1 ངའི་མིང་ལ་དོན་འགྲུབ་ཟེར། ཕ་ཡུལ་ཚ་ཁོ་ཁྲོ་ཆུ་ནས་ཡིན། དོ་ནུབ་ང་ལ་དུས་ཚོད་སྟོང་བ་ཡོད། ཆུང་མ་དང་ཕྲུ་གུ་གཉིས་ནང་ལ་མེད། ཁོང་ཚོ་ཆུང་མའི་ཕ་མའི་ནང་དུ་ཕྱིན་སོང་།དེ་བས་ དོ་ནུབ་ང་རང་གིས་བྱིས་པ་གསོ་སྐྱོང་བྱས་པའི་ཉམས་མྱོང་དང་བསམ་ཚུལ་ཅུང་བཤད་རྒྱུ་ཡིན།

ང་རང་ལོ་བཅུ་བདུན་བར་ཚ་སྐད་མ་གཏོགས་ཨ་མདོའི་སྐད་མི་ཤེས། ལོ་བཅུ་བདུན་སྟེང་དམུ་དགེ་དགོན་པར་གྲྭ་བ་བྱས་པ་ཡིན། དམུ་དགེ་དགོན་པ་ནས་བོད་ཡིག་སྦྱོང་ཞོར་དུ་ཨ་མདོའི་སྐད་ཤེས་སོང་། དེ་ནས་བླ་བྲང་བཀྲ་ཤིས་འཁྱིལ་ལ་སོང་སྟེ་ལོ་ལྔ་ལྷག་ལ་རི་མོ་སྦྱངས་བ་ཡིན། ཕྱིས་སུ་རྒྱ་གར་ལ་སོང་ནས་ལོ་བདུན་བརྒྱད་ཅིག་ལ་སློབ་སྦྱོང་བྱེད་ཞོར་དུ་རི་མོ་བྲིས་ནས་བསྡད་པ་ཡིན།

༢༠༠༥ལོར་བོད་ཀྱི་རི་མོ་བ་ཁ་ཤས་དང་ལྷན་དུ་ཨ་རི་དང་ཁ་ན་ཌའི་ནང་དུ་བོད་ཀྱི་རིག་གཞུང་འགྲེམས་སྟོན་གྱི་བྱེད་སྒོ་ཞིག་ལ་མཉམ་ཞུགས་བྱས་པ་ཡིན། ང་ཚོས་གྲོང་ཁྱེར་མང་པོ་ཞིག་གི་ནང་རིག་གཞུང་འགྲེམས་སྟོན་གྱི་སྐོར་བསྐྱོད་བྱེད་དུས་བོད་པ་གཞོན་སྐྱེས་མང་པོར་ཐུག་སོང་། གཞོན་སྐྱེས་ལ་ལས་བོད་སྐད་བཤད་ཤེས་ཀྱི་འདུག  ལ་ལས་བོད་སྐད་བཤད་ཤེས་ཀྱི་མི་འདུག ཡིན་ནའང་ཚང་མ་བོད་ལ་ཞེན་ཁོག་ཡག་པོ་ཡོད་པའི་ཚོར་སྣང་བྱུང་། ཐེངས་ཤིག་ལ་བོད་པ་གཞོན་སྐྱེས་སྐོར་ཞིག་དང་ལྷན་དུ་ཁ་བརྡ་བྱེད་སྐབས་བརྡ་མ་འཕྲོད་པའི་དཀའ་ངལ་བྱུང་སྟེ་ཕྱི་རྒྱལ་གྱི་བུད་མེད་ཅིག་གིས་སྐད་བསྒྱུར་བྱས་པ་རེད།  ཁོང་ཚོ་བྱིས་པ་ཡིན་དུས་ཕ་མས་བོད་སྐད་བཤད་མ་སོང་ཟེར།

