མིང་། པད་མ་རིག་འཛིན།

 སྡོད་གནས།  སི་ཁྲོན་ཞིང་ཆེན་རྔ་བ་ཁུལ་མཛོད་དགེ་རྫོང་ཐང་སྐོར་སྐ་ཆུའི་འབྲོག་ར།

Email Adress:472541893@qq.com    

Tel: 13317242222/18808371782        Postcode: 624500      Wechat:13317242222

________________________________________________________

སློབ་གསོའི་རྒྱབ་ལྗོངས།   

1998-2003  ཐང་སྐོར་སློབ་ཆུང།

2003-2004  མཛོད་དགེ་རྫོང་བོད་ཡིག་སློབ་འབྲིང་།

2004-2008  གངས་ལྗོངས་ཤེས་རིག་ནོར་བུའི་སློབ་གླིང་།

2008-2009  ཁྱུང་མཆུ་རྫོང་བོད་ཡིག་སློབ་འབྲིང་།

2009-2010  རྔ་ཁུལ་དགེ་ཐོན་སློབ་ཆེན།

2010-2013  པེ་ཅེན་ཕྱི་སྐད་སློབ་ཆེན་དང་New Powerགསོ་སྦྱོང་སློབ་གྲྭ།

2018  ཨ་རའི་ཧྥོ་རྗེ་ནེའུ་ཡ་སློབ་ཆེན་གྱི་དུས་ཐུང་ཁེ་ལས་གསོ་སྦྱོང་འཛིན་གྲྭ།

2019—རང་སྦྱོང་སློབ་ཆེན་གྱི་སྲིད་འཛིན་དོ་དམ་དང་བཟོ་ཚོང་ཁེ་ལས་དོ་དམ།

________________________________________________________

འབྲེལ་ཡོད་སྦྱང་བྱ། 

བོད་ཡིག སུམ་རྟགས། སྙན་ངག  ཚད་མ། སྐར་རྩིས་སྔོན་འགྲོ།  ནག་རྩིས།

དབྱིན་ཡིག ལས་རིགས་དོ་དམ། ཁེ་ལས་འཇུག་སྒོ། མ་རྐང་དང་མ་དངུལ་འཁོར་སྐྱོད་སོགས།  

རྒྱ་ཡིག སློབ་ཆེན་རྒྱ་ཡིག ཕྱུགས་ལས་དཔལ་འབྱོར་དོ་དམ་རིག་པ། སྲིད་འཛིན་དོ་དམ་རིག་པ་སོགས།  བཟོ་ཚོང་ཁེ་ལས་དོ་དམ་སྐོར་གྱི་སྦྱང་ཚན།

________________________________________________________

ལས་ཀའི་ཉམས་མྱོང་།                   

 2008 ཤེས་རིག་གླིང་གི་ཕ་སྐད་དོ་དམ་ཚོགས་པའི་ཚོགས་མི།

2011 དམའ་འབྲིང་ཨིན་ཡིག་བརྡ་སྤྲོད་ཟུར་རྒྱན་གེ་སར་གཞོན་ནུ་དཔར་དུ་བསྐྲུན།

2012 སློབ་ཆེན་པའི་སྤྱི་ཕན་ཚོགས་པ་དེང་རབས་འབྲོག་ལས་བཙུགས།

2013 མཐོ་བོད་འབྲོག་ལས་མཉམ་སྒྲུབ་ཁང་ཐོ་འགོད་དང་མཉམ་སྒྲུབ་ལས་ཀར་སློབ་སྦྱོང་བྱེད་འགོ་བརྩམས།

2014 ཐང་སྐོར་འབྲོག་རའི་མགྲོན་ཁང་གསར་དུ་བསྐྲུན་པ་དང་འབྲོག་ལས་དངོས་སུ་གཉེར་མགོ་བརྩམས།

2015—2018 ཐང་སྐོར་འབྲོག་རའི་མགྲོན་ཁང་དོ་དམ་དང་གཉེར་སྐྱོང་བྱས།

2016  སྤྱི་ཕན་དེང་རབས་འབྲོག་ལས་ཀྱི་ལས་གཞི་མུ་མཐུད་དུ་སྤེལ་བ་དང་མཉམ་སྒྲུབ་ཁེ་ལས་སྐོར་ལ་སློབ་སྦྱོང་བྱས།

