དུ་སྐུ་འཁྲུངས། དགུང་ལོ་བརྒྱད་དགུའི་སྐབས་སུ་ཀློག་བསླབ་ཅིང་། དགུང་ལོ་བཅོ་ལྔ་ཡས་མས་སུ་རབ་ཏུ་བྱུང་སྟེ་བསམ་སྦྱོར་གཉིས་ཀྱི་སྒོ་ནས་དགེ་བའི་བཤེས་གཉེན་ཚུལ་བཞིན་དུ་བསྟེན། དེ་ནས་དགུང་ལོ་ཉི་ཤུ་ཡས་མས་སུ་ཁོང་ལྷ་སར་ཕེབས་ནས་ཇོ་ཤྰཀ་རྣམ་གཉིས་དང་ཕོ་བྲང་པོ་ཏ་ལ་སོགས་ལ་མཆོད་མཇལ་བྱེད་སྐབས་སྔོན་གྱི་སྨན་གསར་ལུགས་འཛིན་ལྷོ་བྲག་བསྟན་འཛིན་ནོར་བུ་སོགས་ཀྱིས་བྲིས་པའི་ལྡེབས་རིས་དང་། ཐང་ཀ་ཤིང་ཚོན་རྒྱན་རིས་རྣམས་མིག་ལམ་དུ་སྣང་བས་སྒྱུ་རྩལ་ཕྱོགས་ལ་སྔར་བྱུང་མ་མྱོང་བའི་ཤེས་ཚོར་ཆེན་པོ་སྐྱེས་ཏེ། སྨན་གསར་ལུགས་ཀྱི་རི་མོ་འབྲི་སྟངས་ལ་སྦྱངས་པ་བྱས་ཤིང་། རིམ་གྱིས་རྒྱལ་རྩེ་དཔལ་འཁོར་ཆོས་སྡེ་ཕྱོགས་སུ་ཕེབས་ནས། དུས་འཁོར་སོགས་སྔགས་ཕྱོགས་ཀྱི་རྒྱུད་སྡེ་རྣམས་ལ་སློབ་གཉེར་གནང་བ་མ་ཟད། ཆོ་གའི་ཕྱག་ལེན་ཐིག་ཚོན་སོགས་ལའང་ཞིབ་འཇུག་ལེགས་པར་མཛད་དེ། དུས་འཁོར་གྱི་ཐིག་ཚོན་གསལ་བྱེད་ཀྱི་གཞུང་ཡང་བརྩམས་ཡོད། སྐབས་དེར་ཁོང་གིས་སྤྲུལ་སྐུ་བྱེའུ་པས་བྲིས་པའི་རྒྱལ་རྩེ་དཔལ་འཁོར་མཆོད་རྟེན་ནང་གི་ལྡེབས་རིས་དེ་དག་གི་འབྲི་སྟངས་ལ་ཞིབ་ཏུ་སྦྱངས་ནས་རུས་ཚིགས་འབྲི་སྟངས་ཐད་ལ་སྤྲུལ་སྐུ་བྱེའུ་ཡི་འབྲི་སྟངས་རྣམས་སྔར་གྱི་སྨན་གསར་ལུགས་སོར་བཞག་བྱས།

        ཁོང་གི་ཕྱག་བྲིས་རྒྱལ་རྩེ་དཔལ་འཁོར་ཆོས་སྡེ་དང་། ས་སྐྱ། ངམ་རིང་། རྫོང་དགའ། གུ་གེ་སོགས་སུ་བཞུགས་པ་མང་ཤོས་ནི་ལྡེབས་རིས་ཡིན་ནོ། ། དེ་ནས་ཟུར་མང་རྣམ་རྒྱལ་དགོན་དུ་ཕེབས་ནས་ལོ་ཆེན་ཚེ་དབང་ཀུན་ཁྱབ་ཀྱི་ཞབས་པད་ཡུན་རིང་དུ་བསྟེན་ཏེ། ཚད་མ་རིག་པ་དང་། ཕར་ཕྱིན། དབུ་མཛོད་འདུལ་བ་དང་བཅས་པར་སྦྱངས་པ་རྡོ་རུས་ཐུག་པ་ལྟ་བུར་མཛད། སྒྲ་ཀ་ཙན་དང་སྨན་རྩིས་སོགས་ལ་སྦྱངས་པ་གནད་སྨིན་མཛད་རྗེས། རྩིས་རིག་ཐུབ་བསྟན་མཛེས་རྒྱན་ཞེས་པ་བརྩམས། མདོ་སྔགས་རིག་གནས་དང་བཅས་པ་ལ་ཚིག་འཁྲི་ལྟ་བུའི་གོ་བ་ཙམ་མ་ཡིན་པར་ཚིག་དོན་རེ་རེར་གདེང་ཆུད་པ་བྱུང་བས། གོས་ལྷ་པཎྜི་ཏ་ཞེས་མཚན་སྙན་ཕྱོགས་ཡོངས་སུ་ཁྱབ།  

 དེ་ནས་རྗེ་སྒྲོལ་མགོན་ཞབས་ཀྱི་ཞལ་རྒྱུན་ཇི་བཞིན་དུས་འཁོར་གྱི་ཆོ་གའི་འདོན་བསྒྲིགས་བཅའ་ཤོམས་གཏོར་གཟུགས་དང་བཅས་པ་ལོ་ཆེན་ཉིད་ནས་གསུངས་པ་ལྟར། རང་ཡུལ་འབྲོག་དགེ་བསམ་འགྲུབ་གླིང་དུ་ཕེབས་ནས། དུས་འཁོར་གྱི་ཕྱག་ལེན་རྣམ་པར་དག་པའི་སྲོལ་བཙུགས། གཙང་བའི་རྡོ་རྗེ་སློབ་དཔོན་ངག་དབང་ཆོས་འཕགས་ཀྱིས་ཀྱང་གོས་ལྷ་པཎྜི་ཏའི་ཞབས་ལ་གཏུག་སྟེ། དུས་འཁོར་གྱི་ཕྱག་ལེན་སོགས་ཁོང་དུ་ཆུད་པར་བྱས་ནས། དཔལ་བསམ་འགྲུབ་ནོར་བུའི་གླིང་དུ་དེའི་ཕྱག་རྒྱུན་ལྟར་བཙུགས། གོས་ལྷ་པཎྜི་ཏ་ཁོང་གིས་དགེ་བའི་བཤེས་གཉེན་བཅུ་ཕྲག་ལྷག་ཅིག་བསྟེན་ཅིང་། མདོ་སྔགས་རིག་གནས་དང་བཅས་པ་སྦྱངས་ནས་ཉམས་ལེན་གནད་སྨིན་མཛད་དེ། དཔལ་དུས་ཀྱི་འཁོར་ལོའི་རིམ་གཉིས་ལམ་གྱི་མྱོང་རྟགས་ཁྱད་པར་ཅན་ཐུགས་ལ་འཁྲུངས།  སྤྱིར་གོས་ལྷ་པཎྜི་ཏས་ལྷ་སའི་ཕྱོགས་ནས་སྨན་ཐང་བའི་བྲིས་རྒྱུན་འཛིན་པའི་མཁན་ལྷོ་བྲག་བསྟན་འཛིན་ནོར་བུ་སོགས་ཀྱིས་བྲིས་པའི་པོ་ཏ་ལའི་ནང་གི་ལྡེབས་རིས་ཁག་དང་། སེར་འབྲས་དགེ་གསུམ་དང་ཇོ་ཁང་རྣམ་གཉིས་སུ་མཆིས་པའི་ལྡེབས་རིས་དང་ཐང་ག  འཇིམ་སྐུ།  ཙ་ཀ  འཚེམ་དྲུབ།  ཤིང་ཚོན་རྒྱན་རིས་ལ་སོགས་དང་བཅས་པར་ཞིབ་གཟིགས་དང་།  