རིག་གཞུང་འགྲེམས་སྟོན་སྐོར་བསྐྱོད་མཇུག་རྫོགས་པ་དང་ང་ཁ་ན་ཌའི་རྒྱལ་ཁབ་ཏུ་བསྡད་པ་ཡིན།  ཁ་ན་ཌའི་ནང་དུ་སློབ་གྲྭར་འགྲོ་ཞོར་དུ་ཕྱི་རྒྱལ་གྱི་བུད་མེད་ཅིག་ལ་གྲོགས་བསྒྲིགས་ཏེ་ལོ་གསུམ་ལ་མཉམ་དུ་བསྡད་པ་ཡིན། ངེད་གཉིས་ཀྱི་བར་ལ་བརྩེ་དུང་ཆགས་སོང་། སྐབས་དེར་ངའི་སེམས་ལ་ད་འགྲིག་མ་སོང་། མོ་དང་མགྱོགས་པོར་ཁ་འབྲལ་ཐབས་མ་བྱས་ན། དུས་ཡུན་རིང་བོ་འགོར་དུས་ཁ་འབྲལ་ཐུབ་ས་མ་རེད་དྲན་སོང་། སྐབས་དེར་ངེད་གཉིས་འཆམ་པོ་དང་སྐྱིད་པོ་ཡོད།  ཡིན་ཡང་སྐབས་དེར་ང་ནི་རིགས་རྒྱུད་གཙང་མ་སྤེལ་རྒྱུ་གལ་ཆེན་ལ་བརྩི་མཁན་ཞིག་ཡིན།   དེ་ནས་ངས་གྲོགས་མོར་ཁ་འབྲལ་འདོད་ཡོད་པའི་གནས་ཚུལ་དྲང་མོར་བཤད་པ་ཡིན། མོས་བློ་ཕམ་དང་བཅས་བཤད་རྒྱུར།  མོས་ང་ལ་སྤྲད་པའི་བརྩེ་དུང་དེ་གཙང་མ་ཡིན་པ་དང་དེ་ལ་འགྱུར་བ་མེད། ལོ་གཅིག་གི་རིང་ལ་ད་དུང་ང་ལ་སྒུག་རྒྱུ་ཡིན་ཞེས་བཤད་བྱུང་།  དེ་ནས་ང་མོ་དང་ཁ་བྲལ་བ་ཡིན།

2 ང་དང་ངའི་ཕྱི་རྒྱལ་གྱི་གྲོགས་མོ་གཉིས་ཁ་བྲལ་ཏེ་ལོ་གཅིག་ལྷག་གི་རིང་ལ་ངས་བོད་མོ་ཁ་ཤས་དང་གྲོགས་བསྒྲིགས་པ་ཡིན་མོད། ལྟ་བ་མཐུན་གྱི་མི་འདུག  ཁོང་ཚོར་བོད་སྐད་ཡིག་ལ་དོ་སྣང་དེ་ཙམ་མི་འདུག དཀའ་ངལ་ཡོད་ཚད་དངུལ་གྱིས་སེལ་ཐུབ་པའི་ཡིད་ཆེས་གནང་མཁན་ཡང་འདུག  བོད་ཀྱི་ཆོས་དང་རིག་གཞུང་གཅེས་ཉར་བྱེད་དགོས་གསུང་གི་འདུག་སྟེ། ནམ་རྒྱུན་དབྱིན་ཇིའི་གློག་བརྙན་དང་རྒྱ་གར་གྱི་གློག་བརྙན་ལ་ལྟ་ཡི་འདུག  མཚོ་ནང་གི་འབུའི་རིགས་ཟ་བ་ལའང་ཐེ་ཚོམ་མི་འདུག  ཐ་ན་རང་གི་ནང་ནས་ཀྱང་བོད་སྐད་བཤད་ཀྱི་མི་འདུག  རྒྱུ་མཚན་དེ་འདྲའི་དབང་གིས་རིགས་རྒྱུད་གཙང་མ་སྤེལ་དགོས་པའི་ལྟ་ཚུལ་ལ་འགྱུར་ལྡོག་ཐེབས་སོང་། དེ་ནས་ངའི་སེམས་ལ་ལས་འབྲས་ལ་གཙིགས་ཆེན་བྱེད་པ་དང་། བོད་ཀྱི་རིག་གནས་ལ་དགའ་མཁན་གྱི་བུད་མེད་ཅིག་ལ་ཆང་ས་རྒྱག་ཐུབ་ན་རིགས་རྒྱུད་བོད་པ་ཡིན་མིན་ལ་ཁྱད་པར་མི་འདུག་དྲན་སོང་།

