བྱར་པོ་པཎ་ཆེན་རྡོ་རྗེ་ཕ་ལམ།

གྲུབ་མཐའ། བཀའ་བརྒྱུད་པ།

འཁྲུངས་འདས། ༡༤༤༧-༡༥༠༦

བྱར་པོ་པཎ་ཆེན་རྡོ་རྗེ་ཕ་ལམ་མཆོག་ནི། སྤྱི་ལོ་(༡༤༤༧)ལོར་བྱར་ཡུལ་དུ་སྐུ་འཁྲུངས། དགུང་ལོ་ཆུང་ངུའི་དུས་ནས་རིག་གནས་སྤྱི་ལ་མཁས་པར་སྦྱངས་ཤིང་། བཀའ་བརྒྱུད་པའི་གྲུབ་མཐའ་འཛིན་པ། དྭགས་པོ་སྨན་སྒོམ་རྡོ་རྗེ་རྒྱལ་མཚན་གྱི་སློབ་མ་དྲང་སྲོང་དོན་གྲུབ་དར་ཞེས་སྔ་འགྱུར་གྱི་གཏེར་ཡང་བཏོན་པ་དེའི་མི་རབས་གསུམ་པ་ཀརྨ་པ་ཆོས་གྲགས་རྒྱ་མཚོའི་བླ་སྨན་དང་། སྨན་གྱི་སློབ་དཔོན་གྱི་བསྐོ་འཇའ་གནང་སྟེ་འཆད་ཉན་ཚུགས་པའི་འཚོ་བྱེད་པདྨ་དཀར་པོ་ཞེས་པའི་རིགས་སྲས་ཡིན་ཞིང་། ཀརྨ་པས་བསྐོ་འཇའ་སོགས་གཟེངས་བསྟོད་ཅིང་རང་མེས་ཀྱི་སྲོལ་དང་། སྐྱེམ་པ་ཚེ་འབུམ་གྱི་ཞབས་ལ་གཏུགས་ནས་ཟུར་ལུགས་ལ་མཁས་པར་སྦྱངས་པས་བྱར་པོ་པཎ་ཆེན་ཞེས་པའི་མཚན་ཐོགས་ཤིང་། ལྷོ་རྒྱུད་དུ་གསོ་དཔྱད་ཀྱི་བསྟན་པ་དར་བར་མཛད།

      བརྩམས་ཆོས་ལ། རྒྱུད་སྡེ་བཞི་གའི་འགྲེལ་པ། ཁོག་འབུགས་ལེགས་བཤད་གསེར་གྱི་སྙེ་མ། བྱེ་བ་རིང་བསྲེལ་གྱི་དཀར་ཆགས་སོགས་མཛད། བརྒྱུད་འཛིན་སློབ་མ་འཕྱོངས་རྒྱས་འཚོ་བྱེད་ཀུན་རྡོར་སོགས་བུ་སློབ་མང་པོ་མཆིས་པར་གཞུང་དང་། ལག་ལེན་མན་ངག་མཐའ་དག་འཆད་ཉན་བཟང་པོས་བསྐྱངས་ཏེ། གསོ་དཔྱད་ཀྱི་བསྟན་པ་སྤྲིན་བྲལ་ཉི་འོད་བཞིན་རྒྱས་པར་མཛད། སྤྱི་ལོ་(༡༥༠༦)ལོར་སྐུ་གཤེགས།

གསལ་བཤད། བོད་ཀྱི་པཎྚི་ཏའི་དཀར་ཆག་རབ་གསལ་མེ་ལོང་ཞེས་བྱ་བ་འདི་ནི་གངས་ལྗོངས་ཤེས་རིག་ནོར་བུའི་སློབ་གླིང་གི་སྐབས་ཉེར་ལྔ་བའི་མཐར་ཕྱིན་བོད་ཡིག་ཆེས་མཐོའི་འཛིན་གྲྭས་འཚོལ་སྡུད་དང་ཕྱོགས་བསྒྲིགས་བྱས་པ་ཞིག་ཡིན་ཞིང་།   དེབ་འདིའི་རྩོམ་སྒྲིག་འགན་ཁུར་བ་གཤེན་མི་དང་། སྤྱང་ཡེ་ཤེས། བེ་རི་རྒྱལ་མཚན་བཅས་ཀྱིས་ཡིད་འཐད་བྱུང་ནས་མ་ཡིག་མཁོ་སྤྲོད་བྱས་པ་བཞིན་གངས་ལྗོངས་ཤེས་རིག་ནོར་བུའི་སློབ་གླིང་གི་དྲ་བར་མུ་འགོད་བྱས་པ་ཡིན།