ལད་འབྲི།  འདྲ་བཤུས།  རྩད་གཅོད་འཚོལ་བསྡུ་བྱས་ནས་སྨན་ལུགས་གཙོ་བོར་སྦྱངས་པ་དང་། རྒྱལ་རྩེ་དཔལ་འཁོར་ཆོས་སྡེ་སོགས་སུ་སྤྲུལ་སྐུ་བྱེའུ་ལུགས་དང་བལ་བྲིས་ལུགས་སྦྱངས་པ་བྱས། དེ་དག་གི་འབྲི་སྟངས་ཀྱི་ཁྱད་པར་ལ་དབྱེ་བ་ཞིབ་ཏུ་བྱས། ཁྱད་པར་དུ་མོ་ལྷའི་རིགས་ནི་སྐུ་གཟུགས་རིང་ཞིང་། སྐུ་སྟོད་ལ་ན་བཟའ་དར་འཕྱང་ལྟ་བུ་མནབས་པ། དཔུང་གདུབ་རྐང་གདུབ་ཉིས་བརྩེགས་ལྡན་པ། སྨད་གཡོག་ནི་ནང་སའི་རྒྱ་རིགས་ཀྱི་འབྲི་ལུགས་ལྟར་ན་བཟའ་འཇོལ་འཇོལ་དང་ལྟེབ་གཉེར་མང་བ་སོགས་མ་ཡིན་པར་འཕོངས་རྐུབ་འཁེབས་པ་ཙམ་དང་དོར་མ་ཕྲ་རིས་ཅན། བྲང་རྒྱན་གྱི་སྣེ་མོ་ནུ་ཟུང་གི་དབུས་སུ་ཐོན་པ། རྣ་རྒྱན་ཆེ་ཞིང་དཔྲལ་བའི་དབུས་སུ་ཐིག་ལེ་དམར་པོ་ཆགས་པ། ནུ་མ་ཤིན་ཏུ་འབུར་ཞིང་ནུ་ཁེབས་ཀྱིས་ཕྱེད་ཙམ་བཀབ་པ། སྐེད་པ་ཕྲ་ཞིང་བརླ་བྱིན་རྒྱས་པ། མིག་དཀྱུས་རིང་ཞིང་སྒེག་ཉམས་ལྡན་པ་སོགས་ཀྱི་ཁྱད་ཆོས་འབུར་དུ་ཐོན་ཡོད།  ཁམས་བྲག་མགོ་ཕྱོགས་སུ་ཕེབས་ནས་ཀརྨ་སྒར་བྲིས་ལུགས་ལ་སྦྱང་གཉེར་བྱས་ཏེ།  སྒར་ལུགས་པའི་འབྲི་སྟངས་ཀྱི་རྩ་བའི་ཁྱད་ཆོས་ཏེ།  སྲོག་ཆགས་དང་བྱ་རིགས། བྲག་ཆུ། ཁང་བཟང་སོགས་ནི་ནང་སའི་རྒྱ་རིགས་ཀྱི་རྒྱལ་སྲོལ་རི་མོའི་འབྲི་སྟངས་རྒྱུད་འཛིན་བྱས་ཡོད་པའི་སྒར་བྲིས་ལུགས་གཙིགས་འཛིན་བྱས། གོས་ལྷ་པཎྜི་ཏ་ཁོང་གིས་གོང་དུ་བཤད་པའི་འབྲི་སྲོལ་རིང་ལུགས་གསུམ་པོར་སྦྱངས་པ་བྱས་ཤིང་། རང་རང་གི་འབྲི་སྟངས་ཐུན་མིན་གྱི་ཁྱད་ཆོས་དང་མན་ངག་ཡོངས་རྫོགས་ཁོང་དུ་ཆུད་པར་བྱས་ནས་འབྲི་སྟངས་གསུམ་ག་སྦྲགས་ཏེ་བྲིས་པའི་རི་མོ་དེ་ལ། གོས་ལྷའི་འབྲི་ལུགས་ཞེས་གྲགས། རྗེས་སུ་འཛམ་ཐང་ཕྱོགས་སུ་དར་རྒྱས་ཆེ་བས་འཛམ་ཐང་ལྷ་རྒྱུན་ཞེས་ད་ལྟ་ཡོངས་སུ་གྲགས་པ་འདི་ཉིད་ལགས་སོ། ། དེང་སང་མཚན་སྙན་ཆེ་བའི་སེང་གེ་གཤོང་མ་མགོའི་དགོན་པའི་འདུ་ཁང་གི་ཁྱམས་ཀྱི་རྒྱལ་ཆེན་རྣམ་བཞི་ཡང་། འཛམ་ཐང་བྲིས་རྒྱུན་ཡིན་ཞེས་དགེ་བཤེས་དཔྱི་ས་བློ་གྲོས་རྒྱ་མཚོའི་རང་རྣམ་དང་། མཁས་དབང་ཚེ་ཏན་ཞབས་དྲུང་གི་རྣམ་ཐར་དུ་གསལ་བོར་གསུངས་ཡོད། ཁོང་གི་ཁྱད་ཆོས་གཙོ་བོ་ནི་ཚོན་སྡེབ་སྟངས་ཀྱི་རྫས་སྦྱོར་ལ་ཐུན་མོང་མ་ཡིན་པའི་ཁྱད་ཆོས་ཤིག་ཡོད་དེ།  ཁོང་གི་ཡོངས་གྲགས་ཀྱི་ཚོན་རྫས་དེ་དག་མི་བཀོལ་བར་རང་ཡུལ་གྱི་ལུང་ཁོང་དང་བྲག་རི་དག་ལས་རྩྭ་རྩི་ཤིང་དང་རྡོ་སོགས་ལས་ཚོན་རྫས་བསྒྱུར་ཏེ་བྲིས་པ་ཡིན་ལ།  དེའི་ཚོན་བྲིས་ནི་དུས་ཡུན་རིང་བོ་འགོར་ཡང་མདོག་མི་འགྱུར་བ་དང་མི་དྲིལ་བ་སོགས་ཀྱི་ཁྱད་ཆོས་ལྡན། གོས་ལྷའི་དགུ་ཐང་ཞེས་པ་དེ་ཁོང་གི་ཚབ་མཚོན་རང་བཞིན་གྱི་སྒྱུ་རྩལ་བརྩམས་ཆོས་ཡིན་ནོ། །  གསུང་རྩོམ་ལ་པོད་གཅིག་ཙམ་བཞུགས།  འདས་ལོ་མི་གསལ།    

གསལ་བཤད། བོད་ཀྱི་པཎྚི་ཏའི་དཀར་ཆག་རབ་གསལ་མེ་ལོང་ཞེས་བྱ་བ་འདི་ནི་གངས་ལྗོངས་ཤེས་རིག་ནོར་བུའི་སློབ་གླིང་གི་སྐབས་ཉེར་ལྔ་བའི་མཐར་ཕྱིན་བོད་ཡིག་ཆེས་མཐོའི་འཛིན་གྲྭས་འཚོལ་སྡུད་དང་ཕྱོགས་བསྒྲིགས་བྱས་པ་ཞིག་ཡིན་ཞིང་།   དེབ་འདིའི་རྩོམ་སྒྲིག་འགན་ཁུར་བ་གཤེན་མི་དང་། སྤྱང་ཡེ་ཤེས། བེ་རི་རྒྱལ་མཚན་བཅས་ཀྱིས་ཡིད་འཐད་བྱུང་ནས་མ་ཡིག་མཁོ་སྤྲོད་བྱས་པ་བཞིན་གངས་ལྗོངས་ཤེས་རིག་ནོར་བུའི་སློབ་གླིང་གི་དྲ་བར་མུ་འགོད་བྱས་པ་ཡིན།