དེ་ནས་ངས་སྔོན་ཆད་ཀྱི་གྲོགས་མོ་དེར་ཡང་བསྐྱར་འབྲེལ་བ་བྱས་ཏེ་མོ་དང་ལྷན་དུ་བསྡད་པ་ཡིན།  ངེད་གཉིས་གཉེན་མ་སྒྲིག་པའི་སྔོན་ལ་ངས་ཆ་རྐྱེན་ཁ་ཤས་བཏོན་པ་དཔེར་ན།  མ་འོངས་པར་ངེད་གཉིས་ཀྱི་བྱིས་པ་བོད་ལུགས་ལྟར་གསོ་སྐྱོང་བྱེད་དགོས་བ། བྱིས་པའི་མིང་ལ་བོད་མིང་འདོགས་དགོས་བ། བྱིས་པར་ངེས་པར་དུ་ནང་ཆོས་ཀྱི་སློབ་གསོ་སྤྲོད་དགོས་བ་སོགས་ཡིན། དེ་ཐམས་ཅད་མོས་ཁས་བླངས་བ་མ་ཟད། ཆ་རྐྱེན་དེ་དག་བསྒྲུབ་པར་རྒྱབ་སྐྱོར་བརྒྱ་ཆའི་བརྒྱ་ཡོད་པ་ཁས་ལེན་བྱས་སོང་།  ད་ལྟ་ངེད་གཉིས་ལ་བུ་གཅིག་དང་བུ་མོ་གཅིག་ཡོད། ང་རང་གི་འདོད་པ་ལྟར་བྱིས་པ་གཉིས་གསོ་སྐྱོང་བྱེད་བཞིན་ཡོད། ངའི་ཆུང་མས་སྔོན་ཆད་ཁས་བླངས་པ་ལྟར་རྒྱབ་སྐྱོར་གཙང་མ་བྱེད་ཀྱིན་འདུག  དེར་བརྟེན་ངའི་བྱིས་པ་གཉིས་ཀྱིས་ཨ་མདོའི་འབྲོག་སྐད་གཙང་མ་བཤད་ཤེས་ཀྱི་ཡོད། ནང་བའི་སྐུ་གསུང་ཐུགས་རྟེན་གྱི་མདུན་ནས་ཕྱག་འཚལ་བའི་གོམས་གཤིས་ཡོད།  ངས་བྱིས་པ་ཁྲིད་ནས་བོད་རིགས་འདུས་སྡོད་བྱེད་སར་འགྲོ་སྐབས་ངའི་སེམས་པ་སྤྲོ་སྣང་གིས་ཁེངས་ཡོད། ངོ་མ་ཡིན།

3 དབྱར་ཀ་གནམ་གཤིས་ཡག་དུས་ངས་ཁོང་གཉིས་ཕྱི་རོལ་གྱི་སྐྱེད་ཚལ་དུ་ཁྲིད་ནས་གླུ་གཞས་འདྲ་བླངས། རྩེད་མོ་འདྲ་རྩེད། སྐྱེད་ཚལ་ནང་གི་དངོས་པོ་མང་པོ་ངོ་སྤྲོད་དང་ལྷན་དུ་མིང་ཚིག་རྣམས་བྱིས་པའི་རྣ་ལམ་དུ་ཐོས་སུ་འཇུག་གི་ཡོད། དགུན་ཁ་གནམ་གཤིས་ཡག་པོ་མེད་དུས་དཔེ་མཛོད་ཁང་དང་དེབ་ཚོང་ཁང་ལ་ཁྲིད་དེ་དེབ་བཀླགས་པ་ཡིན། ཕྱི་ལོགས་སུ་འགྲོ་མ་ཐུབ་པར་ནང་ལ་སྡོད་དགོས་བྱུང་དུས་བྱིས་པ་ཉོབ་འགྲོ་གི་འདུག དེ་ནས་ཁྱིམ་གྱི་དཀྱིལ་ལ་གུར་ཕུབས་ནས། རྟ་ཟོག་སེམས་ཅན་གྱི་རྩེད་ཆས་དང་ལྷན་དུ་འབྲོག་པའི་འཚོ་བ་ངོ་སྤྲོད་བྱེད་ཀྱི་ཡོད། ད་ལྟ་ངའི་བུ་ཆེས་དགའ་ཤོས་ཀྱི་རྩེད་ཆས་དེ་རྟ་ཟོག་སེམས་ཅན་རེད།

ངའི་བུ་ཟླ་བ་གསུམ་ཡིན་དུས་ནས་བོད་ཡིག་གི་དཔེ་ཆ་ལག་ཏུ་བཞག་པ་ཡིན། ཁོ་ལོ་གཅིག་ལ་བུད་དུས་ཡི་གེ་ཀློག་མ་ཐུབ་ནའང་ཡི་གེའི་མགོ་རྔ་གང་ཡིན་ཤེས་གྱི་འདུག བསམ་བཞིན་དུ་དེབ་གྱི་མགོ་རྔ་བརྗེས་ཏེ་ལག་ཏུ་བཞག་ནའང་། དེ་མ་ཐག་མགོ་རྔ་བརྗེ་བོ་རྒྱག་ཤེས་ཀྱི་འདུག དེ་ནི་བྱིས་པའི་མཐོང་སར་ཡི་གེ་ཆེན་པོ་བྲིས་ཏེ་བཞག་པ་དང་རྟག་ཏུ་དཔེ་དེབ་དང་འགྲོགས་ནས་སྡོད་དུ་བཅུག་པའི་ཤུགས་རྐྱེན་རེད་བསམ་བྱུང་།

