པྲོག་གསར་གློ་ཚད་རིམས་ནད་ལ་ཁྱིམ་ནས་བོད་སྨན་བསྟེན་ཐབས།

མཚོ་སྔོན་ཞིང་ཆེན་པྲོག་གསར་གློ་ཚད་ནད་དུག་བོད་སྨན་གསོ་བཅོས་ཆེད་མཁས་ཚོ་ཆུང་གིས་མཚོ་སྔོན་གྱི་ས་གནས་ཁྱད་ཆོས་དང་ནད་ཀྱི་ཁྱད་གཤིས་དང་བསྟུན་ནས། 《མཚོ་སྔོན་ཞིང་ཆེན་གྱི་པྲོག་གསར་ནད་དུག་འགོས་པ་ཅན་གྱིས་ཁྱིམ་ནས་བོད་སྨན་བསྟེན་ཐབས་》ཞེས་པ་གཏན་འབེབས་བྱས་ཏེ། པྲོག་གསར་ནད་དུག་འགོས་པ་ཚོས་བོད་སྨན་ཇི་ལྟར་བསྟེན་ཐབས་དང་བཅོས་ཐབས་ཐད་མཛུབ་སྟོན་བྱས་པ་གཤམ་གསལ་ལྟར།

དང་པོ།  བཅོས་ཐབས་ཇུས་གཞི།

གཅིག  དར་མའི་བཅོས་ཐབས་ཇུས་གཞི།

༡ ནད་རྟགས་སུ་ཚ་རྒྱག་པ་དང་། གྲང་ཤུམ་བྱེད་པ། ཤ་སྒྲིམ་ན་བ། མིད་པ་དང་གྲེ་བ་ན་བ། ཐང་ཆད་པ། སྣ་ཆུ་འཛག་པ། ཡང་ན་གློ་ལུ་ཅན་རྣམས་ལ་ཚ་བ་སྨིན་དུ་གཞུག་པའི་སྨན་ཏེ། འཕྲུལ་ཐང་དང་། ལོ་གྱོན་མ། སྤྲིན་བྲལ་ཟླ་ཟེར། ཨ་གར་བཅོ་ལྔ་སོགས་བསྟེན།

༢ ནད་རྟགས་སུ་གྲེ་བ་ན་བའི་རྟགས་གསལ་ཞིང་། ཚ་རྒྱག་པ་དང་། ཤ་སྒྲིམ་ན་བ། ཐང་ཆད་པ། ཡང་ན་གློ་ལུ་ཅན་རྣམས་ལ་སྨིན་ཐང་དང་གློ་ཚད་སེལ་བའི་སྨན་ཏེ། སྤང་རྒྱན་བཅོ་ལྔ་དང་། ལི་ཤི་དྲུག་པ། གློ་ཚད་ཀུན་སེལ། ནོར་བུ་བདུན་ཐང་སོགས་བསྟེན།

༣ ནད་རྟགས་སུ་གློ་ལུ་མངོན་གསལ་ཅན་རྣམས་ལ། གློ་ཚད་སེལ་བ་དང་ལུད་པ་འགོག་པའི་སྨན་ཏེ། གཙོ་བོ་ཉེར་ལྔ་དང་། གློ་ཚད་ཀུན་སེལ། འཕྲུལ་ཐང་སོགས་བསྟེན།

༤ ནད་རྟགས་སུ་ཐང་ཆད་པ་དང་། ཕོ་རྒྱུ་མི་བདེ་བར་བཤལ་སྐྱུག་ཅན་རྣམས་ལ། ཕོ་བའི་མེ་དྲོད་གསོ་ཞིང་ཟས་འཇུ་ནུས་པའི་སྨན་ཏེ། སེ་འབྲུ་དྭངས་གནས་དང་། ཟླ་ཤེལ་ཆེན་མོ། རིལ་དཀར་སོགས་བསྟེན་པ་དང་།  བཤང་བ་སྐམ་པ་ཅན་ལ་ཞི་བྱེད་དྲུག་པ་ཟབ།

༥  ནད་རྟགས་སུ་སྣ་འཚུབ་པ་དང་སྣ་ཆུ་ཅན་ལ། ཚ་བ་དང་དབུགས་འཚང་སེལ་བའི་སྨན་ཏེ། ཁྱུང་སྔོན་དགུ་བ་དང་སྤང་རྒྱན་བཅོ་ལྔ་སོགས་བསྟེན།

