ཀྲུང་གོ་གུང་ཁྲན་ཏང་གི་སྐབས་བཅུ་བདུན་པ་དང་། སྐབས་བཅོ་བརྒྱད་པ། སྐབས་བཅུ་དགུ་པ་བཅས་ཀྱི་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ་དང་། རྒྱལ་སྲིད་སྤྱི་ཁྱབ་ཁང་གི་དེ་སྔའི་ཙུང་ལི་བློ་མཐུན་ལིས་ཁི་ཆང་ཉེ་ཆར་ཧྲང་ཧའེ་རུ་སྐུ་ངལ་གསོ་བཞིན་ཡོད་ལ། 2023ལོའི་ཟླ10པའི་ཚེས26ཉིན་གློ་བུར་དུ་སྙིང་ནད་ཕོག་པའི་དབང་གིས་ནུས་ཤུགས་ཡོད་རྒུས་མྱུར་སྐྱོབ་བྱས་ཀྱང་ཕན་འབྲས་མ་ཐོན་པར་ཟླ10པའི་ཚེས27ཉིན་གྱི་ཆུ་ཚོད0དང་སྐར་མ10ཡི་ཐོག་ཧྲང་ཧའེ་རུ་སྐུ་གཤེགས་པ་དང་། སྐུ་གཤེགས་སྐབས་ལོ68རེད།

བློ་མཐུན་ལི་ཁེ་ཆང་གི་སྐུ་པར།

ཀྲུང་གོ་གུང་ཁྲན་ཏང་ཀྲུང་དབྱང་ཨུ་ཡོན་ལྷན་ཁང་དང་། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་རྒྱལ་ཡོངས་མི་དམངས་འཐུས་མིའི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་རྒྱལ་སྲིད་སྤྱི་ཁྱབ་ཁང་། ཀྲུང་གོ་མི་དམངས་ཆབ་སྲིད་གྲོས་མོལ་ཚོགས་འདུ་རྒྱལ་ཡོངས་ཨུ་ཡོན་ལྷན་ཁང་བཅས་ཀྱིས་སྐྱོ་སྣང་ཆེན་པོས་ཁྱབ་བསྒྲགས་བྱས་པ་སྟེ། ཀྲུང་གོ་གུང་ཁྲན་ཏང་གི་ཕུལ་བྱུང་ཏང་ཡོན། ཡུན་རིང་ཉམས་སད་ཐེག་པའི་བློ་དཀར་གཞུང་དྲང་གི་གུང་ཁྲན་རིང་ལུགས་ཀྱི་འཐབ་མོ་པ། ཁྱད་དུ་འཕགས་པའི་འབྱོར་མེད་གྲལ་རིམ་གྱི་གསར་བརྗེ་པ་དང་ཆབ་སྲིད་པ། ཏང་དང་རྒྱལ་ཁབ་ཀྱི་ཕུལ་དུ་བྱུང་བའི་མགོ་ཁྲིད་པ། ཀྲུང་གོ་གུང་ཁྲན་ཏང་གི་སྐབས་བཅུ་བདུན་པ་དང་སྐབས་བཅོ་བརྒྱད་པ། སྐབས་བཅུ་དགུ་པ་བཅས་ཀྱི་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན་དང་། རྒྱལ་སྲིད་སྤྱི་ཁྱབ་ཁང་གི་ཙུང་ལི་ཟུར་པ་བློ་མཐུན་ལི་ཁེ་ཆང་ལ་གློ་བུར་དུ་སྙིང་ནད་ཕོག་སྟེ། ནུས་ཤུགས་ཡོད་རྒུས་མྱུར་སྐྱོབ་བྱས་ཀྱང་མ་ཕན་པར2023ལོའི་ཟླ10པའི་ཚེས27ཉིན་གྱི་ཆུ་ཚོད0དང་སྐར་མ10སྟེང་ཧྲང་ཧེ་ནས་སྐུ་གཤེགས་པ་དང་། དགུང་ལོ68རེད།

