དགེ་རྒན་ལགས།
བན་ཤུལ་བྱམས་པ་རྒྱལ།
དགེ་རྒན་ལགས།ཁྱེད་ནི།
འཇིག་རྟེན་གྱི་ལྗོན་པའི་རྩ་བ་ལ་ཆུ་དང་ཉི་འོད་བསུ་བའི་ལྷ།
ཁྱིམ་བདག་གི་འཁོར་བའི་གཞི་མ་ལ་མེ་ཁ་དྲོན་མོ་གསོ་བའི་མི།
སློབ་མ་ཚོའི་མི་ཚེའི་ལམ་ཁ་ལ་དཀར་གསལ་གྱི་སྣང་བ་འདྲེན་པའི་འོད།
སྤྱི་ཚོགས་ཀྱི་རེ་བའི་རྨི་ལམ་ལ་ལག་ལེན་གྱི་ཕྱག་རྒྱ་གཡོ་བའི་གར།།
དགེ་རྒན་ལགས།ཁྱེད་ཀྱིས།
རྒྱུ་འབྲས་ཀྱི་རྒྱ་མ་དྲང་བོར་སློང་བའི་སྤོབས་པ་དེ་གནང་ངོ་།།
ཆོས་ཉིད་ཀྱི་བདེན་པ་གསལ་བོར་གཟིགས་པའི་བློ་མིག་དེ་བསྩལ་ཏོ།།
བདེན་རྫུན་གྱི་ལེགས་ཉེས་རྣམ་པར་འབྱེད་པའི་རིག་པ་དེ་བསྐྱེད་དོ།།
གླེགས་བམ་གྱི་མདུད་རྒྱ་ཆེས་ཆེར་འབྱེད་པའི་ཤེས་རབ་དེ་བསྐྲུན་ཏོ།།
དགེ་རྒན་ལགས།
ཉིན་མོའི་སློབ་ཁྲིད་ཀྱིས་ཁྱོད་ཀྱི་རེ་སྨོན་གྱི་མེ་དཔུང་སྦར་ཀྱང་།
མཚན་མོའི་ཟླ་འོད་ཀྱིས་ཁྱོད་ཀྱི་ཁེར་རྐྱང་གི་རྒྱབ་གཟུགས་སྲུང་ལ།
ལོ་ཟླའི་མག་མོག་གིས་ཁྱོད་ཀྱི་ནམ་མཁའ་ལ་ར་རི་འབྲི་ཞིང་།།
འཁོར་བའི་གདུག་རྩུབ་ཀྱིས་ཁྱོད་ཀྱི་རྨི་ལམ་ལ་བརྡབ་གསིག་གཏོང་ཨང་།
ཡིན་ནའང་།
སློབ་ཁང་གྲུ་བཞི་ཡིས་ཁྱོད་ཀྱི་རྣམ་ཤེས་ལ་ལོག་མལ་བཟོས་ཤིང་།
སློབ་མའི་ངོ་གདོང་གིས་ཁྱོད་ཀྱི་འཇིག་རྟེན་ལ་ཁ་དོག་བསྐྲུན་པས།
ཁྱོད་ཀྱིས་རང་ཉིད་རྒས་པ་མི་ཚོར་ཞིང་།
ཁྱོད་ཀྱིས་རང་ཉིད་ངལ་བའང་མ་ཤེས་པར།
ཁྱོད་རང་སློབ་ཁང་དུ་རྒས་ཤིང་ཁྲིད་སྟེགས་སུ་འཐིམས་ཨང་།
དགེ་རྒན་ལགས།
ཁྱོད་ལ་དགེ་རྒན་ལེགས་པོ་ཞིག་བྱ་འདོད་ཀྱི་དམིགས་ཡུལ་དགོས་པ་ལས།
གླ་བ་ཡག་པོ་ཞིག་གཉེར་འདོད་ཀྱི་ཕུགས་བསམ་དགོས་པ་མ་རེད།
ཁྱོད་ལ་དྲང་བདེན་སྐྱོང་བའི་སྙིང་སྟོབས་དགོས་པ་ལས།
