༄༅། །དགེ་རྒན་སྐལ་བཟང་ཉི་མའི་ལོ་རྒྱུས་མདོར་བསྡུས། 

བསོད་ནམས་ནོར་བུ། (མགོ་ལོག)

གླེང་གཞི།

སྤྱིར་རིག་གནས་ཆེན་པོ་མ་དར་བའི་ཡུལ་ལུང་ཞིག་ནས་ཐོས་བསམ་གྱིས་ཕྱུག་པའི་མ་འོངས་པའི་བདག་པོ་མང་བོ་ཞིག་སྐྱེད་སྲིང་བྱ་རྒྱུ་ནི་དེ་འདྲའི་ལས་སླ་མོ་ཞིག་ག་ལ་ཡིན་ཏེ། ཕྱི་ནང་གཉིས་ཀྱི་འགལ་རྐྱེན་སྣ་ཚོགས་ཤིག་རྒྱ་མཚོའི་རླབས་ལྟར་གཅིག་འཕྲོར་གཅིག་ཏུ་ཡོང་བ་སྨྲ་མ་དགོས། དགེ་རྒན་སྐལ་བཟང་ཉི་མ་མཆོག་ཀྱང་དེ་ལས་མ་འདས་པ་ཅི་ཞིག་ཡོད། 

ཁོང་ནི་བཅུ་ཕྲག་རིག་གནས་ཁོང་དུ་ཆུད་པའི་མཁས་པ་ཞིག་མིན་ལ། ཁྱིམ་ཚང་ཡང་འབྱོར་ལྡན་ཞིག་ཀྱང་མིན། ཁོང་ཆུང་དུས་ནས་རྐང་བ་ཡ་གཅིག་སྐྱོན་ཅན་དུ་གྱུར་བའི་གྲྭ་རྐྱང་ཕལ་བ་ཞིག་གམ་ལྷག་བསམ་གྱིས་ཕྱུག་པའི་འོད་ཀྱི་གོང་བུ་ཞིག་ཡིན། ད་རེབ་བདག་གི་སློབ་དཔོན་རིན་པོ་ཆེ་ལྡོང་ཡོན་ཏན་རྒྱ་མཚོའི་ཐུགས་བཀོད་ལྟར་ད་ལོའི་མཐར་ཕྱིན་ཆེད་རྩོམ་ལ་རང་ས་གནས་ཀྱི་མི་སྣ་རླབས་ཆེན་རེའི་ལོ་རྒྱུས་འཚོལ་སྡུད་ཀྱི་ངལ་བ་དང་དུ་བླངས་ནས་རང་ཡུལ་ལ་བཀའ་དྲིན་བླ་ན་ཆེ་བའི་དགེ་རྒན་སྐལ་བཟང་ཉི་མ་མཆོག་གི་ལོ་རྒྱུས་འདི་བྲིས་པ་ཡིན།

དང་བོ།  དགེ་རྒན་སྐལ་བཟང་ཉི་མའི་ལོ་རྒྱུས་ཉུང་ཙམ།

དགེ་རྒན་སྐལ་བཟང་ཉི་མ་མཆོག་ནི་མགོ་ལོག་ཨ་སྐྱོང་ཁག་གསུམ་གྱི་ཡ་གྱལ་ཨ་སྐྱོང་འབུམ་གྱི་ཁོངས་གཏོགས་ཧོར་རྒྱུད་ཚོ་བ་ཞེས་འབོད་པའི་སྡེ་བ་འདི་ནས་སྤྱི་ལོ༡༩༧༠ལོར་ཡབ་ཚག་པའི་སྟག་ལོ་དང་ཡུམ་དུར་བཟའ་སྒྲོལ་མ་གཉིས་ཀྱི་སྲས་སུ་སྐྱེས། ཆུང་དུས་སུ་ལུག་རྫིའི་ཞོར་དུ་ཡབ་ཀྱི་མདུན་ནས་ཡི་གེའི་འབྲི་ཀློག་དང་མདོ་གདུགས་སྒྲོལ་གསུམ་གཙོ་བྱས་པའི་ཉེར་མཁོའི་ཞལ་འདོན་སྐོར་བློ་འཛིན་བྱས། དགུང་ལོ་བཅུ་བདུན་སྟེང་ནས་ཨ་སྐྱོང་བླ་མ་རྟོགས་ལྡན་བློ་གྲོས་རྒྱ་མཚོ་དང་མཁན་ཨོ་རྒྱན་ཚེ་རིང་གཉིས་ཀྱི་མདུན་ནས་རབ་ཏུ་བྱུང་སྟེ་ཨ་སྐྱོང་རྟོགས་ལྡན་དགོན་མདོ་སྔགས་བཤད་གྲུབ་ཆོས་གླིང་དུ་ཞུགས། 

