༄༅།། ཆོས་ལ་འབད་ཁུལ་བྱས་ཀྱང་ཡར་སྐྱེད་མི་ཐོན་པའི་གནད་འདི་འདྲ་ཡིན་ནོ།།
བཛྲ་ཚུལ་ཁྲིམས་རྒྱ་མཚོ།
འཕྲལ་དང་གནས་སྐབས་ཙམ་གྱི་བདེ་བའི་རོ། །
ཐེང་གཅིག་མྱོང་བས་མི་ཚིམ་ཐར་བ་དང་། །
ཐམས་ཅད་མཁྱེན་པ་སྙིང་ནས་དོན་གཉེར་བ། །
དེ་དག་རྣམས་ནི་ཆོས་པ་རྣལ་མ་ཡིན། །
འོན་ཀྱང་ཐོབ་འདོད་ཙམ་གྱི་བསམ་པ་དེས། །
རེ་བའི་འབྲས་བུ་སྨིན་པར་མི་འགྱུར་བས། །
གུས་རྟག་ཟུང་གི་བརྩོན་པ་ལྷོད་མེད་ཀྱིས། །
མཐར་ཐུག་ཐོབ་བྱའི་དོན་དུ་འབད་པ་གཅེས། །
དེ་ལྟ་མོད་ཀྱི་ཧ་ཅང་རྩོལ་བ་དང་། །
ཆེས་ཆེར་ལྷོད་པའང་སྐྱོན་དུ་འགྱུར་བས་ན། །
དམ་ལྷོད་རན་པར་ཆུ་བོའི་རྒྱུན་བཞིན་དུ། །
བསྐྱང་ན་ཡུན་གྱིས་རེ་འབྲས་སྨིན་པར་འགྱུར། །
སྔོན་གྱི་བཀའ་གདམས་གོང་མའི་ཞལ་རྒྱུན་དུ། །
བྱང་བའི་ར་མདའ་ཇི་བཞིན་མི་བྲེལ་ཞིང་། །
ཧ་ཅང་མི་དལ་ཇག་པ་འདེད་པ་ལྟར། །
དལ་ལྷོད་རན་པའི་བརྩོན་འགྲུས་བསྐྱེད་དགོས་གསུང་། །
སེ་མོ་གྲུ་པའི་ར་མདའ་ལྟ་བུ་དང་། །
ལྗི་བའི་མཆོངས་སྟངས་ལྟ་བུའི་བརྩོན་པ་ཡིས། །
མི་ཡོང་དེ་ལས་ཤིག་གི་བགྲོད་སྟངས་དང་། །
མཚུངས་པའི་བརྩོན་པ་བསྐྱེད་ན་ལེགས་ཚུལ་གསུངས། །
དངོས་པོ་གང་དང་གང་གི་རྒྱུ་འབྲས་ཚུལ། །
ལེགས་པར་ཤེས་ན་དེ་ཡི་གཤིས་ལུགས་མཐོང་། །
གང་ཞིག་འགགས་པས་ཅི་ཞིག་འགག་འགྱུར་བའི། །
སྤང་གཉེན་ཤེས་ན་ལམ་ལ་སློབ་ཚུལ་ཤེས། །
དེ་ཕྱིར་བརྩོན་འགྲུས་རྩོམ་པར་འདོད་པས་ཀྱང་། །
དེ་ཡི་འགལ་རྐྱེན་གང་ཡིན་ངོས་བཟུང་ནས། །
དེ་ནས་དེ་ཡི་གཉེན་པོ་ལེགས་བསྟེན་ན། །
འབད་པ་ཆུང་ངུས་བསམ་དོན་འགྲུབ་པར་འགྱུར། །
ཇི་ལྟར་འཐབ་རྙིང་ལས་དེར་ཆེས་གོམས་པའི། །
མཁས་པ་རྣམས་ནི་དགྲ་དང་གཡུལ་འགྱེད་ཚེའང་། །