2017   སྤྱི་ཕན་དེང་རབས་འབྲོག་ལས་སྤྱི་ཚོགས་ཁེ་ལས་སུ་བསྒྱུར་བར་གྲ་སྒྲིག་བྱས།

2018 ནོར་མིག་དེང་རབས་འབྲོག་ལས་ཀུང་སི་ཐོ་འགོད་དང་། མཐོ་བོད་འབྲོག་ལས་དང་ནོར་མིག་གི་ཐོན་རྫས་གསར་དུ་བཟོས།

2019 མཛོད་དགེ་རྫོང་མཉམ་འབྲེལ་མཉམ་ལས་ནོར་མཛོད་ཁང་དུ་དང་བླངས་པར་ཞུགས།

2021  མཐོ་འབྲོག་ལས་མཉམ་སྒྲུབ་ཁང་དང་ནོར་མིག་ཀུང་སི་གཉིས་གཅིག་སྒྲིལ་བྱས་ཏེ་ལས་འཛིན་ཚོགས་གཙོའི་འགན་ཁུར།

2022  མཐོ་བོད་འབྲོག་ལས་ཆེད་ཚོང་ཁང་གི་མ་དཔེ་ཚོད་ལྟ་བྱས།

2023   མདོ་དབུས་མཐོ་སྒང་གི་འབྲོག་ལས་དཔལ་འབྱོར་དོ་དམ་གཞུང་ལུགས་སྐོར་གྱི་བསམ་གཞིག་གླེང་།

________________________________________________________

དགའ་ཕྱོགས།        འབྲོག་ལས།  བོད་ཡིག་དང་དབྱིན་ཡིག་གི་བརྡ་སྤྲོད།

 

ངའི་འབྲོག་ལས་གཉེར་བའི་ཀུན་སློང་།  

    གོང་དུ་གསལ་བ་ལྟར་ལས་ཀ་མང་བོ་ཞིག་ལ་ཚོད་ལྟ་དང་སྦྱང་བྱ་མང་བོ་ཞིག་བསླབས་བསླབས་རྗེས་ང་ནི་འབྲོག་ལས་ཀྱི་ལས་ལ་ཞུགས།  ང་རང་ལ་ཆུང་དུས་འབྲོག་ལས་གཉེར་བའི་ཕུགས་བསམ་དང་འཆར་གཞི་གཏན་ནས་ཡོད་མ་མྱོང་།  དེ་ཡང་སྐབས་དེའི་སྤྱི་ཚོགས་ཀྱི་ཁོར་ཡུག་དང་སློབ་གསོའི་ཁ་ཕྱོགས་ཀྱི་རྐྱེན་གྱིས་ཡིན་རྒྱུ་རེད།   གང་ལྟར་ལས་ཀ་དང་བྱ་བ་མང་བོ་ཞིག་སྒྲུབ་ཅིང་གོ་བ་དང་ཐོས་པ་མང་བོ་ཞིག་ཐོབ་རྗེས།  ངས་གཞི་ནས་འབྲོག་ལས་ནི་ངའི་ལྷན་སྐྱེས་ཀྱི་ལས་གནས་ཡིན་པ་དང་འབྲོག་ལས་ནི་སྤྱིར་བཏང་གི་ཁ་གསོ་ཐབས་དང་རྒྱབ་འགེབ་ཐབས་ཀྱི་འཚོ་བ་ཙམ་མིན་པར།  འབྲོག་ལས་ནི་འཛམ་གླིང་གི་ཐོན་ལས་དང་བོའི་ཡ་གྱལ་དང་མིའི་རིགས་ཀྱི་ཆེས་ཚད་མཐོ་བའི་ཁ་ཟས་དང་འབྲལ་ཐབས་མེད་པའི་ལས་རིགས་རླབས་ཆེན་ཞིག་ཡིན་པ་གཏིང་ནས་ངོས་ཟིན་ཐོབ།   དེར་མ་ཟད་ང་ཚོ་མདོ་དབུས་མཐོ་སྒང་གི་ནོར་གནག་གཙོར་བྱས་པའི་འབྲོག་ལས་འདི་ནི་སྲིད་ན་དཀོན་པའི་ཕྱུགས་ལས་ཐོན་ཁུངས་ཞིག་ཡིན་པ་དང་།  དེ་ནི་ཏག་ཏག་ངའི་ཕ་ས་ཕ་ཡུལ་དང་ཕ་མེས་ཡང་མེས་ནས་མི་རབས་ནས་མི་རབས་ལ་གཉེར་བའི་འཚོ་བའི་སྲོག་ཤིང་དེ་ཡིན་པ་གཞི་ནས་ཧ་གོ    དེ་བས་སྤྱི་ལོ་༢༠༡༣ལོ་ནས་ང་རང་དངོས་སུ་ཕྱིར་ཕ་ཡུལ་དུ་ལོག་ཅིང་འབྲོག་པའི་འཚོ་བ་བསྐྱངས་ཤིང་འབྲོག་ལས་གཉེར་འགོ་བརྩམས།   ང་ཚོའི་འབྲོག་ལས་འདི་ལ་གདོད་མའི་ཕྱུགས་ལས་ཀྱི་རྣམ་པ་མང་བོ་ད་དུང་མ་འགྱུར་བར་གནས་པ་དང་།  དེ་ལ་སྲོལ་རྒྱུན་འབྲོག་ལས་ཀྱི་ངོ་བོ་ལྡན།    འདི་ནི་ང་ཚོའི་འབྲོག་ལས་ཀྱི་ཁྱད་ཆོས་ཡིན་རྒྱུ་རེད་འདོད།   འོན་ཀྱང་སྤྱི་ཚོགས་གསར་བ་དང་དུས་རབས་གསར་བ།  མི་རབས་གསར་བ།  འབྲོག་པ་གསར་བ་འདི་འདྲའི་དུས་སྐབས་གཅིག་ལ་མཚོན་ན་ང་ཚོའི་འབྲོག་ལས་འདི་ལ་ཡང་དེང་རབས་ཀྱི་ཆ་དང་དཔལ་འབྱོར་གྱི་ཆ་དུས་དང་མཐུན་པ་ཞིག    ལུགས་དང་སྤྱི་ཚོགས་ལ་མཐུན་པ་ཞིག་ཀྱང་མེད་དུ་མི་རུང་བ་ཞིག་རེད་འདོད།  

   སྤྱིར་བཏང་མཐོ་དབུས་མཐོ་སྒང་གི་འབྲོག་ལས་ལ་ཕྱོགས་མང་བོ་ནས་འཕེལ་རྒྱས་དང་འགྱུར་ལྡོག་རབས་དང་རིམ་པ་ཐོན་དང་ཐོན་མུས་ཡིན་པ་མ་ཟད།   མགྱོགས་མྱུར་ཧ་ཅང་ལྡན།   ཡིན་ན་ཡང་མིག་སྔར་ས་ཆ་དང་འབྲོག་ས་མང་བོ་ཞིག་གི་འཕེལ་རྒྱས་དང་འགྱུར་ལྡོག་མང་བོ་ཞིག་ས་གནས་འབྲོག་པའི་འཚོ་བ་ལ་མི་འཚམ་པ་དང་སྤྱིར་ནོར་གནག་འབྲོག་ལས་ལ་མི་འཚམ་པའི་གནས་ཚུལ་འདུག  འགྱུར་ལྡོག་དང་འཕེལ་རྒྱས་འདི་དག་ལ་གཞུང་ལུགས་ཀྱི་རྒྱབ་རྩ་དཀོན་ཞིང་ལག་ལེན་གྱི་དུས་ཚོད་ཐུང་བས་ཡིན་རྒྱུ་རེད།     དེར་མ་ཟད་དེང་སང་གི་འབྲོག་པ་རྒན་པ་ལ་ལས་ངས་ཅང་ཤེས་ནི་མ་རེད་ཟེར་ནས་ཟོག་རྫི་རྐྱང་བ་བྱས་ནས་གཞན་དང་གཞན་ལ་ཁ་ཡ་མི་བྱེད།  ཡང་ལ་ལས་དེང་སང་གི་ཆུང་ཆུང་ཚོས་ཅང་ཤེས་ནི་མ་རེད་ཟེར་ནས་རང་ཚུགས་འཛིན། འབྲོག་པའི་གཞོན་སྐྱེས་མང་བོས་འབྲོག་ལས་དཀའ་རབས་དང་ལྕི་རབས་ཏག་ཏག་བཤད་ནས་སྤྲོ་བ་མེད།   ཡང་ཁ་ཤས་ཀྱིས་འབྲོག་པ་ནི་རི་ལུང་ཐང་གསུམ་ན་གནས་པ་དང་རང་ཁ་རང་གསོ་བྱས།  རང་གི་ལས་ཀ་རང་གིས་སྒྲུབ་ཀྱིན་ཡོད་ཟེར་ནས་འབྲོག་པ་སྤྱི་དང་ལས་རིགས་འདིའི་མ་མཐའི་ཁེ་དབང་དང་ཀུན་སྤྱོད་ལ་དོ་སྣང་སྤུ་ཙམ་མེད།   ཡང་ལ་ལ་ཞིག་གིས་ང་ཚོའི་འབྲོག་པ་ནི་བཟང་རབས་རྒྱན་རབས་ཐལ་དྲགས་པ་བཤད་ནས་སྐྱུག་ཀྱང་བྲོ་བར་བྱེད།  གང་ལྟར་དེ་རིང་ཁ་སང་ང་ཚོའི་འབྲོག་ལས་འདི་བརྩི་རྒྱུའི་བསྲུང་བྱ་དང་འཛིན་རྒྱུའི་རིག་གནས་ཀྱི་རྨང་རྐང་གང་ཡང་མེད་པར་ཆགས་འདུག  དེ་བས་ང་ཚོ་འབྲོག་པ་ཚོའི་རང་རང་ངོས་ཐད་ནས་ལག་པ་བྲག་ཁར་བཞག་ནས་བསམ་བློ་ཞིག་བཏང་རན་རེད་བསམ།  རང་ཉིད་རང་གི་མགོན་ཡིན་གསུངས་པ་ལྟར།  ལས་རིགས་ཀྱི་འགྲན་རྩོད་ཆེན་པོ་འདིའི་ནང་དུ་ཐུན་མོང་གི་ཀུན་སྤྱོད་ཅིག་དང་རིག་གནས་ཀྱི་ལྟ་བ་གཏན་པོ་ཞིག་མ་ཡོད་ན།  ནོར་གནག་ཟེར་བ་འདི་དང་འབྲོག་པ་ཟེར་འདི་གཉིས་ལ་ངོམ་ཆོག་ཆོག་གི་ཐོབ་ཐང་ཞིག་རྩ་བ་ནས་མེད་པར་ཆགས་འགྲོ་རྒྱུ་རེད།    

