རྭ་རྒྱའི་མཐར་ཕྱིན་སློབ་མ་འོས་སྦྱོར། (བཅུ་གསུམ་པ) སྨན་པ་འཇམ་དབྱངས་ཀླུ་སྒྲུབ།

༼ཤ་སྦྲང་དགོན་དང་ནག་བཟའ་སྡེ་བའི་ལོ་རྒྱུས་ཕྱི་རབས་གཞོན་ནུའི་རྣ་རྒྱན༽ ༼ནག་བཟའི་རུས་མཛོད་མེས་པོའི་ཞབས་རྗེས་དང་རུས་མཛོད་རྒྱས་པ་པདྨའི་ཕྲེང་བ༽ ༼སྐར་ནག་རྩིས་དང་འབྲེལ་ཤེས་བྱའི་རྣམ་གྲངས་སྔོན་མེད་གཏམ་གྱི་རང་སྒྲ༽ ༼མེ་བཙའ་དང་གཏར་ག་བྱིས་པའི་རྣ་པྲ་སོགས་ཀྱི་ཟིན་བྲིས་བདུད་རྩིའི་བུམ་བཟང༽ ༼གསོ་རིག་རྒྱུད་བཞིའི་ཚིག་འགྲེལ་དཔལ་ལྡན་བླ་མའི་ཞལ་རྒྱུན༽ ༼ས་དཔྱད་ལ་ཉེ་བར་མཁོ་བའི་ཤེས་བྱའི་རྣམ་གྲངས༽ ༼རི་མོ་སྣ་ཚོགས་ཕྱོགས་བསྒྲིགས་མིག་གི་དགའ་སྟོན༽ ༼བླ་མ་ལྔ་བཅུ་བའི་རེག་ཟིག་དད་པའི་གསོས་སྨན༽ ༼སྨན་རྩིས་སྟག་བླ་ནོར་བུའི་གསུང་རྒྱལ་བའི་སྐྱེས་རབས་དང་འབྲེལ་བའི་སྨན་གྱི་སྨོན་ལམ་གྱི་འགྲེལ་བ་སྙིང་གི་ནོར་བུ༽ ༼ཟིན་ཏིག་གཅེས་བཏུས་ཀྱི་ཚིག་འགྲེལ་ཐོར་བུ་ལྷ་རྗེ་གཞོན་ནུའི་འགུལ་རྒྱན༽ ༼སེམས་སེམས་བྱུང་གི་བརྗེད་བྱང་ཕན་བདེའི་ལམ་སྟོན༽༼རྩིས་ཀྱི་ཟིན་བྲིས་བླངས་དོར་སྟོན་པའི་མེ་ལོང༽ ༼ ལྷ་སའི་གསོལ་འདེབས་བདེ་ཆེན་ཞིང་དུ་འདྲེན་པའི་ལྕགས་ཀྱུ་ཞེས་བྱ་བའི་འགྲེལ་བ་དད་པའི་རྒྱ་མཚོ་སྐྱོམ་པའི་རང་སྒྲ༽ ༼དག་པར་བྱེད་པའི་སྡེབ་སྦྱོར་རིན་ཆེན་རྒྱ་མཚོའི་འགྲེལ་བ་བྱིས་པ་དགའ་བྱེད༽ ༼སྲུང་འཁོར་འདོགས་སྟངས་ཀྱི་བསྙེལ་ཟིན་འདོད་འབྱུང་ནོར་བུ༽༼ནག་རྩིས་ཀྱི་ཚིག་འགྲེལ་ཐོར་བུ་བྲིས་དྲན་པའི་གསལ་འདེབས༽ ༼དཔྱད་རྩོམ་ཕྱོགས་བསྒྲིགས༽ ༼ཆོ་ག་དང་གསོལ་མཆོད་ཕྱོགས་བསྒྲིགས༽༼གུང་ཐང་སློབ་གཉེར་བསླབ་བྱའི་འགྲེལ་བ་བྱིས་པའི་རྩེད་འཇོ༽ ༼གསོ་དཔྱད་སྨན་ཀྱི་སྐོར་གྱི་ཤེས་བྱའི་རྣམ་གྲངས་ཨ་རུའི་ཐང་མ༽ ༼མདོ་སྔགས་ཀྱི་གཞུང་དུ་མ་ལས་བཏུས་པའི་ཚིག་འགྲེལ་སྣ་ཚོགས་ནོར་བུའི་ཀན་མཛོད༽ ༼ཤ་སྦྲང་དགེ་བཤེས་ཀྱི་བྱུང་བརྗོད་པ་དད་པའི་གསོས་སྨན་སོགས་ལོ་རྒྱུས་ཀྱི་སྐོར་སྔོན་བྱུང་གཏམ་གྱི་གཏེར་མཛོད༽ ༼གུང་བསླབ་བྱའི་ཚིག་འགྲེལ་ཐོར་བུ༽ ༼ལམ་ཁྲིད་འཇམ་དཔལ་ཞལ་ལུང་གི་ཟིན་བྲིས་དོན་གཉིས་ལྷུན་གྲུབ༽ ༼གཡུ་ཐོག་ཤོག་དྲིལ་སྐོར་གསུམ་བཤད་ཁྲིད་ཀྱི་ཟིན་བྲིས་འཚོ་བྱེད་ཞལ་ལུང༽ ༼དབང་མི་ཏྲ་བརྒྱ་རྩ་ཐོབ་སྐབས་ཀྱི་གསུང་བཤད་ཟིན་བྲིས་གསང་ཆེན་སྒོ་བརྒྱ་འགྱེད་པའི་ལྡེ་མིག༽སོགས་པར་དུ་འཁོད་པ་དང་མ་འཁོད་པའི་གསུང་རྩོམ་མང་བོ་བཞུགས།

