མཐུན་པ་སྤུན་བཞི།

  སྔོན་ཝ་ར་ཎ་སིའི་རྒྱལ་པོ་ཚངས་སྦྱིན་གྱི་དུས་སུ། སངས་རྒྱས་བཅོམ་ལྡན་འདས་དེ་ཉིད་བྱ་སྲེག་པ་ཞིག་གི་སྐྱེ་བ་བཞེས་ཏེ་ནགས་ཚལ་ཆེན་པོ་ཞིག་གི་མཐར་གནས་སོ། ། དེར་སྤྲེའུ་ཞིག་དང༌། རི་བོང་ཞིག་དང་གླང་ཆེན་བཅས་གནས་པ་ཐམས་ཅད་ཀྱང་ཕན་ཚུན་འཚེ་བ་མེད་པར། བཅུད་ལྡན་ཤིང་འབྲས་དང༌། མ་རྨོས་པའི་ལོ་ཏོག རང་བྱུང་ཡན་ལག་བརྒྱད་ལྡན་ལ་སོགས་པར་གང་དགར་ལོངས་སྤྱོད་ཅིང་མཛའ་བར་གནས་པས་ཉིན་ཞིག་ཁོང་བཞི་བགྲོས་ནས་འུ་ཅག་ཕན་ཚུན་བརྩེ་ཞེན་དུ་ཡུན་རིང་འགྲོགས་ཀྱང་རྒན་གཞོན་དང་བཀུར་བྱ་བཀུར་བྱེད་ཀྱི་དབྱེ་བ་མེད་པས། ད་ནི་རྒན་རིམ་ལ་བཀུར་བར་བྱའོ་ཞེས་རྒན་གཞོན་གྱི་དབྱེ་བ་འབྱེད་ཐབས་གྲོས་བསྡུར་མཐར། དེར་སྐྱེས་པའི་ཤིང་ནྱ་གྲོ་ས་དྷའི་སྡོང་བོ་ཆེན་པོ་ཞིག་ཚད་བྱས་པས། གླང་ཆེན་ན་རེ། ང་གཞོན་དུས་སུ་ཤིང་འདི་ངའི་ལུས་དང་མཉམ་པ་དྲན་ཟེར། སྤྲེའུས་བདག་ཀྱང་དྲན་དུས་ཤིང་འདི་ཆུང་བས་བདག་གི་ལུས་དང་མཉམ་ཟེར། རི་བོང་གིས་ངས་དྲན་དུས་འདབ་མ་གཉིས་སོར་ལྔ་ཙམ་ཡོད་པ་དེ་ལ་ཟིལ་བ་མངར་མོ་ཆགས་པ་དེ་བདག་གིས་མྱངས་ཟེར། བྱ་སྲེག་པ་ན་རེ། ཤིང་སོན་ས་ལ་ཡོད་པའི་སྟེང་བདག་གིས་གཅིན་དོར་བ་ལ་བུ་བརྟེན་ནས་ཤིང་སྡོང་འདི་སྐྱེས་སོ་ཟེར་བས། རྒན་གཞོན་གྱི་གོ་རིམ་ཤེས་ཏེ་རྒན་རིམ་ལ་བསྙེན་བཀུར་དང་གུས་འདུད་བྱེད་ཅིང༌། ཁོང་བཞིའི་ནང་ནས་རྒན་པ་བྱ་སྲེག་པས་གཞན་གསུམ་ལ་བསླབ་པའི་གཞི་ལྔའི་སྤང་བླང་གི་ཤིང་ཡིད་གཅུགས་པར་གནས་སོ། ། དེའི་བསོད་ནམས་ཀྱི་མཐུས་ཡུལ་ཁམས་ཀུན་ཏུ་བདེ་ཞིང་ཚེ་དང་བསོད་ནམས། དཔལ་འབྱོར་ཐམས་ཅད་ཡར་ངོའི་ཟླ་ལྟར་འཕེལ་བར་གྱུར་ཏོ། ། རྣམ་ཐར་དེ་བཞིན་རྒྱལ་ཁམས་བདེ་ཞིང་ལས་བཞི་དགེ་བའི་རྟེན་འབྲེལ་དུ། དགོན་སྡེ་དང་ཁྱིམ་ཚང་གི་རྩིག་ལྡེབས་སུ་ཡུལ་ལྗོངས་ཉམས་དགའ་བར་ནྱའི་ཤིང་འདབ་མ་རྒྱས་པ་ཞིག་གི་མདུན་སར། གླང་པོ་ཆེ་སྟོབས་དང་ལྡན་པ། དེའི་སྟེང་དུ་སྤྲེའུས་ཤིང་ཏོག་འཛིན་པ། དེའི་སྟེང་རི་བོང༌། དེའི་སྟེང་བྱ་སྲེག་པ་བཅས་འོག་ནས་གོང་དུ་རིམ་པར་བཀུར་བའི་ཚུལ་དུ་གནས་པའི་རི་མོ་ཞིག་འབྲི་སྲོལ་ཡོད་པ་དེས་དགེ་འདུན་དང་ཡང་ན་མི་རྣམས་མཐུན་སྒྲིལ་ཡོང་བ་མཚོན་ནོ ། །

རྩོམ་ཁུངས།  དགེ་ལུགས་པའི་དྲ་བ།   དྲ་བའི་སྦྲེལ་ཐགhttp://www.tb1025.cn