 

ངའི་འབྲོག་པའི་འཚོ་བ་དང་མཐོ་བོད་དེང་རབས་འབྲོག་ལས་ཚང་།  

སྤྱིར་འཛམ་གླིང་གི་ཕྱུགས་ལས་ལ་དབྱེ་ན་འཚོ་སྐྱོང་དང་གསོ་སྤེལ་གཞིར་བྱས་ནས་དེ་ལ་ཐོན་སྐྱེད་ལས་སྣོན་དང་།  ཁྲོམ་རའི་ཕྱིར་ཚོང་།  ཚོང་རྟགས་ཁྱབ་སྒྲོག  རྩྭ་ལས་ཆས་ལས།  སོགས་རིམ་པ་བཞིན་ལས་ཀ་མང་བོ་ཞིག་ཡོད་པ་མ་ཟད།  ལས་ཀ་འདི་དག་ཚང་མ་ཕྱུགས་ལས་ཀྱི་ཁྱབ་ཁུངས་ཤ་སྟག་རེད།  ང་ཚོའི་འབྲོག་ལས་འདི་ནི་འཚོ་སྐྱོང་རྐྱང་བ་ཞིག་གམ་རྫི་བུ་དང་བཞོན་མའི་ལས་ཀ་ཙམ་ལ་ངོས་འཛིན་བྱས་བསྡད་ཡོད་པའི་སྣང་ཚུལ་ཞིག་འདུག  དེ་བས་འབྲོག་པ་ཚོས་ཀྱང་འཚོ་སྐྱོང་ཙམ་དང་བཞོན་ལས་ཙག་ཙིག་གི་ཡོང་སྒོ་མ་གཏོགས་འཚོལ་ཐུབ་ཀྱིན་མི་འདུག  

   སྤྱི་ལོ་༢༠༡༨ལོ་ནས་ང་ཚོ་འབྲོག་པའི་ཁྱིམ་ཚང་ཁ་ཤས་ཀྱིས་རང་གི་དཀའ་ངལ་དང་གནད་དོན་འགའ་རེ་མཉམ་དུ་རུབ་སྟེ་ཐག་ཆོད་ཡོང་རྒྱུ་རེད་བསམ་ནས་མཐོ་བོད་སྐྱེ་ཁམས་འབྲོག་ལས་ཆེད་ལས་མཉམ་སྒྲུབ་ཁང་འདི་དངོས་སུ་ལག་བསྟར་བྱས།   མ་དངུལ་བསྡུས།    ལས་ཀ་བསྒྲུབས།    ང་ཚོའི་ཐུན་མོང་གི་སེམས་ན་ན་ཟུག་གམ་དཀའ་ངལ་ཞིག་ཡོད་པ་ནི་རང་ལ་འབྲོག་ལས་ཐོན་ཁུངས་གྱ་ནོམ་པ་ཞིག་ཡོད་ཀྱང་།  དེ་ལ་གོང་རིན་ཐང་མེད་ལ་རྕིས་རྩི་སྒོ་མེད་པ་དེ་རེད།  

   ང་ཚོས་ཁྱིམ་ཚང་གི་འཚོ་སྐྱོང་རྨང་གཞི་བྱས་ནས་འཚོ་སྐྱོང་གི་ཚད་གཞི་དང་རྣམ་པ་གཅིག་གྱུར་བྱས།  ཐོན་ཁུངས་གཅིག་སྡུད་དང་ཐོན་སྐྱེད་ལས་སྣོན་མཉམ་དུ་བྱ་རྒྱུ་བྱས།  དེ་ལྟར་བྱས་ན་ང་ཚོ་རང་གི་འབྲོག་པའི་འཚོ་བ་ཁག་ཐེག་ཡོང་བ་མ་ཟད།   འབྲོག་ལས་ཐོན་རྫས་ངོ་མ་དགོས་མཁན་ཚོ་ལ་ཡང་ཞབས་ཞུ་ངོ་གནོང་མི་དགོས་པ་ཞིག་བསྒྲུབ་ཐུབ།  དེ་བས་ང་ཚོས་འབྲོག་ལས་ཐོན་རྫས་ཀྱི་མ་བཅོས་རྒྱུ་ཆ་རིགས་དྲུག་སྟེ།   ཤ་རིགས།  འོ་རིགས།   སྤུ་རིགས།  ལྤགས་རིགས།  ར་རུད་དང་ལྕི་རུལ་གྱི་རིགས་བཅས་གཅིག་བསྡུས་བྱས་ནས།  གང་ཐུབ་ཐུབ་ཀྱིས་རང་གི་ཐོན་རྫས་སྣ་ཚོགས་བཟོས་ཤིང་ས་གནས་ཁ་ཤས་ནས་མཐོ་བོད་འབྲོག་ལས་ཆེད་ཚོང་ཁང་གཉེར་སྐྱོང་བྱས་ཏེ་ཆེས་མཐའ་མཇུག་གི་མཛད་སྤྱོད་པར་སྤྲོད་ཀྱི་ཡོད་པ་དང་།  ཡང་རྒྱུ་ཆ་ཁ་ཤས་གཅིག་ཏུ་བསྡུས་ནས་དགོས་མཁོ་ཅན་གྱི་བཟོ་གྲྭ་སོགས་ལ་མཉམ་དུ་སྤྲོད་ཀྱིན་ཡོད།  

    ང་ཚོའི་དམིགས་ཡུལ་གཙོ་བོ་ནི་འབྲོག་ལས་ཀྱི་རིག་གནས་དང་ཀུན་སྤྱོད་ལ་ལྷད་མ་འདྲེས་པར་སྤྱི་ཚོགས་དང་ཁྲོམ་ར་ལ་ཞབས་ཞུ་ཡག་པོ་ཞིག་བསྒྲུབ་རྒྱུ་དེ་ཡིན་པ་མ་ཟད།  འབྲོག་ལས་དཔལ་འབྱོར་འཁོར་སྐྱོད་མ་ལག་ཆ་ཚང་ལ་འབྲོག་པ་རང་གིས་བདག་པོ་ངོ་མ་ཞིག་བརྒྱག་རྒྱུ་དེ་ཡིན། 