དགོན་པ་འདིའི་མིང་ལ་མགུ་ཡ་དགོན་ཟེར་མཁན་ཡང་ཡོད། དེ་ནས་ལོ་ངོ་བཅོ་བརྒྱད་ལྷག་གི་རིང་ཨ་སྐྱོང་བླ་མ་རིན་པོ་ཆེའི་བཀའ་ལྟར་སྒྲུབ་གྲྭའི་གྲྭ་ཚང་དུ་བཞུགས། ལོ་བཞིའི་རིང་ལ་སྒྲུབ་གྲྭའི་མཆོད་དཔོན་གྱིས་འགན་བཞེས་ཤིང་དེ་ནས་ལོ་ངོ་བཅུ་ལྷག་ལ་སྒྲུབ་གྲྭའི་གྲྭ་ཚང་གི་བླ་མའི་འགན་བཞེས། སྐབས་དེར། ༧སྐྱབས་རྗེ་བླ་མ་རྟོགས་ལྡན་བློ་གྲོས་རྒྱ་མཚོ། དབོན་སྤྲུལ་རིན་པོ་ཆེ་བསྟན་པའི་དབང་ཕྱུག མཁན་ཆེན་པདྨ་བློ་གྲོས། མཁན་ཆེན་གཞན་དགའི་ཡང་སྤྲུལ་ཐོས་ལྡན་རིན་པོ་ཆེ། མཁན་ཆེན་ཨོ་རྒྱན་ཚེ་རིང་། མཆོག་སྤྲུལ་པདྨ་འགྲོ་འདུལ་སོགས་ལས་དབང་ལུང་མན་ངག་སོགས་ཀྱི་གདམས་པ་མང་དུ་མནོས་ཤིང་ཐུགས་བརྩེས་རྗེས་སུ་བཟུང་སྟེ་རྒྱུད་སྨིན་པར་བྱས། ལྷག་པར་དུ་ཨ་སྐྱོང་བླ་མ་རྟོགས་ལྡན་རིན་པོ་ཆེས་དམིགས་བསལ་གྱིས་ལྟ་སྐྱོང་དང་ཐུགས་བརྩེ་མང་བོ་ཐོབ་མྱོང་སྟེ། 

དཔེར་ན། ཁོང་ཚང་དགོན་པའི་ནང་ན་བཞུགས་སྐབས་ཀྱི་ལོ་ཞིག་ལ་སྐུ་སྙུང་ནས་ཡོད་དུས་བླ་མས་སྨན་ཁང་དུ་སྨན་པར་སྟོན་ཏུ་མངགས་ཏེ་སྨན་ཡོན་དང་འགྲོ་གྲོན་ཚང་མ་བླ་མ་རིན་པོ་ཆེས་ཕྱག་དངུལ་གནང་བ་སོགས་མ་ཡིས་བུ་ལ་བརྩེ་བ་ལྟར་བྱས་མྱོང་ཟེར། ད་དུང་ལྟོ་གོས་ཆོས་གསུམ་པོ་ཁོང་གིས་མ་གནང་བ་ཞིག་མེད་ཅེས་གསུངས་པ་དང་། བླ་མ་རིན་པོ་ཆེས་དུས་རྒྱུན་ཁོང་ལ་ཁྱོད་ཀྱི་བདག་པོ་ཁོང་ཡིན། ཁྱོད་དགོན་པ་འདི་ལས་གཞན་གང་དུའང་འགྲོ་མི་དགོས་ཞེས་ཞལ་ཏ་མང་བོ་གནང་མྱོང་ཟེར་བཞིན་ཕྱག་ཟུང་སྙིང་ཁར་སྦྱར་ནས་སྤྱན་ཆབ་འཐོར་གྱིན་སྐད་ཆ་བཤད་མི་ཐུབ་པའི་གནས་སུ་སླེབས། 

སྐབས་འདིར་ཡང་ཡང་གླེང་བཞིན་པའི་བླ་མ་རིན་པོ་ཆེའམ་ཡོངས་གྲགས་ལ་ཨ་སྐྱོང་རྟོགས་ལྡན་བློ་གྲོས་རྒྱ་མཚོ་ཞེས་པ་མཁས་གྲུབ་གཉིས་ལྡན་གྱི་སྐྱེས་ཆེན་དམ་པ་ཞིག་ཡིན་པ་ཁོང་གི་རྣམ་ཐར་དང་སློབ་མ་དག་ལས། དམ་པའི་ཆོས་ཚུལ་མཐའ་དག་རྫོགས་པ་ནི། །སྙིགས་མའི་མཐུས་བྱས་རྙེད་པར་དཀའ་ན་ཡང་། །སྡོམ་གསུམ་གནང་བཀག་གཙང་མའི་ས་གཞི་ལ། །ཐོས་དང་སྙིང་རྗེ་ཆེན་པོས་ཐུགས་རྒྱུད་བརླན། ། སྡེ་སྣོད་སྔགས་རྒྱུད་རྒྱ་མཚོའི་ཆོ་ག་མཁས། །སྤངས་རྟོགས་ཡེ་ཤེས་དྲི་མེད་འབྲས་བུས་ཕྱུག །བསྡུ་དངོས་བཞི་ཡི་མེ་ཏོག་རྣམ་བཀྲ་བས། །སྐལ་བཟང་སློབ་མའི་བུང་བ་སྡུད་ལ་བསྟེན། ཞེས་གསུངས། ཉིན་ཞིག་ལ་བླ་མའི་ཞལ་ནས་ཁྱོད་ཀྱིས་མནྡ་སོགས་བྱིས་པ་ཁ་ཤས་ཤིག་ལ་ཡི་གེའི་ཀློག་འདོན་ཁྲིད་ཅིག་ཅེས་ཐུགས་བསམ་རྒྱང་ལ་གཟིགས་པའི་བཀའ་ལུང་གནང་། བླ་མ་ཞལ་བཞུགས་སྐབས་བྱིས་པ་དྲུག་བདུན་ཞིག་ཨ་ཁུ་སྐལ་བཟང་ཉི་མ་ཚང་གི་གྲྭ་ཤག་ཏུ་ཀློག་བསླབ་ཏུ་བཅུག དེ་ནི་ད་ལྟའི་སློབ་གྲྭ་འདི་དབུ་ཚུགས་པའམ་རྨང་བཏིང་བ་ཡིན།