བློ་མཐུན་ལི་ཁེ་ཆང་ནི1955ལོའི་ཟླ7པར་ཨན་ཧོས་ཏེན་ཡོན་དུ་སྐྱེས། ཁོང་ཉིད་ན་གཞོན་གྱི་དུས་ནས་བཟུང་ཏང་ལ་དགའ་བ་དང་མེས་རྒྱལ་ལ་དགའ་ཞིང་། མི་དམངས་ལ་དགའ། སློབ་སྦྱོང་ལ་དཀའ་བ་སྤྱད་པ་དང་ཡར་ཐོན་བརྩོན་ལེན་མཛད། 1974ལོའི་ཟླ7པ་ནས་བཟུང་། ཨན་ཧོས་ཧྥིན་དབྱང་རྫོང་ཏ་མེའོ་ཀུང་ཧྲེ་ཏུང་ལིན་རུ་ཆེན་དུ་རུ་ཞུགས་མཛད། 1976ལོའི་ཟླ5པར་ཀྲུང་གོ་གུང་ཁྲན་ཏང་ནང་དུ་ཞུགས། 1976ལོའི་ཟླ11པ་ནས1978ལོའི་ཟླ3པའི་བར་ཨན་ཧོས་ཞིང་ཆེན་ཧྥིན་རྫོང་ཏ་མེའོ་ཀུང་ཧྲེ་ཏ་མེའོ་རུ་ཆེན་གྱི་ཏང་ཀྲི་པུའི་ཧྲུའུ་ཅིའི་འགན་བཞེས། 1978ལོའི་ཟླ3པ་ནས1982ལོའི་ཟླ2པའི་བར་པེ་ཅིང་སློབ་ཆེན་བཅའ་ཁྲིམས་སྡེ་ཁག་ཏུ་སློབ་སྦྱོང་གནང་བ་དང་། སློབ་གྲྭའི་སློབ་མའི་ཚོགས་པའི་འགན་ཁུར་པ་མཛད་མྱོང་། 1982ལོའི་ཟླ2པ་ནས་བཟུང་། བློ་མཐུན་ལི་ཁེ་ཆང་གིས་སྔ་གཞུག་ཏུ་པེ་ཅིང་སློབ་ཆེན་གུང་གཞོན་ཚོགས་པ་ཨུ་ཡོན་ལྷན་ཁང་གི་ཧྲུའུ་ཅི་དང་། གུང་གཞོན་ཚོགས་པ་ཀྲུང་དབྱང་གི་རྒྱུན་ལས་ཨུ་ཡོན། གུང་གཞོན་ཚོགས་པ་ཀྲུང་དབྱང་སློབ་གྲྭ་པུའུ་ཡི་པུའུ་ཀྲང་གི་ཞོར་དུ་རྒྱལ་ཡོངས་སློབ་མའི་མཉམ་འབྲེལ་ཚོགས་པའི་དྲུང་ཡིག་ཆེན་མོ། གུང་གཞོན་ཚོགས་པ་ཀྲུང་དབྱང་ཧྲུའུ་ཅི་ཁྲུའུ་ཡི་རྗེས་སྣོན་ཧྲུའུ་ཅི། གུང་གཞོན་ཚོགས་པ་ཀྲུང་དབྱང་ཧྲུའུ་ཅི་ཁྲུའུ་ཡི་ཧྲུའུ་ཅིའི་ཞོར་དུ་རྒྱལ་ཡོངས་ན་གཞོན་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་གཞོན་པ། རྒྱལ་ཡོངས་ན་གཞོན་གདོང་ལེན་རུ་ཁག་བྱ་བའི་ཨུ་ཡོན་ལྷན་ཁང་གི་ཀྲུའུ་རིན་བཅས་ཀྱི་འགན་བཞེས། 1993ལོའི་ཟླ3པ་ནས་བཟུང་། གུང་གཞོན་ཚོགས་པ་ཀྲུང་དབྱང་ཧྲུའུ་ཅི་ཁྲུའུ་ཡི་ཧྲུའུ་ཅི་དང་པོའི་ཞོར་དུ་ཀྲུང་གོ་ན་གཞོན་ཆབ་སྲིད་སློབ་གླིང་གི་གླིང་གཙོའི་འགན་བཞེས། རྒྱལ་ཡོངས་དམངས་ཆེན་སྐབས་བརྒྱད་པའི་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་མཛད། ཁོང་གིས་ཏང་གི་ལས་འགན་གཙོ་བོར་དམ་དུ་དམིགས་ནས་གུང་གཞོན་ཚོགས་པའི་བྱ་བར་ཐུགས་བསམ་བཞེས་པ་དང་བཀོད་སྒྲིག་གནང་ནས། ཏང་དང་རྒྱལ་ཁབ་ཀྱི་བྱ་བའི་སྤྱི་ཡོངས་ལ་ཞབས་འདེགས་ཞུས། 