དཔེ་མཛོད་ཁང་དང་དཔེ་ཚོང་ཁང་ལ་ཁྲིད་དུས། བྱིས་པ་གཉིས་ཀྱི་འདོད་པ་ལྟར་དཔེ་ཆ་འདེམ་སྒྲིག་བྱེད་དུ་བཅུག་ནས་ཀློག་གི་ཡོད། བོད་སྐད་རང་གི་སྟེང་ནས་ཀློག་པ་ལས་དབྱིན་ཡིག་སྟེང་ནས་ཐེངས་གཅིག་ལའང་ཀློག་མྱོང་མེད།  ཀློག་ཚར་དུས་བྱིས་པ་གཉིས་ལ་དེབ་དེ་སྔོན་མའི་ལེན་ས་དེར་ཕར་འཇོག་དགོས་པའི་གནས་ལུགས་བཤད་དེ་ཕྱིར་འཇོག་ཏུ་འཇུག་གི་ཡོད། ད་ལྟ་ངས་ལབ་མ་དགོས་པར་ངའི་བྱིས་པ་གཉིས་ལ་གོམས་གཤིས་དེ་ལེགས་པར་འཇགས་འདུག  ཀུན་སྤྱོད་དང་འབྲེལ་བའི་བྱ་བ་གང་ཡིན་ཡང་སེམས་ལྷོད་ལ་བབས་ཏེ་སློབ་གསོ་སྤྲད་པ་ཡིན་ན་བྱིས་པའི་སེམས་རྒྱུད་ལ་འཇགས་འགྲོ་ཡི་འདུག

4  ང་དང་བྱིས་པ་གཉིས་ལམ་བར་དུ་འགྲོ་དུས། ལམ་བར་ནས་མཐོང་བའི་དངོས་པོ་ཐམས་ཅད་ཀྱི་མིང་ང་རང་གིས་ཁ་ནས་ལབ་གྱི་ཡོད། དཔེར་ན་ཤིང་སྡོང་ཞིག་མཐོང་དུས་འདི་ན་ཤིང་སྡོང་ཞིག་འདུག་ཅེས་དང་། བྱ་གཅིག་མཐོང་ན། བྱ་ཞིག་འཕུར་ཀྱིན་འདུག་ཅེས་ལབ་གྱི་ཡོད། བྱིས་པ་ལ་ངག་ཐོག་ནས་ལན་སྟེར་བའི་ནུས་པ་མེད་ནའང་། བྱིས་པས་ཧ་གོ་ཡི་ཡོད་པ་རྣམ་འགྱུར་ལས་ཤེས་ཐུབ་གྱི་འདུག  ངའི་བྱིས་པ་གཉིས་ནགས་གསེབ་ལ་སོང་སྟེ་ས་རྡུལ་ནང་དུ་རྩེད་མོ་རྩེ་བ་ལ་ཧ་ཅང་དགའ་བོ་ཡོད་པ་རེད། ནགས་གསེབ་དང་སྐྱེད་ཚལ་ནང་དུ་རླངས་འཁོར་སོགས་ཀྱི་ཉེན་ཁ་མེད་དུས། ཁོང་གཉིས་ལ་རང་དབང་མང་པོ་ཡོད་པས་ལོས་ཡིན་འདོད།

བྱིས་པར་སྒྲིག་ལམ་འཇོག་དུས་ཁ་དོན་ཚིག་ལ་གནས་དགོས་པ་ང་རང་གི་ཉམས་མྱོང་ལས་ཤེས་སོང་། ཁ་དོན་ཚིག་ལ་གནས་ཐུབ་པ་ཡིན་ན། བྱ་བ་ཚང་མར་ནན་ཏན་བྱེད་པའི་གོམས་གཤིས་རྒྱུན་འཇགས་སུ་འགྲོ་བར་ཕན་ཐོགས་འདུག བྱིས་པས་རང་གི་བདེ་འཇགས་ལ་ཉེན་ཁ་ཡོད་པའི་ནོར་འཁྲུལ་ཞིག་བཟོས་པ་ཡིན་ན། དང་པོར་རང་གི་སེམས་ལ་བརྟག་དཔྱད་བྱེད་དགོས། སེམས་ཚོར་ཤུགས་ཀྱི་དབང་དུ་སོང་ཡོད་ན། སེམས་ལྷོད་ལ་འབབ་ཏུ་བཅུག་ནས་བྱིས་པའི་འཕོངས་ཤའི་སྟེང་ལ་ཐལ་ལྕག་རེ་གཞུས་ན་མི་སྐྱོན། ཡིན་ནའང་།བྱིས་པས་ཉེན་ཁ་ཆེ་བའི་ནོར་འཁྲུལ་བཟོས་ན་མ་གཏོགས་བྱིས་པར་རྩ་བ་ནས་གཅར་མི་ཉན།

