ཚེ་རིང་རྣམ་དྲུག
ཚེ་རིང་རྣམ་དྲུག་ནི་བྲག་ཚེ་རིང་དང༌། ཆུ་ཚེ་རིང༌། ཤིང་ཚེ་རིང༌། ལྷ་ཚེ་རིང༌། བྱ་ཚེ་རིང༌། རི་དྭགས་ཚེ་རིང་བཅས་ལ་ཟེར་ཞིང༌། དེའི་བྱུང་བ་དང་མཚོན་དོན་ནི་པཎ་ཆེན་སྐུ་ཕྲེང་དགུ་པ་ཆོས་ཀྱི་ཉི་མས།
སྔོན་ཚེ་མ་ཧཱ་ཙི་ནའི་ཡུལ་གྲུ་འདིར། །
དུས་གསུམ་སྲས་བཅས་རྒྱལ་བས་བྱིན་བརླབས་པས། །
མི་འགྱུར་མི་ཞིག་ཁྱད་ཆོས་བདུན་ལྡན་པའི། །
གཞོམ་བྲལ་རྡོ་རྗེའི་རང་བཞིན་བྲག་རི་བསྐྲུན། །
དེ་ཡི་ངོགས་ལས་འཆི་མེད་བདུད་རྩིའི་རྒྱུན། །
ལྷུང་ལྷུང་རྒྱུན་མར་འབབ་པའི་བརླན་གཤེར་ལས། །
རོ་མཆོག་བརྒྱད་ལྡན་འབྲས་བུས་ཡོངས་དུད་པའི། །
ཚེ་རིང་ལྗོན་ཤིང་རྒྱས་ཤིང་དེ་ཡི་དྲུང༌། །
ཚེ་སྣང་དཔག་མེད་མགོན་གྱི་གཟི་སྟོབས་བྱིན།
སྙིང་ལ་ཞུགས་པ་བདེ་གསལ་མི་རྟོགས་པས། །
ཡེ་ཤེས་ཏིང་འཛིན་མངོན་འགྱུར་དྲང་སྲོང་ཆེ། །
ཚེ་རིང་གྲགས་སྙན་འབར་བ་དགྱེས་བཞིན་བཞུགས། །
དྲང་སྲོང་ཆེན་པོའི་ཆབ་གཏོར་རིལ་བུའི་ཚོགས། །
ལོངས་སུ་སྤྱད་པས་རི་དྭགས་ཚེ་རིང་ཐོབ། །
ལྗོན་འབྲས་འཆི་མེད་བཏུང་བའི་རྒྱུན་བཟང་པོར། །
འབད་མེད་སྤྱད་པས་ཚེ་རིང་འདབ་ཆགས་བྱུང༌། །
དེ་ལྟར་རྟེན་འབྲེལ་ཕུན་ཚོགས་མི་བསླུའི་སྟོབས། །
བདེན་པའི་མཐུ་ལ་དྲུག་ལྡན་ཚེ་རིང་གཟུགས། །
གང་དུ་མཆིས་འདིར་མི་གཤིས་རྒུད་པའི་ཚོགས། །
སྤྱི་དང་ཁྱད་པར་དུས་མིན་འཆི་བ་ཡི། །
འཇིགས་པ་ཀུན་བཅོམ་བདེ་སྐྱིད་དཔལ་འབྱོར་སྟོབས།།
ཚེ་དང་བསོད་ནམས་མཁོ་རྒུའི་ནོར་ལོངས་སྤྱོད། །
གོང་ནས་གོང་དུ་འཕེལ་ཞེས་དྲང་སྲོང་གི།
བདེན་ཚིག་དེ་བཞིན་གནས་འདིར་ལྷུན་གྲུབ་ཤོག །
ཅེས་གསུངས་པ་བཞིན་ནོ། །
རྩོམ་ཁུངས། དགེ་ལུགས་པའི་དྲ་བ། དྲ་བའི་སྦྲེལ་ཐགhttp://www.tb1025.cn
|