སློབ་གསོ་མཁས་ཅན་གྱི་སྙིང་སྟོབས་དར་སྤེལ་ཤུགས་ཆེན་བཏང་ནས་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེར་ལེགས་སྐྱེས་གསར་པ་དེ་བས་ཆེ་བ་འབུལ་དགོས་པའི་ནན་བཤད་གནང་བ།

རྒྱལ་ཡོངས་ཀྱི་རྒྱ་ཆེའི་དགེ་རྒན་དང་སློབ་གསོའི་ལས་དོན་པར་དུས་ཆེན་གྱི་འཚམས་འདྲི་དང་ལྷག་བསམ་ཟོལ་མེད་ཀྱི་སྨོན་འདུན་ཞུས་པ།

ཤིན་ཧྭ་གསར་འགྱུར་ཁང་པེ་ཅིང་ནས་ཟླ་9ཚེས་9ཉིན་གློག་འཕྲིན་འབྱོར་གསལ། ཟླ་9ཚེས་9ཉིན་རྒྱལ་ཡོངས་ཀྱི་ཕུལ་བྱུང་དགེ་རྒན་གྱི་འཐུས་མིའི་བཞུགས་མོལ་ཚོགས་འདུ་པེ་ཅིང་དུ་འཚོགས་པ་རེད། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞི་ཅིན་ཕིང་གིས་ཚོགས་ཞུགས་དགེ་རྒན་གྱི་འཐུས་མིར་འཕྲིན་ཡིག་སྤྲིངས་ཏེ། དགེ་རྒན་དུས་ཆེན་ཐེངས་སོ་དགུ་པ་འཆར་ཉེར་ཡོད་པའི་སྐབས་སུ། ཏང་ཀྲུང་དབྱང་གི་ཚབ་ཞུས་ནས་ཁོང་ཚོ་དང་རྒྱལ་ཡོངས་ཀྱི་རྒྱ་ཆེའི་དགེ་རྒན་དང་དེ་བཞིན་སློབ་གསོའི་ལས་དོན་པ་ཚོར་དུས་ཆེན་གྱི་འཚམས་འདྲི་དང་ལྷག་བསམ་ཟོལ་མེད་ཀྱི་སྨོན་འདུན་ཞུས་པ་རེད།

ཞི་ཅིན་ཕིང་གི་འཕྲིན་ཡིག་ནང་དུས་ཡུན་རིང་པོར་ཁྱེད་ཚོས་ཚབ་མཚོན་དུ་བྱས་པའི་རྒྱལ་ཡོངས་ཀྱི་རྒྱ་ཆེའི་དགེ་རྒན་ཚོས་ཏང་གི་སློབ་གསོའི་མཛད་ཕྱོགས་ལག་ལེན་ནན་ཏན་བསྟར་ནས་དཔེ་ཁྲིད་མི་སྐྱོང་དང་བློ་སྦྱོང་རྩ་གསོ་བྱས་ཏེ་ཀུན་སྤྱོད་དང་། ཤེས་རིག ལུས་རྩལ། མཛེས་རྩལ། ངལ་རྩོལ་བཅས་ཕྱོགས་ཡོངས་ནས་འཕེལ་རྒྱས་འགྲོ་བའི་སྤྱི་ཚོགས་རིང་ལུགས་ཀྱི་འཛུགས་སྐྲུན་པ་དང་ཤུལ་འཛིན་པ་མི་རབས་མང་པོ་གསོ་སྐྱོང་བྱས་པ་དང་། གལ་ཆེ་སར་བཀོལ་སྤྱོད་ཐུབ་པ་དང་ལས་འགན་ལྕི་པོ་འཁུར་ཐུབ་པའི་རྐང་འཛིན་ཤེས་ལྡན་པ་འབོར་ཆེན་གསོ་སྐྱོང་བྱས་ནས། རྒྱལ་ཁབ་འཕེལ་རྒྱས་དང་མི་རིགས་དར་རྒྱས་ཆེད་ལེགས་སྐྱེས་གལ་ཆེན་ཕུལ་ཡོད། དགེ་རྒན་ཚོའི་ཁྲོད་ནས་སློབ་གསོ་མཁས་ཅན་དང་ཕུལ་བྱུང་དགེ་རྒན་ཁག་གཅིག་ཐོན་ཞིང་། ཁོང་ཚོར་བདག་བས་གཞན་གཅེས་དང་བསམ་པ་རྣམ་དག རྒྱལ་ཁབ་ཀྱི་བཀའ་དྲིན་འཇལ་བའི་ཕུགས་བསམ་དང་དད་སེམས་ཡོད་པ་དང་། ཁ་བཤད་དོན་གནས་དང་རང་དཔེ་གཞན་སྟོན་གྱི་ཀུན་སྤྱོད་བསམ་གཤིས་ཡོད་པ། བློ་འབྱེད་སེམས་སྐྱོང་དང་སྣོད་བསྟུན་སློབ་ཁྲིད་ཀྱི་མི་སྐྱོང་བློ་གྲོས་ཡོད་པ། སློབ་བརྩོན་ལག་བསྟར་དང་བདེན་འཚོལ་གསར་གཏོད་ཀྱི་མི་སྣ་སྐྱོང་བའི་རྣམ་འགྱུར་ཡོད་པ། སློབ་ཁྲིད་ལ་དགའ་ཞིང་སློབ་མར་གཅེས་པ་དང་ལེགས་སྐྱེས་ཧུར་འབུལ་གྱི་བྱམས་བརྩེའི་བསམ་པ་ཡོད་པ། འཛམ་གླིང་ལ་ཁ་ཕྱོགས་པ་དང་རིག་གནས་ལ་བརྟེན་ནས་མི་སེམས་འདུལ་བའི་བདེན་ལམ་དོན་གཉེར་གྱི་སྙིང་སྟོབས་ཡོད་པ་བཅས་ལས་ཀྲུང་གོའི་དམིགས་བསལ་གྱི་སློབ་གསོ་མཁས་ཅན་གྱི་སྙིང་སྟོབས་མཚོན་གྱི་ཡོད་ཅེས་འཁོད་ཡོད།