གཉིས། བྱིས་པའི་བཅོས་ཐབས་ཇུས་གཞི།

༡ ནད་རྟགས་སུ་གྲང་ཤུམ་བྱེད་པ་དང་ཚ་རྒྱག་པ། ཤ་སྒྲིམ་ན་བ་ཅན་རྣམས་ལ་ཁོང་སྨན་དུ་མ་ནུ་བཞི་ཐང་དང་གཅིག་ཤེས་ཀུན་གྲོལ་སོགས་བསྟེན།

༢ ནད་རྟགས་སུ་ཚ་རྒྱག་པ། གྲེ་བ་སྐམ་ཞིང་ན་བ། གློ་ལུ་ཅན་རྣམས་ལ་ཁོང་སྨན་དུ་འཕྲུལ་ཐང་དང་གཅིག་ཤེས་ཀུན་གྲོལ་སོགས་གང་རུང་བསྟེན།

༣ནད་རྟགས་སུ་ཚ་རྒྱག་པ་དང་ཟས་ཀྱི་ཡི་ག་ཞན་ཞིང་ཁོང་སྦོ་བ། ཁ་མངལ་བ། བཤང་བའི་དྲི་ཆེ་པའམ་སྐམ་པ་ཅན་རྣམས་ལ་ཁོང་སྨན་དུ་ཟླ་ཤེལ་ཆེན་མོ་སོགས་བསྟེན།

༤ནད་རྟགས་སུ་གྲེ་བ་ན་བ་མངོན་གསལ་ཅན་རྣམས་ལ་ཁོང་སྨན་དུ་ལི་ཤི་དྲུག་པ་སོགས་བསྟེན། 

༥ནད་རྟགས་སུ་གློ་ལུ་མངོན་གསལ་ཅན་རྣམས་ལ་ཁོང་སྨན་དུ་གཅིག་ཤེས་ཀུན་གྲོལ་དང་བློན་པོ་སུམ་སྦྱོར་སོགས་བསྟེན།

 ༦ནད་རྟགས་སུ་ཐང་ཆད་པ་དང་ཟས་ཀྱི་དང་ག་ཞན་པ་ཅན་རྣམས་ལ་ཁོང་སྨན་དུ་སེ་འབྲུ་དྭངས་གནས་སོགས་བསྟེན།

བྱིས་པའི་གཟུགས་གཞི་དམིགས་བསལ་ཡིན་པ་དང་ནད་གཞིའི་འགྱུར་ལྡོག་མྱུར་བས་སྨན་པའི་མཛུབ་སྟོན་འོག་ཁོང་སྨན་བསྟེན་དགོས་པ་དང་། གལ་ཏེ་ནད་གཞིར་འགྱུར་ལྡོག་བྱུང་ཚེ་དུས་ཐོག་ཏུ་སྨན་ཁང་ལ་སོང་ནས་གསོ་བཅོས་བྱ་དགོས།

གསུམ། དམིགས་བསལ་གྱི་མི་ཚོགས་ཏེ་ཁྱེའུ་དང་། ནུ་ཞོ་སྣུན་པའི་བུད་མེད། སྦྲུམ་མ་དང་རྒན་པ། དེ་བཞིན་རྨང་གཞིའི་ནད་རིགས་ཡོད་པའི་མི་ཚོགས་ཀྱིས་སྨན་པའི་མཛུབ་སྟོན་འོག་ཁོང་སྨན་བསྟེན་དགོས་པ་དང་། ས་གནས་ཁག་གི་སྨན་བཅོས་སྒྲིག་གཞི“དྲ་སྦྲེལ+སྨན་བཅོས”སྤྱད་དེ་ཁྱིམ་སྡོད་བདེ་ཐང་མཛུབ་སྟོན་དང་། བདེ་ཐང་དྲིལ་བསྒྲགས་སློབ་གསོ། སྨན་སྤྱོད་བློ་འདྲི་སོགས་ཀྱི་ཞབས་ཞུ་སྤེལ་ནས་མང་ཚོགས་ལ་བོད་སྨན་ལུགས་མཐུན་ངང་སྤྱོད་རྒྱུར་མཛུབ་ཁྲིད་བྱ་རྒྱུ།

མཉམ་འཇོག་བྱ་ཡུལ། གོང་གི་ནད་རྟགས་ལ་གཞིགས་པའི་སྨན་སྣའི་ནང་སྣ་གཅིག་ནས་གཉིས་བདམ་སྟེ་གསལ་བཤད་ཡི་གེ་ལྟར་བསྟེན་རྒྱུ་དང་། སྤྱིར་བཏང་ཉིན༣ ～༥བར་ནད་རྟགས་ཞི་རྗེས་སྨན་མཚམས་བཞག་ཆོག གལ་ཏེ་ནད་རྟགས་མ་ཞི་པའམ་ཡང་ན་སྡུག་ཏུ་ཕྱིན་ཚེ་ཚད་ལྡན་གྱི་སྨན་ཁང་དུ་སོང་ནས་གསོ་བཅོས་བྱ་དགོས།