ཕ་རོལ་འཇོམས་རྩིས་འབའ་ཞིག་མི་བྱེད་པར། །
ཚུར་གནོད་བཟུར་ཞིང་འགལ་ཟླ་ཕམ་པ་བཞིན། །
དེ་བཞིན་སྒྲུབ་པ་བོ་ཡང་ཉོན་མོངས་ཀྱིས། །
ཚུར་གནོད་བཟུར་ཞིང་ཕར་ལ་གཉེན་པོའི་སྒོས། །
འཇོམས་ལ་མཁས་པར་བྱས་ཏེ་བརྩོན་བསྐྱེད་ན། །
མི་མཐུན་གཡུལ་ལས་རྒྱལ་བའི་རྒྱལ་བོར་འགྱུར། །
དེ་ལྟ་མིན་ན་ཉོན་མོངས་ཆ་གཅིག་གི །
བྱེད་པ་གཉེན་པོས་བཀག་པའི་ཁུལ་བྱས་ཀྱང་། །
ཉོན་མོངས་གཞན་གང་ཞིག་གིས་དགེ་བའི་ཆ། །
འགའ་ཞིག་འཕྲོག་པའམ་ཡང་ན་སེམས་ཀྱི་ཁམས། །
བཅོས་དང་རང་བཞིན་ཁ་ན་མ་ཐོ་བ། །
ཆེན་པོ་བསྐྱེད་པས་དགེ་དང་སྡིག་པ་གཉིས། །
མཉམ་པོར་སོང་ནས་དགེ་ལ་སྦྱོར་བའི་ལས། །
ཡར་སྐྱེད་འོང་བ་ཤིན་ཏུ་དཀའ་བར་གསུངས། །
འགའ་ཞིག་ཆོས་བྱེད་པ་ལ་ཤེས་དགོས་ཞེས། །
ཤེས་ཙམ་གཙོར་བཟུང་ཐོས་པས་རྨོངས་བསལ་ཡང་། །
ཉོན་མོངས་གཞན་ལ་བག་ཟོན་མ་བྱས་པས། །
རང་རྒྱུད་ངན་པར་གྱུར་བའང་ཤིན་ཏུ་མང་། །
ལ་ལས་ཤེས་པ་ལས་ཀྱང་རང་གི་རྒྱུད། །
འདུལ་བ་གལ་ཆེ་སྙམ་ནས་བསྒོམ་པ་ཙམ། །
གཙོར་བོར་བཟུང་ནས་རྨོངས་པའི་དགྲ་བོ་ལ། །
བག་ཟོན་མ་བྱས་ཆོས་ལ་མ་བསླབས་པས། །
ཇི་ལྟར་རང་གིས་ཅི་ཞིག་ཁས་བླངས་པའི། །
སྡོམ་པ་རྣམས་ཀྱི་བཅས་པའི་འཇུག་ལྡོག་ལ། །
ཆེས་ཆེར་རྨོངས་པས་རྒྱུན་དུ་རང་གི་རྒྱུད། །
ལྟུང་བས་འཇོམས་པའང་ཤིན་ཏུ་མང་ལ་ལྟོས། །
གཡུལ་དུ་རལ་གྲི་ལྷུང་ན་བསད་དོགས་ནས། །
འཇིགས་པས་མྱུར་དུ་ལེན་པར་བྱེད་པ་ལྟར། །
དེ་བཞིན་སེམས་ནས་དྲན་པའི་མཚོན་ཤོར་ན། །
དམྱལ་བའི་འཇིགས་དྲན་མྱུར་དུ་ལེན་དགོས་གསུངས། །
གང་ཞིག་གཡུལ་ལ་ཞུགས་པའི་འཐབ་མོ་བས། །
དང་བོར་རལ་གྲི་མི་ཤོར་དམ་པོར་འཛིན། །
བརྒྱ་ལ་ཤོར་ན་མྱུར་དུ་ལེན་པ་ནི། །