གཉིས་པ།  སློབ་གླིང་གསར་འཛུགས་ཀྱི་སྐོར།

སྤྱིར་ད་ལྟའི་སྤྱི་ཚོགས་འདི་ལྟ་བུ་ཞིག་ལ་ཆ་མཚོན་ན་མི་གཅིག་གིས་ནུས་པ་ལ་བརྟེན་ནས་སྒེར་གྱིས་སློབ་གྲྭ་ཞིག་གསར་འཛུགས་གནང་རྒྱུ་ནི་ལས་སླ་མོ་ཞིག་མིན་ཡང་། ཡུན་རིང་བོའི་བར་དུ་སློབ་གྲྭ་ཞིག་རྒྱུན་སྐྱོང་ནས་གནས་རྒྱུ་ནི་དེ་ལས་ཀྱང་སྒྲུབ་དཀའ་བའི་དོན་དག་ཉག་ཅིག་ཡིན་པ་སྨོས་མ་དགོས་པ་ཞིག་རེད། མི་ཞིག་གིས་སྒེར་གྱི་སློབ་གྲྭ་ཞིག་སྒྲུབ་བཞིན་ཡོད་དུས། དེའི་མཐའ་འཁོར་གྱི་མི་ཐམས་ཅད་ཀྱིས་ལྟ་བའི་ངོས་ནས་མི་དེ་ནི་ཡོན་ཏན་ཅན་ཞིག་དང་། 

ཡང་ན་འབྱོར་ལྡན་གྱི་མི་སྣ་ཞིག་ཏུ་ངོས་འཛིན་གྱིན་ཡོད་མོད། འོན་ཀྱང་། ཁོང་ནི་དེ་ལྟ་བུའི་ཤེས་ཡོན་པ་དང་འབྱོར་ལྡན་གྱི་མི་སྣ་ཞིག་གཏན་ནས་མིན། འོ་ན་ཁོང་གིས་དེ་ལྟ་བུའི་ལས་ཀ་ཞིག་ཇི་ལྟར་འགྲུབ་པ་རེད་ཅེ་ན། དགེ་རྒན་སྐལ་བཟང་ཉི་མ་མཆོག་གིས་ས་གནས་མང་ཚོགས་ཀྱི་དགོས་མཁོ་དང་རིག་གནས་ཀྱི་ཉམས་ཉེས་ལ་དམིགས་ཏེ། འདུན་པ་ལྷོད་མེད་ཀྱིས་རྒྱུན་འཁྱོངས་བྱས་སྟབས་ཡི་གེ་སློབ་མཁན་གྱི་སློབ་མ་ཇེ་མང་དུ་གྱུར་ཏེ་ཕལ་ཆེར་སློབ་མ་ཉི་ཤུ་ལྷག་ལ་བུད་པས་ཁོང་གིས་སློབ་མ་ཚོར་སློབ་སྦྱོང་གི་ཁོར་ཡུག་བཟང་བོ་ཞིག་དང་། ཡར་མར་འགྲོ་འདུག་གི་སྐབས་སུ་ལམ་གྱི་བདེ་འཇགས་དང་དུས་རྒྱུན་གྱི་འཚོ་བ་སྟབས་བདེར་བཟོ་ཆེད་སློབ་ཁང་འགའ་ལས་ནས་སློབ་གྲྭ་ཞིག་འཛུགས་རྒྱུར་ཐུགས་བསམ་བཏང་། 

སྤྱིར་དགེ་རྒན་སྐལ་བཟང་ཉི་མ་ནི་མིང་སྲིང་ཚོའི་ཁྲོད་ནས་ཕ་ཤུལ་བུ་ཡིས་འཛིན་མཁན་གཅིག་བུ་ཡིན་མོད། འོན་ཀྱང་། ཁོང་གིས་ཁྱིམ་ཚང་དང་གཉེན་ཉེ་ཕལ་བ་བྱས་ཏེ་ལྷག་བསམ་རྣམ་དག་གིས་མི་རིགས་སློབ་གསོའི་ལས་དོན་དང་ས་གནས་འདིའི་དར་རྒུད། དགོན་པ་དང་བླ་མའི་བཀའ་དྲིན་ལ་ཐུགས་བསམ་ཅི་མང་བཏང་སྟེ། སངས་རྒྱས་ཀྱི་བསྟན་པ་དར་སྤེལ་དང་སེམས་ཅན་གྱི་འགྲོ་དོན་ལ་ཕན་འདོགས་མཁན་གྱི་གྲྭ་བ་རེ་གསོ་སྐྱོང་བྱ་ཐུབ་ན་སྙམ་ནས་ཐོག་མར་ཨ་སྐྱོང་རྟོགས་ལྡན་དགོན་མདོ་སྔགས་བཤད་སྒྲུབ་ཆོས་གླིང་དུ་སྔར་མེད་ཀྱི་སློབ་གླིང་ཞིག་གསར་དུ་འཛུགས་འདོད་ཀྱི་བསམ་པས་ཀུན་ནས་བསླངས། 