བྱིས་པ་ལ་སྐྱག་རྫུན་བཤད་མི་ཉན། ངས་བྱིས་པ་གཉིས་ལ་སྐྱག་རྫུན་རྩ་བ་ནས་བཤད་ཀྱི་མེད་ལ། མགོ་སྐོར་ཡང་གཏོང་གི་མེད། སྒྲིག་ལམ་བཟང་ངན་གང་ཡིན་ཡང་ཁ་དོན་ཚིག་ལ་གནས་པའི་ཐོག་ནས། རྒྱུ་མཚན་དང་གནས་ལུགས་བཤད་དགོས། ཡ་རབས་བྱས་ན་བྱ་དགའ་སྤྲོད་དགོས། མ་རབས་བྱས་ན་ཆད་པ་གཅོད་དགོས། དེ་ལྟར་བྱས་ན་བྱིས་པས་ཁ་ལ་ཉན་པོ་འདུག  གནས་ལུགས་དང་རྒྱུ་མཚན་ཧ་གོ་གི་འདུག སྒྲིག་ལམ་ལ་བརྩི་སྲུང་བྱེད་ཀྱི་འདུག གལ་སྲིད་ངའི་བྱིས་པ་གཉིས་ཀྱིས་མ་རབས་ཀྱི་བྱ་བ་གཅིག་བྱས་པ་ཡིན་ན། དུས་ཚོད་སྐར་མ་གསུམ་གྱི་རིང་ལ་མལ་ཁང་དུ་བཅུག་པ་ཡིན། དེང་སྐབས་ངའི་བུས་མ་རབས་ཤིག་བྱས་པ་ཡིན་ན། རང་འགུལ་གྱིས་ཁོ་རང་ཉིད་མལ་ཁང་དུ་འཛུལ་འགྲོ་བ་དང་དུས་ཚོད་སྐར་མ་གཉིས་གསུམ་གྱི་རྗེས་ནས་ཕྱིར་བུད་ཡོང་གི་འདུག གལ་སྲིད་བྱིས་པར་སྒྲིག་ལམ་མ་བཞག་པ་ཡིན་ན། བྱིས་པ་ཆུང་ཆུང་གིས་བྱ་བ་བཟང་ངན་གྱི་དབྱེ་བ་འབྱེད་མི་ཤེས། བྱིས་པ་སྐྱག་ལངས་ལ་བཏང་བ་ཡིན་ན། བྱིས་པ་གསོ་སྐྱོང་ཡག་པོ་བྱེད་མི་ཐུབ་པས་ནན་ཏན་གནང་དགོས།

བྱིས་པ་འདེད་འཁོར་ནང་དུ་དེད་དེ་འགྲོ་སྐབས་ངས་ཁ་འདོན་བྱེད་ཀྱི་ཡོད། དཔེར་ན་ཨ་ར་པ་ཙ་འདོན་དུས། ངྷི་ངྷི་ངྷི་ཞེས་འདོན་པའི་ཚེ་འདེད་འཁོར་དེད་དེ་མགྱོགས་པོར་རྒྱུགས་པ་ཡིན། བྱིས་པ་གཉིས་ཀྱིས་ཀྱང་ཁ་ནས་ངྷི་ངྷི་ངྷི་ཞེས་དགའ་བོ་ཞེ་དྲགས་བྱེད་ཀྱི་འདུག  དེ་ནས་བྱིས་པ་ལ། ཨ་ཕ་དང་ལྷན་དུ་ཕྱི་ལོགས་སུ་འགྲོ་དུས་བོད་ཡིག་དེབ་འཛིན་དགོས་རེད་ལབ་པ་ཡིན། དེང་སྐབས་ང་དང་ལྷན་དུ་ཕྱི་ལོགས་སུ་འགྲོ་དུས་ངའི་བུས་བོད་ཡིག་གི་དཔེ་ཆ་བཟུང་ནས་ཡོང་བའི་གོམས་གཤིས་ཆགས་འདུག ཕྱི་རྒྱལ་ན་བོད་ཡིག་གི་བྱིས་དེབ་མང་པོ་མེད་པས། དྲྭ་ཐོག་ཚོང་ཁང་བརྒྱུད་ནས་ཉོ་བ་དང་། དེ་ནས་རྒྱ་གར་དང་བོད་ཡུལ་ལ་འགྲོ་མཁན་ཚོ་ལ་དེབ་མང་པོ་མངགས་པ་ཡིན།

ང་ཚོ་བོད་པའི་སྤྱི་ཚོགས་ནང་དུ་ཕ་མ་གཉིས་ཀ་བོད་པ་མ་ཡིན་པའི་བྱིས་པ་དེ་བོད་པ་གཙང་མ་ཞིག་མ་ཡིན་པའི་ལྟ་སྟངས་ཤིག་ཡོད་པའི་ཚོར་སྣང་བྱུང་། ངའི་བསམ་ཚུལ་ལ་གཙོ་ཆེ་ཤོས་ཕ་མ་གཉིས་ཀ་བོད་པ་ཡིན་མིན་ལ་ཐུག་མི་འདུག་སྙམ།  གཙོ་ཆེ་ཤོས་བྱིས་པའི་སེམས་རྒྱུད་ལ་བོད་པའི་འདུ་ཤེས་གཙང་མ་དང་བརྟན་པོ་ཞིག་འཇོག་རྒྱུ་དེ་རེད་བསམ།