1998ལོའི་ཟླ6པ་ནས་བཟུང་། བློ་མཐུན་ལི་ཁེ་ཆང་གིས་ཧོ་ནན་ཞིང་ཆེན་ཏང་ཨུའི་ཧྲུའུ་ཅི་གཞོན་པའམ་ཧྲིན་ཀྲང་ཚབ་མ། ཧྲིན་ཀྲང་། ཞིང་ཆེན་ཏང་ཨུའི་ཧྲུའུ་ཅིའམ་ཧྲིན་ཀྲང་། ཞིང་ཆེན་ཏང་ཨུའི་ཧྲུའུ་ཅིའམ་ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་བཅས་ཀྱི་འགན་བཞེས། ཁོང་གིས་དབུས་རྒྱུད་དར་རྒྱས་ཀྱི་འབད་འཐབ་དམིགས་འབེན་བཏོན་ནས། ཞིང་ཆེན་གྱི་གོང་འོག་ཡོངས་སུ་འཕེལ་རྒྱས་ཀྱི་ཐུན་མོང་ལྟ་བ་གྲུབ་པར་བྱས་ཏེ། བཟོ་ལས་ཅན་དང་མཁར་གྲོང་ཅན་གྱི་འཕེལ་རིམ་ལ་སྐུལ་འདེད་ཆེན་པོ་བཏང་བ་དང་མཉམ་དུ། ཞིང་ལས་དེང་རབས་ཅན་དུ་བསྒྱུར་ཚད་ཇེ་མགྱོགས་སུ་བཏང་ནས། ཧོ་ནན་གྱི་དཔལ་འབྱོར་སྤྱི་ཚོགས་ཀྱི་ལས་དོན་སྣ་ཚོགས་གོང་འཕེལ་མྱུར་མོ་འབྱུང་བར་སྐུལ་འདེད་གནང་། 2004ལོའི་ཟླ12པ་ནས་བཟུང་། བློ་མཐུན་ལི་ཁེ་ཆང་གིས་ལེའོ་ཉིང་ཞིང་ཆེན་ཏང་ཨུའི་ཧྲུའུ་ཅི་དང་། ཞིང་ཆེན་ཏང་ཨུའི་ཧྲུའུ་ཅིའམ་ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་གྱི་འགན་བཞེས། ཁོང་གིས་བྱང་ཤར་དར་རྒྱས་དང་མཚོ་འགྲམ་སྒོ་འབྱེད་ཀྱི་གོ་སྐབས་གཉིས་དམ་འཛིན་གནང་ནས། རྒྱལ་དབང་ཁེ་ལས་ཀྱི་བཅོས་སྒྱུར་ཧུར་ཐག་གིས་ཟབ་སྤེལ་མཛད་པ་དང་། གནས་ལྔ་ལམ་གཅིག་ཅེས་པའི་མཚོ་འགྲམ་དཔལ་འབྱོར་རྒྱུད་བསྐྲུན་ཞིང་། གཅིག་བསྡུས་མུ་འབྲེལ་གྱི་སྤྱི་ཁང་ཁུལ་སྒྱུར་བཀོད་དང་ལས་ཞུགས་པ་མེད་པའི་ཁྱིམ་ཚང་གི་ལས་ཞུགས་ལ་ཡར་སྐུལ་བྱེད་པ་སོགས་ཀྱི་དམངས་ཚིས་བཟོ་སྐྲུན་བཏོན་པར་མ་ཟད་དེ་ལག་བསྟར་བྱེད་པར་རྩ་འཛུགས་གནང་ནས། ལེའོ་ཉིང་བཟོ་ལས་རྟེན་གཞི་རྙིང་བ་དར་རྒྱས་སུ་གཏོང་བར་གྲུབ་འབྲས་མངོན་གསལ་བླངས། 2007ལོའི་ཟླ10པར། བློ་མཐུན་ལི་ཁེ་ཆང་ཏང་གི་སྐབས་བཅུ་བདུན་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དང་པོའི་སྟེང་ཀྲུང་དབྱང་ཆབ་སྲིད་ཅུའུ་ཡི་ཨུ་ཡོན་དང་། རྒྱུན་ལས་ཨུ་ཡོན་དུ་བདམས། 2008ལོའི་ཟླ3པར། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པའམ་ཏང་ཙུའི་ཧྲུའུ་ཅི་གཞོན་པའི་འགན་བཞེས་ཏེ། རྒྱལ་སྲིད་སྤྱི་ཁྱབ་ཁང་གི་རྒྱུན་ལས་བྱ་བ་ཁུར་དུ་བཞེས་ལ། འཕེལ་རྒྱས་བཅོས་སྒྱུར་དང་ནོར་སྲིད། རྒྱལ་ཁོངས་ཐོན་ཁུངས། ཁོར་ཡུག་སྲུང་སྐྱོབ། འཛུགས་སྐྲུན། འཕྲོད་བསྟེན་བཅས་ཐད་ཀྱི་བྱ་བ་ཁུར་དུ་བཞེས། ཁོང་གིས་རམ་འདེགས་གནང་ནས་རྒྱལ་སྤྱིའི་དངུལ་རྩའི་ཉེན་ཚབས་ལ་ཁ་གཏད་འཇལ་བ་དང་། དཔལ་འབྱོར་སྒྲིག་གཞི་མྱུར་དུ་ལེགས་སྒྲིག་བྱེད་པ། ཁུལ་ཁོངས་མཐུན་སྦྱོར་འཕེལ་རྒྱས་ཀྱི་འཐབ་ཇུས་ལག་བསྟར་ཟབ་མོ་བྱེད་པ། ནུས་རྒྱུ་གྲོན་ཆུང་དང་བཙོག་རྫས་ཉུང་འབུད་བྱེད་པ། སྐྱེ་ཁམས་ཁོར་ཡུག་སྲུང་སྐྱོབ། སྨན་བཅོས་འཕྲོད་བསྟེན་སྒྲིག་སྲོལ་གྱི་བཅོས་སྒྱུར་ཟབ་སྤེལ་བྱེད་པ་སོགས་ཀྱི་བྱ་བ་བཟང་བོར་བསྒྲུབས། ཁོང་གིས་གཞི་རྩ་སྲུང་བ་དང་གཞི་རིམ་ལ་ཤུགས་སྣོན་པ། རྐྱེན་སྲོལ་འཛུགས་པ་བཅས་སྨན་བཅོས་འཕྲོད་བསྟེན་བཅོས་སྒྱུར་བྱ་བའི་གཙོ་གནད་དུ་བཟུང་སྟེ། སྨན་བཅོས་འགན་སྲུང་དང་། སྨན་རྫས། སྨན་བཅོས་བཅས་ཕྱོགས་གསུམ་མཉམ་སྒུལ་བྱེད་པར་སྐུལ་འདེད་གནང་། འགན་སྲུང་རང་བཞིན་གྱི་བདེ་སྡོད་བཟོ་སྐྲུན་ཧུར་ཐག་གིས་སྤེལ་ནས། མི་དམངས་མང་ཚོགས་ཀྱི་བདེ་སྡོད་ལས་བརྩོན་ལ་ཡར་སྐུལ་གནང་། ཁོར་ཡུག་སྲུང་སྐྱོབ་ཀྱི་བགྲོད་ལམ་གསར་བ་འབད་བརྩོན་གྱིས་འཚོལ་ཞིབ་མཛད་དེ། གོང་འཕེལ་དུ་གཏོང་ཞོར་སྲུང་སྐྱོབ་བྱེད་པ་དང་སྲུང་སྐྱོབ་བྱེད་ཞོར་གོང་འཕེལ་དུ་གཏོང་རྒྱུ་རྒྱུན་འཁྱོངས་མཛད། 2012ལོའི་ཟླ11པར། བློ་མཐུན་ལི་ཁེ་ཆང་ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དང་པོའི་སྟེང་ཡང་བསྐྱར་ཀྲུང་དབྱང་ཆབ་སྲིད་ཅུའུ་ཡི་ཨུ་ཡོན་དང་རྒྱུན་ལས་ཨུ་ཡོན་དུ་བདམས། 2013ལོའི་ཟླ3པར་རྒྱལ་ཡོངས་དམངས་ཆེན་སྐབས་བཅུ་གཉིས་པའི་གྲོས་ཚོགས་ཐེངས་དང་པོའི་སྟེང་། ཁོང་ཉིད་རྒྱལ་སྲིད་སྤྱི་ཁྱབ་ཁང་གི་ཙུང་ལི་རུ་བསྐོས་པ་དང་། ཟླ་དེ་ནས་བཟུང་རྒྱལ་སྲིད་སྤྱི་ཁྱབ་ཁང་ཏང་ཙུའི་ཧྲུའུ་ཅིའི་འགན་བཞེས། རྙོག་འཛིང་ཆེ་བའི་རྒྱལ་ཁབ་ཕྱི་ནང་གི་གནས་བབ་ལ་དམིགས་ནས། བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་མགོ་ཁྲིད་བརྟན་པོའི་འོག་ཏུ། ཁོང་གིས་བརྟན་ཐོག་ཡར་འཕེལ་གྱི་བྱ་བའི་སྤྱིའི་དགོངས་གཞི་རྒྱུན་འཁྱོངས་དང་། འཐབ་ཇུས་ཀྱི་ངེས་ཤུགས་སྲུང་འཛིན་གནང་ནས། ཆེ་ཕྱོགས་སྙོམས་སྒྲིག་ཧུར་ཐག་གིས་འཐུས་ཚང་དུ་བཏང་བ་དང་། སྔོན་སྒྲིག་ཕྲ་སྙོམས་ལ་གཙིགས་འཛིན་དང་ཕྱོགས་ངེས་སྙོམས་སྒྲིག་ལ་གཙིགས་འཛིན་གནང་། དྲ་སྦྲེལ་རྒྱས་པ་ཞེས་པའི་འགུལ་སྐྱོད་གཏིང་ཟབ་ཏུ་སྤེལ་ནས། སྒུལ་ནུས་གསར་རྙིང་མྱུར་མོར་བརྗེ་སྤོར་གནང་། ཕྱི་ཕྱོགས་སྒོ་འབྱེད་ཀྱི་གཞི་རྩའི་རྒྱལ་ཇུས་རྒྱུན་འཁྱོངས་གནང་ནས། རྒྱུད་གཅིག་ལམ་གཅིག་གི་འཛུགས་སྐྲུན་ཏན་ཏིག་གིས་སྤེལ། སྲིད་གཞུང་གི་འགན་ནུས་ཁྲིམས་ལྟར་ཕྱོགས་ཡོངས་ནས་ལག་བསྟར་བྱེད་པར་སྐུལ་འདེད་གནང་ནས། མི་དམངས་ཡིད་ཚིམ་པའི་ཁྲིམས་སྐྱོང་སྲིད་གཞུང་དང་གསར་གཏོད་སྲིད་གཞུང་། སྤྱོད་གཙང་སྲིད་གཞུང་། ཞབས་ཞུ་རྣམ་པའི་སྲིད་གཞུང་བཅས་ཧུར་ཐག་གིས་འཛུགས་སྐྲུན་གནང་། 2017ལོའི་ཟླ10པར། བློ་མཐུན་ལི་ཁེ་ཆང་ཏང་གི་སྐབས་བཅུ་དགུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དང་པོའི་སྟེང་ཡང་བསྐྱར་ཀྲུང་དབྱང་ཆབ་སྲིད་ཅུའུ་ཡི་ཨུ་ཡོན་དང་རྒྱུན་ལས་ཨུ་ཡོན་དུ་བདམས། 2018ལོའི་ཟླ3པར་རྒྱལ་ཡོངས་དམངས་ཆེན་སྐབས་བཅུ་གསུམ་པའི་གྲོས་ཚོགས་ཐེངས་དང་པོའི་སྟེང་ཁོང་ཉིད་ཡང་བསྐྱར་རྒྱལ་སྲིད་སྤྱི་ཁྱབ་ཁང་གི་ཙུང་ལི་རུ་བསྐོས་པར་མ་ཟད། རྒྱལ་སྲིད་སྤྱི་ཁྱབ་ཁང་ཏང་ཙུའི་ཧྲུའུ་ཅིའི་འགན་བཞེས། བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་མགོ་ཁྲིད་བརྟན་པོའི་འོག་ཏུ། ཁོང་གིས་འཛམ་གླིང་གི་དུས་བབ་ལ་འགྱུར་ལྡོག་ཆེ་བ་དང་། པྲོག་གསར་གློ་ཚད་ཀྱི་བརྡབ་གསིག་ཐེབས་པ། རྒྱལ་ནང་གི་དཔལ་འབྱོར་ཉམས་རྒུད་དུ་གྱུར་པ་སོགས་ཀྱི་ཚོད་བགམ་སྣ་མང་ལ་ཁ་གཏད་འཇལ་ཏེ། བརྟན་ཐོག་ཡར་འཕེལ་གྱི་བྱ་བའི་སྤྱིའི་དགོངས་གཞི་རྒྱུན་འཁྱོངས་མཛད་པ་དང་། འཕེལ་རྒྱས་ཀྱི་འདུ་ཤེས་གསར་བ་ཆ་ཚང་ཞིང་ཡང་དག་ལ་ཕྱོགས་ཡོངས་ནས་ལག་བསྟར་མཛད་ཅིང་། འཕེལ་རྒྱས་ཀྱི་རྣམ་པ་གསར་བ་བསྐྲུན་པ་དང་། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གནང་ནས། འཕེལ་རྒྱས་དང་བདེ་འཇགས་ལ་གཅིག་གྱུར་གྱིས་བཀོད་སྒྲིག་གནང་བ་དང་། བརྟན་པོ་དྲུག་དང་འགན་སྲུང་དྲུག་གི་བྱ་བ་བསྟུད་མར་བཟང་བོར་སྒྲུབ་པ། འཕར་སྣོན་བརྟན་པར་བྱེད་པ་དང་བཅོས་སྒྱུར་ལ་ཡར་སྐུལ་བྱེད་པ། གྲུབ་ཚུལ་ལེགས་སྒྲིག་བྱེད་པ། དམངས་ཚིས་ལ་ཕན་འདོགས་པ། ཉེན་ཁ་སེལ་བ། བརྟན་འཇགས་ལ་སྐུལ་བ་བཅས་ཀྱི་བྱ་བ་སྣ་ཚོགས་གཅིག་གྱུར་གྱིས་སྤེལ་བ། རྒྱལ་ནང་གི་ནུས་ལྡན་དགོས་མཁོ་ཧུར་ཐག་གིས་རྒྱ་བསྐྱེད་པ། དཔལ་འབྱོར་འཁོར་སྐྱོད་ལུགས་མཐུན་གྱི་མཚམས་སུ་སྲུང་འཛིན་བྱེད་པ། གསར་གཏོད་ཀྱི་སྐུལ་ཁྲིད་ལ་བརྟེན་ནས་ཐོན་ལས་གྲུབ་ཚུལ་གྱི་ལེགས་སྒྱུར་རིམ་སྤོར་ལ་སྐུལ་འདེད་གཏོང་བ་བཅས་མཛད། མི་དམངས་ལྟེ་བར་འཛིན་པའི་འཕེལ་རྒྱས་བསམ་བློ་ལག་བསྟར་མཛད་དེ། ཧུར་ཐག་གིས་གཞི་རྩ་སྲུང་བ་དང་མཐའ་ཚད་སྐྱོར་བ། འདྲ་མཉམ་ལ་སྐུལ་བ་བཅས་མཛད་ནས། ལས་ཞུགས་དམིགས་བསལ་གྱི་སྲིད་ཇུས་ཕྱོགས་སྟོན་ལ་ཤུགས་བསྣན་པ་དང་། འགན་སྲུང་རང་བཞིན་གྱི་སྡོད་ཁང་གི་མཁོ་སྤྲོད་རྒྱ་བསྐྱེད་གནང་། དབུལ་ཐར་མཁྲེགས་གཏོར་ལ་སྐུལ་སྤེལ་གནང་བ་དང་། གྲོང་གསེབ་དར་སྤེལ་འཐབ་ཇུས་ལག་བསྟར་མཛད་དེ། དབུལ་ཐར་མཁྲེགས་གཏོར་གྱི་གྲུབ་འབྲས་སྲ་བརྟན་རྒྱ་བསྐྱེད་དུ་བཏང་། རི་སྔོ་ཆུ་དྭངས་ནི་གསེར་རི་དངུལ་རི་ཡིན་པའི་འདུ་ཤེས་ལག་བསྟར་མཛད་ནས། སྐྱེ་ཁམས་དཔལ་ཡོན་འཛུགས་སྐྲུན་ཐད་ཕན་འབྲས་མངོན་གསལ་བླངས།

རྒྱལ་སྲིད་སྤྱི་ཁྱབ་ཁང་གི་ཙུང་ལིའི་འགན་བཞེས་རྗེས། བློ་མཐུན་ལི་ཁེ་ཆང་གིས་ད་དུང་སྔ་གཞུག་ཏུ་རྒྱལ་སྲིད་སྤྱི་ཁྱབ་ཁང་བྱང་ཤར་ས་ཁུལ་སོགས་བཟོ་ལས་རྟེན་གཞི་རྙིང་བ་དར་རྒྱས་གཏོང་བའི་མགོ་ཁྲིད་ཚན་ཆུང་གི་ཚན་གཙོ་དང་། རྒྱལ་སྲིད་སྤྱི་ཁྱབ་ཁང་ནུབ་རྒྱུད་ས་ཁུལ་གསར་སྤེལ་མགོ་ཁྲིད་ཚན་ཆུང་གི་ཚན་གཙོ། རྒྱལ་ཁབ་ཚན་རྩལ་སློབ་གསོ་མགོ་ཁྲིད་ཚན་ཆུང་གི་ཚན་གཙོ། རྒྱལ་ཁབ་ནམ་ཟླའི་འགྱུར་ལྡོག་ལ་ཁ་གཏད་འཇལ་བ་དང་ནུས་རྒྱུ་གྲོན་ཆུང་དང་བཙོག་རྫས་ཉུང་འབུད་བྱ་བའི་མགོ་ཁྲིད་ཚན་ཆུང་གི་ཚན་གཙོ་སོགས་ཀྱི་འགན་ཞོར་དུ་བཞེས་ནས། ཚན་རྩལ་དང་སློབ་གསོ། སྐྱེ་ཁམས་སྲུང་སྐྱོབ་དང་བྱང་ཤར་ཕྱོགས་ཡོངས་ནས་དར་རྒྱས་སུ་གཏོང་བ། ནུབ་རྒྱུད་གསར་སྤེལ་ཆེན་པོ་སོགས་ཀྱི་ཁྱབ་ཁོངས་སུ་མཛད་པ་རྒྱ་ཆེར་བསྐྱངས། པྲོག་གསར་གློ་ཚད་བྱུང་རྗེས། བློ་མཐུན་ལི་ཁེ་ཆང་གིས་ཀྲུང་དབྱང་རིམས་ནད་ལ་ཁ་གཏད་འཇལ་བའི་བྱ་བའི་མགོ་ཁྲིད་ཚན་ཆུང་གི་ཚན་གཙོའི་འགན་བཞེས་ཏེ། ཏང་ཀྲུང་དབྱང་གི་ཇུས་ཆོད་བཀོད་སྒྲིག་ལག་བསྟར་དོན་འཁྱོལ་ནན་མོ་མཛད་པ་དང་། མི་དམངས་བླ་རུ་བཀུར་བ་དང་ཚེ་སྲོག་བླ་རུ་བཀུར་བ་རྒྱུན་འཁྱོངས་གནང་ནས། རིམས་ནད་འགོག་སྡོམ་དང་དཔལ་འབྱོར་སྤྱི་ཚོགས་འཕེལ་རྒྱས་ལ་གཅིག་གྱུར་གྱིས་བཀོད་སྒྲིག་བྱེད་པར་སྐུལ་འདེད་གཏོང་བར་དགེ་མཚན་ལྡན་པའི་གྲུབ་འབྲས་ཆེན་པོ་ལེན་གནང་མཛད། བློ་མཐུན་ལི་ཁེ་ཆང་གིས་ཀྲུང་གོའི་གནས་ཚུལ་ལ་རྐང་བཙུགས་ཏེ། སྤྱི་ཚོགས་རིང་ལུགས་ཀྱི་གཞི་རྩའི་དཔལ་འབྱོར་ལམ་ལུགས་རྒྱུན་འཁྱོངས་དང་འཐུས་ཚང་དུ་བཏང་བ་དང་། དཔལ་འབྱོར་སྒྲིག་སྲོལ་གྱི་བཅོས་སྒྱུར་ལ་བསྟུད་མར་སྐུལ་འདེད་གནང་ལ། སྤྱི་ཚོགས་རིང་ལུགས་ཁྲོམ་རའི་དཔལ་འབྱོར་གྱི་ཁ་ཕྱོགས་རྒྱུན་འཁྱོངས་མཛད་ནས། སྲིད་གཞུང་དང་ཁྲོམ་རའི་འབྲེལ་བ་ཐག་གཅོད་བཟང་བོ་མཛད་དེ། ཁྲོམ་རར་ཐོན་ཁུངས་སྒྲིག་བཀོད་ཁྲོད་དུ་ཐག་གཅོད་རང་བཞིན་གྱི་ནུས་པ་འདོན་དུ་བཅུག་པ་དང་། སྲིད་གཞུང་གི་ནུས་པ་སྔར་ལས་ལེགས་པར་བཏོན་ནས། ནུས་པ་ཅན་གྱི་ཁྲོམ་ར་དང་བྱས་པ་ཅན་གྱི་སྲིད་གཞུང་གཉིས་ཟུང་སྦྲེལ་སྔར་ལས་བཟང་བོ་བྱེད་པར་སྐུལ་འདེད་གནང་། ཁོང་གིས་སྲིད་གཞུང་གི་འགན་ནུས་བསྒྱུར་བ་དང་སྲིད་འཛིན་སྒྲིག་སྲོལ་བཅོས་སྒྱུར་ལ་བསྟུད་མར་སྐུལ་སྤེལ་གནང་ནས། ནོར་ཁྲལ་དང་དངུལ་རྩ། དངུལ་གཏོང་། ཚན་རྩལ་སོགས་ཁྱབ་ཁོངས་གཙོ་བོའི་བཅོས་སྒྱུར་ལ་གཅིག་གྱུར་གྱིས་བཀོད་སྒྲིག་མཛད་དེ། སྔར་ལས་དགེ་མཚན་ལྡན་ཞིང་རང་འགུལ་ཅན་གྱི་སྒོ་འབྱེད་འཐབ་ཇུས་ལག་བསྟར་མཛད་པ་དང་། ཁྱབ་རྒྱ་སྔར་ལས་ཆེན་པོ་དང་ཁྱབ་ཁོངས་སྔར་ལས་ཡངས་པོ། རིམ་པ་སྔར་ལས་ཟབ་མོ་བཅས་ཀྱི་སྒོ་ནས་ཕྱི་ཕྱོགས་སྒོ་འབྱེད་ལག་བསྟར་མཛད། བློ་མཐུན་ལི་ཁེ་ཆང་གིས་མི་དམངས་མང་ཚོགས་ལ་བརྩེ་སེམས་ཟབ་མོ་བཅངས་ཏེ། མང་ཚོགས་ཀྱི་ལས་ཞུགས་དང་སློབ་གསོ། སྡོད་ཁང་། སྨན་བཅོས། རྒན་གསོ་སོགས་ཕྱོགས་ཀྱི་འབུར་ཐོན་དཀའ་ངལ་ཧུར་ཐག་གིས་ཐག་གཅོད་གནང་བ་དང་། དམངས་ཚིས་ཀྱི་མཐའ་ཚད་བརྟན་པོར་སྐྱོར་ནས། མི་དམངས་མང་ཚོགས་ཀྱི་ཐོབ་སྣང་དང་སྐྱིད་སྣང་། བདེ་སྣང་བཅས་རྒྱུན་མ་ཆད་པར་མཐོར་འདེགས་གནང་།