དེ་ཡང་ཤེས་རབ་སྡོང་བུ་ལས། དམ་པ་རྣམས་ཀྱིས་ཁས་འཆེས་མི་བྱ་ཞིང་། ། གལ་ཏེ་དཀའ་བའི་ཁས་ནི་བླངས་གྱུར་ན། །རྡོ་ལ་རི་མོ་བརྐོས་པ་ཇི་བཞིན་དུ། །ཤི་ཡང་གཞན་དུ་བྱེད་པར་མི་འགྱུར་རོ། །ཞེས་གསུངས་པ་བཞིན་ཁོང་གིས་སྤྱི་ལོ་༢༠༠༣ལོར་ཁྱིམ་ཚང་གིས་སེན་མགོ་ཁྲག་དང་སེན་རྩ་རྣག་བྱས་ནས་བསགས་པའི་དམངས་སྒོར་ལྔ་སྟོང་ཙམ་ཡོད་པ་དེ་དང་། སྐབས་དེར། གོང་རིམ་ནས་ཁྱིམ་ཚང་སོ་སོར་སྦྱིན་པའི་རྣམ་གྲངས་ཀྱི་རྩྭ་ར་ཞིག་ཡོད་པ་དེ་བཙོང་ནས་དེའི་རིན་པ་དང་བཅས་ཁྱོན་སྒོར་ཁྲི་ལ་ཉེ་བ་ཞིག་ཡོད་པ་ཁྱེར་ཏེ་ཁོང་དང་ཁོང་གི་རོགས་པ་ཞིག་དངོས་སུ་ཟི་ལིང་དུ་སློབ་ཁང་ལས་བྱེད་ཀྱི་རྒྱུ་ཆ་ཤིང་སོགས་ཉོ་རུ་ལམ་ལ་ཕྱིན། སྐབས་དེར། ཁོང་ཚང་ལ་མཚོན་ན་དཀའ་ཁག་མང་བོར་འཕྲད་ཡོད་དེ། 

གཅིག ལམ་དང་འགྲིམ་འགྲུལ་སྟབས་བདེ་མིན་པའི་དཀའ་ཁག་དང་། གཉིས། སྐད་བརྡ་མི་འཕྲོད་པའི་དཀའ་ཁག གསུམ། རྐང་བ་ཡ་གཅིག་སྐྱོན་ཅན་ཡིན་རྐྱེན་འགྲོ་འདུག་སྟབས་བདེ་མིན་པའི་དཀའ་ཁག་སོགས་མང་བོ་བརྒྱུད་ནས་སློབ་ཁང་ལས་བྱེད་ཀྱི་ཤིང་ཆ་སོགས་ཉོས་ནས་ཟླ་ཕྱེད་ཙམ་གྱིས་ཕྱིར་ཕ་ཡུལ་དུ་ཕེབས། དེ་ནས་ཁོང་དངོས་སུ་བྱོན་ཏེ་དགོན་པ་ནས་སྤྱི་ལེ་གཅིག་ཙམ་ཡོད་པའི་གནས་ཤིག་སྟེ་ཁོད་ཡངས་ལ་ཁམས་གཙང་ས་ཞིག་ཏུ་སློབ་གྲྭ་གསར་འཛུགས་བྱ་རྒྱུར་སེམས་ཐག་བཅད། སློབ་མ་ཆེ་གྲས་ཚོ་ལ་ཉི་མ་རེ་རེར་དུས་ཚོད་བཀོད་སྒྲིག་བྱས་ཏེ་སྔོན་ཉོས་ཡོང་བའི་གདོང་མ་ཐམས་ཅད་ཟླ་ཕྱེད་ཙམ་གྱི་རིང་ལ་རེ་རེ་བཞིན་རྒྱབ་ཏུ་ཁུར་ནས་ཁང་བ་ལས་སར་བསྐྱལ་དུ་བཅུག 

སྤྱི་ལོ་༢༠༠༤ལོར་དངོས་སུ་སློབ་མ་ཁ་ཤས་དང་དགེ་རྒན་ཁོང་གིས་གཙོས་ཁང་ལས་པ་འགའ་དང་མཉམ་དུ་གྱང་བརྡུངས་ནས་ཁང་བ་ལས་རྒྱུ་ལག་བསྟར་བྱས། ཁོ་ཚོས་ཉི་མ་རེར་དཀའ་ལས་སྣ་ཚོགས་བརྒྱབས་ནས་སློབ་ཁང་གཅིག་དང་སློབ་མའི་མལ་ཁང་། དགེ་རྒན་གྱི་གཟིམ་ཁང་སོགས་ཁང་མིག་ལྔ་དྲུག་ཙམ་ལས་རྗེས་གཞི་ནས་གནས་འདིར་ཀུན་ཕན་བཻ་རོའི་གླིང་། ཞེས་པའི་སློབ་གླིང་གསར་བ་འདི་ས་ཆེན་གྱི་པང་དུ་འཁྲུངས། 

འོན་ཀྱང་། དེ་ནི་སྐྱ་རེངས་བཀྱགས་པ་ཙམ་ལས་ཡོད་ཚད་གྲུབ་ཟིན་པ་ག་ལ་ཡིན་ཏེ། ཡུན་རིང་མ་འགོར་བར་སྔར་ལས་པའི་ཁང་བ་དེ་དག་གི་རྒྱུ་ཆ་ཞན་པ་དང་ལས་མཁན་ལ་ཉམས་མྱོང་མེད་པ། འབྱུང་བཞིའི་གནོད་པ་སོགས་ཀྱིས་གྱང་བརྡུངས་ནས་ལས་པའི་ཁང་བ་མང་བོར་གནོད་པ་ཐེབས་ཏེ་ཐིགས་ཆུ་ཟགས་པ། སེར་ཁ་གས་པ་སོགས་དཀའ་ཁག་མང་བོ་ཞིག་དང་འཕྲད། 

