ངེས་ཤེས་ཆིག་བརྒྱ་མ།
ལྡོང་ཡོན་ཏན་རྒྱ་མཚོ།
༢༡
རྨོངས་དད་དང་ཨུ་ཚུགས། མཁྲེགས་འཛིན་དང་སྒེར་གཅེས་ལས་བྱུང་བ་མ་ཡིན་པར། འཐད་ལྡན་དང་ཁུངས་ལུང་། མངོན་སུམ་མྱོང་གྲུབ་སོགས་ལས་རྙེད་པའི་ཚད་ཐུབ་ཡིད་ཆེས་ཀྱིས། མི་ཚེར་ཟད་མཐའ་མེད་པའི་མཛེས་སྡུག་དང་ཡང་དག་པའི་ལམ་སྟོན་བྱེད་ཐུབ།
༢༢
བདེ་སྐྱིད་ལ་དགའ་བ་ནི་དབུགས་ལྡན་ཡོངས་ལ་བདོག་པའི་ཐུན་མོང་གི་བསམ་བློ་ཞིག་རེད། འོན་ཀྱང་། རིག་གནས་ཀྱིས་བསྐྱེད་པའི་བག་ཆགས་དང་སློབ་གསོའི་སྒུལ་ཤུགས། ཁོར་ཡུག་གི་ཤུགས་རྐྱེན། སྐྱེས་སྦྱངས་བློ་གྲོས་སོགས་ཀྱིས། བདེ་སྐྱིད་ཀྱི་ངོས་འཛིན་མི་འདྲ་ལ་ཐོབ་འབྲས་ཀྱང་མི་མཚུངས། གང་ལྟར། ཡོད་ཚད་ཀྱི་དམིགས་ཡུལ་བདེ་སྐྱིད་ལ་ཕྱོགས་ཡོད།
༢༣
བདེ་སྡུག་ཅེས་པའང་གཙོ་བོ་སེམས་ཀྱིས་བསྐྱེད་ཅིང་སེམས་ཀྱི་མྱོང་རོལ་བྱེད་སྟངས་ཤིག་ཡིན་ན། སེམས་བཟོ་བཅོས་བྱེད་པ་ལས་ལྷག་པའི་བདེ་སྐྱིད་འཚོལ་ཐབས་ཤིག་གང་ན་ཡོད།
༢༤
ཟོལ་མེད་རྣམ་དག་གི་བྱ་སྤྱོད་ཅིག་ཡིན་མིན་ནི། ཕ་རོལ་བོར་མནའ་བསྒགས་པ་དང་རང་གིས་མོ་ལུང་ཞུ་བ་སོགས་བྱེད་མི་དགོས་ཏེ། ཁྱོད་ཀྱིས་གཟབ་ནན་ངང་གཟིགས་དང་། ཕལ་ཆེར་ཞིག་ཕ་རོལ་བོའི་མིག་གིས་བལྟ་སྟངས་དང་བཞིན་གྱི་རྣམ་འགྱུར་ལས་མངོན་འོང་།
༢༥
བདེ་སྐྱིད་ཅེས་པ་བཙལ་ནས་རྙེེད་རྒྱུ་ཡོད་པ་ཞིག་ཡིན་ཡང་། བརྩད་ནས་འཕྲོག་རྒྱུ་ཡོད་པ་ཞིག་ཡིན་མི་སྲིད། དེའི་ཕྱིར། བདེ་སྐྱིད་དང་ཞི་བདེའི་ཆེད་དུ་དམག་འཁྲུག་བརྒྱག་དགོས་པར་བརྗོད་པ་ནི། སྲིད་དོན་པ་དག་གི་ཁ་གཡང་དང་གཡོ་འཕྲུལ་ཞིག་ཅི་ལ་མིན།
༢༦