ཞི་ཅིན་ཕིང་གིས་རྒྱང་སྐྱོད་ཀྱི་ལམ་བུ་གསར་པའི་ཐོག་ཁྱེད་ཚོ་དང་རྒྱལ་ཡོངས་ཀྱི་རྒྱ་ཆེའི་དགེ་རྒན་ཚོས་སློབ་གསོ་མཁས་ཅན་མིག་དཔེར་འཛིན་པ་དང་། སློབ་གསོ་མཁས་ཅན་གྱི་སྙིང་སྟོབས་དར་སྤེལ་ཤུགས་ཆེན་གཏོང་བ། ཏང་གི་ཆེད་དུ་མི་སྣ་གསོ་སྐྱོང་དང་རྒྱལ་ཁབ་ཀྱི་ཆེད་དུ་ཤེས་ལྡན་པ་གསོ་སྐྱོང་བྱེད་པའི་ཐོག་མའི་བསམ་འདུན་དང་ལས་འགན་བློ་ལ་བརྟན་པོར་ངེས་པ། “སློབ་གསོའི་ལས་ལ་བརྩོན་པ་ཆེར་སྐྱེད་ཀྱིས། རྒྱལ་ཁབ་སྟོབས་ཆེན་སྐྲུན་པར་ང་ཡིས་འབད”ཅེས་པའི་ཕུགས་འདུན་ཆེན་པོ་འཆང་བ། རང་རྟོན་རང་དར་དང་འབད་འབུངས་ཡར་བརྩོན་བཅས་བྱས་ཏེ། རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེའི་ཆེད་དུ་དེ་བས་ཆེ་བའི་ལེགས་སྐྱེས་གསར་པ་འབུལ་དགོས་པའི་ནན་བཤད་གནང་ཡོད།

ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ་རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་མཆན་བཀོད་མཛུབ་སྟོན་གནང་སྐབས། དགེ་རྒན་ནི་སློབ་གསོ་འཛུགས་སྐྱོང་གི་གཞི་རྩ་དང་སློབ་གསོ་དར་རྒྱས་ཀྱི་འབྱུང་རྩ་རེད་ལ། སློབ་གསོ་འཕེལ་རྒྱས་གཏོང་བའི་ཐོན་ཁུངས་ཨང་དང་པོའང་རེད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་དགེ་རྒན་གྱི་དཔུང་ཁག་འཛུགས་སྐྱོང་ལ་ཚད་མཐོའི་མཐོང་ཆེན་གནང་བས། དགེ་རྒན་གྱི་དཔུང་ཁག་གི་བྱང་ཚད་ཟམ་མི་ཆད་པར་མཐོ་རུ་ཕྱིན་པ་དང་། གྲུབ་ཆ་ཟམ་མི་ཆད་པར་ལེགས་སུ་ཕྱིན་པ། ཐོབ་ཐང་ཟམ་མི་ཆད་པར་ལེགས་སུ་ཕྱིན་པ། དགེ་རྒན་གྱི་དཔུང་ཁག་འཛུགས་སྐྱོང་ལ་ལོ་རྒྱུས་རང་བཞིན་གྱི་གྲུབ་འབྲས་ཐོབ་པ། ཏང་དང་རྒྱལ་ཁབ་ལ་ཕུལ་བྱུང་ཤེས་ལྡན་པ་འབོར་ཆེན་གསོ་སྐྱོང་བྱུང་ནས་རང་རྒྱལ་གྱི་སློབ་གསོའི་བྱ་གཞག་འཕེལ་རྒྱས་གཏོང་ཆེད་ལེགས་སྐྱེས་མངོན་གསལ་དོད་པོ་འབུལ་ཐུབ་ཡོད། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་བྱེད་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་ཏང་གི་ཚོགས་ཆེན་ཉི་ཤུ་པའི་དགོངས་དོན་ལ་གོ་བ་གཏིང་ཟབ་ལེན་པ། སློབ་གསོ་མཁས་ཅན་གྱི་སྙིང་སྟོབས་དར་སྤེལ་ཤུགས་ཆེན་གཏོང་བ། བྱང་ཚད་མཐོ་བའི་དགེ་རྒན་དཔུང་ཁག་གསོ་སྐྱོང་བྱེད་པ། ཀྲུང་གོའི་ཁྱད་ཆོས་ཀྱི་དགེ་རྒན་གྱི་སློབ་གསོའི་མ་ལག་འཐུས་སྒོ་ཚང་དུ་གཏོང་བ། དཔེ་ཁྲིད་མི་སྐྱོང་གི་ནུས་པ་ཆེ་རུ་གཏོང་བ། དགེ་རྒན་ལ་དོ་དམ་དང་ཐོན་ཁུངས་བཀོད་སྒྲིག་བྱེད་སྟངས་ལེགས་སུ་གཏོང་བ། ཐོབ་ཐང་འགན་ལེན་བྱེད་ཤུགས་ཆེ་རུ་གཏོང་བ། གཟི་བརྗིད་མཚན་སྙན་དང་གཟེངས་བསྟོད་མ་ལག་འཐུས་ཚང་དུ་གཏོང་བ། སྤྱི་ཚོགས་ཡོངས་ཀྱིས་དགེ་རྒན་ལ་བརྩི་འཇོག་དང་སློབ་གསོར་མཐོང་ཆེན་བྱེད་པའི་རྣམ་པ་ཟབ་མོ་ཞིག་ཆགས་པར་བྱེད་པ། དགེ་རྒན་རྣམས་ལ་སྤྱི་ཚོགས་ཐོག་བརྩི་འཇོག་མང་ཤོས་ཐོབ་པ་དང་མི་རྣམས་ཀྱིས་ཡིད་སྨོན་མང་ཤོས་བྱེད་པའི་ལས་རིགས་སུ་འགྱུར་བ་བཅས་བྱས་ཏེ། སློབ་གསོའི་རྒྱལ་ཁབ་སྟོབས་ཆེན་འཛུགས་སྐྲུན་མགྱོགས་པོ་བྱེད་པ་དང་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་བྱེད་ཆེད་འདེགས་སྐྱོར་ནུས་ལྡན་བྱེད་དགོས་ཞེས་མཛུབ་སྟོན་གནང་བ་རེད།

ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ་རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཏིང་ཤུའེ་ཞང་ཚོགས་འདུར་ཞུགས་ཤིང་། ཁོང་གིས་ཞི་ཅིན་ཕིང་གི་འཕྲིན་ཡིག་དང་ལི་ཆང་གི་མཆན་བཀོད་མཛུབ་སྟོན་བརྒྱུད་བསྒྲགས་གནང་བ་དང་འབྲེལ་གསུང་བཤད་ཀྱང་གནང་བ་རེད།