སྐབས་དེར། ཁོང་གིས་འབྲོག་ས་རུ་གསར་དུ་ཐོན་པའི་གོང་རིམ་གྱི་རྣམ་གྲངས་ཁྲོད་དུ་དྲོད་ཁང་ལས་བྱེད་ཀྱི་སྟོང་ཕག་མང་བོ་ཞིག་ཡོད་པ་དེ་ཁོང་གིས་རྩྭ་ས་བཙོང་བའི་རིན་གྱིས་ཉོས་ཏེ། དཔྱིད་མགོར་སློབ་ཁང་སོགས་གསར་དུ་ལས་རྒྱུར་སྟ་གོན་བྱས། དེ་དུས་ཁྱིམ་བདག་འོད་སྲུང་ཟེར་བ་ཞིག་གིས་ཀྱང་ཁང་བ་ལས་བྱེད་དུ་སྟོང་ཕག་མང་བོས་སྦྱིན་བདག་བྱས་མྱོང་ཟེར། སྐབས་དེར། ད་རུང་འགྲིམ་འགྲུལ་གྱི་ལམ་དེ་འདྲ་སྟབས་བདེ་མིན་པར་མ་ཟད་དགེ་རྒན་སྐལ་བཟང་ཉི་མ་ལགས་ལ་མཚོན་ནའང་ཁོང་ཚང་གི་འགྲོ་འདུག་ནི་ང་ཚོ་བཞིན་རང་དབང་དུ་ཡོད་པ་ཞིག་མ་ཡིན་ཡང་། ཁོང་གིས་སྙིང་སྟོབས་ཆེན་པོས་སྒོ་ནས་རླངས་འཁོར་གྱི་ཁ་ལོ་བ་ཞིག་ལ་གླ་ཆ་མཐོ་པོར་བྱིན་ནས་གཅིག་པུ་སྤྱི་ལེ་དགུ་བཅུ་ལྷག་ཡོད་སའི་དབྱིག་གཞུང་ཡུལ་ཚོ་རུ་རྡོ་དང་སྟོང་ཕག་འདྲུད་དུ་སོང་།

ཕྱིར་ཡོང་སྐབས་ཁ་ལོ་བ་དང་ཁོང་གཉིས་མ་གཏོགས་མེད། དེར་མ་ཟད་ས་ཡང་རུབ་ཡོད། ལམ་བར་ནས་དར་བརྡིབས་ཏེ་རླངས་འཁོར་དར་ནང་དུ་ལྷུང་བས་འོལ་བརྒྱལ་མང་བོ་མྱོང་དགོས་བྱུང་ལ། མཚན་གང་བོར་དར་བརྐོས་པས་ནམ་གསལ་མ་ཁར་ད་གཟོད་རླངས་འཁོར་དར་ནས་ལོན་བྱུང་ཟེར། དེ་དང་འདྲ་བར་སློབ་གྲྭ་གསར་འཛུགས་བྱེད་སྐབས་སློབ་གླིང་གི་དོན་དུ་དཀའ་སྡུག་གི་རྔུལ་ཆུ་བཏོན་པ་ཉུང་ཉུང་ག་ལ་ཡིན། 

ལོ་ཟླ་ནི་རྟ་ཕོའི་བང་ལྟར་མགྱོགས་པས་མིག་རྡེབ་དབང་ཙམ་གྱིས་མི་ལོ་བཅོ་བརྒྱད་ཙམ་འགོར་ཟིན་ལ། མི་ལོ་བཅོ་བརྒྱད་ཀྱི་རིང་དུ་སློབ་གླིང་སྤྱིའི་འགྲོ་གྲོན་ལ་སྒོར་ཁྲི་བརྒྱ་ལྷག་བཏང་འདུག་ལ་ཁོང་གིས་སྒེར་ངོས་ནས་ད་ལྟའི་བར་དུ་དམངས་སྒོར་ཁྲི་བདུན་བཅུ་ལྷག་བཏང་འདུག ད་ལྟ་ཉལ་ཁང་ལྔ་དང་། སློབ་ཁང་ལྔ། ཀུན་དགའ་ར་བ་གཅིག མཛོད་ཁང་དང་ཇ་ཁང་སོགས་ཁང་མིག་ཉེར་དགུ་བཅས་ཁྱོན་ཁང་བ་བཞི་བཅུ་ལྷག་ཡོད། ཁྲུས་རྫིང་དང་སྐྱེད་ཚལ་ར་བ་ཞིག་ཀྱང་འདུག དེ་ལྟར་དགེ་རྒན་སྐལ་བཟང་ཉི་མ་མཆོག་དང་རྒན་ཀུན་བཟང་ཉི་མ་གཉིས་ཀྱིས་ལོ་ངོ་འདི་དག་གི་རིང་ལ་སློབ་མ་རེ་རེར་མཚན་མོ་སེམས་ཀྱིས་འཚོས་ཤིང་ཉིན་དཀར་མིག་གིས་འཚོས་ནས་ཡོང་སྟེ་ད་ལྟའི་བར་དུ་གྲྭ་བཙུན་སུམ་བརྒྱ་ལྷག་ལ་ཐོག་མར་ཡི་གེ་ཀློག་སློབ་པ་ནས་ཆོ་ག་ཆོས་སྤྱོད་སོགས་མ་ལུས་པ་ཁྲིད་ནས་ཡོང་། སྤྱིར་སློབ་མ་ཞིག་ལ་ཀློག་དང་ཆོ་ག་ཆོས་སྤྱོད་སོགས་ཁྲིད་རྒྱུ་ནི་དེ་འདྲའི་ལས་སླ་མོ་ཞིག་ག་ལ་ཡིན། སློབ་མ་ཚོར་ཀློག་དང་གསོལ་ཁ་སོགས་ཁྲིད་སྐབས་དུས་ལྟར་ཡག་པོ་འདོན་རོགས་མི་བྱེད་མཁན་དང་མི་ཤེས་མཁན་ཅུང་ཙམ་མང་བས་ཉིན་གང་བོར་རེ་རེར་བཞིན་ཡང་ཡང་ཁྲིད་དགོས་བྱུང་ལ། སྐབས་དེར་སྔ་མོའི་ནངས་ཇ་མ་གཏོགས་ཉིན་གཅིག་ལ་ཇ་ཁམ་གང་ཡང་བཞེས་ཁོམ་མེད་པའི་དུས་ནི་ཐེངས་གཅིག་དང་གཉིས་ཙམ་མ་ཡིན་ནོ། ། 

