མིང་མེད།
པད་ཀོར།
༡
ངས་རང་ཉིད་ལ་རྟག་ཏུ་གླུ་ལེན་བཞིན་ཡོད།
ལན་རེར་མཚན་མོའི་སྐར་མདའ་ལ་བལྟས།
རྨོ་ལགས་ཀྱི་ལྷ་སྒྲུང་ནང་གི་མི་དག་ལ་རྒྱང་རིང་དང་བརྩེ་དུང་ཡོད་མེད་དྲིས།
གྲོང་ཁྱེར་ནི་འཚོ་བ་རོལ་ས་ཡིན་མིན་ལ་འདང་བརྒྱབ།
སྐྱེ་འཆིའི་བར་དུ་དོན་སྙིང་གིས་ཟིན་པ་ག་ཙམ་ཡོད་མེད་བཙལ།
རྣམ་དག་གིས་ལས་འབྲས་སྙོར་མཁན་ལ་མཛུབ་རྩིས་བརྒྱབ།
བལྟས་འཕྲོར་ལུས་པའི་དཔེ་དེབ་ཀྱི་ཤོག་གྲངས་བརྩིས།
གཏི་མུག་དང་འདོད་པས་ཟིན་པའི་ཉིན་མཚན་ལ་མིག་ཆུ་བཏང་།
ཁྱོད་ཀྱིས་མི་ཤེས་པ་ཐག་གིས་ཆོད་དེ།
འཇིག་རྟེན་གྱི་དབང་དགོས་ཤིང་མི་དགོས་པ་དག་ལ་ངས་ཀྱང་ཧབ་ཐོབ་བྱས་མྱོང་།
༢
ངས་ཁྱོད་ཀྱིས་སྙན་ངག་འབྲི་བར་སྒུག
ངས་ད་དུང་ཁྱོད་ཀྱིས་ང་ལ་གཅེས་ཨེ་ཡོང་ལ་རེ།
ངས་ཁྱོད་རང་མི་སྣ་བསམ་ཤེས་ཅན་ཞིག་ཏུ་གྱུར་བར་ཉན།
ངས་ཁྱོད་ཀྱིས་རྒྱུ་འབྲས་ཀྱི་དཀར་ནག་ལ་ཉེ་རིང་མི་བྱེད་ངེས་བསམ།
༣
འཁོར་བ་སྡུག་བསྔལ་གྱི་བག་ཆགས་སུ་སྐྱེས།
ངས་རང་ཉིད་ཡང་ཡང་དེ་ཉིད་ཁོར་ནར་འཇུག་རྩིས་བྱེད།
ང་རང་ཁེར་རྐྱང་ལ་སྐྲག་གིན་ཡོད་པ་འདྲ་ཡང་།
ཁེར་རྐྱང་ཁོ་ནས་ང་ལ་ཐོབ་བྱ་མང་དུ་བསྐྱེད་བྱུང་།
བུ་མོ། ཁེར་རྐྱང་ལ་སྐྲག་མ་གནངས།
མི་ནི་སྐྱེ་འཆི་གཉིས་ཀ་ཁེར་རྐྱང་གིས་འཇུག་འགྲོ།
༤
གྱོན་པ་ཡང་ཡང་བརྗེ་མཁན་གྱི་མི་དེ་རྙེད་མ་སོང་མོད།
འཕྱ་ལད་ཡང་ཡང་རྒྱག་མཁན་ཞིག་ནི་དངོས་གནས་འདུག
ངས་ཕ་ཡུལ་གྱི་སུག་ལག་གཡར་ཏེ།
གྲོང་ཁྱེར་གྱི་དབུས་དང་མཐའ་རང་གི་རྗེས་རིས་བརྐོས།
པ་ལགས་ཀྱིས་ང་རང་ལག་གཏོང་དུ་བཏང་མེད་དེ།
ཐུགས་གཤིས་མི་མཐུན་པ་ཚོ་དང་རིང་དུ་སྡོད་ཟེར།
ངས་རྨོ་མོས་བསླབས་པའི་མགུར་གླུ་དེ་ཀུན་ལ་བླངས།
ཐོས་པ་དགའི་བྱིན་རླབས་དེ་ཀུན་ལའང་འཇུག་ངེས་བསམ་ཀྱང་།
ཁོ་ཚོའི་མ་ཡེངས་བློ་རྒོད་རྣོ་པོ་དེ་རང་སྟེང་དུ་བཞག་འདུག
ཁ་དང་ལག་པ་ཁོ་ན་གཞན་ལ་སྟོན་བཞིན།
༥
ཕོ་མོའི་བར་དུ།
ང་ཚོས་བྱད་བཞིན་མི་གཅིག་པ་བརྒྱ་ཕྲག་སྟོན་མོད།
ཏག་ཏག་ཉམ་དམའ་བ་དེར་གཡོལ་བཞིན་འགྲོ་ལ།
རང་གི་སྐྱོན་གཤིས་འགའ་ལའང་ཁས་མི་ལེན།
༦
འཁོར་བའི་པང་དུ་ཟགས་རྗེས།
ད་གཟོད་ང་ཚོས་ངོ་སོ་ཟེར་བ་མི་གླེང་།
དཀའ་སྡུག་ལའང་ཞེད་སྣང་གི་ངོ་མི་སྟོན།
ཞུ་བ་དང་སྤྲེལ་ལད་བྱེད་སར་ལྕེ་རྩེ་སྣར་རྐྱང་བྱེད།
|