2023ལོའི་ཟླ3པར། བློ་མཐུན་ལི་ཁེ་ཆང་གིས་རྒྱལ་སྲིད་སྤྱི་ཁྱབ་ཁང་གི་ཙུང་ལིའི་འགན་བཞེས་མཚམས་བཞག མགོ་ཁྲིད་ལས་གནས་ལས་བབས་རྗེས། ཁོང་གིས་བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་མགོ་ཁྲིད་ལ་མཐའ་གཅིག་ཏུ་གོང་བཀུར་དང་རྒྱབ་སྐྱོར་གནང་བ་དང་། ཏང་དང་རྒྱལ་ཁབ་ཀྱི་ལས་དོན་འཕེལ་རྒྱས་ལ་ཐུགས་ཁུར་ཟབ་བཞེས་གནང་ཞིང་། ཏང་སྲོལ་སྲིད་གཙང་འཛུགས་སྐྲུན་དང་རུལ་སུངས་ལ་རྒོལ་བའི་འཐབ་རྩོད་ལ་བློ་བརྟན་འགྱུར་མེད་ཀྱིས་རྒྱབ་སྐྱོར་མཛད།

བློ་མཐུན་ལི་ཁེ་ཆང་གི་སྐུ་ཚེ་ཧྲིལ་བོ་ནི་གསར་བརྗེའི་སྐུ་ཚེ་ཧྲིལ་བོ་དང་འབད་འཐབ་ཀྱི་སྐུ་ཚེ་ཧྲིལ་བོ། འོད་སྟོང་འབར་བའི་སྐུ་ཚེ་ཧྲིལ་བོ་ཡིན་ཞིང་། བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུས་པའི་སྐུ་ཚེ་ཧྲིལ་བོ་ཡིན་ལ། གུང་ཁྲན་རིང་ལུགས་ཀྱི་ལས་དོན་ཐད་ནུས་ཤུགས་ཅི་ཡོད་བཏོན་པའི་སྐུ་ཚེ་ཧྲིལ་བོ་ཡིན། ཁོང་ཉིད་སྐུ་གཤེགས་པ་ནི་ཏང་དང་རྒྱལ་ཁབ་ཀྱི་གྱོང་གུད་ཆེན་པོ་ཡིན། ང་ཚོས་སྐྱོ་སྣང་ཡོད་ཚད་སྟོབས་ཤུགས་སུ་བསྒྱུར་ནས། ཁོང་གི་གསར་བརྗེའི་ཐུགས་དགོངས་དང་། བླ་མེད་མཛད་པ། སྤྱོད་ཚུལ་བཟང་བོ་བཅས་ལ་སློབ་སྦྱོང་བྱས་ཏེ། བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་མཐའ་འཁོར་དུ་མཐུན་སྒྲིལ་སྔར་ལས་དམ་པོ་བྱས་ནས། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རླབས་ཆེན་དར་ཆ་མཐོན་པོར་སྒྲེང་བ་དང་། ཞི་ཅིན་ཕིང་གི་དུས་རབས་གསར་བའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་དགོངས་པ་ཕྱོགས་ཡོངས་ནས་ལག་བསྟར་བྱེད་པ། གཏན་ཕབ་གཉིས་ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་ཟབ་མོ་ལེན་པ། འདུ་ཤེས་བཞི་ཇེ་དྲག་ཏུ་གཏོང་བ། རང་རྟོན་བཞི་ཇེ་བརྟན་དུ་གཏོང་བ། སྲུང་སྐྱོང་གཉིས་སྒྲུབ་པ་བཅས་བྱས་ཏེ། ཡིད་ཆེས་བརྟན་པོ་དང་སེམས་ཤུགས་གཅིག་མཐུན། ངར་སེམས་ཆེར་སྐྱེད་དང་དཔའ་སྐྱེད་མདུན་སྐྱོད་ཀྱིས་ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་སྟོབས་ལྡན་རྒྱལ་ཁབ་ཕྱོགས་ཡོངས་ནས་འཛུགས་སྐྲུན་དང་མི་རིགས་བསྐྱར་དར་གྱི་རླབས་ཆེན་ལས་དོན་ལ་ཕྱོགས་ཡོངས་ནས་སྐུལ་འདེད་གཏོང་ཆེད་མཐུན་སྒྲིལ་འབད་འཐབ་བྱེད་དགོས།

བློ་མཐུན་ལི་ཁེ་ཆང་ཇི་སྲིད་བར་དུ་གནས་གྱུར་ཅིག