ཁོང་ནི་སློབ་མ་ཚོའི་དགེ་རྒན་ཙམ་མ་ཡིན་པར་ཇ་མ་དང་ཁྱིམ་བདག་གི་འགན་ཡང་གཅིག་ལྕོག་ཏུ་ཁུར་ཡོད་དེ། སྔ་མོར་སློབ་མ་ཚོར་ཡར་མ་ལངས་སྔོན་ཁོང་བཞེངས་ནས་ནངས་ཇ་སྐོལ་བ་དང་། ཉིན་གུང་དྲོས་ཇ་སྐོལ་བ་སོགས་ཉི་མ་རེ་རེ་བཞིན་ཞབས་ཞུ་སྒྲུབ་ཀྱིན་ཡོད། ད་དུང་ཆེས་རླབས་ཆེ་བ་ནི་ཁོང་གིས་ད་ལྟའི་བར་དུ་སློབ་མ་ཚོའི་ལག་ནས་སློབ་ཡོན་སྐར་གང་ཡང་བསྡུ་མྱོང་མེད་ལ། དེ་ལས་ལྡོག་སྟེ་གྲྭ་ཕྲུག་ཚོར་ངལ་གསོའི་སྐབས་སུ་ཕྱོགས་ཡར་མར་གྱི་ཁྱིམ་ཚང་ལ་གྲོང་ཆོག་ཏུ་སོང་བ་དང་། དགོན་པའི་སྒྲུབ་མཆོད་སོགས་ཀྱི་སྐབས་སུ་ཡོན་བདག་གིས་ཕུལ་བའི་འབུལ་བ་སོགས་ལ་བདག་པོ་བྱས་ཏེ་དབྱར་གནས་སོགས་གྲོལ་རྗེས་ཤིང་སློང་ལ་འགྲོ་སྐབས་རང་རང་གི་ལག་ཏུ་འཇོག་གིན་ཡོད་ཟེར། 

ད་ལྟའི་བར་དུ་ཁོང་གིས་གྲྭ་བ་སུམ་བརྒྱ་ལྷག་གསོ་སྐྱོང་བྱས་འདུག་ལ་དེ་དག་ལས་མཁན་བཀྲ་ཤིས་རྡོ་རྗེ་ལགས་གཙོ་བྱས་པའི་ཤེས་ཡོན་པའི་སྡེ་ནས་བསྟན་པ་དང་འགྲོ་བ་ལ་ཕན་ཐོག་དང་ཐོག་བཞིན་པའི་སློབ་མ་བཟང་བོ་ལྔ་བཅུ་ལྷག་བྱུང་ཡོད་ཟེར། ད་ལྟ་ཁོང་གིས་སློབ་གླིང་དེར་རིག་གནས་ཀྱི་དགེ་རྒན་གཙང་ཤུལ་དབང་དྲག་ནོར་བུ་དང་། གླིང་ཚང་ཟླ་བ་ཚེ་རིང་སོགས་གདན་འདྲེན་ཞུས་ཡོད། ད་སྐབས་སློབ་གླིང་གི་འཁྲིད་བྱ་གཙོ་བོ་ནི་ཀློག་བསླབས་རྗེས། ཆོ་ག་འདོན་ཆ། སུམ་རྟགས་དག་གསུམ། སྙན་ངག ལོ་རྒྱུས། བསྡུས་གྲྭ། ཀུན་བཟང་བླ་མའི་ཞལ་ལུང་སོགས་བློ་འཛིན་བྱེད་པ་དང་། གྲྭ་བ་ཞིག་གིས་ངེས་པར་དུ་ཤེས་དགོས་པའི་བཅའ་འབུད་རྡུང་གསུམ། འདོན་ཕྱག་ལེན། འབུམ་ལྔའི་བསགས་སྦྱོང་སོགས་རྒྱུད་པ་ཆུད་མི་ཟ་བར་བྱས་ཏེ་བློ་རིག་སྨིན་རྗེས་གནས་འདིའི་བཤད་གྲྭ་ལྔ་རིག་ཐོས་བསམ་གླིང་གི་གཙོས་དགོན་སྡེ་ཆེ་ཁག་དག་ནས་ཐོས་བསམ་རྣལ་མར་བྱེད་བཞིན་ཡོད། 

