༢༠༢༣ལོའི་བསང་ཆུ་རྫོང་ཨ་མཆོག་སློབ་གསོ་ཡར་སྐུལ་ཚོགས་པའི་སློབ་གསོའི་བྱ་འགུལ། 

༢༠༢༣ལོའི་བསང་ཆུ་རྫོང་ཨ་མཆོག་སློབ་གསོ་ཡར་སྐུལ་ཚོགས་པས་ཕུལ་བྱུང་སློབ་ཆེན་སློབ་མར་རོགས་དངུལ་བྱ་དགའ་སྟེར་བའི་མཛད་སྒོ་སྤྱི་ཟླ་བརྒྱད་པའི་ཚེས་ཉེར་གཉིས་ཉིན་ཨ་མཆོག་ལོ་དགུའི་ལུགས་ཀྱི་ཞག་འདུག་སློབ་གྲྭ་ནས་སྤེལ། 

  ཚོགས་ཐོག་ནས་ཨ་མཆོག་གྲོང་རྡལ་མི་དམངས་སྲིད་གཞུང་གི་ཧྲུའུ་ཅི་སངས་རྒྱས་སྐྱབས་ལགས་ཀྱིས་གཏམ་བཤད་ལས་བསྟན་དོན། “སྔོན་ཆད་བྱ་དགའ་ཐོབ་མྱོང་བ་དང་ད་ལྟར་ཐོབ་བཞིན་པ། མ་འོངས་པར་བྱ་དགའ་འཐོབ་རྒྱུ་ཡིན་པ་མཐའ་དག་གིས་ས་གནས་སློབ་གསོ་ཡར་སྐུ་ཚོགས་པའི་རེ་བ་སྟོང་ཟད་དུ་མི་གཏོང་བར། མ་འོངས་པར་སོ་སོས་སློབ་ལ་ཧུར་བརྩོན་བྱས་ཏེ། རང་ལམ་རང་གིས་བཙལ་ཞིང་། རང་མགོ་རང་གིས་འཁྱོངས་པ། ཕ་ས་ཕ་ཡུལ་ལ་ཕན་ཐོགས་པའི་མི་ཞིག་ཏུ་ཆགས་རྒྱུ་རེ་བ་ཡིན།”ཞེས།  ཨ་མཆོག་སློབ་གསོ་ཡར་སྐུལ་ཚོགས་པའི་ཚོགས་གཙོ་བསྟན་པ་ལགས་ཀྱིས་ནན་གྱིས་བསྟན་དོན། “ངེད་ཅག་ཨ་མཆོག་ས་ཁུལ་ནས་འཚར་ལོངས་བྱུང་བའི་ལས་བྱེད་ལྷན་རྒྱས་གཙོས་ས་ཁུལ་གྱི་མི་སྣ་སུ་ཡིན་ཡང་དགེ་ལས་ལ་བརྩོན་ཞིང་དོན་བཟང་ལ་འབད་ཚེ་འབྲས་བུ་ལེགས་པ་རེ་འབྱུང་རྒྱུ་ཡོད་པ་སྟེ། དཔེར་ན། བསམ་གཏན་ལྟ་བུ་རེད། བྲག་དཀར་རྫོང་གི་ཚོང་ཁྲོམ་ཞིག་མེ་ཡི་ཞལ་དུ་བསྟིམས་ཚར་བ་ན། དེ་གར་ཡོད་པའི་བསམ་གཏན་གྱི་ཚོང་ཁང་ལ་མེ་སྐྱོན་ཅི་ཡང་བྱུང་མེད། དེ་ནི་ཁོང་གིས་སློབ་མ་རྣམས་ལ་བཏང་བའི་དགེ་རྩ་དེའི་འབྲས་བུ་རུ་འདོད་པས། ང་ཚོས་བསམ་གཏན་ལ་སློབ་སྦྱོང་བྱ་འོས”ཞེས།  