སློབ་གསོའི་ཟར་ཟུར།  

 དམག་འཁྲུག་ལ་བརྟེན་ཏེ་ཁ་ལོ་སྒྱུར་མཁན་ཚོས། ཕ་རོལ་བོ་ནི་དགྲ་བོ་ཡིན་ཞིང་དེ་ཅིས་ཀྱང་གསོད་དགོས་པའི་སློབ་གསོ་གཏོང་མོད།   ཤེས་རིག་གི་ཞིང་ཁམས་སུ་གྲུབ་པའི་བསམ་བློའི་དགའ་ཚལ་དག་ནས། ཚེ་སྲོག་ཡོད་ཚད་འདྲ་མཉམ་དང་རྩ་ཆེན་ཡིན་པས།    གཅེས་སྐྱོང་དང་རང་དབང་སྤྲོད་དགོས་པའི་སློབ་གསོ་བྱེད་འོས།            

༡༩

   འཚང་མ་རྒྱས་བར་དུ་སློབ་གཉེར་ལ་ཚར་བ་མེད་པར་འདོད་པ་འདི་ནང་བ་སངས་རྒྱས་པས་སློབ་གསོར་བཟུང་བའི་སྙིང་སྟོབས་ཤིག་སྟེ།  སློབ་གསོའི་མཐར་ཐུག་གི་གྲུབ་དོན་ཡང་། སྐྱོན་ཀུན་ཟད་དང་ཡོན་ཏན་ཀུན་རྫོགས་ཉིད་ལས་གཞན་དུ་ཅི།         

༢༧

    ཟ་འཐུང་སྐྱེ་འཆིའི་གོ་རིམ་ཙམ་ལ་གཏིང་ཟབ་པའི་སློབ་གསོ་ཞིག་མ་མྱང་ཡང་ཉེས་སྐྱོན་ཆེན་པོ་མེད་དེ། དུད་འགྲོས་ཀྱང་སླ་བའི་ཆོས་ཉིད་དེ་ཙམ་ཞིག་རོལ་ཤེས་ཀྱིན་ཡོད། དེས་ན། བསམ་ཚུལ་ཡི་གེའི་ལམ་ནས་མཚོན་ཐུབ་པ་དང་།  སྣོད་བཅུད་ཀྱི་གཤིས་ལུགས་ལ་བསམ་བློ་གཏོང་ཤེས་པ། སྒོ་གསུམ་དང་འབྲེལ་བའི་བྱ་སྤྱོད་ཚད་ལྡན་ལ་ཕྱོགས་པ། རང་གཞན་གཏན་བདེའི་ས་རུ་འགོད་པའི་སློབ་གསོའི་གདམས་ངག་ཅིག་ལོན་པར་ཅིས་ཀྱང་བརྩོན་དགོས་པ་ཡིན།                

༢༩

   སློབ་གསོའི་གདུལ་བྱ་ནི་རྒྱ་ཆེ་བ་ནམ་མཁའ་ལྟ་བུ་ཞིག་སྟེ།  ཕོ་མོ་དང་རྒན་གཞོན། དབུལ་ཕྱུག་དང་མཐོ་དམན་ལ་ཁྱད་པར་མེད་པར་སློབ་གསོ་མྱོང་བའི་ཐོབ་ཐང་འདྲ་མཉམ་ཡིན།  སློབ་གསོའི་ངོ་བོ་ནི་གཏིང་ཟབ་པ་རྒྱ་མཚོ་ལྟ་བུ་ཞིག་སྟེ། ཚེ་རབས་ཕྲེང་རྒྱུད་དུ་མྱང་ཡང་ཟད་མཐའ་མེད།                  

 ༣༡

    ཨར་འདམ་གྱིས་བཟོས་པའི་ཁང་རྩེག་མང་བོ་ཞིག་མེད་ཀྱང་ཅི་སྐྱོན། ཟས་གཡོ་འཁྲུག་རྩོད་སོགས་ཀྱི་སློབ་ཚན་སྣ་མང་ཞིག་མ་འཛོམས་ཀྱང་བློ་ག་ལ་ཕམ། ང་ཚོར་མཁོ་བ། མིའི་རིགས་ལ་གལ་འགང་ཆེ་བ། དབུགས་ལྡན་ཡོད་ཚད་ཀྱི་སྤྱི་ནོར། སྣོད་བཅུད་གཉིས་ཀྱི་གསོས་སྨན། བྱམས་བརྩེ་དང་ཤེས་རབ་ཟུང་འཇུག་གི་སློབ་གསོ་ཡོད་ན། སྙིང་བོ་དང་ཡང་སྙིང་འཛོམས་ཡོད། མེ་ཏོག་དང་འབྲས་བུ་སྨིན་ཡོད།

མུ་འགོད།