ལོ་ངོ་བཅོ་བརྒྱད་འདིའི་རིང་ལ་སློབ་གླིང་འདིར་འཕེལ་འགྲིབ་སྣ་ཚོགས་ཤིག་བྱུང་འདུག་ལ་ཁོང་གི་ལྷག་བསམ་དང་དམིགས་རྒྱང་ལ་ཐམས་ཅད་ཡིད་འགུལ་ཐེབས་ཡོད། དགོན་སྡེ་དང་གྲོང་སྡེ་སྤྱིས་རྒྱབ་སྐྱོར་འོག་འཕེལ་རྒྱས་ཆེན་པོ་བྱུང་མྱོང་ཡོད་ལ། ཡང་ཆབ་སྲིད་ཀྱི་འགྱུར་ལྡོག་འོག་རྨང་མེད་གཏོང་དགོས་པའི་བཀའ་བཙན་ཐོག་འདྲ་བ་ཐེངས་མང་བོར་བབས་མྱོང་འདུག ཡིན་ནའང་ཁོང་གི་ཐུགས་སྟོབས་ནི་ས་ཆེན་པོ་བཞིན་དུ་བསྙེལ་བ་མི་འདུག་ལ། གནམ་འདེགས་ཀྱི་ཀ་བ་བཞིན་དུ་འགྱེལ་བ་མི་འདུག ཁོང་གིས་ཞལ་ནས་ང་རང་མ་ཤི་བར་དུ་ངའི་བསམ་བློ་དང་སེམས་ཤུགས་ཉམས་མི་སྲིད་ལ། གནས་འདིའི་དབྱངས་གསལ་གྱི་ང་རོ་དང་ལམ་སྟོན་གྱི་སྒྲོན་མེ་དག་གཟིམས་མི་སྲིད་ཅེས་གསུངས་ལ། མི་ལ་བརྩོན་འགྲུས་ལྡན་གྱུར་ན། ། འཇིག་རྟེན་འདི་ན་དཀའ་བ་མེད། །ཅེས་གསུངས་པ་བཞིན། ད་ལྟ་སློབ་གླིང་འདིའི་གཟི་བྱིན་སྔར་བཞིན་འབར་གྱིན་འདུག 

འདི་ནི་དགེ་རྒན་རྣམ་དག་ཅིག་གི་ཀུན་སྤྱོད་གཙང་མ་ཞིག་དང་། ལྷག་བསམ་རྣལ་མ་ཞིག་གིས་དགོན་སྡེ་ཞིག་ལ་ཤ་ཚ་ཚུལ་ཞིག་གམ་གྲྭ་རྐྱང་ཕལ་བ་ཞིག་གིས་མི་རིགས་ལ་ཕུལ་བའི་ལེགས་སྐྱེས་ཤིག་ཀྱང་ཅི་ལ་མིན། 

གསུམ་པ།  ཁོང་གིས་སློབ་མ་ཚོར་བཏོན་པའི་རེ་བའི་སྐོར།

ད་ལྟ་ཁོང་གིས་སློབ་མ་ཚོ་རེ་སྐུལ་དང་ཤ་ཚའི་སློབ་གསོ་ཅི་ཞིག་གནང་གིན་འདུག་ཅེ་ན། འདི་ནས་མཐར་ཕྱིན་རྗེས་བཤད་སྒྲུབ་གཉིས་ལ་ཞུགས་ཏེ་བསྟན་པ་དང་སེམས་ཅན་ལ་ཕན་གང་ཐོགས་བྱ་རྒྱུ་དང་། རབ་ཡིན་ན་དབེན་པའི་རི་ཁྲོད་འགྲིམ་སྟེ་ཚེ་དང་སྒྲུབ་པ་མཉམ་ལེན་ཐུབ་པ་ཞིག་དང་དེ་མིན་ནའང་གཞན་གནོད་གཞི་དང་བཅས་པ་སྤངས་རྒྱུ་དེ་ནི་གྲྭ་བ་ཞིག་ཡིན་པའི་ངོས་ནས་མ་མཐའི་ཆ་རྐྱེན་ཡིན། གནས་བབ་ཅི་འདྲ་ཞིག་གི་འོག་ཏུ་དེ་ལྟ་བུའི་འགན་འཁྲི་དེ་ནམ་ཡང་བརྗེད་མི་ཉན་ཞེས་སློབ་གསོ་དང་རེ་སྐུལ་བྱེད་ཀྱིན་ཡོད་ཅེས་གསུངས། 