མཇུག་བསྡུའི་སྐབས་སུ་སློབ་གཙོ་སངས་རྒྱས་ཚེ་རིང་ལགས་ཀྱིས་བསྟན་དོན། “ངས་འདི་ནས་ཨ་མཆོག་ས་ཁུལ་གྱི་སློབ་གསོ་ཡར་སྐུལ་ཚོགས་པའི་བྱ་གཞག་འདིར་ཐུགས་སྨོན་ཆེ་གཏད་དང་བཀའ་དྲིན་ཆེ་བསྩོལ་མཛད་མཁན་གྱི་དབལ་མང་ཚང་སྤྲུལ་བའི་སྐུ་རིན་པོ་ཆེ་མཆོག་དང་། ཨ་མཆོག་ས་ཁུལ་གྱི་བུ་བུས་ཕྲུག་བུ་བརྒྱུད་ཕྱི་རབས་པའི་མདུན་ལམ་ལ་སེམས་ནས་ཚོགས་པ་འདི་གསར་འཛུགས་དང་འགོ་མཇུག་བར་གསུམ་གྱི་བྱ་བར་ནམ་ཡང་ཐུགས་ཁུར་ཆེ་བཞེས་དང་མ་རྩ་ཅི་འབྱོར་གཏོང་མཁན་གྱི་ཚོགས་པའི་ཚོགས་གཙོ་ཨ་ཁུ་བསྟན་པ། དེ་མིན་དངོས་སམ་བརྒྱུད་ནས་ཚོགས་པའི་བྱ་གཞག་ཆེད་ལུས་ཀྱི་ཚེགས། སེམས་ཀྱི་ཤུགས། རྒྱུ་ཡི་གྲོན་བཅས་གཏོང་མཁན་བློ་མཐུན་རྟ་མགྲིན་སྐྱབས་གཙོ་བྱས་རྫོང་དང་ཤང་གི་ཏང་སྲིད་འགོ་ཁྲིད་དང་། རྒན་མགོན་པོ་སྐྱབས་གཙོ་བྱས་ཚོགས་པའི་མི་སྣ། དེ་མིན་དགོན་པའི་དོ་དམ་ཁང་དང་སྡེ་དམངས་སོ་སོའི་འགན་འཁུར་བ། རྒྱ་ཆེ་བའི་མང་ཚོགས་བཅས་ལ་སྙིང་ཐག་པ་ནས་བཀའ་དྲིན་ཆེ་ཞུ་བ་ཡིན། དེང་གི་དུས་རབས་ནི་འགྲན་རྩོད་ཛ་དྲག་ཆེ་ཞིང་འཕེལ་རྒྱས་མགྱོགས་མྱུར་ལྡན་པའི་དུས་རབས་ཤིག་ཡིན་པས་ཛ་དྲག་ཆེ་བའི་འགྲན་རྩོད་ཁྲོད་ཕམ་ཁ་མི་ཉོ་བར་རྒྱལ་ཁ་ལེན་དགོས་ན་ངེས་པར་དུ་ཤེས་རིག་གི་ལམ་ཁ་སྙེགས་དགོས་པ་རེད། ངས་ཚོགས་པའི་ཚབ་བྱས་ནས་ཤེས་རིག་གི་ལམ་ཁ་སྙེག་མཁན་གྱི་སློབ་བུ་ཁྱེད་ཅག་གིས་དེ་རིང་རང་རང་ས་ནས་འདི་ལྟ་བུའི་གཡུར་ཟའི་འབྲས་བུ་བླངས་པར་སྙིང་ཁོངས་རུས་པའི་སྟེང་ནས་རྟེན་འབྲེལ་ཞུ་བ་ཡིན། 