དེ་ཡི་དགོས་མཁོ་གསལ་བར་ཤེས་པས་ཡིན། །
དེ་བཞིན་ལམ་ལ་བརྩོན་པ་དེ་དག་ཀྱང་། །
ཐོག་མ་ཉིད་ནས་དྲན་པ་ཉམས་མི་བྱེད། །
བརྒྱ་ལ་ཤོར་ན་དེ་མ་ཐག་ཉིད་ཏུ། །
འཇིགས་ཤིང་དངངས་པས་མྱུར་དུ་སོར་ཆུད་བྱ། །
དེ་ལྟར་ནུས་དང་མི་ནུས་རྩ་བ་ཡང་། །
ཉེས་ལྟུང་བྱུང་བའི་འབྲས་བུ་ངན་སོང་དུ། །
ལྟུང་ལ་འཇིགས་པའི་བསམ་པ་ཚིག་ཙམ་དུ། །
སོང་དང་མ་སོང་ཉིད་ལ་རག་ལས་གསུངས། །
དེ་ཡང་ལས་འབྲས་མཐིལ་དུ་བྱས་པ་དང་། །
མ་བྱས་ཉིད་ལ་ཐུག་ཀྱང་འོ་སྐོལ་རྣམས། །
དེ་དག་གདམས་པ་ཟབ་མོར་མ་མཐོང་བས། །
ཡོན་ཏན་མཆོག་གི་རྩ་བ་ཆད་པར་གསུངས། །
མི་བསད་རྟ་འགྱེལ་རྐུ་འཕྲོག་བཅོམ་གསུམ་སོགས། །
སྡིག་པ་ཚབས་ཆེན་དག་ལ་ཟོན་དགོས་ཀྱང་། །
ཉེས་སྤྱོད་ཆུང་ངུ་དག་ལ་འཇིགས་དང་བཅས། །
སྒྲིམས་ནས་རྒྱུན་དུ་དགག་དགོས་ཅི་ཞེ་ན། །
ཇི་ལྟར་དུག་ཅན་མདའ་ཡིས་ཡན་ལག་ཙམ། །
ཅུང་ཟད་རྨས་ན་རིང་པོར་མི་ཐོགས་པར། །
ཡན་ལག་ཅན་དེ་དུག་གིས་འཇོམས་འགྱུར་བས། །
དུག་ཅན་རྨ་དེ་བཅད་ནས་འབོར་དགོས་བཞིན། །
ཉེས་སྤྱོད་ཆུང་ཡང་མ་འཛེམས་ཡལ་བོར་བས། །
མྱུར་དུ་སེམས་ལ་ཁྱབ་ཅིང་ཆེན་པོར་འགྱུར། །
དེ་ཕྱིར་དང་པོར་སྒྲིམས་ནས་འགོག་དགོས་ཤིང་། །
གལ་ཏེ་ཤོར་ན་མྱུར་དུ་བཅོས་དགོས་གསུངས། །
དེ་ཕྱིར་ཇི་ལྟར་ཁྲག་ལ་བརྟེན་བཅས་ནས། །
དུག་ནི་ལུས་ལ་ཁྱབ་འགྱུར་དེ་བཞིན་དུ། །
གླགས་རྙེད་གྱུར་ན་ཉེས་པས་རང་སེམས་ལ། །
ཁྱབ་པར་འགྱུར་ཞེས་སྤྱོད་འཇུག་ཆེན་མོར་གསུངས། །
འདི་ནི་ཤཱཀྱའི་དགེ་སྦྱོང་བཛྲ་ཚུལ་ཁྲིམས་རྒྱ་མཚོས་ཉིན་རེ་བཞིན་ལམ་རིམ་ཆེན་མོའི་ཤོག་རྒྱུན་བཟུང་ནས་ཀློག་བཞིན་ཡོད་པ་ལ།དེ ་རིང་བཀླགས་པའི་ཐད་ཀྱི་མྱོང་ཚོར་ཞིག་རྗེད་བྱང་དུ་བཀོད་པའོོ།།
|