ད་དུང་ཁྱེད་ཚོར་ནམ་རྒྱུན་ཁོམ་པ་རེ་ཡོད་སྐབས་སོས་དལ་དང་བག་ཡངས་བྱས་ནས་མི་འདུག་པར་སྦྱིན་བདག་རྣམས་ཀྱི་རེ་བ་ལྟར་ཤི་གསོན་གང་ཡིན་ཡང་ཕན་ཅི་ཐོགས་ཀྱིས་གྲོང་ཆོག་རེ་འགྲོ་དགོས་པར་སེམས་ཏེ། མི་ཞིག་ལ་མཚོན་ན་ཆེས་དཀའ་ཁག་ཆེ་བའི་དུས་ནི་ན་བ་དང་འཆི་བ་གཉིས་ཀྱི་དུས་ཡིན་ལ། དེའི་དུས་སུ་ཁོང་ཚོར་ཆེས་མཁོ་བ་ནི་གསོན་པོ་ལ་སྐུ་རིམ་དང་གཤིན་པོ་ལ་བསྔོ་སྨོན་གནང་མཁན་ཡིན་པས་ང་ཚོས་ནུས་པ་ཅི་ཡོད་ཀྱིས་བྱམས་དང་སྙིང་རྗེ་ཡི་སྒོ་ནས་ཕན་གང་ཐོགས་རེ་བྱ་རྒྱུ་ལས་རང་ཉིད་དཀོར་གྱི་རྣམ་སྨིན་ཙམ་ལ་འཇིགས་ནས་གྲོང་ཆོག་ལ་མ་སོང་ན། གཅིག་ན་དད་པ་ཅན་གྱི་ཚོགས་བཅག་པ་དང་། གཉིས་ན་སེམས་ཅན་བློས་གཏོང་རེད་སྙམ་པས་ཐུགས་ལ་འཛིན་པར་ཞུ་ཞེས་ཞུ་བཞིན་ཡོད། རང་ཉིད་ལ་མཚོན་ན་ཡང་གྲྭ་བ་ཞིག་ཡིན་པའི་ངོས་ནས་རང་གི་ལྟོ་རྒྱབ་ཙམ་གྱི་ཆེད་མ་ཡིན་པར་བྱིས་པ་རེ་རེ་ཡིན་ཡང་ཆོས་ལམ་ལ་འཇུག་ཐུབ་སོང་ན་ལྷ་མཆོད་པའི་མེ་ཏོག་ཡུ་བ་ཅན་དང་། ཁྲལ་འཇལ་གྱི་བེ་ཚང་དུ་བ་ཅན་རེད་ཅེས་བསམ་གྱིན་ཡོད། ད་རུང་ཡིན་ཡང་མ་ཤིའི་བར་དུ་སངས་རྒྱས་ཀྱི་བསྟན་པ་ལ་ཞབས་ཞུའི་དོན་ཆེ་ཆུང་གང་ཡིན་ཡང་། བསྒྲུབ་པར་བྱ་རྒྱུའི་ཆོད་སེམས་བརྟན་པོ་ཡོད།

མཇུག་གཏམ།

ཕྲན་གྱིས་ད་ཐེངས་མཐར་ཕྱིན་ཆེད་རྩོམ་གྱི་མི་སྣར་དགེ་རྒན་སྐལ་བཟང་ཉི་མ་མཆོག་གི་ལོ་རྒྱུས་འདེབས་དོན།  སྤྱིར་བདག་གི་ཕ་ཡུལ་ལ་སེམས་ཅན་གྱི་འགྲོ་དོན་འབའ་ཞིག་མཛད་མཁན་ཁོང་ལས་མི་སྣ་རླབས་ཆེན་གཞན་བྱོན་མ་མྱོང་བ་མ་ཡིན་ཏེ།  སྐྱེས་བུ་ཁོང་རྣམ་གྱི་ལོ་རྒྱུས་མཁྱེན་ལྡན་གྱི་རྩོམ་པ་བོ་རེ་འགས་ཡིག་ཐོག་ཏུ་འགོད་ཡོད་པས་བདག་གིས་ད་ལྟ་གསར་ཏུ་བྲིས་ཀྱང་དགོས་པ་ཆེར་མ་མཐོང་།  

དེ་ན་ད་ལྟའི་ཆ་འདི་ནས་ཆེས་སྤྱིར་གཏོང་གི་མི་ཞིག་གིས་ཕ་ཡུལ་གྱི་ས་གནས་ཁག་དང་བསྟན་དགོན་གཉིས་ལ་ཕན་རྒྱ་ཆེན་པོ་ཐོག་ཡོད་མཁན་ཁོང་ལས་གཞན་ཉིན་མོའི་སྐར་མ་ལྟར་དཀོན།  འོན་ཀྱང་།  ཉེ་འཁོར་གྱི་མི་ཁ་ཅིག་གིས་ཁོང་གི་ལྷག་བསམ་དང་གཞན་ཕན་གྱི་བསམ་བློའི་རིན་ཐང་སོགས་མཐོང་བ་ཕར་ཞོག་དུས་རྒྱུན་ཁ་ནས་དགོས་མིན་གྱི་རྡོལ་གཏམ་སྣ་ཚོགས་ཤིག་ལབ་བཞིན་ཡོད། དོན་གྱི་དེ་ནི་ཕྲག་དོག་གི་ཆ་ཙམ་ལས་མ་འདས། ངོ་ཚོས་མི་བཟང་བོ་ཁ་མིག་ཡར་ལྟ་བྱས་ན་རང་གཞན་ཀུན་ལ་ཕན་པས་།  བདག་གི་ཁོང་གིས་མི་ཚེའི་ལོ་རྒྱུས་ནང་གི་ཆ་ཤས་ཤིག་ཡིག་ཐོག་ཏུ་ཕབ་པ་འདི་དགེ་བའི་རྒྱུ་རུ་གྱུར་བར་ཤོག