གཡོ་སྒྱུ་འཁྲབ་པའི་རིག་འཁྲུལ་དགོས་པ་མ་རེད།
ཁྱོད་ལ་བྱམས་སེམས་དང་སྙིང་རྗེ་དགོས་པ་ལས།
ཞེ་སྡང་དང་ཁུ་ཚུར་དགོས་པ་མ་རེད།
ཁྱོད་ལ་མཁས་པས་དམན་ས་འཛིན་པའི་བརྟུལ་ཞུགས་དགོས་པ་ལས།
བླུན་པོས་དཔོན་ས་རྩོད་པའི་ཧམ་སེམས་དགོས་པ་མ་རེད།
དགེ་རྒན་ལགས། ཁྱེད་ནི་ནམ་ཡང་།
གནས་ལུགས་དང་དྲང་བདེན་གྱི་རྩ་བ་ན་འགྲེངས་ཡོད་པས།
དབང་གི་ཐམ་ཁས་གཡོ་བར་མ་བྱེད་ཅིག
རྒྱུ་འབྲས་དང་ཆོས་ཉིད་ཀྱི་ཟབ་ས་ན་བཞུགས་ཡོད་པས།
ནོར་གྱི་མཛེས་མས་བསླུ་བར་མ་གྱུར་ཅིག
དགེ་རྒན་ལགས།
ཁྱེད་ཀྱིས་རང་ཉིད།
འཁོར་བའི་སྡུག་བསྔལ་ལ་བྱོན་པའི་ལྷ་གསོན་པོ་ཞིག་ཏུ་བསྒོམ་པར་གྱིས་དང་།
རང་ངོ་གསལ་བོར་མཐོང་སྲིད་ལ།
ཁྱེད་ཀྱིས་རང་ཉིད།
འགྲོ་བའི་བློ་མིག་ལ་བཏེགས་པའི་འོད་ཆེན་པོ་ཞིག་ཏུ་སེམས་པར་གྱིས་དང་།
ཐུགས་བཞེད་ལྷུན་གྱིས་འགྲུབ་སྲིད།
དགེ་རྒན་ལགས།
ཁྱེད་རང་ངེས་པར་དུ།
བླུན་པོ་མང་ས་ལ་སྙིང་རྗེ་ཡིས་བྱོན་དགོས།
མུན་པ་ཟབ་ས་ལ་འོད་སྣང་གིས་འཚེར་དགོས།
གྲང་རེག་རྒོད་ས་ལ་མེ་ལྕེ་རུ་འབར་དགོས།
རྨོངས་པའི་རྩུབ་འགྱུར་ལ་ང་རྒྱལ་གྱིས་འགྲེང་་དགོས།
དགེ་རྒན་ལགས།ཁྱེད་ཀྱིས།
དབུ་འཕང་མཐོན་པོར་ཁྱོགས་ལ།
འགྲོ་བའི་སྨོན་ལམ་ཀློང་གི
ཞོགས་པ་རེ་རེའི་ཉི་ཟེར་ལ་སྤྱན་གྱིས་ཡང་་ཡང་གཟིགས་དང་།
ཁྱེད་ཀྱིས་དྲན་ཅིང་སྙེག་པའི་ནམ་མཁའ་དེ་ཇི་འདྲའི་མཐོངས་ཡངས་ཨང་།
དགེ་རྒན་ལགས།ཁྱེད་ཀྱིས།
ཕྱག་ཟུང་ཤེད་ཀྱིས་རྐྱོངས་ལ།
ཀུན་ཀྱི་རེ་བའི་ཁམས་ཀྱི་
དབྱར་ཟླ་དྲུག་པའི་སྐྱེ་མཚར་ལ་ཕྱག་གིས་རེག་རེག་མཛོད་དང་།
ཁྱེད་ཀྱིས་རེ་ཞིང་སྒུག་པའི་འཇིག་རྟེན་དེ་ཇི་འདྲའི་མཚར་སྡུག་རྫོགས་ཨང་།
སྤྱི་ལོ༢༠༢༣ལོའི་དགེ་རྒན་དུས་ཆེན་ལ་ཕུལ་བའོ།
|