5  མཐའ་དོན་གྲོང་ཁྱེར་ན་གནས་པའི་བོད་ཀྱི་ཕ་མ་རྣམས་ལ་རེ་བ་ཞིག་ཞུ་རྒྱུར། བྱིས་པ་ནི་མ་འོངས་པའི་ཡོད་ཚད་ཡིན་པ་ཤེས་པའི་ཐོག་ནས་བྱིས་པ་གསོ་སྐྱོང་ཡག་པོ་བྱེད་རོགས། བྱིས་པ་དང་མཉམ་དུ་དུས་ཚོད་མང་བོ་སྐྱེལ་རོགས། མི་རིགས་ཀྱི་ཁྱད་ཆོས་ཡོད་པའི་བྱིས་པ་ཞིག་གསོ་སྐྱོང་བྱེད་མི་ཐུབ་པ་ཅི་ཡོད།  བྱིས་པའི་ཁ་ནས་ང་བོད་པ་ཡིན་ལབ་དུས་སྤོབས་པ་ཡོད་པ་ཞིག་བྱེད་དགོས། ངོ་མ་ཡིན།

ཕ་རྒན་ཡག་པོ་ཞིག་བྱེད་དགོས་བསམ་པའི་འདུན་པ་ཤུགས་ཆེན་པོ་ཞིག་རྒྱུན་དུ་ཡོད་པ་ལྟར། ངའི་ཆུང་མ་ལ་མངལ་ཆགས་པ་དང་ཆུང་མའི་མངལ་གྱི་ཐད་ནས་ངས་སྐྱབས་འགྲོ་དང་མ་ཎི་བཏོན་པ་ཡིན། མངལ་དུ་ཡོད་པའི་ཕྲུ་གུའི་ཆེད་དུ། ཆུང་མའི་ཁོར་ཡུག་ནས་བོད་གཞས་མང་པོ་བླངས་པ་ཡིན། ཆུང་མ་སྦྲུམ་མ་ཡིན་སྐབས། བྱིས་པའི་བདེ་ཐང་གི་ཆེད་དུ་ཁྱིམ་ལས་མང་ཤོས་ང་རང་གིས་འགན་ཁུར་ཏེ་ཆུང་མ་ལ་ངལ་གསོའི་དུས་ཚོད་སྟེར་གང་ཐུབ་བྱས་པ་ཡིན།

ངའི་བུ་བཙས་པ་དང་ཁོའི་མལ་ཁྲིའི་ཁོར་ཡུག་ལ་གངས་རི། རྩྭ་ཐང་། སྦྲ་གུར། རྟ་ནོར་ལུག་གསུམ་ལ་སོགས་པའི་རི་མོས་མཛེས་བཟོ་བྱས་པ་ཡིན། དེ་ནས་ཚོན་མདོག་ཡོད་པའི་ཀ་ཁའི་བྱང་བུ་བཟོས་ཏེ་ཕྲུ་གུའི་མལ་ཁྲི་མཛེས་བཟོ་བྱས་པ་ཡིན། བྱིས་པའི་མལ་ཁྲི་དང་ཐག་ཅུང་རིང་བའི་གྱང་ངོས་སུ་གསལ་བྱེད་ཀྱི་ཡི་གེ་རྣམས་ཆེན་པོར་བྲིས་ཏེ་སྦྱར་ནས་བུ་ཕྲུག་གཉིས་ལ་བོད་པའི་འདུ་ཤེས་བསྐྲུན་ཐབས་བྱས་པ་ཡིན། དེ་ནས་བྱིས་པ་གཉོར་སྐྱོང་གི་ལས་ཀ་ཆ་ཚང་ང་རང་གིས་བྱས་པ་ཡིན། དཔེར་ན་བྱིས་པ་པང་དུ་ཉར་བ། དགོང་མོར་ཡར་ལངས་ཏེ་འོ་མ་ལྡུད་པ། གྱོན་གོས་བརྗེ་བོ་རྒྱག་པ་ལ་སོགས་པའི་ལས་ཀ་ཚང་མ་ཆུང་མ་དང་འདྲ་མཉམ་གྱིས་འགན་ཁུར་ལེན་ཐུབ་ཡོད་སྙམ་པའི་སྤོབས་པ་ཡོད།