ངས་མཉམ་སྒྲུབ་ཁང་གི་ལས་ཀ་ལ་སྣེ་ཁྲིད་དང་འཆར་འགོད་དམིགས་སུ་བཟུང་བའི་ཞོར་དུ་རང་གི་འབྲོག་པའི་ཁྱིམ་ཚང་གི་འཚོ་སྐྱོང་ལ་ཡང་དོ་དམ་དང་ལེགས་བཅོས་ཀྱི་ཉམས་མྱོང་གང་མང་ལེན་གྱིན་ཡོད།  ང་ཚོའི་འབྲོག་ལས་འདི་ཐོན་སྐྱེད་ལས་སྣོན་སོགས་ལས་ཀ་གཞན་ལ་བསྐྱེད་ནས་འཕེལ་རྒྱས་བྱུང་དགོས་ན་ཐོག་མར་འཚོ་སྐྱོང་གི་ལས་ཀ་འདི་ཡག་པོ་ཞིག་ངེས་པར་དུ་འཁྱོངས་དགོས།   འཚོ་སྐྱོང་གི་ལས་ཀ་ལ་གཙོ་བོ་འཕེལ་ཀ་མྱུར་ཞིང་རྒྱུད་རྐང་བཟང་བ།   རྩ་ཆུ་འཛོམས་ཤིང་ཤ་ཤེད་རྒྱས་པ།  ནད་སྣ་སྔོན་འགོག་དང་སྨན་བཅོས་དུས་སུ་བྱས་ནས་་བདེ་ཐང་ཡོང་བ།  སེམས་ཅན་གྱི་ཚེ་སྲོག་ལ་མ་འབྲེལ་བའི་མ་བཅོས་རྒྱུ་ཆ་མང་དུ་ལེན་པ།   བྱམས་བརྩེའི་ཐབས་ཀྱིས་སྐྱོང་ཞིང་དྲིན་དྲན་པ།  གྲངས་ཀ་ཉུང་ལ་སྤུས་ཀ་བཟང་བར་འབད་པ་སོགས་ཡིན།  དེའི་མ་ཚད་དེང་རབས་ཀྱི་ཆ་ནས་འཚོ་སྐྱོང་གི་ར་བ་དང་སྒྲིག་ཆས་གང་ལེགས་བཟོ་བ་དང་།  དྲོད་ཁང་དང་ཁྱིམ་ཚང་གི་འདུག་ཁང་ཡང་སྤུས་ལེགས་གྲལ་དག་འབྲོག་ས་རང་དུ་ལས་རྒྱུ་གལ་ཆེན་ཡིན་པར་འདོད།   ཆ་འཕྲིན་ལག་རྩལ་གྱི་ཐད་ནས་བརྙན་མིག་དང་རྩིས་འཕྲུལ་སོགས་ལ་བརྟེན་ནས་སེམས་ཅན་གྱི་གྲངས་ཀ་དང་སྤུས་ཀ་འཚོ་གནས་སོགས་ཀྱི་གཞི་གྲངས་གནས་ཚུལ་ལེན་རྒྱུ་ཡང་ཁ་ཚ་དགོས་གཏུག་གི་ལས་ཀ་རེད།

 

ཞེས་པད་མ་རིག་འཛིན་གྱིས་སྤྱི་ལོ་༢༠༢༣ལོའི་ཟླ་༤ཚེས་༢༢དགོང་མོ་འབྲི་མོ་དང་བེའུ་ཆུང་གི་ངུར་སྒྲའི་ཁྲོད་ནས་མཐོ་བོད་འབྲོག་ར་དང་བོའི་དགུན་ས་ནས་སྦྱར་བའོ། །

གསལ་བཤད།  
    གངས་ལྗོངས་ཤེས་རིག་ནོར་བུའི་སློབ་གླིང་གི་དྲ་བར་ཆེད་དུ་སློབ་གླིང་འདིའི་ཕུལ་བྱུང་མཐར་ཕྱིན་སློབ་མ་རྣམས་འོས་སྦྱོར་བྱེད་ཀྱིན་ཡོད་པས། མཐར་ཕྱིན་འཛིན་གྲྭ་སོ་སོའི་སྤྱི་ཚོགས་སྟེང་གཟེངས་ཐོན་གྱི་མཐར་ཕྱིན་སློབ་མ་དག་སློབ་ཚོགས་གཞུང་ལས་ཁང་དུ་འོས་སྦྱོར་གནང་རོགས་ཞུ།