དབང་ལུང་ཁྲིད་གསུམ་སོགས་ཐོབ་ཚུལ་གྱི་སྐོར།

ཆུང་དུས་ཁུ་བོ་བློ་བཟང་འོད་ལྡན་གྱི་དྲུང་ནས་ཀློག་བསླབས། དགེ་སློང་བློ་བཟང་མཁས་བཙུན་དང། ཨ་ལགས་བློ་བཟང་ཐུབ་བསྟན་རྣམ་གཉིས་ལས་ཆོ་ག་ཆོས་སྤྱོད་སོགས་བསླབས། བྱ་ཐང་ཨ་ཁུ་བློ་བཟང་ཚང་གི་མདུན་ནས་ནཱ་རོ་མཁའ་སྤྱོད་མའི་དབང་དང་། གཅོད་དབང་སོགས་ཐོབ། ཨ་ཚོགས་དགེ་བཤེས་ཚང་གི་མདུན་ནས། མཁའ་སྤྱོད་མའི་དབང་དང་། དུར་ཁྲོད་བདག་་པོའི་རྗེས་གནང་སོགས་ཐོབ། གཡེར་གཤོང་ཆོས་པ་རིན་ཆེ་འཇམ་དབྱངས་དགེ་འདུན་རྒྱ་མཚོའི་ཞལ་སྔ་ནས། ཡོན་ཏན་གཞིར་གྱུར་མའི་ཁྲིད་དང་། འཇིགས་བྱེད་དཔའ་བོ་གཅིག་པའི་དབང་། རྒྱུད་རྟོགས་བདུན་རྟོགས་གསུམ་གྱི་ལུང་བཅས་ཐོབ།