སྔོན་ཆད་ཡིན་ན་གྲོགས་པོ་ཚོ་དང་ལྷན་དུ་ཇ་ཁང་དང་འཚིག་ཇ་ཁང་སོགས་སུ་བསྡད་དེ་ཁ་བརྡ་བྱེད་རྒྱུ་དེ་ངའི་གོམས་གཤིས་ཡིན། ཡིན་ན་ཡང་། ངའི་བུ་བཙས་པ་ནས་བཟུང་བདག་གི་དགའ་ཕྱོགས་དང་གོམས་གཤིས་འགྱུར་སོང་། བྱིས་པ་དང་ལྷན་དུ་དུས་ཚོད་སྐྱེལ་བ་དང་རྩེད་མོ་རྩེ་བ་ནི་ངའི་དགའ་ཕྱོགས་དང་གོམས་གཤིས་སུ་གྱུར་སོང་།  ད་ལྟ་གྲོགས་པོ་ཁ་ཤས་ཀྱིས་ང་ལ། བྱིས་པ་བཙས་པ་དང་ལྷན་དུ་ཁྱོད་བརླག་སོང་། ཁྱོད་ཀྲོ་རན་ཀྲོར་བསྡད་ཡོད་དམ་ཞེས་ཀུ་རེ་རྩེད་བཞིན་འདུག ཕ་ཡུལ་དང་རྒྱ་གར་དུ་ཡོད་པའི་གྲོགས་པོ་ཁ་ཤས་ཀྱིས་ང་ལ་འདི་ལྟར་བརྗོད་ཀྱི་ཡོད་པ་རེད། ང་ཆུང་མ་ལ་དགའ་དྲགས་ནས་རྟག་ཏུ་བྱིས་པ་གཉོར་སྐྱོང་གི་ལས་་ཀ་བྱེད་ཀྱི་ཡོད་པ་རེད་ཅེས་ཟུར་ཟ་སོགས་བྱེད་ཀྱི་འདུག་མོད། ང་རང་གི་སེམས་ལ། བྱིས་པ་ནི་ངེད་བཟའ་མི་གཉིས་ཀྱི་ཡིན་པ་ལས་ཆུང་མ་གཅིག་པོའི་མ་ཡིན་པའི་གནས་ལུགས་ལ་འདང་རྒྱག་གི་ཡོད།

བྱིས་པ་པང་ལ་བཟུང་ནས་རྟག་པར་སྐད་ཆ་བཤད་པ། ཁོར་ཡུག་ནས་ཆོས་འདོན་པ། གླུ་གཞས་ལེན་པ་ལ་སོགས་པའི་བྱ་བ་མང་བོ་རྒྱུན་འཁྱོངས་བྱས་པ་ཡིན། ཆུང་མས་ཀྱང་ང་ལ་སེམས་ཤུགས་སྤར་བ་དང་རྒྱབ་སྐྱོར་གཙང་མ་བྱེད་ཀྱི་འདུག མོས་འདི་ལྟར་ལབ་སོང། ཁྱེད་ཀྱིས་གྲོགས་པོར་ཁ་བརྡ་བྱེད་པ་ནང་བཞིན་བྱིས་པ་ལ་སྐད་ཆ་བཤད་དགོས་པ་རེད། བྱིས་པས་གོ་ཐུབ་ཀྱི་ཡོད་པ་མ་རེད་ཅེས་བསམ་མི་ཉན” ཞེས་བསླབ་བྱ་གནང་གི་འདུག  ངའི་བུ་སྐྱེས་ནས་ལོ་གཅིག་གི་རྗེས་སུ་བུ་མོ་སྐྱེས་པ་རེད། ཁོང་གཉིས་ཀྱི་བར་ལ་ལོ་གཅིག་ལས་མེད་དུས་མཉམ་དུ་སྐྱོང་རྒྱུ་ལས་སླ་བོར་གྱུར་སོང་། ངས་ལས་ཀ་ནས་ཟླ་བ་བཅུ་གཅིག་རིང་ལ་དགོངས་པ་ཞུས་ཏེ་བྱིས་པ་གཉིས་གཉོར་སྐྱོང་བྱས་པ་ཡིན།

སྔོན་ཆད་ངས་ཕྱི་རྒྱལ་དུ་བོད་ཀྱི་བྱིས་པ་ལ་བོད་སྐད་སློབ་པའི་མཐུན་རྐྱེན་མི་ཚང་བའི་གནས་ཚུལ་མང་པོ་ཐོས་མྱོང་། ལྷག་པར་དུ་ཆེད་ལས་མཁས་པར་རློམ་མཁན་ཁ་ཤས་དང་ཉེ་འཁོར་ཀྱི་བོད་མི་ཚོས་ཕྱི་རྒྱལ་དུ་བྱིས་པ་ལ་བོད་ཀྱི་སྐད་ཡིག་སློབ་སའི་ཁོར་ཡུག་མེད་རབས།  ཕྱི་རྒྱལ་ནས་བོད་སྐད་ཡིག་དེ་སྐད་ཡིག་གཉིས་པའི་གནས་སྟངས་འོག་ནས་བྱིས་པར་ཁྲིད་དགོས་པ་མང་པོ་གསུང་གི་འདུག  ཁོང་ཚོའི་བསམ་ཚུལ་དེ་ནོར་འཁྲུལ་ཡིན་པ་ང་རང་གི་བྱིས་པ་གཉིས་ཀྱི་སྟེང་ནས་བདེན་དཔང་བྱས་ཡོད། མི་ལ་སེམས་ཤུགས་གཅོག་པའི་ལམ་སྟོན་མ་གནང་ན་ལེགས། སྔོན་ཆད་ཁོང་ཚོའི་དགོངས་ཚུལ་དེས་ང་ལའང་ཤུགས་རྐྱེན་ཐེབས་ཏེ་འདི་ལྟར་དྲན་མྱོང་། བུ་ཕྲུག་ལ་བོད་སྐད་བསླབ་མ་ཐུབ་ན་ཅི་བྱེད་བསམ་ནས་སེམས་ཁྲལ་བྱས་མྱོང་། བྱིས་པ་བོད་ལུགས་ལྟར་གསོ་སྐྱོང་བྱེད་མ་ཐུབ་ན་ཅི་བྱེད་བསམ་ནས་སེམས་པ་སྐྱོ་མྱོང་། ཡིན་ནའང་རྒྱུན་དུ་གནད་དོན་དེར་དོ་སྣང་བྱས་པ་ཡིན།  