གཉིས་པ།  སྔོན་འགོག་ཇུས་གཞི།

གཅིག  སྨན་གྱི་སྔོན་འགོག  

ལོ་གྱོན་མ། ཉིན་རེར་ཁེ༡ཆུ་ཁོལ་དྲོད་འཇམ་དུ་སྦངས་ནས་བསྟེན། རྒན་དར་གཞོན་གསུམ་གང་ཡིན་ཡང་སྔོན་འགོག་ཏུ་བསྟེན་ཆོག

གཉིས།  དཔྱད་ཀྱི་སྔོན་འགོག

༡ སྤོས་བདུག བདུག་པ་ནག་པོ་དགུ་སྦྱོར་ཉུང་ཙམ་རེ་མེ་ལ་སྦར་ཏེ་ཁྱིམ་ནང་གི་མཁའ་དབུགས་གཙང་སེལ་དང་མནོལ་སེལ་བྱ་དགོས། ཉིན་རེར་ཐེངས༢～༣ལ་བདུག(སྦྲུམ་མ་དང་མེ་ཏོག་གི་དྲི་མི་འཕྲོད་པས་འཛེམ་དགོས།)

༢རིམས་སེལ། ནག་པོ་དགུ་སྦྱོར་གྱི་ཁྲོལ་བུ་སྐེ་ལ་བཏགས་ནས་ཉིན༧རེའི་ནང་བརྗེས་དགོས།(སྦྲུམ་མ་དང་མེ་ཏོག་གི་གི་དྲི་མི་འཕྲོད་པས་འཛེམ་དགོས།)

༣ ཙོག་ལུམས། བདུད་རྩི་ལྔ་ལུམས་ཕྱེ་རགས་ཁེ༡༠ཡང་ན་བདུད་རྩི་སྨན་ལུམས་ཁེ༣༠ ཆུ་ཁོལ་ནང་སྦངས་ནས（དྲོད་ཚད་༤༢℃ཙམ། ）རྐང་པ་ལུམས་སུ་གཞུག་ནས་འཁྲུ་དགོས།   ཉིན་རེར་ཐེངས ༡ དང་ཐེངས་རེར་སྐར་མ་༣༠-༤༠ཙམ་སྦངས་པ། ཐེངས་བདུན་བཅོས་ཡུན་གཅིག་ཡིན། 

༤ ཟས་ཚོད་བསྡམ་པ། ཟས་སྐོམ་དུས་ལྟར་བསྟེན་རྒྱུ་དང་། སྐྱ་ལ་འཇུ་སླ་བའི་ཟས་རིགས་སྣ་ཚོགས་བསྟེན། འབྲུ་རིགས་དང་སྤྲི་དཀར་གྱི་རྫས་མང་བའི་ཟས་ཏེ་འབྲས་དཀར་ཕྱེ་ཐུག སྣེའུ་འབྲས་ཕྱེ་ཐུག སྲན་ཁུ། སྦྲང་རྩི། འོ་མ་སོགས་དང་། སྔོ་ཚལ་དང་སིལ་ཏོག་རིགས་ཏེ་ཞི་ལན་ཧྭ། ཙི་ཀན་ལན། ཚོད་དཀར། ལ་ཕུག ཀུ་ཤུ། སྔོ་འཇོང་སོགས་དང་། ཆུ་སྐོལ་མང་དུ་བསྟེན་དགོས།

༥ རྒྱུན་སྤྱོད་བསྲུང་པ། ངལ་གསོ་འོས་འཚམ་བྱ་བ་དང་། གཉིད་ཚིམ་པ།སེམས་ཁམས་དྭངས་ཤིང་སྤྲོ་བ། ལུས་སྦྱོང་དང་ངལ་གསོ་འོས་འཚམ་བྱས་ཏེ།གནམ་གཤིས་དྲོ་གྲང་དང་བསྟུན་ནས་གྱོན་ཆས་དང་ཁང་པའི་ནང་གི་དྲོད་ཚད་སྙོམ་སྒྲིག་བྱེད་དགོས། གྲང་འགོག་དྲོད་སྲུང་དང་དུས་རྒྱུན་སྤྱོད་ལམ་ལེགས་པར་བྱས་ནས་ལུས་ཁམས་བདེ་སྲུང་བྱ་དགོས །དེ་མིན་ཁ་ཐུམ་རྒྱག་པ་དང་ལག་པ་ཡང་ཡང་བཀྲུ་དགོས་ཤིང་འདུ་འཛི་ཆེ་བའི་གནས་སུ་མི་འགྲོ་བ་བྱེད་རྒྱུ་གལ་ཆེ། 