ཨ་ལགས་བྲག་དཀར་རིན་པོ་ཆེ་འི་མདུན་ནས། དུས་འཁོར་སྤྱི་བཀའི་དབང་། ཚེ་དཔག་མེད་ཀྱི་དབང་། བག་ཙེའི་རྗེས་གནང་སོགས་ཐོབ། ཨ་ལགས་སྨད་་སོགས་ཚང་གི་མདུན་ནས། རྟ་མགྲིན་ཡང་གསང་གི་དབང་དང་འཇིགས་བྱེད། ཐུགས་རྗེ་ཆེན་པོ་རྒྱལ་བ་རྒྱ་མཚོ། མི་འཁྲུགས་པ། སྨན་བླ་སོགས་ཀྱི་དབང་དང་རྗེས་གནང་། རྟ་མགྲིན་ཡང་གསང་གི་དབང། སྙིང་བོ་བཅུད་བསྡུས་དང། མགོན་ཆོས་སོགས་ཀྱི་ལུང་ཐོབ། གཉན་ཁྲོད་ཆུ་མིག་བརྒྱ་རྩ་དང་། རྗེ་བཙུན་རྡོ་རྗེ་རྣལ་འབྱོར་མའི་བསྙེན་སྒྲུབ་བཅུ་ཆའི་སྦྱིན་བསྲེག་དང་བཅས་པ། རྟ་མགྲིན་ཡང་གསང་གི་བསྙེན་པ། འཇིགས་བྱེད་ཀྱི་བསྙེན་པ། སྔོན་འགྲོ་ཐེངས་གཉིས་སོགས་སྒྲུབ་པ་ལ་གཞོལ། གཅིག་དགུ་གྱ་ལྔ་ལོར་ཨ་ལགས་ལྕང་སྐྱ་རིན་པོ་ཆེའི་ཞལ་སྔ་ནས། པྲ་ཏིའི་སུམ་རྟགས་དང། གུང་ཐང་བསླབ་བྱ་ཁ་ཚང་སོགས་ཀྱི་ཁྲིད་ཐོབ།

སློབ་དཔོན་འཇིགས་མེད་རྒྱལ་མཚན་དང། བཛྲ་ཚུལ་ཁྲིམས། ལྡོང་ཡོན་ཏན་རྒྱ་མཚོ། རྭ་རྒྱའི་གྲགས་པ་བཟང་བོ། སེ་ར་ཐོགས་མེད། རྡོ་སྦིས་གཅོད་པ་ཚེ་རིང་། མཛོད་ཚ་ཨ་བུ་དཀར་ལོ། རྒན་ཚེ་བཀྲ། རྒན་ཁ་ལོ་སོགས་ཀྱི་མདུན་ནས། སུམ་རྟགས་སྙན་ངག་སྨན་རྩིས་སོགས་ལ་སྦྱངས། དགེ་རྒན་རྣམ་པའི་གསུང་བཀོད་ལྟར་ལོ་གཅིག་ཙམ་ལ་བྱིས་པའི་འཛིན་གྲྭ་གཅིག་ལ་ཀ་ཁ་སློབ་རོགས་བྱས། མཐར་ཕྱིན་རྗེས་མཛོད་དགེ་ཨ་ཁུ་བསྟན་ཚང་གི་མདུན་ནས་རྒྱུད་བཞིའི་ཁྲིད་ལུང་ཆ་ཚང་གསན། བོད་ལྗོངས་སྨན་རྩིས་ཁང་གི་རྒན་བསྟན་འཛིན་བཀྲ་ཤིས་ཚང་གི་མདུན་ནས་འགྲེལ་བ་ཟླ་ཟེར་སོགས་པོད་བདུན་གྱི་ལུང་ཐོབ།