    དམིགས་བསལ་ད་ལོའི་བྱེད་སྒོའི་འདིའི་ཁྲོད་དུ་མི་སྣ་གལ་ཆེན་ཞིག་ལ་མཐོངས་ཆེན་པོས་དྲིན་གཟོའི་བྱ་དགའི་སྐྱེས་ཕུལ་ས་དེ་ནི་དགེ་རྒན་འཕགས་པ་ལགས་ཡིན། རྒན་འཕགས་པ་ལགས་ནི་ཨ་མཆོག་འབྲིང་བ་སྡེ་བའི་མི་ཡིན།  སྐུ་ན་ཆུང་དུས་ཕ་ཡུལ་གྱི་གཞུང་གི་ངལ་རྩོལ་གྱི་ལས་ཀར་ཞུགས་མྱོང་ལ། ངལ་རྩོལ་གྱི་གོ་རིམ་ཁྲོད་ནས་སློབ་སྦྱོང་རང་སྦྱོང་དང་། དགེ་རྒན་གྱི་བྱ་བར་ཟབ་སྦྱོང་དང་སློབ་གཉེར་ཟབ་སྦྱོང་སོགས་སུ་ཞུགས། 1980–2003 སློབ་གསོའི་བྱ་བར་ཞུགས།  1997-2023བར་སློབ་གསོ་ཡར་སྐུལ་ཚོགས་པའི་ལས་འགན་དང་དུ་བཞེས།  དེང་གི་ཀན་ལྷོ་ཁུལ་སྲིད་གྲོས་ཀྱི་ཀྲུའུ་ཞི་རིན་ཆེན་དོན་གྲུབ་ལགས་ལོ་རབས་དགུ་བཅུའི་ནང་ཨ་མཆོག་མི་དམངས་སྲིད་གཞུང་གི་ཡུལ་ཚོའི་འགོ་བར་བཞུགས་པ་དུས་དེ་ནས་བཟུང་ས་གནས་ཀྱི་སློབ་གསོའི་བྱ་བར་རོགས་དངུལ་བསླངས་ཏེ་སློབ་གསོ་ཐེབས་རྩ་ཚོགས་པའི་ལས་དོན་གྱི་དབུ་ཁྲིད་གཙོ་གཉེར་དུ་གནང་བ་དེ་ནས་བཟུང་ད་ལྟའི་བར་ཏེ་ལོ་ངོ་ཉེར་དྲུག་གི་རིང་ལ་ཚོགས་པ་འདིའི་རོགས་དངུལ་རྩིས་གཉེར་བའི་འགན་གཅིག་ལྕོགས་སུ་བཞེས།  ད་ལོ་དགུང་གྲངས་གྱ་གཉིས་སོན་པའི་ཁོང་རང་ལས་གནས་འདི་ནས་ངལ་གསོའི་གོ་སྐབས་གནང་བ་ལགས་སུ་བཀའ་དྲིན་གཏིང་རག་གི་སླད་དུ་སྤུས་ལེགས་མཐའ་རྒྱན་དང་བཅས་པའི་གཟི་བརྗིད་གོས་དར་གྱི་དཔང་རྟགས་ཕུལ་བ་ལ་བརྟེན་མ་འོངས་པ་ན་རྒན་ཁོང་གི་སྐུ་ཚེ་རིང་དུ་བསྲིངས་ཏེ་འབྱུང་ཁམས་བདེ་ལྡན་སྐྱིད་པའི་སྨོན་འདུན་ཞུས་པ་ལགས། 

མཇུག་མཐར་ཨ་མཆོག་ས་ཁུལ་གྱི་སློབ་གསོ་གོང་ནས་གོང་དུ་འཕེལ་བ་ལ་བརྟེན་སྲིད་འབྱོར་རིག་གསུམ་དབྱར་མཚོ་བཞིན་རྒྱས་པའི་སྨོན་ལམ་སྙིང་ནས་འདེབས། 

           ཞེས་རེབ་འདིའི་གསར་འགྱུར་འབྲི་མཁན་རྒྱ་འདུ་སངས་རྒྱས་ཀྱིས།