 གསུམ་པ།   ཕྱི་རྗེས་གཅོད་ཐབས།

གཅིག བོད་སྨན་གྱིས་ཕྱི་རྗེས་གཅོད་ཐབས།

༡  ནད་རྟགས་སུ་དབུགས་འཚངས་པ་དང་རྔུལ་ནག་འདོན་པ། བྲང་བསྡམས་ཞིང་སྙིང་ཁམས་མི་བདེ་བ། སྐམ་ལུ་བྱེད་པ་ཅན་རྣམས་ལ་ཕོ་བོའི་མེ་དྲོད་དང་གློ་སྙིང་གསོ་བའི་ཁོང་སྨན་ཏེ། གསོ་བྱེད་ཉི་མའི་དཀྱིལ་འཁོར་དང་།  ཨ་གར་བཅོ་ལྔ། འབའ་སམ་སྨན་མར་སོགས་བསྟེན་དགོས།

༢ ནད་རྟགས་སུ་ལུས་ཐང་ཆད་པ་དང་ཟས་ཀྱི་དང་ག་ཞན་པ། ཕོ་བ་སྦོས་བརྒྱངས་བྱེད་པ། ཁོག་བཤལ་བ་ཅན་རྣམས་ལ་ཕོ་བའི་མེ་དྲོད་བསྲུང་བའི་སྨན་ཏེ་སེ་འབྲུ་དྭངས་གནས་སོགས་བསྟེན་དགོས། 

༣ ནད་རྟགས་སུ་གཉིད་ཡེར་བ་དང་། སེམས་ལས་ཆེ་བ། ཡི་མུག་པ་ཅན་རྣམས་ལ་སྙིང་དང་རླུང་ཁམས་གསོ་བའི་སྨན་ཏེ་ཨ་གར་བཅོ་ལྔ་དང་ཨ་གར་བརྒྱད་པ་སོགས་བསྟེན་དགོས།

གཉིས། དཔྱད་ཀྱི་ཕྱི་རྗེས་གཅོད་ཐབས། 

༡ ཙོག་ལུམས། བདུད་རྩི་ལྔ་ལུམས་ཕྱེ་རགས་ཁེ༡༠ཡང་ན་བདུད་རྩི་སྨན་ལུམས་ཁེ༣༠ ཆུ་ཁོལ་ནང་སྦངས་ནས（དྲོད་ཚད་༤༢℃ཙམ། ）རྐང་པ་ལུམས་སུ་གཞུག་ནས་འཁྲུ་དགོས།   ཉིན་རེར་ཐེངས ༡ དང་ཐེངས་རེར་སྐར་མ་༣༠-༤༠ཙམ་སྦངས་པ། ཐེངས་བདུན་བཅོས་ཡུན་གཅིག་ཡིན། 

༢ ཧོར་མེའི་བཅོས་ཐབས། སྤྱི་གཙུག་དང་ཨན་སྟོང་ཚིགས་པ་དང་པོ།མཇིང་ཚིགས་སོགས་ཀྱི་གསང་གནས་སུ་ཧོར་མེ་བསྟེན། ཐེངས་རེར་སྐར་མ༣༠དང་ཉིན༣ནང་ཐེངས༡བསྟེན་དགོས། 

༣ བསྐུ་མཉེའི་བཅོས་ཐབས། མཇིང་ཚིགས་ཡོངས་ཀྱི་གསང་དམིགས་དང་རྒྱབ་ཚིགས༦ ༧ ༡༠ ༡༣ ༡༤ བཅས་ལ་བསྐུ་མཉེ་ཟབ། ཐེངས་རེར་སྐར་མ༣༠དང་ ཉིན༢～༣ལ་ཐེངས༡བསྟེན་དགོས།

༤ བཅོས་ཐབས་གཞན་པ། བོད་ཀྱི་གསོ་བ་རིག་པའི་ལུས་སྦྱོང་ཁམས་གསོ་བྱེད་ཐབས་ལག་འཁྱོལ་བྱས་ཏེ་ལུས་སྦྱོང་འོས་འཚམ་རྒྱག་དགོས།