རྒན་དབང་འདུས་ཀྱི་མདུན་ནས་རྒྱུད་བཞི་དང། ཀོང་སྤྲུལ་ཟིན་ཏིག་གི་ཁྲིད་རྒྱས་པ་དང་ལུང་བཅས་ཐོབ། རྒན་ཚེ་བཀྲ་ཚང་གི་མདུན་ནས་རྒྱུན་མཐོང་ནད་ཀྱི་རྟགས་དང་བཅས་ཐབས་བཤད་པ་བློ་གསལ་དགའ་སྟོན་དང། ཟིན་ཏིག རྒྱུད་བཞིའི་ཉེས་གསུམ་གསོ་བ། ཨ་ལགས་ཤིང་བཟའ་ཚང་གི་གསོ་རིགས་གི་ཟིན་བྲིས་སོགས་ཀྱི་ཁྲིད་ཐོབ། རྒན་ཨ་བུ་དཀར་ལོ་ཚང་གི་མདུན་ནས། གཡུ་ཐོག་མཁའ་འགྲོ་སྙིང་ཐིག་གི་དབང་ལན་བདུན་དང་། ཁམས་གཙང་གསོ་རིགས་མན་ངག་མྱོང་བྱང་ཕྱོགས་བསྒྲིགས་ཀྱི་ལུང་ཚར་གསུམ། བྱིས་པའི་རྣ་པྲ་དང་མི་ཕམ་བྱང་ཁོག་ཡུལ་ཐིག་གི་ཁྲིད། རྡོ་གྲུབ་མགྱོགས་རྩིས་ཀྱི་ཁྲིད། ནད་གདོན་རིམས་ཡམས་སྲུང་བའི་མན་ངག་གཅེས་བསྒྲིགས་ཀྱི་ཁྲིད། ལྷ་རིས་ཀྱི་ཁྲིད། མེས་ཞལ་དང་། བེེ་སྔོན། མན་ངག་བཀའ་རྒྱ་མ། མན་ངག་ལྷན་ཐབས་ལྡེ་མིག་དང་བཅས་པ། གཡུ་ཐོག་ཆ་ལག་བཅོ་བརྒྱད་སོགས་ཀྱི་ལུང་ཐོབ། འཇུ་མི་ཕམ་ཀྱི་གསོ་རིགས་བསྟན་པ་རྒྱས་པའི་སྨོན་ལམ་གྱི་འགྲེལ་བའི་ཁྲིད། རྩ་རྒྱུད་དང། གསོ་བྱེད་ཐབས། བྱ་བྱེད་སྨན་པ། ཕྱི་མ་རྒྱུད་ཆ་ཚང་བཅས་ཀྱི་ཁྲིད་ཐོབ། རྒན་ཁ་ལོ་ཚང་གི་མདུན་ནས། རྩ་མདོ་དང་ཆུ་མདོའི་ཁྲིད། ལུམས་ཀྱི་ལག་ལེན་དང་བཅས་པ་ཐོབ། རྒན་གཡང་དར་ཚང་གི་མདུན་ནས། བཤད་རྒྱུད་དང་། མན་རྒྱུད། ཁོང་ནད་གསོ་བ། ཚ་བ་གསོ་བ་བཅས་ཀྱི་ཁྲིད་ཐོབ།

དགེ་རྒན་བཀའ་དྲིན་ཅན་ཏིང་འཛིན་ཚང་གི་ཞལ་སྔ་ནས། གཡུ་ཐོག་སྙིང་ཐིག་གི་དབང་དང་། རྩ་ཐིག་རླུང་གསུམ་གྱི་ཁྲིད། ཟླ་རྒྱས་འགྲེལ་ཆེན་གྱི་ཁྲིད། ཐུར་མའི་འགྲེལ་བའི་ཁྲིད། ཁམས་གཙང་ཚང་དང་། སྨན་རྩིས་སྟག་བླ་ནོར་བུའི་སྨན་ཡིག་གི་ཁྲིད་ལུང་ཆ་ཚང་། རྒྱུད་བཞིའི་ཁྲིད་ལུང་ཆ་ཚང་། བདུད་རྩི་བུམ་པའི་དབང་དང་། བདུད་རྩི་བུམ་པ་སོགས་གཉན་རིམས་བཅོས་སྐོར་གྱི་ཁྲིད་ཆ་ཚང་། བྱང་ལུགས་དངུལ་ཆུ་བཙོ་བཀྲུ་ཆེན་མོའི་ལག་ལེན་ཆ་ཚང་། ཙནྡན་མར་ཁུའི་ལག་ལེན། གཡུ་ཐོག་སྙིང་ཐིག་ཆོས་སྐོར་སོགས་ཀྱི་ལུང་ཐོབ། གཡུ་ཐོག་ཤོག་དྲིལ་སྐོར་གསུམ་དང་། དེབ་ཆིངས་སྒྱོགས་གསུམ་སོགས་ཀྱི་ཁྲིད་ཐོབ། མཁན་སྤོས་དར་རིན་པོ་ཆེའི་མདུན་ནས། མན་ངག་བྱེ་བ་རིང་བསྲེལ་སོགས་སྨན་རྩིས་གཉིས་ཀྱི་སྐོར་པོད་ཉི་ཤུ་རྩ་སྟོད་ཀྱི་ལུང་ཐོབ། སྨན་བླའི་དབང་། ལོ་གྱོན་མའི་དབང་། བདུད་རྩི་བུམ་པའི་དབང་། ཨོ་རྒྱན་སྨན་བླའི་དབང་སོགས་ཐོབ།

བླ་མ་རིན་པོ་ཆེ་ཨ་ཁུ་དཔལ་ལྡན་ཚང་གི་མདུན་ནས། ལམ་ཁྲིད་འཇམ་དཔལ་ཞལ་ལུང་གི་ཁྲིད། ལམ་རིམ་འབྲིང་བོའི་ཁྲིད། དབང་མི་ཊྲ་བརྒྱ་རྩ། རིགས་གསུམ་སྤྱི་སྒྲུབ་ཀྱི་རྗེས་གནང་སོགས་ཐོབ། ཨ་ཁུ་གྲགས་པ་ཚང་གི་མདུན་ནས། རིན་འབྱུང་བརྒྱ་རྩ་དང་། སྒྲུབ་ཐབས་ཆ་ཚང་གི་ལུང་ཐོབ། བླ་བྲང་ཨ་ཁུ་དགེ་འདུན་རྒྱ་མཚོ་ཆུང་བ་ཚང་གི་མདུནནས། ཁྲོས་མའི་ཞི་དབང་དང་། དྲག་དབང་། ཁྲོས་མའི་ཆོ་ག་ཆ་ཚང་། མ་ཅིག་རྣམ་བཤད་བཅས་ཀྱི་ལུང་། གཏོར་མ་བརྒྱ་རྩའི་ཁྲིད་སོགས་ཐོབ།

གསལ་བཤད།
གངས་ལྗོངས་ཤེས་རིག་ནོར་བུའི་སློབ་གླིང་གི་དྲ་བར་ཆེད་དུ་སློབ་གླིང་འདིའི་ཕུལ་བྱུང་མཐར་ཕྱིན་སློབ་མ་རྣམས་འོས་སྦྱོར་བྱེད་ཀྱིན་ཡོད་པས། མཐར་ཕྱིན་འཛིན་གྲྭ་སོ་སོའི་སྤྱི་ཚོགས་སྟེང་གཟེངས་ཐོན་གྱི་མཐར་ཕྱིན་སློབ་མ་དག་སློབ་ཚོགས་གཞུང་ལས་ཁང་དུ་འོས་སྦྱོར་གནང་རོགས་ཞུ།
སློབ་ཚོགས་གཞུང་ལས་ཁང་གི་ཁ་པར་ཨང་གྲངས།
15283703999
15109745084

སྤྱིའི་ལྟ་སྐུལ་བ། སློབ་གྲྭའི་དབུ་བཞུགས་ལྷན་ཚོགས།
གཙོ་སྐྱོང་སྡེ་ཁག ཐོན་མིའི་སློབ་ཚོགས།
དོ་དམ་པ། ཁཱ་ཤེས་རབ་རྒྱ་མཚོ།
ཞིབ་དཔྱད་པ། ཁཱ་ཤེས་རབ་རྒྱ་མཚོ།
རྩོམ་སྒྲིག་པ། འབའ་སྣང་གྲོལ།
རྩོམ་སྒྲིག་ཨུ་ཡོན། འོད་ཟེར་བཟང་བོ། བསོད་ནམས་རབ་སྣང་། འཕྲིན་ལས་ཉི་མ། བན་ཤུལ་འཇམ་དབྱངས་ཡེ་ཤེས། དམ་ཆོས་ཕུན་ཚོགས། སྦྲ་ནག་འཇིགས་མེད་རྡོ་རྗེ།