ཡུན་རིང་འདྲིས་ཤིང་གོམས་པར་གྱུར་ན་གཅན་གཟན་རི་སྐྱེས་དང་འདབ་ཆགས་སྒོ་ཕྱུགས་དག་གིས་ཀྱང་སྙིང་ཉེ་ཉེ་བྱེད་མོད། མི་མང་བོ་ཞིག་གིས་ཡུན་རིང་འགྲོགས་ཏེ་ནང་རྒྱུས་ལོན་རྗེས་ཚུར་རྒོལ་བྱེད་འོང་། སྐབས་ལ་རེར་བཟང་ངན་དང་མཆོག་དམན་གྱི་ཚད་ཐིག་ཀྱང་འཇོག་རྐྱང་མ་རེད།
༢༧
རང་ཉིད་ཀྱིས་རྫུན་བཤད་མྱོང་བ་དང་བྱ་བ་མ་རུང་བ་ཡང་བསྒྲུབས་མྱོང་བ། རྣམ་གཡེང་དང་རོལ་རྩེད་ལ་དགའ་བ་སོགས་སྐྱོན་ཆ་མང་བའི་ཚུལ་ལ་སོམས་དང་། ཕ་རོལ་བོའི་སྐྱོན་ཆ་འགའ་ཞིག་ལ་བཟོད་སྒོམ་དང་གུ་ཡངས་བྱེད་ཐུབ། བཟོད་སྒོམ་དང་གུ་ཡངས་ཀྱི་ཟིལ་ཤུགས་དེས། ནམ་ཞིག་ཕ་རོལ་བོ་ཡང་ལེགས་ལམ་དུ་ཞུགས་སྲིད།
༢༨
ལག་འཇུ་བྱེད་པ་དང་འཛུམ་དཀར་སྟོན་པ། གུས་ལན་སློག་པ་དང་ཐོད་པ་གཏུགས་པ། ལེགས་སོ་བརྗོད་པ་དང་བཟང་བརྡ་སྟོན་པ་སོགས་ཀྱིས་ཀྱང་ཚོར་བདེ་སྟེར་ཞིང་བར་ཐག་ཇེ་ཉེར་གཏོང་མོད། ནང་སེམས་ཀྱི་ཁ་དོག་འདྲེས་ཤིང་གཞན་གྱི་དགེ་མཚན་ཁས་ལེན་པའི་བློ་སྤོབས་ཡོད་ན། མཐུན་སྒྲིལ་གྱི་གོང་བུ་གཅིག་ཏུ་འགྱུར་འགྲོ།
༢༩
ས་ཆེན་ཡོམ་ཡོམ་སྒུལ་བའི་སྐྱེས་ཆེན་ཞིག་གིས། དལ་ལྷོད་ངང་གད་བདར་བ་ཞིག་ལ་འཚོ་བའི་གླེང་མོལ་བྱས་པས། གད་བདར་བ་དེ་དང་དེའི་རིགས་དག་སྤྲོ་དགའ་ཆེན་པོས་རང་རང་གི་བྱ་བར་ཞུགས་སྐད། དེའི་ཕྱིར། ཅི་ཙམ་མཐོ་རུ་ཕྱིན་ཡང་ཐོག་མའི་རྐང་རྗེས་དཔར་སའི་ས་གཞི་དང་དེའི་བཀའ་དྲིན་བརྗེད་མི་རུང་།
༣༠
རང་གིས་རང་ལ་ཡིད་ཆེས་ཡོད་པའི་མིས། ཉམ་ཆུང་རླབས་ཆེན་དུ་བསྒྱུར་ནུས་པ་དང་། དཀྱུས་མ་ངོ་མཚར་ཅན་དུའང་བསྒྱུར་ཐུབ་པས། རང་ཉིད་ཀྱི་འཇོན་ནུས་དང་བློ་སྤོབས་ལ་མཐོང་ཆུང་དང་ཁྱད་གསོད་གཏན་ནས་བྱེད་མི་རུང་ངོ་། །
མུ་འགོད།
| 
青公网安备 63262102000011号