 ང་ཡོད་སར་མཚོན་ན། ཕ་མ་མང་ཤོས་ཀྱིས་བོད་སྐད་ཡིག་བེད་མེད་དུ་བཞག་སྟེ་བུ་ཕྲུག་ལ་རྒྱུན་དུ་དབྱིན་སྐད་ཀྱིས་ཁ་བརྡ་བྱེད་ཀྱི་འདུག  ཕ་མ་ཁ་ཤས་ཀྱིས་བུ་ཕྲུག་ནི་རང་ཉིད་ཀྱི་དབྱིན་སྐད་སྦྱོང་བྱེད་ཀྱི་ལག་ཆ་ལྟ་བུར་བེད་སྤྱོད་བྱེད་ཀྱི་འདུག  སྟབས་ལེགས་པ་ཞིག་ལ་ང་བོད་ནས་ཡོང་བའི་སྐྱེས་པ་ཞིག་ལ་ཐུག་སོང་། ཁོའི་བཟའ་ཟླ་དེ་ཕྱི་རྒྱལ་བ་ཞིག་རེད། ཁོང་གཉིས་ལ་བུ་ལོ་ལྔར་ལོན་པ་ཞིག་འདུག  བུ་དེས་བོད་སྐད་ཧ་ཅང་ཡག་པོ་བཤད་ཀྱི་འདུག སྐྱེས་པ་དེ་ལས་བྱིས་པར་བོད་སྐད་ཡིག་སློབ་པའི་བྱེད་ཐབས་མང་པོ་ཧ་གོ་སོང་། ཁོང་བརྒྱུད་ནས་ལྷ་སའི་སྐད་གཙང་མ་བཤད་མཁན་གྱི་བོད་ཀྱི་བུད་མེད་ཅིག་ལ་ཐུག་སོང་། བུད་མེད་དེ་ཁ་ན་ཌ་ནས་འཚར་ལོངས་བྱུང་བ་ཞིག་ཡིན་པ་དང་། མོས་ཁོ་མོའི་ཕ་མ་གཉིས་ཀྱིས་ཁྱིམ་དུ་བོད་སྐད་མ་བཤད་ན་ལན་མི་སྟེར་བའི་གནས་ཚུལ་བཤད་སོང་། དོ་སྣང་བྱ་འོས་པའི་གནས་ཚུལ་གཅིག་ནི། ལོ་བཞི་བཅུའི་སྔོན་ལ་ཁ་ན་ཌའི་ནང་དུ་བསླེབས་པའི་བོད་པ་ཚོས་བོད་སྐད་བཤད་ཤེས་ཀྱི་ཡོད་པ་དང་།  ལོ་བཅུ་ཕྲག་གཉིས་ཀྱི་ནང་དུ་ཁ་ན་ཌར་བསླེབས་པའི་བོད་པའི་བྱིས་པ་མང་ཤོས་ཀྱི་བོད་སྐད་བཤད་ཤེས་ཀྱི་མི་འདུག་པའི་གནས་ཚུལ་དེ་རེད། གང་ལྟར་གོང་གསལ་གནས་ཚུལ་དེ་དག་གིས་བྱིས་པ་བོད་ལུགས་ལྟར་གསོ་སྐྱོང་བྱེད་པ་དང་བོད་ཡིག་འབྲི་ཀློག་ཐུབ་རྒྱུ་ཡིན་པའི་གནས་ཚུལ་དེ་གསལ་བོ་ཆགས་སོང་བ་དང་ང་རང་གི་ཆོད་་སེམས་དེ་ཡང་བརྟན་པོར་གྱུར་སོང་།།

གཡག་རྒོད་རྩོམ་སྒྲིག་ཚོགས་ཆུང་གིས་ཡི་གེར་ཕབ། 

རྩོམ་ཁུངས། འཕགས་ཆེན་འཕྲིན་སྟེགས་ལས་བཤུས།